Qanoq ililluni maniguunnermik piviusumik ersersitsisoqarsinnaava?

MANIGUUNNEQ piviusoq Guutip isaani nalilerujussuuvoq. Jakob ima allassimavoq: ’Anneruniartut Guutip akerartorpai, nikanartittulli saammaattarpai.’ (Jâko 4:6) Tassani Jakob eqqarsaatit Allakkanit Hebriiarisuuneersut makku innersuussutigisimasinnaavai: „[Jehova] qutsinnermiippoq, [maniguuttulli, NV] isigai, imminnut angisuutittut nalunngilai ungasissumit.“ „Inuup isini makitarpaluttut nakatissavai, angutit makitanaveersagaassapput, [Jehovalu] kisimi ullussami issumani qutsinnerussaaq.“ „[Guuti] mitaatilliisunut mitaatilliisarpoq, qanilaartunulli saammaassisarpoq.“ — Tussiaat 138:6; Jesaja 2:11; Ussatit 3:34.

Aammattaaq apustili Peterip kristumiut maniguunnissaannik kajumissaarsimavai, ima allalluni: ’Tamassimi ilissinnut nikanartinnermik assuuseritsi, anneruniartut Guutip akerartormagit, nikanartittulli saammaattarlugit.’ — 1 Pîtruse 5:5.

Kristusip maniguussutsikkut maligassiaa

Immaqa ima aperiumassaatit: ’Maniguuttuuneq ileqqussatigut allatigullu sunik iluaqutissartaqarami?’ Kristumiutut ilumoortutut inuuniarluni ilungersortumut akissut nalunanngilaq: Maniguukkuit Jesusitut issaatit. Jesus maniguunnermik ersersitsisimavoq suliassaq asseqanngitsoq, qilammi inissisimaffini qimallugu nunarsuarmi maani inuttut inuulernerminik taamaalillunilu inngilinit atsinnerulernerminik nassataqartoq, ilassigamiuk. (Eprîarit 2:7) Naak Guutimut ernerugaluarluni upperisarsiornikkut akeqqami nikanarsaaneri naammagittarluni atorsimavai. Misilinneqartarnermini tatitujuarpoq, massa inngilinut legionilikkuutaanut ikioriartoqqoriaannaagaluarluni. — Matîuse 26:53.

Nikanarsagaasutut qisummi nappakkami toqutaagaluarluni Jesus Ataataminut aalajaattuarpoq. Taassuma maligassiaa Paulusip innersuussutigaa ima allakkami: ’Ima isumaqaritsi soorlu Kristus Jesus; Guutip taattua taassuma pigigaluaramiuk Guutisut issutsi paggatigisatut isumaqartinngilaa, pissutsili iperarpaa kiffap taattua atillugu inuillu assigilerlugit; inuttullu pissuseqarluni malunnarsigami imminik nikanarsarpoq naalaannarluni toqumut allaat, massami [qisummi nappakkami, NV] toqumut allaat.’ — Filípimiut 2:5-8.

Maniguunneq piviusoq qanoq ersersinnerusinnaavarput? Qanoq ililluta pissutsini assigiinngitsuni pingaarniarnermut taarsiullugu maniguunniarsinnaavugut?

Inuk maniguuttoq qanoq qisuariartartoq

Siullermik sammeriartigu qanoq ililluni suliffimmi kristumiutullu kiffartornermi maniguuttoqarsinnaasoq. Suliaq pitsaasumik naammassineqassappat siuttuusussamik aalajangiisartussamillu toqqaanissaq pisariaqarsinnaasarpoq. Qullersaasumit arlaannik suliassinneqaraangavit qanoq qisuariartarpit? Ima eqqarsartarpit: ’Kinaasorigamiuna naalakkersorniarsarigaanga? Taassumannga sivisunerusumik maani sulivunga.’ Pingaarniartuugaanni naalatsigitinnissaq ajornakusoortorujussuusinnaavoq. Maniguuttulli ’saqitsaagajunnermit piunngitsumillu ataqqineqarumanermit pinnani, kisianni qanilaarluni ilani imminit annerutinniartarpai’. — Filípimiut 2:3.

Ilinnit nukarliunerusumit misilittagakinnerusumilluunniit siunnersorneqaraangavit qanoq qisuariartarpit? Maniguuttoq siunnersuutigineqartup eqqarsaatigiinnarnissaanulluunniit piumassuseqartarpoq. Pingaarniartorli ajuallattarpoq siunnersuutigineqartorlu ingerlaannaq itigartittarlugu. Suna pitsaanerua? Ingasattumik nersualaarneqarneq siumukarnissaraluamik akornusiisoq, imaluunniit atorluarsinnaasumik iluaqutaasinnaasumillu siunnersorneqarneq? — Ussatit 27:9; 29:5

Atoruminaatsorsiornermi nikallujuissinnaavit? Maniguussuseq iluaqutigalugu Jobitut pissutsit ajornakusoortut nikallujuillutit atorsinnaavatit. Pingaarniartoq pissutsit pissusissamissut ingerlanngikkaangata nikallortarpoq ajuallatsinniarsorineqarninilu ajuallaatigisarlugit naammagittaalliutigisarlugillu. — Job 1:22; 2:10; 27:2-5.

Maniguuttoq asannittuuvoq isumakkeerfiginnittarlunilu

Ilaasa ima oqarnissartik ajornakusoortittarpaat: „Utoqqatserpunga. Kukkuvunga. Ilumoorputit.“ Sooq? Pingaarniarpallaaramik! Ilumoorlunili utoqqatsernerinnaq, assersuutigalugu aappariit akornanni, assortuunnermik kipititsigajuppoq.

Ajuallatsinneqaraangavit isumakkeerfiginneriaannaasarpit? Imaluunniit pingaarniarneq pissutigalugu puttarsisaqartarpit ajuallatsitsisorlu qaammaterpassuarni oqaluukkumassanagu? Immaqalu allaat akiniaaniartarpit? Akiniaanerit ilaat inuarnermik imaluunniit nikassaaqattaarnerup nassatarisaanik tusaamanerlugaalernermik kinguneqartarput. Akerlianik maniguuttoq asanittuullunilu isumakkeerfiginnittarpoq. Taamaappoq asannittoq eqqunngitsumik iliorfigineqarnerminik tamanik naatsorsueqqissaarneq ajormat. Jehovap Israelikkut pingaarniassusertik ’iiumappassuk’ isumakkeerfigeriaannaasarsimavai. Jesusip ajoqersugai maniguuttut isumakkeerfiginneriaannaasarput, ataasiaannaratik, arlaleriarujussuarlutilli. — Joel 2:12-14; Matîuse 18:21, 22; 1 Korintumiut 13:5.

Maniguuttut ’ataqqeqatigiittarput ingiaqattaallutik’. (Rûmamiut 12:10) Biibilimik nutsikkami New International Version-imi versi tamanna ima nutserneqarsimavoq: „Imminut ataqqinissinnit annermik ataqqeqatigiissaasi.“ Allat nersualaartarpigit piginnaanerilu pingaartillugit? Imaluunniit tusaamanerlugaalersinniarlugit sanngiissutaannik ujarlertuaannarpit? Ilumoorlutit allat nesualaarsinnaavigit? Tamanna ajornakusoortikkukku immaqa nalornineq pingaarniarnerluunniit ajornartorsiutigisimassavat.

Pingaarniartoq naammagittaatsuuvoq. Maniguuttoq naammagittartuullunilu kamagittartuuvoq. Illimmi? Ajortumik pineqartutut misigigaangavit ingerlaannaq kamalertarpit? Taamatut qisuariarneq kamagittarnerup akerleraa. Maniguuttoq imminut pingaartorsiutigineq ajorpoq. Eqqaamajuk qanoq pisoqartoq Jesusip ajoqersugai imminnut pingaartorsiutigivallaalermata — kina arlartik annerunersoq assortuussutigilerpaat. Puiorpaat tassaannaallutik ’kiffat atunngitsut’. — Lúkarse 17:10; 22:24; Mákorse 10:35-37, 41.

Atuakkiortup franskip Voltairep maniguussuseq tassaanerarsimavaa „tarnip anneruniajuissusia . . . pingaarniassutsimut akiuussutissaq“. Aap, maniguussuseq tassaavoq anneruniajuissuseq. Inuk maniguuttoq isumakkut anneruniajuitsuuvoq, pingaarniartuunani. Allanik ataqqinnilluinnartuuvoq inussiarnersuullunilu.

Sooq maniguunnermik ineriartortitsisariaqarpugut? Maniguunneq pissusiummat Guutip iluarisaa taassumanngalu siulersortinnissamik oqinnerulersitsisoq. Daniel ilaatigut maniguunnini pissutigalugu ’Jehovamit nuannarineqangaarsimavoq’ inngilimillu aallartitsivigineqarsimalluni takorruuisinneqarlunilu. (Daniel 9:23; 10:11, 19) Maniguunneq pilluaqqusaanerpassuarnik nassataqartarpoq. Ilumoortunik ikinngutitaarnissatsinnut iluaqutigisarparput, pingaarnerpaamillu, Jehovap pilluaqqusineranik kinguneqartarpoq. „Guutimik mianerinninnerup qanilaarnerullu [tassa: maniguunnerullu] akissarsiarititaat tassaapput pisuussutit, ataqqinaat inuunerlu.“ — Ussatit 22:4. (wE 1/2 99)

[Qupp. 7-imi assiliartaq]

Maniguulluni utoqqatserneq allanut attaveqarluarnermik kinguneqartarpoq