Sapiillipput

OQALUUSSINISSAMUT sapiillinissaq tamatigut piuminartuunngikkaluarpoq. Apustili Paulus oqarpoq ilaanni ’assoruungaarluni’ taamaaliortarluni. (1 Tásalûníkamiut 2:2) Oqaluussinissamut ’assoruungaarneq’ imminut akilersinnaava? Immikkut misilittagaqarnissaq qulakkeerneqarsinnaanngikkaluarpoq, Guutilli innuttaasa sapiillisimagaangamik nuannaarutigisarpaat. Assersuutit ilaat eqqarsaatigikkit.

Niviarsiaqqap Taramik atillip, arfineq-pingasunik ukiullip, tusarnaaqqissaarpaa ilinniartitsisup atuartut oqaluttuukkai sorsunnersuup kingulliup nalaani juutit tigusanut inissiarsuarniittut Davidip ulloriaanik taaneqartoq sungaartoq ilisarnaatitut atortariaqarsimagaat. Tarap oqaaseqassanerluni eqqarsaatigaa. „Uisallunga qinuvunga,“ oqaluttuarpoq. Taava nappaavoq oqarlunilu Jehovap Nalunaajaasuittaaq tigusanut inissiarsuarniittut, taakkualu pingasunik teqaqqulik tungujortoq aappaluaartoq ilisarnaatigisimagaat. Ilinniartitsisup soqutiginartippaa qujallunilu. Kingusinnerusukkut Tara periarfissaqarpoq ilinniartitsisup oqaloqatigeqqinnissaanut, taassumalu atuartitaminut tamanut videofilmi Jehovas Vidner står fast trods nazismens terror takutippaa.

Guineami Afrikap kitaaniittumi, oqaluussisartoq inuusuttoq kuisimanngitsoq Irènemik atilik kiffartornermini siumukarusuppoq. Ajoqersuiartortitap atuaqqissaaqatiginnittup kajumissaarpaa atuaqatiminut atuagassianik Napasuliaq Alapernaarsuffik-​mik Iteritsi!-millu neqerooruteqaqqullugu. Atuaqatini soqutiginninneq ajormata Irène nangaavoq. Taamaakkaluartoq ajoqersuiartortitamit kajumissaarneqarami Irène aalajangerpoq siullermik atuartut assortuisuunersaat saaffigeqqaariarlugu. Irènep tupigusuutigisaanik niviarsiaraq taanna soqutiginnittuuvoq kajumillunilu atuagassiat tigullugit. Atuartut allat aamma taamaaliorput. Qaammammi tamatumani Irènep atuagassiat qaammatit tallimat kingulliit ingerlaneranni agguaassimasaminnit amerlanerusut agguaassimavai.

Trinidadimi utoqqaanertaasup nangaassutigeqaa atuarfimmi pisortap saaffiginissaa atuagassiap Iteritsi!-p ilinniartitsinermut atorsinnaassusia takutinniarlugu. Sapiillivorli. Ima oqarpoq: „Atuarfik ornitsillugu qinuvunga. Tupigusuutigeqaara pisortaq inussiarnersupilussuummat.“ Iteritsi! ima qulequtalik: „Ullumikkut inuusuttunut sumik neriuutissaqarpa?“ tiguaa ilinniartitsinerminilu atornissaa akueralugu. Tamaaniilli atuagassiat 40-t assigiinngitsunik qulequtallit tigusimavai.

Inuusuttuutilluni Vaughnip oqaluussineq sapernartittarpaa. „Annilaangavunga, assakkut kiagullunga sukavallaartumillu oqalullunga — eqqissisimasinnaanngilanga.“ Taamaattoq piffissaq tamaat oqaluussisartunngorpoq. Sulili oqaluussineq sapernartippaa. Ullut ilaanni iluatsitsinani suliffissarsioreerluni aalajangerpoq qimuttuitsuni nalunaajaaniarluni „ullormi asuliinnarpasikkaluartumi angusaqarusulluni“. Qimuttuitsunili inuit niuernermi suliaqartut pingaarpasissut takullugit nakimavoq. Naggataatigut sapiillisaarluni angut utoqqasaaq issiaqatigisani saaffigaa. Sivisuumik oqaloqatigiipput. „Taama inuusutsigigaluarlutit apeqqutit pitsaasut eqqartorpatit,“ niuertoq oqarpoq aperalunilu: „Upperisarsiornermik ilinniarsimasuuit?“ Vaughn akivoq: „Naamik, Jehovamut nalunaajaasuuvunga.“ „Aap,“ angut qungujulluni oqarpoq. „Maanna paasivara.“

Nalunaajaasut taakku tamarmik — allarpassuillu — nuannaarutigaat oqaluussinissamut sapiillisimagamik. Illittaaq taamaaliussavit? (wE 15/12 99)

[Qupp. 26-mi assiliartaq]

Tara

[Qupp. 26-mi assiliartaq]

Vaughn