Upperisartik pillugu uumissorneqartut
’Tamarmik uumissussavaasi atera pillugu.’ — MATÎUSE 10:22.
1, 2. Jehovap nalunaajaasuisa upperisarsiornertik pissutigalugu atortariaqarsimasaasa ilaat eqqaakkit.
KRETAMI pisiniarfiutilik peqqusersuitsoq minnerpaamik 60-eriarluni parnaarussassatut tigusaasarsimavoq 18-eriarlunilu eqqartuussivimmut sassartinneqartarsimalluni. Ukiut arfinillit sinnerlugit parnaarussaasimavoq, nuliaminit meeqqaminillu tallimanit avissaartinneqarluni. Japanimi ilinniartoq 17-inik ukiulik atuarfimminit anisitaavoq, naak pissuserikkaluarluni klassimilu ilinniartuni 42-ni pikkorinnersaagaluarluni. Frankrigimi inuppassuit suliffimminnit pissutissaqanngikkaluartumik soraarsitaasimapput, naak sulisutut eqiasuitsutut peqqissaartutullu ilisimaneqaraluarlutik. Pisimasut piviusut tamakku tamarmik sumik assigiissuteqarpat?
2 Inuit taakku tamarmik Jehovamut nalunaajaasuupput. Qanoq ilillutik ’pinerlussimappat’? Upperisartik maleruaramikku. Jesus Kristusip ajoqersuutigisimasaanut naalalluni pisiniarfiutillip allat upperisaminik oqaluttuuttarsimavai. (Matîuse 28:19, 20) Inatsit pisoqaq, upperisamut allamut ilanngutsitsiniarnissamik inerteqqut, naapertorlugu eqqartuunneqarpoq. Ilinniartoq Japanimiu atuarfimmit anisitaavoq nalunngeqatiginnissutsini Biibili tunngavigalugu ajoqersorneqartoq pissutigalugu kendomik (Japanimiut panaattaasiannik) sungiusarnermut pinngitsoorani peqataaffigeqqusaasumut peqataajumannginnami. (Jesaja 2:4) Frankrigimilu suliffimminnit soraarsitaasut paasitinneqarput Jehovamut nalunaajaasuunertik kisiat pissutigalugu soraarsitaallutik.
3. Sooq Jehovap nalunaajaasuisa amerlanersaat qaqutiguinnaq inoqatiminnit ingasattumik malersorneqartarpat?
3 Nunat ilaanni Jehovap nalunaajaasui ukiuni nutaanerusuni taama ingasatsigisumik misigisaqarsimapput. Jehovalli nalunaajaasuisa amerlanersaat qaqutiguinnaq inoqatiminnit malersugaasarput. Jehovap innuttai nunarsuaq tamakkerlugu ileqqorilluartutut ilisimaneqarput — tamannalu pissutigalugu ajoquserniassallugit kinaluunniit pissutissaqanngilaq. (1 Pîtruse 2:11, 12) Isertortukkut perlulioqatigiinniarneq ajorput ajortumeeriniarlutillu iliuuseqassanatik. (1 Pîtruse 4:15) Akerlianik Biibilip unnersuussutaa malillugu siullermik Guutimut taavalu naalakkersuisunut naalatsigitinniartarput. Inatsisit naapertorlugit akileraartarput ’inuillu tamaasa eqqissiveqatiginiarsaralugit’. (Rûmamiut 12:18; 13:6, 7; 1 Pîtruse 2:13-17) Biibilimik ilinniartitsiniarnerminni inatsisinik ilaqutariittut inuunermi nalilinnik ileqqussatigullu najoqqutassianik qutsissunik ataqqinninnissamik kajumissaarisarput. Innuttaasutut inatsisinik maleruaaniartutut naalakkersuisunit amerlasuunit nersorneqarsimapput. (Rûmamiut 13:3) Taamaakkaluartorli, soorlu qulaani eqqaaneqartoq, ilaannikkut assut akerlilersorneqartarput — nunat ilaanni allaat upperisarsiornerat inerteqqutigineqalersimalluni. Tamanna tupaallaatigisariaqarparput?
Ajoqersugaanerup ’akissaa’
4. Jesusimut ajoqersuganngorniaraanni taassuma oqaasii naapertussagaanni suna ilimagineqarsinnaava?
4 Jesusip paatsuugassaanngitsumik paasitippaatigut imminut ajoqersuganngorneq sumik nassataqarumaartoq. Malinnitsini ima oqaluttuuppai: ’Kiffaq naalakkaminit annerunngilaq. Uanga qinugigaminga ilississaaq qinugiumaarpaasi.’ Jesus ’pinngikkaatik uumissorpaat’. (Juánase 15:18-20, 25; Tussiaat 69:5; Lúkarse 23:22) Ajoqersugai tamatumunnga assingusumik ilimagisaqarsinnaapput — pissutissaqanngitsumik akerlilersorneqarumaarlutik. Arlaleriarluni ima mianersoqquai: ’Tamarmik uumissussavaasi.’ — Matîuse 10:22; 24:9.
5, 6. (a) Sooq Jesusip imminnut malinninniartut kajumissaarpai ’akissaa naatsorsoqqullugu’? (b) Sooq tupaallaatigisariaqanngilarput akerlilersorneqalerutta?
5 Taamaattumik Jesusip malinnittussani kajumissaarpai ajoqersuganngornissamik ’akissaa naatsorsoqqullugu’. (Lúkarse 14:28) Suna siunertaralugu? Jesus malissanerlugu malissannginnerluguluunniit apeqqutaanngilaq, kisianni malinnissaata nassatarisai naammassissallugit aalajangernissaq pineqarpoq. Misilinneqarnerit artornartullu immikkut pisinnaatitaaffimmut ilaasut naammagalugit atornissaannut pisareersimasariaqarpugut. (Lúkarse 14:27) Kristusimut malinnittutut Jehovamut kiffartornissatsinnut pinngitsaalineqanngilagut. Nammineq piumassutsitsinnit taama aalajangertariaqarpugut; aammalu ilisimasaqarluarneq tunngavigalugu aalajangertariaqarpugut. Nalunngilarput Guutimut tunniulluinnarutta annertuumik pilluaqqusaanerit misigiumaarlugit aammali ’tamanit uumissorneqassalluta’. Taamaattumik alerlilersorneqaleraangatta tupigusuutigisanngilarput. ’Akissaa naatsorsoreerparput’, akilernissaanullu piareersimalluinnartarpugut. — 1 Pîtruse 4:12-14.
6 Sunali pillugu ilaasa, ilaatigut naalakkersuisut oqartussaasullu, kristumiut ilumoortut akerlilersortarpaat? Tamanna paasiniarlugu ukiuni hundredelinni siullerni upperisarsioqatigiit immikkoortut marluk misissoriartigik. Tamarmik uumissorneqartarsimapput — assigiinngitsulli pissutigalugit.
Uumissuillutillu uumissorneqartut
7, 8. Ajoqersuutit suut juutiunngitsunik ajattuinermut ersiutaasimappat, tamakkulu pissutigalugit juutit amerlasuut qanoq isumaqaleriartorsimappat?
7 Ukiuni hundredelinni siullerni u.n.k. Israel Romamiunit naalakkersorneqarpoq, juutillu upperisarsiornikkut aaqqissuussaanerat amerlanertigut farisiiarinit allakkanillu ilisimatuunit naqisimannittumik qulangersimaneqarpoq. (Matîuse 23:2-4) Siuttut taakkua ingasaassisut Mosesip inatsisaasa ilaat inuiaqatigiinnit immikkoornissamik peqqussut atornerlullugu juutiunngitsunik asissuinissaq peqqussutigaat. Taamaalillutik upperisarsiorneq juutiunngitsunik uumissuititsisoq aammalu nammineq taakkunannga uumissorneqartussaq pilersippaat.
8 Juutit siuttuisa nunami allamiunik asissuinissaq ajoqersuutigissallugu artornartinngilaat, taamanikkut juutit juutiunngitsunik nikaginnittuummata. Upperisarsiornikkut siuttut ajoqersuutigaat arnaq juutiusoq kisimiilluni Guutimik nalusut akornanniinngisaannassasoq, ’tiingatuusorineqarmata’. Angut juutiusoq ’kisimiilluni [Guutimik nalusut] akornanniissanngilaq aammik kuisisuusorineqarmata’. Immuiaasoq juutiunngippat immuk atortussaajunnaarsinneqartarpoq immuiaaneq juutimit nakkutigineqarsimanngippat. Siuttuminnit sunnerneqarlutik juutit immikkoorniassuseq pallitassaanngilluinnassuserlu ineriartortissimavaat. — Naleqqiuguk Juánase 4:9.
9. Juutit upperisarsiornikkut siuttuisa juutiunngitsut pillugit ajoqersuutigisaat sumik kinguneqarsimappat?
9 Ajoqersuutit taamaattut juutit juutiunngitsullu akornanni ajunngitsumik attaveqartitsisimanngillat. Ukiut ingerlaneranni juutiunngitsut juutit inuiannik tamanik uumissuisutut isigilerpaat. Oqaluttuarisaanermik ilisimatooq Romamiu Tacitus (ukiup 56-ip missaani inunngortoq) allassimavoq juutit ’inuiaat allat tamaasa akeqqamissut uumissoraat’. Tacitus aamma oqarpoq nunami allamiut juutinut ilasianngoraangamik ajoqersorneqartartut nunartik miserratigissallugu ilaquttatillu ikinngutitillu nikanartutut isigissallugit. Amerlanertigut Romamiut juutinik akuerinnittuupput, amerlaqimmata. Ukiumili 66-imi u.n.k. juutit pikitsitsimmata Romamiut akiniaapput, naggataatigullu ukiumi 70-imi u.n.k. Jerusalem aserorneqarluinnarpoq.
10, 11. (a) Mosesip inatsisai naapertorlugit nunami allamiut qanoq iliorfigineqartussaasimappat? (b) Juutiussutsimut tunngatillugu pisimasut qanoq ilinniutigisinnaavavut?
10 Pallorfiginninnermut Mosesip inatsisaani allaatigineqartumut naleqqiullugu nunami allamiunik isiginninneq tamanna qanoq ittuua? Inatsisini inuiaqatigiinnit allanit immikkoorneq pingaartinneqarpoq, tamatumanili Israelikkut, ingammillu minguitsumik guutisiornerata, illersorneqarnissaat siunertarineqarpoq. (Josva 23:6-8) Taamaattorli Inatsisini peqqussutigineqarpoq nunami allamiut naapertuilluartumik peqqusersuitsumillu iliorfigineqassasut inoroorsaarfigineqassallutillu — Israelikkut inatsisaannik ingasattumik unioqqutitsinngippata. (3 Moses 24:22) Anersaaq ingasaassinianngitsoq allamiut pillugit inatsisinut tunngaviusoq qimakkiartoramikku juutit upperisarsiornikkut siuttuisa Jesusip nalaani inuusut pallorfiginninneq uumissuititsisoq, aammalu nammineq uumissugaasoq, ineriartortippaat. Naggataatigut ukiuni hundredelinni siullerni inuiaqatigiit juutiusut Guutimut iluarisaajunnaarput. — Matîuse 23:38.
11 Tamanna ilinniutigisinnaanerparput? Aap! Imminut iluartuutinniarluni pingaakujuppaluttumik allamik uperisalinnik ajattuisumik isiginneriaaseq Jehovamik ilumoortumik pallorfiginninnermut ersiutaanngilaq, taassumanngalu iluarisaanani. Eqqarsaatigikkit kristumiut ilumoortut ukiuni hundredelinni siullerni inuusut. Kristumiuunngitsunik uumissuineq ajorput, Romamullu pikitsitsiniarnatik. Taamaattoq ’tamanit uumissorneqarput’. Sooq? Kikkunnillu uumissorneqarpat?
Kristumiut siulliit kikkunnit uumissorneqarsimappat?
12. Biibilimi qanoq erseqqissarneqarpa Jesusip kissaatigigaa malinnitsini kristumiuunngitsunik oqimaaqatigiissumik isiginnittaaseqassasut?
12 Jesusip ajoqersuisarnerani ersersinneqarluarpoq kissaatigigaa ajoqersukkami kristumiuunngitsut oqimaaqatigiissumik isigisariaqaraat. Aammali oqarsimavoq malinnitsini silamiunut ilaassanngitsut — ima paasillugu isummat iliuutsillu Jehovap naapertuilluartumik aqqutigeqqusaanut akerliusut ingalassimasariaqaraat. Sorsunnernut naalakkersuinermullu kalluunnaveersaartariaqarput. (Juánase 17:14, 16) Aappaatigulli kristumiuunngitsut asissorneqarnissaannut kajumissaarinani Jesusip malinnitsini peqquai ’qinngarsortitik asaniaqqullugit’. (Matîuse 5:44) Apustili Paulusip kristumiut ima kajumissaarpai: ’Qinngarsortit kaappat nerleruk, imerusuppallu immiguk.’ (Rûmamiut 12:20) Aamma kristumiut oqarfigai ’tamanut ajunngitsulioqqullugit’. — Galâsiamiut 6:10.
13. Suna pillugu juutit upperisarsiornikkut siuttuisa Kristusip ajoqersugai taama akerlilersortigisimavaat?
13 Taamaattoq kristumiut erniinnaq immikkoortunit pingasunit ’uumissorneqalerput’. Uumissuisut siulliit tassaapput juutit upperisarsiornikkut siuttui. Tupinnanngilaq taakkua erniinnaq kristumiut malugilermatigik. Kristumiut ileqqussatigut assuarnaassutsikkullu najoqqutassiat qutsissut maleruarpaat, ilungersuussillutillu tusarliussaq neriulernartoq oqaluussissutigisarlugu. Inuit tuusintilikkuutaat juutiussuseq qimappaat kristumiunngorlutillu. (apustilit suliait 2:41; 4:4; 6:7) Juutit upperisarsiornikkut siuttuisa isaanni Jesusip ajoqersugai juutiusut tassaaginnarput tunussisut! (Naleqqiuguk apustilit suliait 13:45.) Siuttut kamattut taakku isumaqarput kristumiut juutit ileqqutoqqaat atorunnaarsikkaat. Allaat juutiunngitsut pillugit isiginnittaasiat assuaraat! Ukiumit 36-mit u.n.k. juutiunngitsut kristumiunngorsinnaalerput, kristumiutullu upperisaq pigalugu immikkut pisinnaatitaaffiit nuannaarutigisinnaalerlugit, juutit naligilluinnarlugit. — apustilit suliait 10:34, 35.
14, 15. (a) Sooq kristumiut Guutimik nalusunit guutipilussiortunit uumissorneqarsimappat? Tamatumunnga assersuummik taasaqarit. (b) Kikkut aamma kristumiunik uumissuisimappat?
14 Aappassaanik, kristumiut Guutimik nalusunit guutipilussiortunit uumissorneqarput. Assersuutigalugu Efesusitoqqami guutip arnap Artemisip naalaffia assilillugu siilvimik illernartuutiliortarneq aningaasarsiutaasorujussuuvoq. Paulusili tamaannga tikimmat Efesusimiorpassuit tusarliussamik ilassinnipput Artemisimik guutisiorneq taamaatillugu. Inuussutissarsiutertik aarlerinartorsiulermat siilviliortut perulluliulerput. (apustilit suliait 19:24-41) Kristumiuussuseq Bityniamut, ullumikkut Tyrkiap avannaata kitikannianiittumut, anngummat tamatumani assingusumik pisoqalerpoq. Kristumiut Allagaataasa Griikerisuut naammassineqarnerata kinguninnguani Bityniami naalagaasup, Pliniusip Nukarliup, nalunaarutigaa Guutimik nalusut naalaffii ornigarneqartarunnaarsimasut uumasullu pilliutigineqartussat nerisassaannik niuerneq appariarsimaqisoq. Kristumiut tamatumunnga pisuutinneqarput — malersorneqarlutillu — taakkua guutisiorneranni uumasunik pilliutit inuusaliallu atoqqusaanngimmata. (Eprîarit 10:1-9; 1 Juánase 5:21) Ersarippoq kristumiussutsip siammarnera guutipilussiornermut atatillugu iluanaarniuteqarnermut sunniuteqarnerluttoq, tamatumanilu annaasaqartut tamanna ajuallaatigeqaat.
15 Pingajussaanik, kristumiut Romamiunit inuiaassutsiminnik pingaartitsivallaartunit ’uumissorneqarput’. Aallaqqaataani kristumiut upperisarsiortutut ikittuinnartut immaqalu ingasaassisutut Romamiunit isigineqarput. Ukiulli ingerlaneranni kristumiutut nassuerneq pinerlunnertut toqumik pillaatissinneqartussatut isigineqalerpoq. Sooq innuttaasut peqqusersuitsut kristumiutut inuusut malersorneqartussatut toqunneqartussatullu isigineqalerpat?
Kristumiut sulliit — sooq Romamiut naalagaaffissuanni uumissorneqarpat?
16. Kristumiut qanoq ilillutik silamiunit immikkoorsimappat, taamaattumillu sooq Romamiut silarsuaanni iluarineqanngillat?
16 Kristumiut Romamiut naalagaaffissuanni uumissorneqarsimapput pingaartumik upperisarsiornertik pissutigalugu. Assersuutigalugu silarsuarmut matumunnga akuliukkumanngillat. (Juánase 15:19) Taamaattumik naalakkersuinermut atasumik atorfeqarneq ajorput sakkutuutullu kiffartorneq ajorlutik. Tamanna pissutigalugu ’silarsuarmik matuminnga soqutigisaqanngivissutut inuunermilu suliassani tamani atorfissaqanngitsutut oqaatigineqartarput,’ oqaluttuarisaanermik ilisimatooq August Neander taama oqarsimavoq. Silamiut ilaginngimmatsik Romamiut ajortunngorsimanerat ingalassimavaat. „Kristumiut ilagiissaat ikittunnguit piuaassusertik assuarnaassusertillu pissutigalugit Guutimik nalusunit inuulluapilukkumatuunit uumitsaanneqartarput,“ oqaluttuarisaanermik ilisimatooq Will Durant taama oqarsimavoq. (1 Pîtruse 4:3, 4) Kristumiut malersornerisigut toquttarnerisigullu Romamiut immaqa ilerasuuteqarnertik annikilliornartoq nipangertinniarsarisimavaat.
17. Suup takutippaa kristumiut ukiuni hundredelinni siullerni oqaluussissutiginninnerat sunniuteqarluarsimasoq?
17 Ukiuni hundredelinni siullerni kristumiut ilungersuussilluinnarlutik Guutip naalagaaffia pillugu nutaarsiassaq nuannersoq oqaluussissutigisarpaat. (Matîuse 24:14) Ukiup 60-ip u.n.k. missaani Paulus oqarsinnaasimavoq nutaarsiassaq nuannersoq ’pinngortitani tamani qilaap ataaniittuni oqaluussissutigineqareersoq’. (Kulorsamiut 1:23) Ukiut hundredellit siulliit naalerneranni Jesusip malinnittai Romamiut naalagaaffissuanni sumi tamaani ajoqersugaqarput — Asiami, Europami Afrikamilu! Allaat ’kaasarip illoqataasa’ ilaat kristumiunngorsimapput.a (Filípimiut 4:22) Neander oqarsimavoq: „Kristumiussuseq inuit sumilluunniit inissisimafillit akornanni siammarsimavoq, taamaalillunilu naalagaaffiup upperisarsiorneranut aarlerinartuulerluni.“
18. Kristumiut Jehovamut tunniusimalluinnarnerata qanoq Romamiut naalakkersuisuinut akueriuminaatsuutissimavai?
18 Jesusip malinnittai Jehovamut tunniusimalluinnarput. (Matîuse 4:8-10) Immaqa pallorfiginninneranni ingammik tamannarpiaq pissutigalugu Romamiut uumissorpaat. Romamiut upperisarsiornerit assigiinngitsut akuerisarpaat, upperisarsiortut taakkua aamma kaasarimut guutisiorpata. Kristumiulli siulliit guutisiorneq taama ittoq peqataaffigisinnaanngivippaat. Naalakkamut Romamiut naalagaaffissuannit qutsinnerungaartumut, Jehova Guutimut, naalannerpaasariaqartutut misigipput. (apustilit suliait 5:29) Taamaattumik kristumiu qanorluunniit innuttaalluartigigaluaruni naalagaaffiup akeraatut isigineqartarpoq.
19, 20. (a) Ingammik kikkut kristumiut aalajaatsut ajortumik mamarlerneqarsimanerannut pisuuppat? (b) Kristumiut qanoq sallusumik unnerluutigineqarsimappat?
19 Kristumiut aalajaatsut Romamiut silarsuaanni ’tamanit uumissorneqarnerannut’ aamma allamik pissutissaqarpoq: Taakku pillugit ajortumik mamarliisut inuppassuit upperiinnarpaat, pingaartumik juutit upperisarsiornikkut siuttui pisuullutik. (apustilit suliait 17:5-8) Ukiumi 60-imi 61-imilu Paulus kaasarimit Neromit eqqartuussaanissani utaqqillugu Romamiitillugu juutit siuttuusut kristumiut pillugit ima oqaaseqarput: ’Immikkoorniaqatigiit taakku tamaginni assortorneqartut ilisimavavut.’ (apustilit suliait 28:22) Qularnanngitsumik Nerop aamma mamarliinerit tusarsimavai. Oqaatigineqarpoq ukiumi 64-imi Romami ikuallannersuarmut pisuutinneqarami Nerop kristumiut ajornerarneqangaareersut tamatumunnga pisuutikkai. Tamanna pissutigigunarlugu malersugaanersuaq kristumiut nungutitaanissaannik siunertalik pilerpoq.
20 Kristumiunut ilumuunngitsumik unnerluutit tassaagajupput salluliuutit ajoqersuutaannillu eqqunngitsumik issuaanerit imminnut akuliunneqartut. Ataasiinnarmik Guuteqaramik kaasarilu pallorfigiumannginnamikku guuteqanngitsutut pasillerneqarput. Kristumiuunngitsullu ilaasa ilaquttatik kristumiuusut assortortarmatigik kristumiut ilaqutariinnik avissaartitsisutut unnerluutigineqartarput. (Matîuse 10:21) Inuttuumasutut oqaatigineqartarput, immaqa Jesusip Naalakkap unnukkorsiortitsinerani oqaaserisaanik mumitsineq pissutigalugu. — Matîuse 26:26-28.
21. Suut marluk pissutigalugit kristumiut ’tamanit uumissorneqarsimappat’?
21 Taamaattumik kristumiut aalajaatsut Romamiunit uumissorneqarput makku marluk pissutigalugit: (1) Biibili tunngavigalugu upperisaqarnerat iliuuserisartagaallu, aamma (2) eqqunngitsumik unnerluutigisaanerat. Sunaluunniit pissutaagaluarpat unnerluussisut ataasiinnarmik siunertaqarput — kristumiussutsip naqisimaneqarnissaa. Soorunami kristumiut malersorneqarnissaannik pilersitsisuiit tassaapput akerlilersuisut inunnit pissaaneqarnerusut, anersaapiluit takussaanngitsut. — Evfisumiut 6:12.
22. (a) Pisimasup suup takutippaa Jehovap nalunaajaasuisa ’tamanut ajunngitsuliornissaq’ noqqaassutigisaraat? (Takuuk qupperneq 11-mi ungalusaq.) (b) Allaaserisami tulliuttumi suut sammineqassappat?
22 Kristumiut siulliit assigalugit Jehovap nalunaajaasui ullumikkut nunani assigiinngitsuni ’tamanit uumissorneqarsimapput’. Taamaattorli taakkua nalunaajaasuunngitsunik uumissuineq ajorput, aamma naalakkersuisunut pikitsitsiniarneq ajorlutik. Akerlianik silarsuaq tamakkerlugu innuttaaqatigiissutsikkut, naggueqatigiissutsikkut inuiaassutsikkullu akornutaasunik asanninnikkut qaangiiniartartutut ilisimaneqarluarput. Soormi taava malersorneqartarpat? Akerlilersorneqarnertillu qanoq qisuariarfigisarpaat? Apeqqutit tamakku allaaserisami tulliuttumi sammineqassapput. (wE 1/12 98)
[Quppernerup ataani ilanngussaq]
a Allassimammat ’kaasarip illoqatai’ taamani kaasarip Nerop qanittumik ilaqutai pineqartariaqanngillat. Tassaasinnaapput kaasarip inoqutaanut kiffaasut illuanilu atorfillit, soorlu igaffimmiut asaasartullu.
Qanoq akissavigit?
□ Sooq Jesusip imminnut malinninniartut kajumissaarpai ’ akissaa naatsorsoqqullugu ’?
□ Juutiunngitsunik isiginnittaaseq nalinginnaasoq juutiussutsimut qanoq sunniuteqarsimava, tamannalu qanoq ilinniutigisinnaavarput?
□ Kristumiut siulliit aalajaatsut immikkoortunit pingasunit kikkunnit akerlilersorneqarsimappat?
□ Assigiinngitsut marluk suut pissutigalugit kristumiut siulliit Romamiunit uumissorneqarsimappat?
[Qupp. 11-mi ungalusaq]
’Tamanut ajunngitsuliortarput’
Jehovap nalunaajaasuisa Biibilip ’tamanut ajunngitsuliornissamik’ oqaaqqissaarinera maleruarniarsaraat. (Galâsiamiut 6:10) Ajornartoortoqaraangat tullermut asanninneq killissutigalugu allamik upperisallit ikiorniartarpaat. Assersuutigalugu 1994-imi Rwandami ajoqisumik pisoqarmat nalunaajaasut Europameersut Afrikaliarput ajornartoortunik ikiuinissaq aaqqissorniarlugu. Qimaasunut inissiat nakorsiartarfiillu sukkasuumik pilersinneqarput. Nerisassarpassuit, atisarpassuit tæpperpassuillu timmisartumik tikisinneqarput. Qimaasut ajornartoortunik ikiuinermik tamatuminnga tunineqartut nalunaajaasut tamaaniittut pingasoriaatigaat.
[Qupp. 9-mi assiliartaq]
Ukiuni hundredelinni siullerni kristumiut ilungersuussilluinnarlutik nutaarsiassaq nuannersoq oqaluussissutigisimavaat