„Jehova, Guuti nallittuisoq saammaasorlu“
„[Jehova], Guuti nallittuisoq, saammaasoq, kamajasuunngitsoq, isumassuingaartoq unneqqaringaartorlu.“ — 2 MOSES 34:6.
1. (a) Ilaquttaminnik pallorfiginninnermik ilumoortumik taamaatitsisumik misigisaqarsimasut Biibilimi sumik tuppallersaatissaqarsinnaappat? (b) Jehovap imminik qimagussimasut qanoq isigai?
„PANIMA oqaluttuuppaanga kristumiut ilagiissaannut ilaarusukkunnaarluni,“ ataataasoq kristumiu oqaluttuarpoq. „Tamatuma kingorna, ullorpassuit, sapaatit-akunnerpassui, aap, allaat qaammaterpassuit, ilukkut anniaatigaara. Toqumit annernarneruvoq.“ Asasani pallorfiginninnermik minguitsumik taamaatitsisoq takullugu isumatsannartorujussuuvoq. Illit taama misigisaqarnikuuit? Taamaappat tuppallersaatigissavat Jehovap misigeqatigimmatit. (2 Moses 3:7; Jesaja 63:9) Ajortuliortulli qanoq isigisarpai? Biibilimi takutinneqarpoq Jehovap naakkinnilluni kajumissaarai imminut iluarisaaniarsareqqeqqullugit. Malakiasip nalaani juutit pikitsitsisut ima kimigiiserfigai: „Uannut saanniarniaritsi, taava uanga ilissinnut saassaanga.“ — Malaki 3:7.
2. Allassimaffiit suut takutippaat Jehovap nallittuineq pissuserilluinnaraa?
2 Guutip naakkinninnera Sinajip qaqqaani Mosesimut erseqqissarneqarsimavoq. Tassani Jehova nalunaarpoq tassaalluni ’Guuti nallittuisoq, saammaasoq, kamajasuunngitsoq, isumassuingaartoq unneqqaringaartorlu’. (2 Moses 34:6) Nalunaarutip tamatuma takutippaa Jehovap nallittuineq pissuserilluinnaraa. Apustili Peter allassimavoq: ’Tammarsimasoqaqqusinngilaq.’ (2 Pîtruse 3:9) Soorunami Guutip nallittuinera killeqarpoq. Moses paasitinneqarsimavoq Guuti „pisuusumik pillaanngitsoorneq ajortoq“. (2 Moses 34:7; 2 Pîtruse 2:9) Taamaattorli ’Guuti asassutaavoq’, nallittuinerlu pissutsimi tamatumani pingaaruteqarpoq. (1 Juánase 4:8; Jâko 3:17) Jehova ’kamassimajuaannanngilaq ilumoortumillu asavaatigut’. — Mika 7:18, 19.
3. Jesusip qanoq ililluni allakkanik ilisimasunit farisiiarinillu nallittuineq allaanerulluinnartumik isumaqarfigaa?
3 Jesusip Ataatani qilammiusoq naammalluinnartumik malinniartarsimavaa. (Juánase 5:19) Unioqqutitsisut nallittortarpai, ajortuliorneri akuerinngikkaluarlugit kisianni timikkut nappaatilittut naakkinnittuliorfigalugit. (Naleqqiuguk Mákorse 1:40, 41.) Aap, Jesusip nallittuineq Guutip inatsisaasa ’pisariaqarnerusortaannut’ ilaasutut isigaa. (Matîuse 23:23) Taassumunnga akerliusumik allakkanik ilisimasut farisiiarillu, naapertuilluarnermik ingasaassinerminni nallittuineq sumiginnarluinnarsimavaat. Jesus ajortuliortunut attaveqartoq takullugu unnerluutiginnittarput: ’Uuma ajortuliortut ilassivai nereqatigalugillu.’ (Lúkarse 15:1, 2) Unnerluussisuni akillugit Jesus assersuusianika pingasunik, Guutip naallittuineranik ersersitsisunik, oqaluttuarpoq.
4. Assersuusiat marluk suut Jesusip saqqummiuppai, tusarnaartinilu sumik paasitikkusullugit?
4 Siullermik Jesusip oqaluttuaraa angutip savat 99-it qimakkai sava ataaseq tammarsimasoq ujarniarlugu. Tamanna qanoq ilinniutigineqarsinnaava? ’Ajortuliortoq allamik isumataartoq ataaseq iluartunit 99-init allamik isumataarnissamik ajorsanngitsut qilammi tipaatsuutigineqarnerussaaq.’ Nangilluni Jesusip oqaluttuaraa arnaq aningaasannguamik tammaasaminik ujarlersoq nanillugulu tipaatsuttoq. Jesusip tusarnaartini sumik paasitikkusuppai? ’Ajortuliortoq allamik isumataartoq ataaseq Guutip inngiliini tipaatsuutigineqarumaarpoq.’ Jesusip assersuusiaasa pingajuat tassaanerarneqarpoq oqaluttuarineqarsimasut pitsaanerpaartaat. Tamanna misissornerugutsigu Guutip naallittuinera paasinerussavarput malinniarsinnaanerussallugulu. — Lúkarse 15:3-10.
Ernerup pikitsitsiumatuup angerlarsimaffini qimappaa
5, 6. Jesusip assersuussiaasa pingajuanni ernerup nukarliup qanoq takutippaa uissuumminartumik qujasuitsuulluni?
5 ’Inuk marlunnik erneqartoq. Nukarliullu anguni oqarfigaa: „Ataataq, pigisannit agguutissarsiassannik tuninnga.“ Taava pini taakkununnga agguarpai. Kingunersuarinngisaagulli ernerata nukarliup pini tamaasa katersorpai nunamut ungasisumut aallarluni, tassanilu qussalaatsutut inuulluni pigisani nungulussinnarpai.“ — Lúkarse 15:11-13.b
6 Erneq nukarleq uissuumminartumik qujasuippoq. Siullermik kingornussassani piumavai, taavalu ’qussalaatsutut inuulluni’ nungulussinnarlugit. Oqariaaseq ’qussalaatsutut inuuneq’ nutserneqarpoq griikerit oqaasianit ’imminut naalakkersinnaanngitsumik inooriaaseqarneq’-mik isumaqartumit. Biibilimik paasisimannittoq naapertorlugu oqaaseq isumaqarpoq ’nakkaannajasuuneq’. Assersuusiami nukarleq tuluttut taaneqartarpoq the Prodigal Son, oqaaseq ’prodigal’ isumaqarpoq ’atuivallaartoq’ imaluunniit ’piisaapiluttoq’.
7. Kikkut ullumikkut ernertut tammarsimasutut ippat, sunalu pillugu taakkua ilarpassui ’nunami ungasissumi’ attaviitsoorusuppat?
7 Ullumikkut ernertut tammarsimasutut ittoqarpa? Aap. Ajoraluartumik ilaasa, amerlavallaanngikkaluit, Ataatatta qilammiusup Jehovap ’angerlarsimaffia’ toqqissisimanartoq qimassimavaat. (1 Timûtiuse 3:15) Taakku isumaqarajupput Guutip ilagiissaani killigeqqusat nerukippallaartuusut Guutillu uatsinnut alaatsinaattuarnera illersuutissatut isiginagu akornutaasutut isiginerusarlugu. (Naleqqiuguk Tussiaat 32:8.) Assersuutigalugu arnaq inuusuttoq Biibilip najoqqutassiai naapertorlugit perorsarneqarsimavoq, imigassamilli ikiaroornartunillu atornerluisunngorsimalluni. Maanna inuunermini ukiut artornartut tamakku eqqarsaatigalugit oqarpoq: „Takutinniarsimavara nammineerlunga pitsaanerusumik inuusinnaallunga. Nammineq niaqora malikkusuppara allallu isumaat tusarusunnagit.“ Ernertut tammarsimasutut arnaq inuusuttoq taanna siulersorneqarusunngilaq. Ajoraluartumik kristumiut ilagiissaannit anisitaasariaqarsimavoq Biibilip najoqqutassiai unioqqutikkamigit. — 1 Korintumiut 5:11-13.
8. (a) Kikkut Guutip najoqqutassiaanut akerliusumik inuusut ikiorniarpaat? (b) Sooq upperisarsiorneq eqqarsaatigeqqissaarneqartariaqarpa?
8 Uppeqat Guutip najoqqutassiaanik taamaatitsisoq takullugu annernaqaaq. (Filípimiut 3:18) Taamaattoqaraangat utoqqaanertat allallu anersaakkut piukkunnaatillit taanna ikiorniartarpaat. (Galâsiamiut 6:1) Kinaluunniilli Kristusip nammaataata tigunissaanut taassumunngalu ajoqersuganngornissamut pinngitsaalineqarsinnaanngilaq. (Matîuse 11:28-30; 16:24) Jehovap nalunaajaasuisa meeraat tamarmik nammineersinnaatitaanissamik ukioqalerunik upperisaq pillugu namminneq aalajangertariaqarput. Inuk kinaluunniit ileqqussat tungaatigut kiffaanngissuseqarpoq namminerlu Guutimut akisussaalluni. (Rûmamiut 14:12) Soorunami tamatta ’siaruartikkavut naapertorlugit katersuiumaarpugut’. Ernerup tammarsimasup Jesusip assersuusiaaniittup aamma tamanna paasisimavaa. — Galâsiamiut 6:7, 8.
Nunami ungasissumi pissutsit isumatsassimanartut
9, 10. (a) Ernerup tammarsimasup atugai qanoq ilillutik allanngorsimappat, taamaattumillu qanoq iliorpa? (b) Ernerup tammarsimasup ullumikkullu pallorfiginninnermit ilumoortumit qimagussimasut assigiissutaasa ilaat taakkit.
9 ’Tamaasa nungukkamigit kaannerlu sualuttoq nunamut taassumunnga nalliummat ajorsalerpoq. Taava nunap tamatuma inuisa ilaat ornillugu attaviginiarpaa, taassumalu nunaatiminut aallartippaa puulukit paareqqullugit. Qaarsillarumallerporlu orpigannguit naatsiassartaannik puulukit nerisassaannik, tunineqaranili.’ — Lúkarse 15:14-16.
10 Naak ajorsangaaraluarluni ernerup tammarsimasup suli angerlamut uternissani eqqarsaatiginngilaa, puulukinilli paarsisutut sulilerluni. Puulukit Mosesip inatsisai naapertorlugit minguttuutut isigineqarmata, juutiusoq ilerasuuteqarnani taama suliffeqarsinnaagunanngilaq. (3 Moses 11:7, 8) Ernerulli tammarsimasup ilerasuuteqarsimaguni naqisimasariaqarpaa. Ilimagisinnaanngilaa sulisitsisumi nunami allamiup inuussutissarsiorfissaqanngitsup isumai soqutigissagai. Ullumikkut amerlasuut ernerup tammarsimasup ajorsarneranut assingusumik misigisaqarsimapput pallorfiginninneq ilumoortoq qimakkaangamikku. Kanngunarsaataasutut isigisimasaraluaminnik atugaqalertarnerat qaqutigoortuunngilaq. Assersuutigalugu angutip inuusuttup 17-inik ukiullip kristumiutut perorsarneqarsimanini naalasseriiffigilerpaa. „Kanngunartuliortarnerup ikiaroornartutortarnerullu ukiut ingerlaneranni Biibilimit ilikkarsimasakka aanngartippaat,“ nassuerpoq. Sivitsunngitsoq ujajaasutut toqutsisutullu parnaarunneqarpoq. Kingusinnerusukkut anersaakkut peqqissutsi peqqippaa, kisianni ’nuannaarneq naajasoq ajortip pia’ taassumunnga akisorujussuusimavoq. — Naleqqiuguk Eprîarit 11:24-26.
11. Erneq tammarsimasoq qanoq ililluni ajorsarnerulersimava, ullumikkullu ilaasa qanoq paasisimavaat silarsuup matuma pilerisaarutai tassaannaasut ’salloqittaatit piunngitsut’?
11 Erneq tammarsimasoq ajorsarnerulerpoq ’tunineqannginnami’. Ikinngutai nutaat maanna sumiippat? Aningaasat nungummata taanna soqutigiunnaarpaat. (Ussatit 14:20) Ullumikkut uppernermik taamaatitsisimasut amerlasuut paasilertarpaat silarsuup matuma pilerisaarutai isumaalu tassaannaasut ’salloqittaatit piunngitsut’. (Kulorsamiut 2:8) „Jehovamit siulersorneqannginnama ajortorpassuit atortariaqarsimavakka,“ arnaq inuusuttoq Jehovap peqatigiissortaanik qimatsisimagaluartoq taama oqaluttuarpoq. „Silarsuarmut naleqqussaraluarpunga, allanilli allaanerulaarama ilassiumanngilaannga. Meeqqatut tammarsimasutut ataatamik siulersuisinnaasumik amigaatilittut misigivunga. Taava paasilerpara Jehova pisariaqartillugu. Tamatuma kingorna taassumannga attaviitsoorusunngisaannarpunga.“ Jesusip assersuusiaani erneq tammarsimasoq aamma taama isummerpoq.
Erneq tammarsimasoq silattorpoq
12, 13. Ullumikkut ilaat suna pissutigalugu silattorsimappat? (Takuuk ungaluusaq.)
12 ’Taava ilitsorilerpoq oqarluni: „Ata, ataatama kiffartortorpassui neqissaqangaartut, uangali perlingajalerpunga. Nikuillunga ataataga ornissavara oqarfigalugulu: ’Ataataq, qilammut ilinnullu ajortuliorpunga, kingorna ernernik taaneqarneq qinngaqquppunga; kiffartortivit ilaattut itinnga.’“ Taava nikuilluni angunni ornippaa.’ — Lúkarse 15:17-20.
13 Erneq tammarsimasoq ’ilitsorilerpoq’. Sivisungaatsiartumik sinnattortutut issimavoq, nuannaarniutit kiserluinnaasa sammillugit. Maannali malugisinnaavai anersaakkut pissutsini. Inuunerluttunngungaarsimagaluarpoq, sulili neriuutissaqarpoq. Suli inuttut ajunngitsortaqarpoq. (Ussatit 24:16; naleqqiuguk 2 Israelikkut oqaluttuarisaanerat 19:2, 3.) Tunngavissaqarluassava isumaqassalluni ullumikkut Guutip savaataanit qimaguttut neriuutissaarutivissut, tamarluinnarmik naalasseriinnermikkut Guutip anersaavanut illernartumut ajortuliorsimasut? (Matîuse 12:31, 32) Taamaattariaqanngilaq. Ilaat uteriissusertik pillugu ilerasuuteqarput, piffissallu ingerlanerani amerlasuut silattortarput. „Ullut tamaasa Jehova eqqarsaatigisimavara,“ qatanngut arnaq piffissaq Jehovap peqatigiissortaasa avataaniissimanini pillugu oqarpoq. „Qinujuarsimavunga ullut ilaanni sallusuissut uterfigeqqikkukku ilassiumaaraanga.“ — Tussiaat 119:176.
14. Erneq tammarsimasoq qanoq aalajangerpa, qanorlu ililluni maniguunnini takutippa?
14 Jehovalli innuttaanit tammarsimagaanni qanoq iliortariaqarpa? Jesusip assersuusiaani erneq tammarsimasoq aalajangerpoq angerlarumalluni ataatani isumakkeerfigineqarnissamik qinnuigiumallugu. Ima oqarniarpoq: ’Kiffartortivit ilaattut ittinnga.’ Kiffartortut taakku ullormut ataatsimut sulisussarsiarineqartarput, taamaattumillu kiffanit allanit inoqutigiinnut ilaasunit akimannginnerullutik. Ernerup eqqarsaatiginngilaa ernertut naatsorsuutigineqaqqinnissani, nikanarnerpaamilli atorfeqarnissani akueriumavaa taamaalilluni ullut tamaasa takutissinnaajumallugu ataatani ilumoorfigeqqilerlugu. Ernerli tammarsimasoq tupaallatsinneqarpoq.
Asannittumik tikilluaqquneqarnera
15-17. (a) Ataatap ernini takugamiuk qanoq qisuariarpa? (b) Ataatap ernini annoraamik pitsaasumik, asammiumik aloqutinillu tunimmagu sumut ersiutaava? (c) Ataatap nalliuttorsiortitsilluni suna takutippaa?
15 ’Sulili ungasissumiitillugu angutaata takulerpaa naakkigingaalerlugulu, arpallunilu qungasiagut eqippaa kunillugulu. Erneratali oqarfigaa: „Ataataq, qilammut ilinnullu ajortuliorpunga, kingorna ernernik taaneqarneq qinngaqquppunga.“ Angutaatali kiffani oqarfigai: „Annoraaq pitsaaneq aasiuk atitillugulu, assammiulersiullu aloquserlugulu; norrarlu puallarsagaq aallugu toqussiuk, nerillutalu tipaatsutta, ernera una toqugaluarluni kingumut uummarmat, tammaraluarlunilu kingumut nanisaammat.“ Taava tipaatsulerput.’ — Lúkarse 15:20-24.
16 Angajoqqaat asannittut tamarmik meeraqarunik Guutip innuttaanit qimagussimasunik kissaatigaat taakkua anersaakkut peqqissusertik tigoqqissagaat. Taamaattumik takorlooruminarpoq ernerup tammarsimasup ataataata qanoq ililluni ullut tamaasa illup saavani aqqut kipisalluni nasiffigisaraa, ernermi uternissaa neriuutigalugu. Taava ullut ilaanni illu ornillugu pisuttoq takuaa! Angutip inuusuttup isikkuani ukiut qaangiuttut malunnaateqarput. Kisianni ataatap ’suli ungasissumiitillugu’ ilisarilerpaa. Inuusuttoq atisarluttoq ajorsartorlu takuinnanngilaa. Ernini takuaa arpallunilu ornippaa!
17 Ataatap ernini tikikkamiuk, eqillugu kunippaa. Taavalu kiffani peqquai annoraamik tuneqqullugu, asammiuleqqullugu aloquseqqullugulu. Atisat ulluinnarsiutit pineqanngillat, kisianni annoraaq ’pitsaaneq’, immaqa kusanartumik allapalaagalik pulaartut ataqqinartut atortagaat. Inussiat nalinginnaasumik asammiulerneqarneq aloquserneqarnerlu ajorput, ataatalli takutikkusuppaa ernini tikilluaqqullugu ilaqutariinnut ilaavissutut. Ataatarlu suli iliuuseqarpoq. Ernermi uternera nalliuttorsiutiginiarpaa. Allatut iliornissani kanngusuutigigamiuk pinngitsaalineqartutullu isumakkeerfiginngilaa. Akerlianik isumakkeerfiginnikkusuppoq kajumillunilu taamaaliorluni.
18, 19. (a) Ernermik tammarsimasumik assersuusiap Jehova pillugu sumik paasitippaatigut? (b) Jehovap Judakkunnut Jerusalemimiunullu isumaqarnermigut qanoq takutippaa ajortuliortut imminut uternissaat ’qilanaaralugu’?
18 Manna tikillugu ernermik tammarsimasumik assersuusiaq Guuti pallorfigisarput pillugu sumik ilinniutigisimavarput? Siullermik paasivarput Jehova tassaasoq ’Guuti nallittuisoq, saammaasoq, kamajasuunngitsoq, isumassuingaartoq unneqqaringaartorlu’. (2 Moses 34:6) Aap, nallittuineq Guutip ilisarnaatigaa. Ajorsartut naakkinnittuliorfigissallugit taassumunnga pissusissamisoortuuvoq. Jesusip assersuusiata aamma takutippaatigut Jehova ’isumakkeerfiginnittartuusoq’. (Tussiaat 86:5) Inuit ajortuliatik peqqissimissutigineraat taamaalillutillu naakkinnittuliorfiginnissamik pissutissaqartinneraanni eqqumaffigiuarpaa. — 2 Israelikkut 12:12; 16:9.
19 Assersuutigalugu eqqarsaatigeriaruk Esajasip nalaani Guutip Judakkunnut Jerusalemimiunullu isumaqarfiginninnera. Esajas Jehovamit isumassarsisitaalluni allassimavoq Judakkut Jerusalemimiullu ’alunit kassernut’ napparsimasut. Aammali allassimavoq: „Ilumut [Jehovap] qilanaaraa ilissinnik saammaassinissani, ilumut nikuippoq nallittorumallusi.’ (Jesaja 1:5, 6; 30:18; 55:7; Hesekiel 33:11) Jesusip assersuusiaani ataataasoq assigalugu Jehovap ’aqqut’ imminut utimut sammisoq alaatsinaappaa. Kialuunniit ’illuminit’ qimagussimasup uternissaa qilanaaraa. Ilimaginnginnerparput ataataq asannittoq taama isumaqarfiginnissasoq? — Tussiaat 103:13.
20, 21. (a) Ullumikkut amerlasuut qanoq ilillutik Jehovap nallittuineranit kajungersinneqarpat? (b) Allaaserisami tulliuttumi suut sammissavavut?
20 Ukiut tamaasa Jehovap nallittuinera pissutigalugu amerlasuut silattorlutik pallorfiginninnermut ilumoortumut utertarput. Ilaqutaasa tamanna tipaatsutigeqaat. Assersuutigalugu ataataasup kristumiup allaaserisap aallaqqaataani issuarneqartup takuaa panini anersaakkut peqqissiartortoq maannalu piffissaq tamaat atorlugu oqaluussisartuusoq. „Pissutsit aaqqissuussaaneranni matumani pisoqqami nuannaarnerpaatut misigivunga,“ oqarpoq. „Aliasunnermit qullit uanni tassaalersimapput nuannaarnermit qullit.“ Qularnanngivissumillu Jehovattaaq nuannaarpoq. — Ussatit 27:11.
21 Ernermilli tammarsimasumik assersuusiaq pissarsiffiginerusinnaavarput. Jesusip oqaluttualiani nangippaa Jehovap nallittuinerata allakkanillu ilisimasut farisiiarillu uteriillutik assuarinnillutillu isumaasa assigiinngissutaat ersersinniarlugu. Allaaserisami tulliuttumi takussavarput qanoq taamaaliortoq tamannalu ullumikkut qanoq uatsinnut pingaaruteqartoq. (wE 1/10 98)
Uteqqiinissamut
□ Jesusip qanoq ililluni farisiiarinit nallittuineq allaanerulluinnartumik isumaqarfigaa?
□ Ullumikkut kikkut ernertut tammarsimasutut ippat, qanorlu ilillutik?
□ Suna pissutigalugu erneq tammarsimasoq silattorpa?
□ Ataatap qanoq ililluni ernini peqqissimisoq naakkinnittuliorfigaa?
[Quppernerup ataani ilanngussat]
a Biibilimi assersuusiat tassaasariaqanngillat pisimasuiit. Oqaluttuarineqarput ilinniutissaq aalajangersimasoq saqqummersinniarlugu, taamaattumillu oqaluttuani annikitsualuit tamarmik immikkut pingaartinneqartariaqanngillat.
b Assersuussiap tamatuma siulittuutitut isumaqarnera atuakkami Inuk inuit inuusimasut pingaarnerpaartaat-ni kapitali 86-imi nassuiarneqarpoq.
[Qupp. 11-mi ungalusaq]
SILATTORSIMAPPUT
Suut pissutigalugit kristumiut ilagiissaannit anisitaasimasut ilaat silattorsimappat? Uani assersuutit ilaat eqqaaneqassapput:
„Qamanerpiaq nalunngikkaluarpara sallusuissut sumi nassaarineqarsinnaanersoq. Ukiut arlallit Biibilimik atuaqqissaartarsimanera kristumiullu ataatsimiinnerinut najuuttarsimanera puiuikkiussimavakka. Qanoq ilillunga Jehova tunoqqajuarsinnaavara? Taassuma qimassimanngilaanga, uangali qimassimavara. Kiisami paasilerpara qanoq silatusaanngissimatigalunga uteriissimatigalungalu. Nassuerutigaara Jehovap oqaasia ilumoortuusoq — ’siuaruartikkat naapertorlugit katersuisoqassasoq’.“ — C.W.
„Paninnguara oqaluttalerpoq, misigissutsillu uanni eqeersaarneqarput. Jehovap kinaaneranik qanorlu qinnuigineqarsinnaaneranik ilinniartikkusuppara. Sinissaaruttalerpunga, unnuillu ilaanni biilerlunga illoqannginnersaliarpunga. Sivisuumik qinusimananga qiallunga Jehova qinnuigilerpara. Nalunngilluinnarpara Jehovamut attaveqaqqittariaqarlunga, neriuutigaaralu isumakkeerfigisinnaagaanga.“ — G.H.
„Upperisarsiorneq eqqartorneqaleraangat oqartarpunga upperisarsioqatigiinnik sallusuissummik piginnittunik qinersissaguma Jehovap nalunaajaasuinut ilanngunniarlunga. Eqqaavaralu taakkununnga ilaasimagaluarlunga, maleruaasinnaanangali taamaattumillu tunuarsimallunga. Eqqarsaatiginerugaangakku pisuusutut misigisarpunga nikallungalerlungalu. Naggataatigut imminut nassuerutigaara nallinnartumik inuullunga, ilumoorullugulu iliuuseqartariaqalerlunga.“ — C.N.
„Ukiut 35-it matuma siorna uigalu anisitaavugut. 1991-imili tupaallaatigisatsinnik nuannaarutigisatsinnillu utoqqaanertanit marlunnit pulaarneqarpugut, taakkualu oqaluttuuppatigut Jehovamut utersinnaasugut. Ukiup affaa tamatuma kingorna nuannaarutigingaakkatsinnik ilanngutiteqqinneqarpugut. Uiga 79-inik ukioqarpoq uangalu 63-inik ukioqarlunga.“ — C.A.