Jehovap piumasaatut iliorput
Jesusip meeqqat piffissaqarfigisarsimavai
JESUSIP kiffartornera ukiunik pingasunik affarmillu sivisussuseqartoq naangajalerpoq. Ungasinngitsukkut Jerusalemimukassaaq naalliunnartumillu toqutaassalluni. Qanoq pisoqarnissaa nalunngilaa, ajoqersukkanimi ima oqarfigisimavai: ’Inuup ernera inuit assaannut pisitaassavoq, taakkualu toqussavaat.’ — Mákorse 9:31.
Soorunami Jesusip piffissani sinneruttoq ullut tamaasa, nalunaaquttap-akunneri tamaasa, piffissamininnguit tamaasa atorluarniarsimassavai. Ajoqersugai suli oqaaqqissaarneqartariaqarput. Jesusip takusinnaasimavaa maniguuttuunissamut ajortuliortooqqajaajuarnermullu suli sakkortuumik oqaanneqartariaqartut. (Mákorse 9:35-37; 42-48) Aamma aappariinneq, avinneq kisimiittuunerlu pillugit ajoqersorneqartariaqarput. (Matîuse 19:3-12) Erniinnaq toqusussaalluni nalunnginnamiuk qularnanngitsumik piffissaq ilungersunartoq eqqarsaatigalugu toqqaannartumik Jesusip ajoqersukkani oqaluffigisimavai. Piffissaq sinneruttoq pingaartuuvoq — taamaattumik Jesusip tulliullugu iliuuserisaa maluginiarnartuuvoq.
Jesup meeqqat tikilluaqquai
Biibilimi allassimavoq: ’Merlertunnguit taassumunnga aappaat attoqqullugit.’ Ajoqersugaasa takugamikkik ingerlaannaq avoqqaarinnilerput. Immaqa isumaqarsimagaluarput Jesus meeqqanik sammisaqarnissaminut pingaaruteqarpallaartoq ulapippallaartorluunniit. Takorlooruminarpoq ajoqersugaasa tupaallassimanissaat, Jesusip taakkua ajorimmagit! Oqarfigisimavai: ’Merlertunnguit uannut qaaginnarlit pitsaaleqinasigillu, taamaattut Guutip naalagaaffia pigimmassuk.’ Jesusilu nangippoq: ’Ilumut oqarfigaassi: kialuunniit Guutip naalagaaffia merlertunnguatut pinngikkuniuk iserfigissanngilaa.’ — Mákorse 10:13-15.
Jesusip meeqqat pissusii nersornartut takusinnaavai. Alapernaatsuugajupput tatiginnittuugajullutillu. Angajoqqaamik oqaasii upperisarpaat meeqqanullu allanut illersortarlugit. Inunnguutsiminnik ilinniartikkuminartuunerat Guutip naalagaaffianut iserusuttunut tamanut maligassaalluarpoq. Jesusip oqarneratut ’taamaattut Guutip naalagaaffia pigaat’. — Naleqqiuguk Matîuse 18:1-5.
Jesusilli meeqqat assersuusiariniaannarlugit samminngilai. Oqaluttuap erseqqissumik takutippaa najornerat Jesusip ilumoorluni nuannarigaa. Markusip oqaluttuaraa Jesusip meeqqat ’pakkullugillu assamminik patikkai [attorai] pilluaqqullugillu’. (Mákorse 10:16) Markusip oqaluttuaaniinnaq asannippaluttumik pissuseqarneq eqqaaneqarpoq, tassa Jesusip meeqqat ’pakkukkai’. Inersimasut meeqqanik Jesusimut ’attortinniarlugit’ aggiussisimasut ilimagisaat akimorlugu Jesus iliuuseqarsimavoq.
Jesusip ’assamminik patikkai’ qanoq isumaqarpa? Uani upperisarsiornikkut ileqqulersornerup, soorlu kuisinnerup, pineqarsimasinnaaneranut takussutissaqanngilaq. Assammik patitsineq ilaannikkut isumaqartarpoq toqqaaneq allatigullu isumaqaannarsinnaalluni pilluaqqusineq. (1 Moses 48:14; apustilit suliait 6:6) Uani Jesusip meeqqat pilluaqquinnarsimasinnaavai.
Qanorluunniit pisoqarsimagaluarpat Markusip oqaaseq ’pilluaqquaa’ (kateulogeʹo) sakkortunerusoq atorpaa. Tamatuma ersersippaa Jesusip meeqqat qamannga pisumik, qajassuussisumik asannittumillu pilluaqqugai. Ersarippoq meeqqat piffissaajaataasutut isiginngikkai.
Sumik ilinniarfigisinnaagipput
Jesusip meeqqat inersimasullu nikaginnippaluttumik qununartumilluunniit iliuuseqarfigineq ajorpai. „Qungutsarissuusimassaaq illajasuusimassallunilu,’ ujarlerfissiami taama allassimavoq. Tupinnanngilaq qanorluunniit ukiullit ilaginissaa nuannarisimammassuk. Jesusip maligassiaa eqqarsaatigalugu immitsinnut aperisinnaavugut: ’Allat ilassiortuusutut isigaannga?’ ’Allanut tunngasunit sammisaannillu akornusertissallunga ulapippasippallaartarpunga?’ Inunnik allanik ilumoortumik soqutiginninnermik ineriartortitsinerup imminik tunniusimasunngortissavaatigut, Jesusip iliorsimaneratut. Ilumoortumik soqutiginninnerput allat malugissavaat qaninnerulerlutillu. — Ussatit 11:25.
Soorlu Markusip oqaluttuaata takutikkaa Jesusip meeqqat ilaginerat nuannarisimavaa. Pinnguartut isiginnaassallugit piffissaqarfigisarsimagunarpai, assersuusiamimi ilaanni pinnguarneri eqqaavai. (Matîuse 11:16-19) Immaqa meeqqat Jesusip pilluaqqusaasa ilaat kinaaneranik ajoqersuineranillu pingaartitsinissaminnut nukangavallaarput. Meeqqat asagamigit piffissaqarfigisimavai. Qularnanngilluinnarpoq Jesusip kiffartornermini meerarpassuit naapissimasai kingusinnerusukkut asanninneranit ajoqersuganngornissaminnut kajumissisinneqarsimassasut.
Jesusip inuunermini sapaatip-akunnerini kingullerni pingaaruteqartuni meeqqat piffissaqarfigisimappagit, soorunami aamma uagut inuunitsinni ulapinnartumi piffissaqarfigisinnaavavut. Immikkut pisariaqartitallit, soorlu meeqqat ataataqanngitsut anaanaqanngitsullu, immikkut eqqumaffigisariaqarpavut. Meeqqat soqutigineqarnertik alliartorluaatigisarpaat, Jehovallu kissaatigaa sapinngisarput tamaat asallugillu ikiussagivut. — Tussiaat 10:14. (wE 1/11 98)