Guutip peqatigiissortaanut ilaasutut isumannaatsumiigit
„[Jehovap] aqqa pallittaalisatut ippoq, iluartoq tassunga qimaanasuartarpoq annaanneqarlunilu.“ — USSATIT 18:10.
1. Jesusip qinnutaa naapertorlugu kristumiut qanoq ajornartorsiussappat?
TOQUNISSI sioqqutitsiarlugu Jesusip malitsini Ataataminut qilammiusumut qinnuppai. Asannilluni ima oqarpoq: ’Oqaatsinnik tunivakka, silarsuullu inuisa uumissorpaat ilaginnginnamikkik, soorlu uangattaaq silarsuup inuisa ilaginngikkaannga. Qinnutinngilakka silarsuarmit peerseqqullugit, kisianni ajortumut sernigeqqullugit.’ (Juánase 17:14, 15) Jesusip nalunngilaa silarsuaq kristumiunut navianartuusoq. Silarsuup uumissuinini kristumiut salluliuutiginerisigut malersornerisigullu takutittarpaa. (Matîuse 5:11, 12; 10:16, 17) Aammattaaq ajortunngorsaaniartarpoq. — 2 Timûtiuse 4:10; 1 Juánase 2:15, 16.
2. Kristumiut anersaakkut isumannaassuseq sumi nassaarisinnaavaat?
2 Apustili Johannesip oqaatigisimavaa silarsuaq kristumiunik uumissuisunik Guutimit nigorsimasunik Satanimillu aqunneqartunik inoqarumaartoq. (1 Juánase 5:19) Silarsuaq tamanna kristumiut ilagiivinit annerujussuuvoq Satanilu inummit kimilluunniit pissaaneqarnerungaarluni. Taamaattumik silarsuup uumissuinera assut aarlerinartorsiortitsivoq. Jesusip malittai sumi anersaakkut isumannaatsumiissinnaappat? The Watchtower 1. decembari 1922-moortumi ima allassimasoqarpoq: „Maanna ulluni ajortuni inuuvugut. Satanip peqatigiissortaasa Guutillu peqatigiissortaasa akornanni sorsuuttoqarpoq. Sorsunneq ilungersunartuuvoq.“ Akersuunnermi tamatumani Guutip peqatigiissortai anersaakkut illersorneqarfiusinnaapput. Oqaaseq „peqatigiissortat“ Biibilimi nassaassaanngilaq 1920-kkunnilu oqariartaaseq „Guutip peqatigiissortai“ nutaajulluni. Taavami Guutip peqatigiissortai taakkua suuppat? Qanorlu uatsinnik illersuisinnaappat?
Jehovap peqatigiissortai
3, 4. (a) Ujarlerfissiaq The Watchtower-ilu naapertorlugit peqatigiit aaqqissuussaasut suuppat? (b) Jehovap Nalunaajaasuisa silarsuaq tamakkerlugu peqatigiinnerat sooq peqatigiinnermik aaqqissuussaasumik taaneqarsinnaava?
3 Concise Oxford Dictionary naapertorlugu oqaaseq „peqatigiissortat“-nik matumani nutsigarput „organisation“ isumaqarpoq „peqatigiit aaqqissuussaasut“. Tamanna eqqarsaatigalugu ukiuni hundredelinni siullerni kristumiut apustilit ilagiikkuutaanut aaqqissugaat Siulersuisoqatigiinnit nakkutigineqartut ’qatanngutigiissutut peqatigiinnik’ taaneqartut ’peqatigiinnik aaqqissuussanik’ taassallugit kukkunerunngilaq. (1 Pîtruse 2:17, NV) Jehovap Nalunaajaasui ullumikkut assingusumik aamma aaqqissugaapput. Ukiuni hundredelinni siullerni ataasiussuseqarneq ’inunnik tunissutaasunit’, ’paarsisunit ajoqersuisunillu’, nakussatsinneqartarsimavoq. Taakkua ilaat ilagiinniit ilagiinnut angalasarsimapput ilaallu ilagiinni utoqqaanertaallutik. (Evfisumiut 4:8, 11, 12, NV; apustilit suliait 20:28) Jehovap Nalunaajaasuisa ullumikkut ataasiussuseqarnerat ’tunissutaasunit’ assingusunit nakussatsinneqartarpoq.
4 The Watchtower-imi 1. novembari 1922-moortumi oqaaseq „peqatigiit aaqqissuussaasut“ pillugu ima allassimavoq: „Peqatigiit aaqqissuussaasut tassaapput inuit aalajangersimasumik siunertaqarlutik kattussimasut.“ The Watchtower nangilluni allappoq Jehovap Nalunaajaasui peqatigiinnik aaqqissuussaasunik taaneqarmata isumaqanngitsoq taakkua „immikkut upperusiortunik nalinginnaasumik isumaqartinneqartartumik taaneqarsinnaasut, isumaqarnerusorli Biibilimik Atuaqqissaartartut [Jehovap Nalunaajaasui] Guutip piumasaanik naammassinninniarlutik tamaasalu Naalakkap iliortarsimaneratut aaqqissugaalluartumik naammassiniarlugit ilungersuuteqartut.“ (1 Korintumiut 14:33) Apustili Paulusip ersersippaa nalimini kristumiut assingusumik aaqqissugaalluartumik iliuuseqartartut. Taassuma kristumiut tanitat peqatigiit inuup timaanut assersuuppai; timi amerlasuunik avateqarpoq tamarmillu suliassatik naammassisarpaat timi torersumik ingerlaqqullugu. (1 Korintumiut 12:12-26) Peqatigiinnut aaqqissuussaasunut assersuut pitsaangaarami! Suna pillugu kristumiut aaqqissugaappat? Guutip siunertaanut kiffartoqqullugit, Jehovap piumasaanik naammassinneqqullugit.
5. Guutip peqatigiissortai takussaasut suuppat?
5 Biibilimi siulittuutigineqarpoq kristumiut ilumoortut ullumikkut ataasiussuseqassasut, ’inuiattut’ ’nunamut’ siulersorneqassasut ’silarsuarmi qaammaqqutaasutut qaamaqqullugit’. (Jesaja 66:8; Filípimiut 2:15) Ullumikkut „inuiaat“ aaqqissugaasut taakkua 5,5 millioninit amerlanerupput. (Jesaja 60:8-10, 22) Taakkuinnaalli Guutip peqatigiissortaanut ilaanngillat. Inngilit aamma ilaapput.
6. Guutip peqatigiissortaanut ilaasut kikkuuppat?
6 Inngilit Guutip kiffaanik inunnik suleqateqartarsimanerannut assersuutissarpassuaqarpoq. (1 Moses 28:12; Daniel 10:12-14; 12:1; Eprîarit 1:13, 14; sarĸúmersitat 14:14-16) Taamaattumik naleqquppoq The Watchtower-imi 15. maaji 1925-moortumi ima allassimammat: „Inngilit illernartut tamarmik Guutip peqatigiissortaanut ilaapput.“ Nangillunilu allassimavoq: „Guutip peqatigiissortaasa niaquat, pissaanermik oqartussaassusermillu tamakkiisumik piginnittoq, tassaavoq Naalagaq Jesus Kristus.“ (Matîuse 28:18) Taamaattumik Guutip peqatigiissortaanut ilaasut tassaapput Guutip piumasaanik peqatigiillutik suliaqartut qilammiittut nunamiittullu tamarmik. (Takuuk ungalusaq.) Taakkununnga ilaaneq immikkut pisinnaatitaaffiuvoq nuanningaartoq! Qilanaarnaqaarlu piffissanngorpat pinngortitat tamarmik, qilammiittut nunamiittullu, ataasiussuseqarlutik Jehova Guutip unnersiutiginissaanut aaqqissugaanissaat! (sarĸúmersitat 5:13, 14) Qanorli ilillutik ullumikkut Guutip peqatigiissortai uagutsinnik illersuippat?
Guutip peqatigiissortaani qanoq ililluta illersorneqarpugut?
7. Guutip peqatigiissortaasa qanoq ilillutik ikiortarpaatigut?
7 Guutip peqatigiissortaasa Satanimut ussiiniarneranullu illersorsinnaavaatigut. (Evfisumiut 6:11) Satanip Jehovap pallorfiginnittai tatillugillu malersorlugillu ussernartorsiortittarpai ataasiinnaq siunertaralugu: ’Ingerlavissaasigut ingerlatikkunnaarniarlugit’. (Jesaja 48:17; naleqqiuguk Matîuse 4:1-11.) Pissutsit aaqqissuussaaneranni matumani saassunneqanngitsuuissinnaanngilagut. Taamaakkaluartoq Guutimut peqatigiissortaanullu qanimut attaveqarnerup nukittutissavaatigut illersorlutalu taamaalillunilu ’ingerlavissatsinniitiinnarluta’. Tamatuma kingunerisaanik neriuuterput pigiinnassavarput.
8. Jehovap peqatigiissortaasa takussaanngitsut taassuma kiffai nunamiittut qanoq ilillutik tapersersortarpaat?
8 Illersorneqarneq tamanna qanoq ililluni Guutip peqatigiissortaasa pilersittarpaat? Siullermik Jehovap kiffaasa anersaajusut uagutsinnik ikiuiuaannarneratigut. Jesus tatineqangaarnermini inngilimit nakussatsinneqarsimavoq. (Lúkarse 22:43) Toqutaaqqajaanermini Peter inngilinit tupinnartuliornikkut annaanneqarsimavoq. (apustilit suliait 12:6-11) Ullumikkut tupinnartuliornerit atuutinngikkaluartut Jehovap innuttai neriorsorneqarsimapput oqaluussinerminni inngilinit ikiorneqartassasut. (sarĸúmersitat 14:6, 7) Ajornartorsioraangamik pissusissaq akimorlugu pissaanermik nakussatsinneqartarlutik misigigajupput. (2 Korintumiut 4:7) Aammattaaq nalunngilaat ’[Jehovap] inngiliisa taassuminnga mianerinnittut ungullugit tammaarfigisaraat annaakkumallugit’. — Tussiaat 34:8.
9, 10. ’[Jehovap] aqqa pallittaalisatut ittoq’ qanoq paasisariaqarpa, tamannalu qanoq ililluni Guutip peqatigiissortaanut tamarmiusunut atuuppa?
9 Jehovap peqatigiissortai takussaasut aamma illersuutaapput. Qanoq ilillutik? Ussatit 18:10-mi allassimavoq: „[Jehovap] aqqa pallittaalisatut ippoq, iluartoq tassunga qimaanasuartarpoq annaanneqarlunilu.“ Tamanna isumaqanngilaq Guutip aqqata uteqattaarnerinnaatigut ikiorneqarsinnaasugut. Jehovamulli tatiginninnermik ersersitsinikkut Guutip aqqa qimarnguigineqarsinnaavoq. (Tussiaat 20:2; 122:4) Tamanna isumaqarpoq kisimi oqartussaassusia tapersersussagipput, inatsisai najoqqutassiaalu aalajangiusimassagivut neriorsuutaalu upperissagivut. (Tussiaat 8:2-10; Jesaja 50:10; Eprîarit 11:6) Tamatumunnga ilaavoq Jehovamut tunniusimalluinnarneq. Taamatut Jehovamut pallorfiginnittut kisimik tussiaasiortutut oqarsinnaapput: „Uummatitta [Jehova] tipaatsuutigaat, tunaaraarpullu aqqa illernartoq.“ — Tussiaat 33:21; 124:8.
10 Maanna Guutip peqatigiissortaani takussaasuniittut Mikatut oqarsinnaapput: „Uagulli [Jehova] Guuterput guutisiorfigissavarput naassaanngilluinnartumik.“ (Mika 4:5) Ullumikkut Guutip peqatigiissortai ’Israelimut Guutip pigisaanut’ katersuussimapput, Biibilimilu taaneqarsimapput taassuma ’aqqanut ilannguttut’-nik. (Galâsiamiut 6;16; apustilit suliait 15:14; Jesaja 43:6, 7; 1 Pîtruse 2:17) Jehovap peqatigiissortaanut ilaaneq tassaavoq inuiannut Guutip aqqanit illersorneqarnissaminnik ujartuisunut illersorneqatunullu ilaaneq.
11. Jehovap peqatigiissortai ilaasortaminnut immikkut ittumik qanoq ikiuisarpat?
11 Aammattaaq Guutip peqatigiissortai takussaasut inuiaqatigiiupput uppertut, uppeqatigiit ineriartoqatigiittut kajumissaaqatigiittullu. (Ussatit 13:20; Rûmamiut 1:12) Taakkunani kristumiut paarsisut savaatinik paarsisuupput, napparsimasunik nikallungasunillu qiimmassaasarlutik tammarsimasunillu ikiuisarlutik. (Jesaja 32:1, 2; 1 Pîtruse 5:2-4) Peqatigiissortat aqqutigalugit ’kiffap ilumoorlunilu silatuup neriffissaat nalliuttaraangat nerisassaannik’ pilersortarpai. (Matîuse 24:45) ’Kiffaq’ taanna anersaakkut ittunik pitsaanerpaanik — Biibili tunngavigalugu eqqorluartumik ilisarsinermik inuunermut naassaanngitsumut sammisumik — pilersuivoq. (Juánase 17:3) ’Kiffamit’ ilinniartitaaneq iluaqutigalugu kristumiut ileqqussatigut najoqqutassat qutsissut pigiinnarsinnaavaat avatangiisinilu navianartuni ’pulateriaarsuttut silassorissinnaatillugit tuisullu peqqusersuitsuusinnaatillugit’. (Matîuse 10:16) ’Naalakkallu suliaanik naammassisaqangaartuinnaqqullugit’ ikiorneqartuaannarput, tamannalu immini illersuutaangaarpoq. — 1 Korintumiut 15:58.
Guutip peqatigiissortaanut kikkut ilaappat?
12. Guutip qilammi peqatigiissortaanut kikkut ilaappat?
12 Illersorneqarneq tamanna Guutip peqatigiissortaanut ilaasunit pineqarsinnaammat, kikkut tamatumunnga ilaappat? Guutip peqatigiissortai qilammiittut eqqarsaatigalugit nalorninartoqanngilaq. Satan inngiliilu qilammiikkunnaareerput. Inngililli aalajaatsut suli tappavaniipput. Apustili Johannesip takusimavai ulluni kingullerni ’savaaraq’, kerubit (’uumasut sisamat’) ’inngilerpassuillu’ Guutip issiavissaarsuata eqqaaniittut. Taakkununngalu ilaapput ’utoqqaanerit’ 24-t — kristumiunut tanitanut qilammi kingornussarsereersimasunut sinniisuusut. (Eprîarit 12:22, 23: sarĸúmersitat 5:6, 11; 12;7-12) Ersarippoq taakkua tamarmik Guutip peqatigiissortaanut ilaasut. Inuit eqqarsaatigalugit nalorninartoqarneruvoq.
13. Guutip peqatigiissortaanut ilaasut ilaanngitsullu qanoq ililluni Jesusip ilisaritippai?
13 Imminut malinninnerartut pillugit Jesus oqarsimavoq: ’Ullussami issumani qasseersuit uannut oqarumaarput: „Naalagaq, Naalagaq, atikkut pruffiitisut oqalunnginnerpugut? Atikkut anersaapilunnik anisitsinnginnerpugut? Atikkut qassiinik killinnartuliunnginnerpugut?“ Uangali taava nalunaarfigiumaarpakka: „Ilisarinngisaannarpassi; qimassinga, iluaatsuliorumatuususi-aa.“’ (Matîuse 7:22, 23) Iluaatsuliorumatuut, qanorluunniit oqaraluarunik sumulluunniillu guutisioriartortaraluarunik, Guutip peqatigiissortaanut ilaasinnaanngillat. Aammattaaq Jesusip takutissimavaa Guutip peqatigiissortaanut ilaasut sukkut ilisarineqarsinnaanersut. Oqarsimavoq: ’Uannut oqartut: „Naalagaq, Naalagaq,“ qilammiup naalagaaffianut tamakkeratik isissapput, kisianni Ataatama qilammiusup peqqusaanik iliortut.’ — Matîuse 7:21.
14. Guutip piumasaa suna Guutip peqatigiissortaanut ilaasut iliuuserisariaqagaat ilisaritinneqarpa?
14 Taamaattumik Guutip peqatigiissortaanut — ’qilammiup naalagaaffianik’ qiterisalimmut — ilaassagaanni Guutip piumasaanik naammassinnittuusariaqarpoq. Suna piumasarigamiuk? Paulusip tamatuma pingaartortaa ersersippaa ima oqarami: ’[Guutip] inuit tamaasa annaqquai sallusuissummillu ilisarsileqqullugit.’ (1 Timûtiuse 2:4) Inuup ilumoorluni eqqorluartumik ilisarsineq Biibilimeersoq ujaruniuk, inuunermini atoruniuk ’inunnullu tamanut’ siaruarteruniuk Guutip piumasaatut iliussaaq. (Matîuse 28:19, 20; Rûmamiut 10:13-15) Guutip aamma piumasaraa savaatimi nerisinneqartarnissaat isumassorneqartarnissaallu. (Juánase 21:15-17) Tamatumani kristumiut ataatsimiittarneri pingaartuupput. Inuup ataatsimiinnernut ornigussinnaagaluarluni sumiginnaasup Guutip peqatigiissortaani inigisaminik pingaartitsinnginnini ersersippaa. — Eprîarit 10:23-25.
Silarsuarmut ikinngutaaneq
15. Nalimini ilagiinnut Jakobip suna mianersoqqussutigaa?
15 Jesusip toqunerata kingorna ukiut 30-t missaat qaangiuttut affarmik qatanngutaata Jakobip Guutip peqatigiissortaaniinnerup navianartorsiortinneqarsinnaaneranut pissutaasut allaatigai: ’Uersartusi ukorsii-aa, ilisimanngilisiuk silap piinik asanninneq Guutimut akerartuutaasoq? Taamaammat silap piinik asannikkumaannartoq Guutimut akerartortigitittaraaq.’ (Jâko 4:4) Guutimut akerartortigitittoq taassuma peqatigiissortaanut ilaasinnaanngilaq. Silarsuarmut ikinngutaaneq suugami? Nassuiarneqarpoq assigiinngitsunik iluseqarsinnaasoq, soorlu kalluunnaveersaartuunermi nakkaannarneq ajortunillu ilagisartagaqarneq. Versit ataqatigisaasa takutippaat Jakobip immikkut ittoq eqqarsaatigigaa — tassa eqqunngitsumik isumaqarneq eqqunngitsumik ileqqoqalernermik kingunilik.
16. Sumut atatillugu Jakobip mianersoqqussutigaa silarsuarmut ikinngutaaneq tassaasoq Guutimut akerartortaaneq?
16 Jâko 4:1-3-mi allassimavoq: ’Sorsunnerit akerariinnerillu ilissinni sumit-uku pisut? Matumannga pinnginnerlutik illigutsannisi timissi avataanni sorsuttarmata? Pilerisarpusi peqarnasilu; inuartarpusi annerussisarlusilu pisaqarnerlu ajorlusi; akerariillusilu sorsuuttarpusi; soqanngilasi qinuneq ajorassi; qinusarpusi sussanasilu, ajortumik qinusarassi, illigutsannissinni aqqalaniaannarlusi.’ Oqaatsit tamakkua allareerlugit Jakob silarsuarmut ikinngutaanissamut mianersoqqusivoq.
17. Ukiuni hundredelinni siullerni ilagiinni kristumiuni ’saqitsaanneq’ ’assortuunnerlu’ qanoq paasisariaqarpat?
17 Jakobip toqunerata kingorna ukiut hundrelikkuutaat qaangiuttut kristumiuunerartut imminnut sorsuupput toqoraallutillu. Ukiunili hundredelinni siullerni ’Israelimut Guutip pigisaanut’ ilaasortaasunut, qilammi ’palasiusussanut kunngiusussanullu’ Jakob allappoq. (sarĸúmersitat 20:6) Taakkua sorsunnivinni imminnut toqoraatinngillat. Soormiuna Jakob taamaaliortoqartutut nipilimmik kristumiunut allattoq? Apustili Johannesip inuit qatanngutiminnik uumissisuisut inuartunik taavai. Paulusip ilagiinni inuttut isumaqatigiinnginnerit akersuunnerillu ’saqitsaannernik’ ’assortuunnernillu’ taasimavai. (Títuse 3:9; 2 Timûtiuse 2:14; 1 Juánase 3:15-17) Tamanna Jakobip eqqarsaatigisimagunarpaa — kristumioqatinut asanninnginneq. Kristumiut Satanip silarsuaani inuit iliorfigeqatigiittarnerattut imminnut iliorfigeqatigiittalersimagamik.
18. Kristumiut akornanni iliuutsit asanninngitsut akeqqersimaarnerlu sunit pisinnaappat?
18 Sooq kristumiut ilagiivini taamatut pisoqarpa? Eqqunngitsumik pissuseqarneq pissutigalugu, soorlu pilerissuseq ’illigutsannerlu’. Makitasuunerup, sinnganerup piumatussutsillu aamma ilagiinni kristumiutut peqatigiinneq aserorsinnaavaat. (Jâko 3:6, 14) Taamatut pissuseqarneq silarsuarmut ikinngutaalersitsisarpoq, taamaattumillu Guutimut akeraalersitsisarluni. Taamatut pissuseqartup kialuunniit Guutip peqatigiissortaanut ilaasortatut isigineqarnissani naatsorsuutigisinnaanngilaa.
19. (a) Kristumiup uummataani eqqarsaatit eqqunngitsut sorlanippata kina annerusumik pisuutinneqarsinnaava? (b) Kristumiut qanoq ilillutik eqqarsartaaseq eqqunngitsoq anigorsinnaavaat?
19 Eqqarsartaaseq eqqunngitsoq uummatitsinni sorlanippat kina pisuutissinnaavarput? Satani? Ilaatigut, aap. Taanna silarsuarmi maani, pissutsip taamaattup siammarsimaffigisaani, ’silaannarmut naalagaavoq’. (Evfisumiut 2:1, 2; Títuse 2:12) Eqqarsartaaseq eqqunngitsoq taama ittoq uinitsinnit naammalluinnanngitsumit sorlaqarajuppoq. Silarsuarmut ikinngutaanissamut mianersoqquseriarluni Jakob ima allappoq: ’Isumaqarpisiluunniit allakkat asuliinnaq oqaaseqartut: anersaaq uatsinni ineqartitani ilungersorluni kajungeraa?’ (Jâko 4:5) Tamatta inunnguuserisatsinnik ajortulioqqajaasarpugut. (1 Moses 8:21; Rûmamiut 7:18-20) Taamaanneq akiorneqarsinnaavoq sanngiissutigisaq nassuerutigigaanni qaangernissaanullu Jehovap ikiuinissaa tatigigaanni. Jakob allappoq: ’Saammaannerli [sinngaqqajaanermit inunnguuserisatsinnit] annerusoq [Guutip] tunniuttarpaa.’ (Jâko 4:6) Guutip anersaavata illernartup ikiuineratigut qatanngutillu kristumiut aalajaatsut tapersersuinerisigut Jesusillu utertitsissutitut pilliutaata nalinga iluaqutigalugu kristumiut aalajaatsut uinngup sanngiissutai ajugaaffigisinnaavaat. (Rûmamiut 7:24, 25) Taakkua Guutip peqatigiissortaani isumannaatsumiipput, Guutimut, silarsuamuunngitsoq, ikinngutaallutik.
20. Guutip peqatigiissortaanut ilaasut pilluaqqusaangaarneq suna misigisarpaat?
20 Biibili neriorsuivoq: ’[Jehovap] innuttani tunissavai pissaanermik, Jehovap innuttani pilluaqqussavai eqqissisillugit.’ (tugsiaut 29:11) ’Inuiannut’ Jehovap pigisaanut, peqatigiissortaanut takussaasunut, ullumikkut ilumut ilaagutta nakussatsinneqartassaagut eqqissinerlu innuttaminut pilluaqqussutaa misigalutigu. Ilumoorpoq Satanip silarsuaa Jehovap peqatigiissortaanit takussaasunit annerungaartoq Satanilu uagutsinnit pissaaneqarnerungaartoq. Jehovali Ajugaqanngitsuuvoq. Nukinga sulisoq ajugaaffigineqarsinnaanngilaq. Inngiliisalu pissaaneqangaartut aamma Guutimut kiffartoqatigaatigut. Uumissorneqaraluarluta aalajaassinnaavugut. Jesusitulli silarsuaq ajugaaffigisinnaavarput. — Juánase 16:33.
Nassuiarsinnavigit?
◻ Guutip peqatigiissortai takussaasut suuppat?
◻ Guutip peqatigiissortai qanoq ilillutik ikiuisarpat?
◻ Guutip peqatigiissortaanut kikkut ilaappat?
◻ Qanoq ililluta silarsuarmut ikinngutaaneq ingalassinnaavarput?
[Qupp. 11-mi ungalusaq]
Guutip peqatigiissortai suuppat?
Jehovap Nalunaajaasuisa atuagassiaataanni oqariartaaseq „Guutip peqatigiissortai“ assigiinngitsunik pingasunik atorneqartarpoq.
1 Jehovap qilammi peqatigiissortai takussaanngitsut tassaapput pinngortitat anersaajusut aalajaatsut. Taakkua Biibilimi taaneqarput ’Jerusalem tapinnga’-mik. — Galâsiamiut 4:26.
2 Jehovap peqatigiissortai inuit takussaasut. Ullumikkut tassaapput tanitat sinneruttut amerlangaartunit ilannguffigineqartut.
3 Jehovap silarsuarmi tamarmi peqatigiissortai. Taakkua tassaapput Jehovap qilammi peqatigiissortai aamma tanitat taassuma ernermisut isigilersimasai nunamiittut, qilammiilernissamik neriugisaqartut. Piffissanngorpat inuit nunamiittut naammalluinnartunngortitaasimasut aamma ilaalissapput.
[Qupp. 12-mi assiliartaq]
Anersaakkut nerisassat pitsaanerpaat Jehovap peqatigiissortai aqqutigalugit pilersinneqartarput