Iternissamut piffissanngorpoq!

„PIFFISSAQ inuuffigisarput unioqinatigu; iternissatsinnut piffissanngoreerpoq.“ (Rûmamiut 13:11, Knox) Apustili Paulus taama allassimavoq kristumiunut Romamiittunut juutit pissutsinik aaqqissuussaanerata ukiumi 70-imi ajunaarutaasumik aserorneqarnerat ukiut 14-it missaannik sioqqullugu. Kristumiut juutiusut anersaakkut eqqumasimagamik, piffissami ajunaarfiusumi Jerusalemimiissimanngillat, taamaattumik toqutaanissaraluartik imaluunniit inussianngortitaanissaraluartik pinngitsoortillugu. Kisianni qanoq ilillutik nalungilaat illoqarfik qimassallugu?

Jesus Kristusip siumut oqaatigereersimavaa Jerusalem akeqqanik unguneqarumaartoq, innuttaalu piuneerunneqassasut. (Lúkarse 19:43, 44) Tamatuma kingorna ajoqersukkani aalajaatsut nalunaaqqutinik takujuminartunik paasitippai. (Lúkarse 21:7-24) Kristumiunut Jerusalemimi najugaqartunut Jesusip peqqussutaa malissagunikku illoqarfimmit anisariaqarput, angerlarsimaffitsik suliffitsillu qimattariaqarlugit. Kisianni eqqumasut qimaasullu inuunertik annaappaat.

Jesusip Jerusalemip aserorneqarnissaa siulittuutigimmagu, ajoqersugaasa aperaat: „Qaqugu tamakku taamaalissappat, sunalu najuunnissannut pissutsillu aaqqissuussaanerata naggatissaanut nalunaaqqutaassava?“ (Matîuse 24:3, NV) Akissummini Jesusip siunissami najuunnissani Noap nalaani nunarsuaq tamakkerlugu ulersuaqanngitsiarnerani pisimasunut assersuuppaa. Jesusip ersersarpaa ulersuaqarmat ajortut tamarmik peerneqartut. (Matîuse 24:21, 37-39) Paasititsissutigaa Guuti inuiannut akuliuteqqikkumaartoq. Akuliunneq tamanna annertunerujussuussaaq Guutimmi silarsuaq ajortoq imaluunniit pissutsit aaqqissuussaanera manna peerumaarmagu. (Naleqqiuguk Pîtrusip agdlagaisa áipait 3:5, 6.) Nalitsinni pisinnaava?

‘Suut tamarmik taamaaginnarpat?‘

Ukiuni hundredelinni siullerni juutit illoqarfitsik illernartoq aserorneqarumaartoq eqqarsaatigisimanngisaannarpaat. Inuit qaqqap innermik anitsisartup eqqaani najugallit anitsineranillu takunnissimanngisaannartut assingusumik qulartarput. Mianersoqqussummut nalinginnaasumik qisuariarneq tassaagajuttarpoq: „Uanga nalinni takkunnavianngilaq.“ Qaqqanik innermik anitsisartunik misissuisartoq Lionel Wilson oqarpoq: „Qaqqat innermik anitsisartut ukiut hundredellip aappassaani imaluunniit pingajussaani anitsisarput. Ilaat qaqqap innermik anitsisartup eqqaani najugaqartut angajoqqaammi nalaanni anitsisimasoq ernumatigisinnaavaat. Kisianni aanaakkuisa nalaanni anitsisimappat navianartorsiornatik misigissapput.

Paasissutissalli eqqoqqissaartut ikiorsinnaavaatigut navianartoqalernerup eqqumaffiginissaanut ilumoorunnissaannullu. Mont Peléemiit qimaasut ilaat qaqqat innermik anitsisartunik ilisimasaqartuusimavoq navianartoqalerneranullu takussutissat paasisimallugit. Takussutissat taamaattut aamma takuneqarsinnaasimapput Mount Pinatubop anitsinngitsiarnerani. Qaqqanik innernik anitsisartunik misissuisartut qaqqap iluani ersinngitsumik naqitsininnguuttartunik misissuisut innuttaaqatigiit akuersitissimavaat tamatuma eqqaa qimaqqullugu.

Soorunami mianersoqqussutinik sumiginnaasoqartarpoq susoqarunnannginnerarlugulu oqaluttunik. Immaqa allaat qanoq iliuuseqartut illaruaatigisinnaavaat. Apustili Peterip siulittuutigisimavaa ullutsinni taama isumaqarneq siaruarsimassasoq. Oqarpoq: ’Manna pingaarlugu nalussanngilarsi, ullussani kingullerni tikiukkumaartut mittatilliillutik mitallersut illigutsannitik malillugit ingerlasut oqarlutillu ima: „Naammiuna tikiunnissamik unnersuut? Siuaasammi sinippaarmatali kingorna pinngortitat pileqqaarnerannit suut tamarmik taamaaginnarput.“’ — 2 Pîtruse 3:3, 4

Isumaqarpit ‘ulluni kingullerni‘ inuusugut? Atuakkami The Columbia History of the World-imi oqaluttuarisaanermut ilisimatuut John A. Garraty aamma Peter Gay aperipput: „Qaammaasaqarneq nakkaakkiartuinnarpa?“ Ajornartorsiutit naalakkersuisut sorsugassaat, nunarsuaq tamakkerlugu pinerluttuliornerit aamma inatsisaattuliornersuit annertusinerat, ilaqutariit nakkaakkiartuinnarnerat, ilisimatuussutsikkut teknologikkullu inuiaat ajornartorsiutaannik aaqqiisinnaannginnerat, oqartussaassutsikkut allanngorarnerit aamma annertuumik ileqqorlunnerup upperisasiornerillu nakkaannerat, misissoreerlugit ima isummerput: „Pissutsit tamakku tamarmik naggatissap takkutingajalerneranut nalunaaqqutaanngippata, tamatumunga assingusupilussuupput.“

„Naggatissap“ takkutingajalernera upperissallugu pissutissaqarluarpugut. Nunarsuulli aserorneqarnissaa annilaangassutigisariaqanngilarput, Biibilimimi allassimavoq Guutip ‘nunarsuaq aalajaatsumik tunngavilersimagaa naassaanngitsumullu patajaallisillugu‘. (Tussiaat 104:5) Kisianni ilimagisinnaavarput pissutsit aaqqissuussaanerat ajortoq naalliuuterpassuarnut pisuusimasoq, ungasinngitsukkut atorunnaarsitaassasoq. Sooq? Pissutsit aaqqissuussaanerata matuma ulluini kingullerni inuusugut qularunnaarsitsisunik takussutissaqaratta, Jesusip oqaatigisimasaatut. (Takuuk ungaluusaq „Ullunut kingullernut takussutissat ilaat“.) Jesusip oqaasii nunarsuarmi pisunut nallersuutigeriakkit. Tamatuma ikiorsinnaavaatit eqqortumik aalajanginissannut ilinnut ilaquttannullu iluaqutaasussamik. Kisianni sooq maannakkut taama iliuuseqarnissaq pingaaruteqartigaa?

Eqqumaniarnissaq pingaaruteqarpoq

Misissuisartut naak qaqqap innermik anitsisartup anitsingajalernera oqaatigisinnaagaluarlugu siumut oqaatigisinnaanngilaat qaqugorpiaq pissanersoq. Taamatuttaaq Jesusip pissutsit aaqqissuussaanerat manna pillugu oqarsimavoq: ’Ullussamilli taassuminga ullulluunniit qanoq ilinissaanik ilisimasoqanngilaq, inngililluunniit qilammiittut ernerulluunniimmi ilisimanngilaat; Ataatama kisimi nalunngilaa.’ (Matîuse 24:36) Pissutsit aaqqissuussaanerat manna atuuttoq qaqugu naggaserneqarumaartoq ilisimannginnatsigu Jesusip mianersoqquaatigut: ’Imaattorli ilisimassavarsi: tillittup unnuap qanoq ilineragut tillikkiartorfissaa illup naalagaata nalunngikkuniuk pigaaqqajaqaaq illuminut tillinniartunik iserniartoqaqqunagu. Taamaattumik ilississaaq piareersimaniaritsi, inuup ernera [Jesus] ilimasuffigingisassigut tikiussammat.’ — Matîuse 24:43, 44

Jesusip oqaasiisa takutippaat pissutsit aaqqissuussaanerata matuma naggatissaa inuiannut pakasaajumaartoq. Kristusip ajoqersugai ’piareersimasariaqarputtaaq’. Illup naalagaatut ippugut, taanna pakasarneqarsinnaavoq tillinniap qaqugu illumut iserniassanersoq nalugamiuk.

Apustili Paulus kristumiunut Thessalonikamiunut allassimavortaaq: ’Ilissi nammineq ilisimalluarassi [Jehovap] ullussaa nalliukkumaartoq soorlu tillittoq unnuakkut pisartoq. . . Ilissili, qatanngutivut ukorsii, taarmiuunnginnassi ullussap taassuma tillittutut qaninngaassanngilaasi. . . Taamaammat sininnaveerisa, ikkunatut pinnata, kisianni eqqumaniarta putumatsaalillutalu.’ (1 Tásalûníkamiut 5:2, 4, 6) Oqaatsit ’eqqumaniarta putumatsaalillutalu’ qanoq paasisariaqarpat?

Isumannaatsumut qimaaniassasugut isumaqanngilaq illoqarfik aalajangersimasoq qimassagipput, soorlu kristumiut ukiuni hundredelinni siullerni taama iliorsimasut Jerusalem qimakkamikku. Romami uppeqatini iteqqullugit oqaaqqissaareerlugit Paulusip kajumissaarpai ’suliat taartut pii iperassagaat’ aamma ’Naalagaq Jesus Kristus atiniassagaat’. (Rûmamiut 13:12, 14) Jesusip tumai maleqqissaarutsigik, piffissamut inuuffigisatsinnut eqqumaniassaagut, anersaakkullu eqiinganitta ikiussavaatigut Guutimit illersorneqarnissatsinnut pissutsit aaqqissuussaanerat ajortoq peerneqarpat. — 1 Pîtruse 2:21.

Jesus Kristusimik malinnittut siunertaqarluartumik nalerisimaarnartumillu inuupput. Jehovap nalunaajaasuisa millionilikkuutaat paasisimavaat Jesusip ajoqersukkaminut nammakkiussaa tassaasoq iluaqisoq qasuernartorlu. (Matîuse 11:29, 30) Ajoqersuganngorusukkaanni alloriarnissaq siulleq tassaavoq ’Guutip ilisarinissaa aallartitaalu Jesus Kristusip ilisarinissaa.’ (Juánase 17:3) Jehovap nalunaajaasuisa sapaatit-akunneri tamaasa angerlarsimaffiit millionilikkuutaat pulaartarpaat inuit ikiorumallugit ’sallusuissummik ilisarsileqqullugit’. (1 Timûtiuse 2:4) Nuannaarutigissavaat angerlarsimaffimmi akeqanngitsumik Biibilimik atuaqqissaaqatigissallutit. Ilisimasatit Biibiliminngaanneersut amerliartortillugit qularnanngitsumik qulariunnaassavat nalerput qangaanniit allaanerulluinnartoq. Aap, iternissamut piffissanngorsimavoq. (wE 15/9 98)

[Qupp. 7-mi ungalusaq/assiliartaq]

ULLUNUT KINGULLERNUT TAKUSSUTISSAT ILAAT

’Inuiaammi pikititsiumaarput inuiaqatiminnut’; ’nunamiut eqqissivissaarutissapput’. (Matîuse 24:7; sarĸúmersitat 6:4)

Ukiuni hundredelinni makkunani sorsunnersuit marluk akerleriinnerpassuillu eqqissineq nunamit peersissimavaat. Oqaluttuarisaanermut ilisimatooq John Keegan allappoq: „Sorsunnersuaq siulleq — kingornatigullu sorsunnersuup aappaa — nunarsuarmi sorsuunnernut allanut siornatigut pisimasunut naleqqiussassaanngillat, isorartussusia, sakkortussusia, annertussusia, pigisat inuillu tunngatigut annaasaqarnerit eqqarsaatigalugit. . . . Sorsunnersuit toqutaaffiunerpaasimapput, akisunerpaajusimallutik aamma nunarsuarmi piffinni annertunerusumi naalliunnernut amerlanerusunut pisuusimallutik sorsunnernut allanut tamanut naleqqiullugit.“ Ullumikkut arnat meeqqallu sakkutuuninngarnit sorsuunnerni eqqugaanerusarput. UNICEF-ip (FN-ip Meeqqanut Aningaasaateqarfia) missingersimavaa ukiuni qulini kingullerni meeqqat 2.000.000-it sorsuunnerni toqutaasimasut.

’Kaannersuarlu nalliuttarumaarpoq’ (Matîuse 24:7; sarĸúmersitat 6:5, 6, 8)

1996-imi qajuusiassat majsillu akiitsupiloorsimapput. Pissutaasoq tassaavoq nunarsuarmi karrinik pissamaatit aatsaat taama annikillisimatiginerat, pissamaatimmi taamaallaat ullunut 50-inut naammalersimammata. Inuussutissat pingaaruteqartut akiitsornerisa kinguneraat nunarsuarmi piitsut ilaat, hundredemillionillit arlallit, amerlanertigut meeraasut, kaallutik innartariaqartarnerat.

’Nuna tamatigut tamaana sajuttarumaarpoq’ (Matîuse 24:7)

Missingersorneqarsimavoq ukiuni 2500-ni kingullerni nunat sajunneri qulaaluaannaat inunnik 100.000-inik amerlanerusunik naleqarsimasut. Taakku ilaat sisamat 1914-ip kingornatigut pisimapput.

’Iluaatsuliornerit amerliumaarput’ (Matîuse 24:12)

1900-kkut qaangiukkiartulerneranni inatsisaatsuliornerit amerliartuinnarsimapput. Sakkutuujunngitsunut perulluliorluni saassussinerit, naakkittaatsumik toqutsinerit aamma toqoraanersuit ingasattut ullunut kingullernut nakuuserfiusunut tunngassuteqartut ilagaat.

’Toqorarnerlu nalliuttarumaarpoq’ (Lúkarse 21:11)

Missingersorneqarsimavoq 1990-ikkunni inuit 30 millionit tuberkulosemit toqquteqarumaartut. Bakteriat nappaalanermik tunillaassuisut antibiotikamut akiuussinnaaleriartuinnarput. Nappaat alla aamma toqqutsigineqarsinnaasoq, malaria, ukiumut inuit 300-500 millionit eqqorneqaatigisartagaat 2.000.000-it missaasa toqussutigisarpaat. Ilimagineqarpoq ukiut tusintilikkuutaat matuma naanerani ukiumut 1,8 millionit aids-mik toqquteqarumaartut. Nalunaarusiami State of the World 1996-imi allassimavoq: „Inuiaat ullumikkut nappaalanerpassuarnik eqqorneqartuartarput.“

’Naalagaaffimmillu iivangkiiliu tamanna oqaluussissutigineqassavoq inuit najugaanni tamarsuarmi inuiaqatigiit tamarmik nalujunnaarutissaannik’. (Matîuse 24:14)

1997-imi Jehovap nalunaajaasuisa nalunaaquttap-akunneri 1 milliardit sinnerlugit Guutip naalagaaffia pillugu nutaarsiassaq nuannersoq pillugu oqaluussinerminni atorsimavaat. Oqaluussisartut 5 millioninit amerlanerusut tusarliussaq tamanna nunani 232-ni inunnut tusarliussimavaat.

[Suminngaanneernerat]

FAO photo/B. Imevbore

Asseq: U.S. Coast Guard

[Qupp. 4, 5-mi assiliartaq]

Kristumiut anersaakkut eqqumanertik pissutigalugu Jerusalemimit qimaasinnaasimapput