Annannissarsi sulissutigiuarsiuk!
’Asasakka, . . . annannissarsi sulissutigisiuk mianersorlusi uulillusilu.’ — FILÍPIMIUT 2:12.
1, 2. Sooq inuppassuit isumaqarput namminneq inuunertik aqussinnaanagu?
„INUNNGUUTSINNIT taamaappit?“ Ungasinngitsukkut apeqqut tamanna Amerikamiut atuagassiaata tusaamasaasup saqqaani naqinnerit silittut atorlugit allassimavoq. Qulequttap ataani ima allassimavoq: „Inuttut pissuseq, isumakkut periaaseq, allaat inuunermi qinertakkavut. Misissuinerit nutaat naapertorlugit tamakku kinguaariit kingornuttagaannit aalajangerneqartarput.“ Taamaannerarneqarmat ilaat misigissapput inuunerminnik aqutsisinnaavallaarnatik.
2 Allat isumakuluutigaat angajoqqaaminnit perorsarneqarluarsimannginnamik imaluunniit ilinniartitsisunit ilinniartinneqarluarsimannginnamik pilluaatsumik inuusariaqarlutik. Immaqa isumaqarput angajoqqaamik kukkusimanerisa uteqqinnissaat, periataartarnerisa pitsaanngitsut malinniarnissaat Jehovallu qimaannarnissaa pinngitsoortissinnaanagit — naatsumik oqaatigalugu ajortumik qinersinissartik siumut aalajangipajaarneqareersimasoq. Tamannali ilumut Biibilimi ajoqersuutigineqarpa? Upperisarsiortut ilaasa tamanna ajoqersuutigaat, suut tamarmik siumut aalajangeriigaanerannik upperisaqarlutik. Ajoqersuut tamanna naapertussagaanni Guutip qangarsuarli inuup inuunerani pisussat tamaviisa aalajangereersimavai.
3. Nammineq siunissatsinnut akisussaassuseqarsinnaanerput pillugu Biibilimi sumik kajumissinartumik neriorsoqqissaaruteqarpa?
3 Isummat eqqaaneqartut tamarmik matumuuna assigiipput: Isumaqartoqarpoq qinernissamut periarfissaqarpallaanngitsugut, nammineq inuunitsinnut sunniuteqarpallaarnata. Taamaappat nikallornissamut pissutissaqassagaluarpugut, nikallornerullu suut tamaasa ajornerulersissagaluarpai. Soorlu Ussatit 24:10-mi allassimasoq: „Ullormi annikilliorfiusumi sapiissuseerukkuit taava nukikissimassaqaatit.“ Biibilimili neriorsoqqissaarneqarpugut ’annannissarput sulissutigisinnaagipput’. (Filípimiut 2:12) Qanoq ililluta ajoqersuummut Biibilimeersumut isumalluarnartumut tamatumunnga tatiginninnerput nakussatsissinnaavarput?
Immitsinni ’illuliornerput’
4. Korintumiunut agdlagkat sujugdlît 3:10-15-imi atortussat ikuallajanngitsut pillugit allassimasumi Paulusip suna pinngilaa?
4 Korintumiunut agdlagkat sujugdlît 3:10-15-imi Paulusip assersuusiaa misissoriartigu. Tassani kristumiutut ’ illuliorneq ’ eqqaavaa, assersuusiaanilu ilagiit iluanni aammalu ilagiit avataanni kiffartorneq pineqarsinnaapput. Paulusip oqaasii naapertorlugit ajoqersukkap naggataatigut Jehovamut kiffartornissaminik aalajangernissaa tamatuminngalu aalajangiusimanniinnarnissaa taassuminnga ilinniartitsisimasut ajoqersuisimasullu kisimik akisussaafigaat? Naamik. Paulusip erseqqissarpaa ilinniartup suliassani sapinngisamik ilungersuutigisariaqaraa; kisianni soorlu allaaserisami siulianiittumi nassuiarneqartoq Paulus oqanngilaq ilinniartoq ajoqersugarluunniit nammineq qinigassaqanngitsoq. Ilumoorpoq Paulusip assersuusiaani allat ajoqersorniarlugit sulinerput pingaartinneqartoq, imminut ineriartortinniarluta sulinerput pineqarnani. Tamanna takuneqarsinnaavoq Paulus allassimammat peqqissaanngitsumik ’illuliukkat’ nungussinnaasut ’illuliortorli’ nammineq annalluni. Taamaattorli Biibilimi assersuut tamannarpiaq aamma ilaannikkut imminut ineriartortinnerput pillugu atorneqartarpoq.
5. Allassimaffiit suut takutippaat kristumiut imminnut ’ illuliuuttariaqartut ’?
5 Assersuutigalugu Judas 20, 21 eqqaaneqarsinnaavoq: ’Ilissili, asanartusi ukorsii, upperisassigut illernangaartukkut ineriartorteqatigiigitsi, qinusarlusi anersaakkut illernartukkut. Guutimut asanartittuinnaritsi.’ Griikerit oqaasiat tamaani ’ineriartorteqatigiigitsi’-mik nutserneqartoq Paulusip aamma Korintumiut agdlagai sujugdlît kapitali 3-mi ’qarmaaneq’ pillugu atorpaa, Judasilli oqaaseq tamanna atorpaa upperneq tunngavigalugu imminut ineriartortinnitsinnut assersuutigalugu. Jesusip inuk qaarsumut illuliortoq pillugu assersuusiaa issuarmagu Lukasip griikerit oqaasiat ’ tunngavik’-mik isumaqartoq Paulusip kristumiut qarmaasarnerat pillugu atorsimasaa aamma atorpaa. (Lúkarse 6:48, 49) Paulusip kristumioqatini anersaakkut siumukarnissaannik kajumissaaramigit aamma aalajaatsumik ’tunngaveqarneq’ eqqartorpaa. Guutip oqaasiani nassuiarneqarpoq nammineq ineriartornissatsinnut ’qarmaasartugut’. — Evfisumiut 3:15-19; Kulorsamiut 1:23; 2:7.
6. (a) Kristumiup kialuunniit ’ illulioqatigiissimanerup inerneruneranik assersuummik taasaqarit. (b) Ajoqersugaq kinaluunniit sumik akisussaaffeqarpa?
6 Kristumiumik ’qarmaaneq’ inuup ataasiinnap sulissutigissavaa? Eqqarsaatigeriaruk illuliorniartoq qanoq iliortartoq. Illussanik titartaasartoq saaffigisarpaa illu titartaqqullugu, naallu pingaartumik nammineerluni illuliornissaq suliarigaluarlugu aamma entrepenøri saaffigisarpaa suliassap ilaa suliareqqullugu suleriaatsillu pitsaanerpaat siunersiutiginiarlugit. Entrepenøri aalajaatsumik tunngaviliorpat, titartakkat paasiniarsinnaanissaannik ikiuulluni, atortussat suut pisiarineqarnissaannik siunnersuilluni illuliornerullu ingerlaneranni siunnersuisarluni, qularnanngitsumik isumaqassaagut sulilluartoq. Siunnersuutaali sumiginnarutsigik, atortussat akikitsut pitsaavallaanngitsullu pisiaralugit, allaallu titartakkat naapertornagit illuliorutta? Taamaaliorutta entrepenøri imaluunniit illussanik titartaasartoq pisuutinneqarsinnanngillat illu uppikkaluarpat. Aamma kristumiut ’qarmaasarnerat’ taamaappoq. Ajoqersugaq kinaluunniit suleqatigiissimanerup inerneraa. Jehova tassaavoq titartaasartoq. Kristumiu aalajaatsoq ’Guutip suleqataatut’ ilinniartumik ajoqersuisartoq ineriartortitsisartorlu Jehovap tapersersortarpaa. (1 Korintumiut 3:9) Ilinniartorli aamma aalajangiisuuvoq. Naggataatigut taanna nammineq qanoq inuuniarnerminut akisussaaffeqarpoq. (Rûmamiut 14:12) Kristumiutut pitsaasunik pissuseqarumaguni tamakku ineriartortinniarlugit noqqaassuteqartariaqarpoq, imminut ’qarmarlunilusooq’. — 2 Pîtruse 1:5-8.
7. Kristumiut ilaannut sunik unamminiarnartoqartarpa, taakkualu suna tuppalliutigisinnaavaat?
7 Imali paasisariaqarpa kinguaariit kingornuttagaat, avatangiisit ilinniartitsisullu piginnaassusii pissusiilu pingaaruteqanngitsut? Naamerluinnaq. Biibilimi takutinneqarpoq tamakku tamarmik pingaaruteqarlutillu sunniuteqartartut. Assigiinngitsutigut ajortulioriataarneq inunnguuseraarput tamannalu ajugaaffigiuminaatsorujussuuvoq. (Tussiaat 51:7; Rûmamiut 5:12; 7:21-23) Angajoqqaat perorsaanerat angerlarsimaffimmilu avatangiisit meeqqanut sunniuteqangaarsinnaapput — ajunngitsumik ajortumillu. (Ussatit 22:6; Kulorsamiut 3:21) Jesusip juutit upperisarsiornikkut siuttui ajoqersuinerat tamatumalu allanut ajortumik kinguneri pissutigalugit avoqqaaringaarsimavai. (Matîuse 23:13, 15) Ullumikkuttaaq tamatsinnut tamakkununnga assingusunik sunniuteqartoqartarpoq. Assersuutigalugu Guutip innuttaasa akornanni ilaat meeraanerminni ajornartorsiutit pissutigalugit assigiinngitsunik ilungersuutigisaqartarput. Taakku inussiarnerfigineqartariaqarlutillu misiginneqataaffigineqartariaqarput. Tuppalliutigisinnaavaallu Biibilimi allassimammat angajoqqaamik eqqunngitsuliorsimaneri uteqqittariaqanngikkaat ilumoorfiginninngitsuusariaqarnatilluunniit. Malugeriaruk Judakkut kunngiisa ilaat qanoq ilillutik tamatumunnga assersuutaalluartut.
Judakkunni kunngit namminneq aalajangiisimapput
8. Jotam qanoq maligassaalluanngitsumik ataataqarsimava, qanorli qinersisimava?
8 Uzzija 16-innarnik ukioqarluni Judakkunnut kunnginngorsimavoq ukiunilu 52-ini naalakkersuilluni. Piffissap tamatuma ilarujussuani „ataatamisut Amasjatorluinnaq [Jehovap] iluarisaanik iliorpoq“. (2 Kunngit 15:3) Jehovap pilluaqquaa sakkutooqarnikkut tupinnartumik ajugaatittarlugu, ajoraluartumilli kunngip iluatsitsisarneq tamanna pingaakujuutigilerpaa. Pingaarniarluni Jehova pikitsitsiffigilerpaa naalaffimmilu tipigissaatilliiffimmi tipigissaatilliiartorluni, palasit kisimik taamaaliortussaagaluartut. Uzzija avoqqaarineqarpoq, kamangaalerlunili. Nikanarsarneqarpoq pupissunngorluni inuunermilu sinnera immikkut najugaqartariaqarluni. (2 Israelikkut 26:16-23) Ernerata Jotamip tamakku tamaasa qanoq qisuariarfigai? Inuusuttoq taanna ataataminit sunnerneqarsinnaagaluarpoq Jehovallu taassuminnga pillaanera ajuallaatigisinnaallugu. Inuiaat nalinginnaasut aamma ajortumik sunniuteqarsinnaasimapput upperisarsiornikkut eqqunngitsumik ileqqoqaramik. (2 Kunngit 15:4) Jotamili nammineq qinersivoq. „[Jehovap] iluarisaanik iliorpoq.“ — 2 Israelikkut 27:2.
9. Akaz qanoq ajunngitsumik sunnerneqarsimava, kingusinnerusukkulli qanoq iliorsimava?
9 Jotam ukiuni 16-ini naalakkersuivoq Jehovamullu aalajaattuarluni. Ernera Akaz taamaattumik maligassaalluartumik ataataqarsimavoq, aamma allanit ajunngitsumik sunnerneqarsinnaasimalluni. Pruffiitit aalajaatsut Esajas, Hoseas Mikalu nunami tamatumani oqaluussisartillugit inuuvoq. Taamaattorli ajortumik qinersisimavoq. „[Jehovap] iluarinngisaanik iliorpoq siuaasani Daavi assiginagu.“ Ba’alit assinginik kuisanik guutilialiorpoq tamakkulu guutisiorfigalugit, allaallu ernermi ilaat Guutimik nalusut guutigisaannut pilliutigalugit. Pitsaanerpaamik sunnerneqarsimagaluarluni kunngitut Jehovamullu kiffaatut ilumuunngitsuliorpoq. — 2 Israelikkut 28:1-4.
10. Akaz ataatatut qanoq ittuusimava, ernerali Ezekias qanoq qinersiva?
10 Pallorfiginninneq ilumoortoq najoqqutarissagaanni Akazimit ajornerusumik ataataqartoqarsinnaagunanngilaq. Erneratali Ezekiasip nammineq ataatassani qinersinnaasimanngilaa. Ernerit Akazip Ba’alimut pilliutigisimasai qularnanngitsumik tassaapput Ezekiasip qatanngutai. Ezekias alliartornermini ajortumik avatanngiiseqarsimagami Jehovamut ilumuunngittariaqarnerpa? Naamik. Akerlianik Ezekias tassaalersimavoq Judakkut kunngiisa pitsaanerit ilaat — aalajaallunilu, silatullunilu asaneqarpoq. „[Jehovap] najorpaa.“ (2 Kunngit 18:3-7) Ezekiasip suli inuusuttuulluni kunngissaallunilu isumassarsisitaalluni Tussiaat 119 allassimagunarpaa. Taamaappat paasinarpoq sooq ima allassimasoq: „Aliasunnermit sinissaaruppunga.“ (Tussiaat 119:28, NV) Sunilluunniilli aliasuuteqaraluaruni Ezekiasip Jehovap oqaasianit siulersortippoq. Tussiaat 119:105-imi allassimavoq: „Oqaatsisit naneruaraakka isikkannut, qaammaqqutigalugillu aqqutinni.“ Aap, Ezekias nammineq qinersivoq — eqqortumillu qinersilluni.
11. (a) Manasse naak ataataminit sunnerneqarluarsimagaluarluni qanoq ingasatsigisumik Jehovamut pikitsitsisimava? (b) Inuunermi naalernerata nalaani Manasse qanoq aalajangerpa, uagullu tamanna qanoq ilinniutigisinnaavarput?
11 Killormulli Judakkut kunngiisa pitsaanerpaat ilaat ajornerpaat ilaannik kingoraarteqarpoq. Ezekiasip ernerata Manassep guutipilussiorneq, anersaarsiorneq nakuusernerlu aatsaat taama ingasatsigisut siuarsarpai. Oqaluttuarineqarpoq ’[Jehovap] Manasse innuttaalu mianersoqqugaluarai’, qularnanngitsumik pruffiitit aqqutigalugit. (2 Israelikkut 33:10) Juutit oqaluttuatoqaat naapertorlugit Manasse qisuariarpoq Esajas pilattugaatillugu. (Naleqqiuguk Eprîarit 11:37.) Naluarput tamanna ilumoornersoq, kisianni Jehovap mianersoqqussutai Manassep tusarumanngilai. Ernermi ilaat ikuallallugit pilliutigisimavai, soorluttaaq aataa Akaz taamaaliorsimasoq. Taamaattoq angut ajortoq taanna kingusinnerusukkut inuunermini misilinneqangaalerami peqqissimilerlunilu allamut saappoq. (2 Israelikkut 33:1-6; 11-20) Tamatumannga paasisinnaavarput inuunermini ajorluinnartumik aalajangersimagaluartoq annattussaajunnartariaqanngitsoq. Inuk allanngorsinnaavoq.
12. Jehovamut kiffartornermut tunngatillugu Amon erneralu Josias qanoq imminnut akerliulluinnartumik qinersisimappat?
12 Manassep ernerata Amonip ataatami peqqissimisimanera allamullu saassimanera takullugit ilinniutigilluarsinnaagaluarpai. Taannali kukkusumik qinersivoq. ’Suliani ajortut amerlanerulersiinnarpai,’ naggataatigullu toqunneqarluni. Ernera Josias qujanartumik taassumannga allaanerulluinnarpoq. Qularnanngitsumik aalajangerpoq aataminut pisimasut ilinniutigiumallugit. Arfineq-pingasuinnarnik ukioqarluni naalakkersuilerpoq. 16-inik ukioqarluni Jehova sammiviginialerpaa, tamatumalu kingorna tassaalerpoq kunngi maligassaalluarlunilu aalajaatsoq. (2 Israelikkut 33:20–34:5) Qinersivoq — qinersilluarlunilu.
13. (a) Judakkut kunngii misissukkavut qanoq ilinniarfigisinnaavavut? (b) Angajoqaat meeqqaminnik perorsaanerat qanoq pingaaruteqartigaa?
13 Judakkut kunngiisa ilaasa arfineq-marluk inuuneri misissoratsigik pingaartumik ilinniutigaavut. Ilaatigut kunngit ajornerpaat ilaasa erneri tassaapput kunngit ajunnginnerpaat, ilaatigullu kunngit ajunnginnerpaat ilaasa erneri tassaapput kunngit ajornerpaat. (Naleqqiuguk Nalunaajaasup oqaasii 2:18-21.) Tamanna isumaqanngilaq angajoqqaat perorsaanerat pingaaruteqanngitsoq. Angajoqqaat meeqqatik Jehovap aqqutigeqqusaanik maleruaanissamik ajoqersoraangamikkik pitsaanerpaamik periarfississavaat Jehovamut aalajaalluni kiffanngornissamut. (5 Moses 6:6, 7) Taamaattoq meeqqat ilaasa, angajoqqaat ilungersuussilluarsimagaluartut, aqqut eqqunngitsoq qinertarpaat. Meeqqat allat naak angajoqqaaminnit ajorluinnartumik sunnerneqarsimagaluarlutik aalajangertarput Jehova asallugulu kiffartorfigissallugu. Jehovap ikiuineratigut inuunerminni iluatsitsisarput. Ilaannikkut eqqarsaatigisarpiuk ilinnut qanoq pisoqassanersoq? Taamaappat eqqortumik aalajangersinnaanissatsinnik Jehovap neriorsueqqissaarutaasa ilaat eqqarsaatigikkit!
Jehovap tatigaatigut
14. Qanoq ililluta nalunngissinnaavarput Jehovap piginnaassuseqarfiginngisavut nalunngikkai?
14 Jehovap suut tamaasa isigai. Ussatit 15:3-mi allassimavoq: „[Jehovap] isai tamaginnut anngusimapput, ajortut ajunngitsullu nakkutigaat.“ Kunngi David Jehova pillugu ima oqarsimavoq: „Naartuusunga isivit takusimavaanga, timima pisatai allassimapput illit allattaavinni, pinngortinneqalernerisa ulluini arlaannaalluunniit pinngortinneqanngikkallarmat.“ (Tussiaat 139:16, NV) Jehovap nalunngilai sanngiissutivut tamaasa — inunnguuserisimasavut aamma iliuuseqarfigisinnaanngisavut pissutigalugit pigiliussimasavullu tamaasa. Nalunngilluinnarpaa tamakkunannga qanoq sunnerneqartartugut. Piginnaaneqarfiginngisavut allaat uatsinnit nalunngilluinnarneruai. Saniatigullu nallittuivoq. Sapinngisatsinnit annerusumik piumaffiginngisaannarpaatigut. — Tussiaat 103:13, 14.
15. (a) Allanit ajortumik iliorfigineqarsimasut suna tuppalliutigisinnaavaat? (b) Nammineq akisussaaffeqarnerput eqqarsaatigalugu Jehovap qanoq tatigaatigut?
15 Akerlianilli Jehovap pisartunut saperluinnartutut isiginngilaatigut. Inuunermi ajortunik misigisaqarutta tuppalliutigisinnaavarput piaaraluni ajortuliornerit tamaasa Jehovap uumigimmagit. (Tussiaat 11:5; Rûmamiut 12:19) Nalunatali piaaralutalu eqqunngitsumik qinersisimagutta eqqunngitsuliorsimanitta kingunipiluinut illersussanerpaatigut? Soorunami naamik. ’Kialuunniit nammineq nammagassi nammassavaa,’ taama allassimavoq. (Galâsiamiut 6:5) Jehovap pinngortitani sianissusillit tamaasa tatigalugit eqqortuliornissamut imminullu kiffartornissamut akisussaaffeqartippai. Soorlu Mosesip Israelikkut oqarfigisimagai: „Ullumi qilak nunarsuarlu ilisimannittoralugit ilissinnut saqqummiuppakka inuussut toqulu, pilluaqqussut perloqqussullu. Inuussut qinerniarsiuk ilissi kinguaassasilu inuuginnaqqullusi!“ (5 Moses 30:19) Jehovap tatigaa uaguttaaq eqqortumik qinersisinnaassasugut. Qanoq ililluta nalunngissinnaavarput?
16. Qanoq ililluta ’ annannissarput sulissutigisinnaavarput ’ sulinerpullu naammassisinnaallugu?
16 Malugiuk apustili Paulus qanoq allassimasoq: ’Taamaattumik, asasakka, . . . annannissarsi sulissutigisiuk mianersorlusi uulillusilu, Guuti tassaammat ilissinni sunniisoq piumallersittarlusi naammassisaqartittarlusilu iluarisani naapertorlugu.’ (Filípimiut 2:12, 13) Oqaaseq griikerisooq ’sulissutigisiuk’-mik nutserneqarsimasoq isumaqavippoq „inernissaa tikillugu sulineq“, tassa „naammassinninneq“. Taamaattumik kinaluunniit siumut ajorsarnissamut nakkaannarnissamulluunniit aalajangerigaanngilaq. Jehovap qularnanngivissumik tatigaa suliaq uatsinnut suliassiissutigisani naammassisinnaagipput — taamaanngippat allassimaffimmik tamatuminnga allatsitsisimanavianngikkaluarpoq. Qanorli ililluta taamaaliorsinnaavugut? Nammineq nukitsigut saperpugut. Immini sapinngikkaluarutta ’mianersorluta uulillutalu’ sulisariaqassanngikkaluarpugut. Jehovalli sunnertarpaatigut; anersaava illernartoq isumatsinnut uummatitsinnullu sunniuteqartarpoq ’piumallersittarluta naammassisaqartittarlutalu’. Taama asannittumik ikiorneqartaratta taava pissutissaqannginnerpugut inuunermi eqqortumik qinersinissatsinnut tamakkuninngalu angusiniarnissatsinnut? — Lúkarse 11:13.
17. Inuttut pissuserisavut eqqarsaatigalugit qanoq allanngorsinnaavugut, Jehovallu qanoq ikiortarpaatigut?
17 Soorunami akornutissaqartarpoq ajugaaffiginiartariaqakkatsinnik — immaqa ileqqupiloqarpugut inuunerullu ingerlanerani eqqarsariaatsitsinnut ajortumik sunnerneqarsimalluta. Jehovalli anersaavata ikiuineratigut tamakku tamarmik ajugaaffigineqarsinnaapput. Soorlu Paulusip kristumiut Korinthimiittut allaffigisimagai, Guutip oqaasiata ’ippiliugarsuit aserortersinnaavai’. (2 Korintumiut 10:4) Jehovap ilumut ikiorsinnaavaatigut inuttut pissuserisatsigut allanngorluinnarnissatsinnut. Oqaasiani kajumissaarneqarpugut ’inutoqaq’ iperaqqullugu ’inuttaarlu Guuti assilillugu pinngortitaq ateqqullugu, iluartillugu illernartillugulu ilumoornikkut’. (Evfisumiut 4:22-24) Jehovap anersaavata taama allanngorluinnartiginissatsinnut ikiorsinnaavaatigut? Aap! Guutip anersaava inerititaqarsinnaavoq. Pissutsinik kusanartunik naleqangaartunillu tamatta pigerusuttatsinnik — pingaartumik asanninnermik — inerititaqarsinnaavoq. — Galâsiamiut 5:22, 23.
18. Inuit sianissusillit tamarmik sumik qinersisinnaappat, tamattalu taamaattumik sumik aalajangertariaqarpugut?
18 Tamanna pingaartumik aniguisitsisumillu ilumoortortaqarpoq. Jehova Guutip killeqanngilluinnartumik asanninneq ersersissinnaavaa, uagullu taanna assigalugu pinngortitaavugut. (1 Moses 1:26; 1 Juánase 4:8) Qinersisinnaavugut Jehova asajumallugu. Asanninnerlu tamanna — siornatigut inooriaaserput imaluunniit ileqquliussimasavut ajortut pinnagit — siunissatsinnut matuersaataavoq. Adam Evalu Edenimi aalajaattuarsinnaassagunik Jehova Guutimut asanninneq pigisariaqarsimavaat. Asanninneq taama ittoq aamma pisariaqarpoq Harmagedonimit aniguissagutta Kristusillu ukiuni tuusintini naalakkersuinera naappat inaarutaasumik misilinneqarnissamut atassagutta. (sarĸúmersitat 7:14; 20:5, 7-10) Tamatta qanorluunniit atugaqaraluarutta asanninneq taama ittoq ineriartortissinnaavarput. (Matîuse 22:37; 1 Korintumiut 13:13) Aalajangerniarta Jehova asajumallugu, naassaanngitsumillu asanninneq tamanna tunngavigalugu ’illuliorumalluta’. (wE 1/11 98)
Eqqaamavigit?
□ Isummat suut nammineq inuttut akisussaaffeqarnermut Biibilimi ersarissumik ajoqersuutigineqartumut akerliulluinnarpat?
□ Kristumiu imminut qanoq ’ illuliuuttariaqarpa ’?
□ Judakkut kunngiisa maligassiaata qanoq takutippaa inuk nammineq qinersisariaqartoq?
□ Jehovap qanoq neriorsoqqissaarpaatigut inuunermi eqqortumik qinersisinnaasugut naak avatangiisitsinnit ajortumik sunnerneqaraluarluta?
[Qupp. 15-mi assiliartaq]
Illit siunissat kinguaariit kingornuttagaannit aalajangeriigaava?
[Qupp. 17-mi assiliartaq]
Naak ataatani maligassaalluanngikkaluartoq kunngi Josias aalajangerpoq Guuti kiffartorfigiumallugu