Mianersoqqussut sianigiuk!

JUUNIP 3-ani 1991-imi Japanimi qaqqamit innermik anitsisartumit Fugenimit qaarpallannerujussuaq qoqianngunaqisoq tutsiuppoq sakkortoqisumik gassit arsakullu kuuinnavissut aniatilermagit. Akusaq kissaqisoq qaqqap sivingarnatigut kuiinnavippoq. Anitsineq inuit 43-it inuunerannik akeqarpoq. Annaqqavissut amerlasuut uutitersimaqaat. „Imermik! Imermik! Imermik aggiussilaaritsi!“ ilaat nilliapput. Qatserisartunit politiinillu tuaviinnaq ikioriartorneqarput.

SAPAATIP AKUNNERI MARLUK tamanna sioqqullugu innermik anitsisartup Fugenip qaarpiaani anngaq qattuninnguussimasoq malugineqarsimavoq, taamaattumik oqartussaasut innuttaasullu kalerrisaarneqarnissaminnut sillimasimapput. Sapaatip-akunnerata missaa ajunaarneq sioqqullugu tamaaniittut qimaanissaat kajumissaarutigineqarsimavoq. Ulloq ataasiinnaq anitsinissaq sioqqullugu aviisiliortut politiinit qinnuigineqarsimapput assiaqutsiussaq qanilleqqunagu. Taamaakkaluartoq ullormi tassani ajortumik pisoqarfiusumi ualikkut ulorianartorsiorfiusumiittut 43-it ajunaarput.

Soorliuna taama amerlatigisut sapiiserlutik tassaniittut imaluunniit qimaanngitsut? Ilaat nunaatiliupput illutik qimareerlugit narsaatitik pigisatillu takuniarlugit utersimasut. Qaqqanik innermik anitsisartunik ilisimasallit pingasut anitsisartoq sapinngisaminnik qanillinerpaaniarsimavaat suliaminnut tunngatillugu alapernaannermik. Aviisiliortut assiliisullu arlallit assiaqutsiussaq qaangersimavaat tusagassanik uissuumminarluartunik qaqqap innermik anitsilerneranut tunngasunik aviisinut ilanngutassianik pissarsiniarlutik. Aammattaaq taxartartut pingasut aviisiliortunik angallassisut tassaniipput. Politiit angutillu kajumissutsiminnik qatserisartut sulisimapput. Tamarmik navianartorsiorfiusumiinnissaminnut pissutissaqarput — tamannali inuunerminnik annaasaqarnerannik kinguneqarpoq.

Navianartorsiorfiusumiippit?

Soorunami tamatta qaqqap innermik anitseriaannaasup eqqaani najugaqanngilavut. Maannami nunarsuaq tamakkerlugu navianartorsiorneq siunitsinniippat nunarsuarmik tamarmik navianartorsiortitsisoq? Atuakkap siulittuutinik tatiginartunik oqariartuuteqartutut ilisimaneqalersimasup, silarsuaq tamakkerlugu ajunaarnersuaqarnissaa mianersoqqussutigaa, qanorlu pisoqarnissaa imatut oqaluttuaraa: ’Seqineq taarsissavoq qaammallu qaamajunnaarluni, ullorissallu qilammit nakkarumaarput qilaallu pissaaneri aalajummaarlutik. . . . Taavalu nunami naggueqatigiit tamarmik nimaarumaarput.’ (Matîuse 24:29, 30) Maani qilammi pisut tupinnartut silarsuarmut tamarmut ’nunarsuarmi inuiaqatigiinnut tamanut’ eqquisussatut oqaatigineqarput. Allatut oqaatigalugu ajunaarnersuaq inunnik tamanik eqquisussaq siulittuutigineqarpoq.

Atuagaq tatiginartunik siulittuutilik tassaavoq Biibili. Soqutiginarpoq allassimaffiup ataqatigiinnerata pisimasut nunarsuaq tamakkerlugu ajunaarnersuaqalersitsisut annikitsualuttaat ilanngullugit oqaluttuarimmagit. Soorluttaaq anngap qattuninnguussimasup qaqqallu innermik anitsilerneranut nalunaaqutaasut allat pissutigalugit Shimabarami pisortanit tamanna ulorianartorsiorfittut nalunaarutigineqarsimasoq, Biibilip mianersornissamut annannissamullu piareersarnissatsinnut pissutissaqartippaatigut. Qaqqap innermik anitsisartup Fugenip eqqaani pisimasoq ilinniarfigisinnaavarput siunissamilu pisussat ilungersunassusiat paasillugu.

[Suminngaanneernera]

Yomiuri/Orion Press/Sipa Press