Inuunermi allanngorarnerit anigorniaraangakkit Guutip anersaava tatigisaruk

„Sapinngisannik iliorit iluarisatut . . . Guutimut sassarniarlutit.“ — 2 TIMOTHEUSI 2:15, NV.

1. Allanngorarnerit suut anersaakkut peqqissutsitsinnik navianartorsiortitsisinnaappat?

SILARSUAQ avatangiiserput allanngorartuarpoq. Ilisimatuussutsikkut teknikikkullu siuariarnernik tupinnartunik takunnittuuvugut, aammattaarli malunnartorsuarmik ileqqussatigut najoqqutaarukkiartorneq misigaarput. Soorlu allaaserisap matuma siuliani eqqartorneqartoq, silarsuup anersaava Guutimut akerliusoq kristumiut akiortariaqarpaat. Silarsuup allanngorarneratulli, uaguttaaq inuttut ataasiakkaatut inuunerput allanngorartuarpoq. Meeraajunnaaraangatta inersimasunngortarpugut. Pisuunngorsinnaavugut piitsunngorsinnaallutaluunniit, ikinngutitaarsinnaavugut ikinngulluunniit annaasinnaavarput ilaqutartaarsinnaavugut ilaqutarluunniit annaasinnaallugu. Imaassinnaavortaaq peqqiilleriataartugut peqqisseriataartugulluunniit. Allanngorarnerpassuit iliuuseqarfigisinnaanngisavut anersaakkut peqqissutsitsinnik navianartorsiortitserujussualeqqissinnaapput.

2. Daavip inuunera qanoq allanngorarpa?

² Daavitut, Isajip erneratut, allanngornersuarnik misigisaqarsimasut ikittuararsuupput. Savanik paarsisuinnartut ilisimaneqarluni nuna tamakkerlugu sapiitsuliortutut tusaamasanngoriataarpoq. Kingusinnerusukkut qimaasutut inuusariaqarpoq, kunngimit sinngasumit uumasutut malersorneqarluni. Tamatuma kingorna Daavi nammineq kunnginngorpoq ajugaasartoq. Sualuttumik ajortuliami kingunipilui atortariaqarpai, aammattaaq ilaqutaani alianangaartunik pisoqartarpoq avissaartuuttoqartarlunilu. Pisuunngorpoq, utoqqalivoq utoqqalinerlu pissutigalugu ippigusuuteqartalerluni. Daavip inuunermini allanngornerpassuit misigigaluarlugit inuunini tamaat Jehova anersaavalu tatigai. Sapinngisaminik iliorpoq ’iluarisaasutut Guutimut sassarniarluni’, Guutillu pilluaqquaa. (2 Timotheusi 2:15, NV) Pissutsit atukkavut Daavip atugaanit allaanerugaluartut, periaaserisartagai ilinniarfigisinnaavavut. Inuunitta allanngorarnerani Guutip anersaavata qanoq ikiortuarsinnaaneraatigut maligassiaanit paasissavarput.

Daavip maniguuttuunera — maligassaalluartoq

3, 4. Qanoruna pisoqarmat Daavi savanik paarsisuinnartut ilisimaneqarluni nuna tamakkerlugu tusaamasanngoriataartoq?

³ Daavi nukappiaraalluni ilaquttaminilluunniit immikkut malunnaatilittut isigineqanngilaq. Pruffiiti Samueli Betlehemimut pimmat Daavip angutaata ernerminit arfineq-pingasuusunit arfineq-marluk tassunga ilisaritippai. Daavip angutaata nukarlequtini Daavi narsaammiitiinnarpaa, savanik paarsitillugu. Jehovalli Daavi Israelikkunnut kunngiusussatut toqqarsimavaa. Narsaammiittoq aggersarneqarpoq qanorlu pisoqarsimanera Biibilimi ima oqaluttuarineqarpoq: „Taava Samuelip nassuk uuliamik imaqartoq tigullugu Daavi tanippaa qatanngutai isigitillugit; ullorlu taanna aallarnerfigalugu [Jehovap] anersaavata Daavi tikittalerpaa.“ (1 Samueli 16:12, 13) Daavip anersaaq taanna inuunermi sinnerani tunaaraa.

⁴ Sivitsunngitsoq savanik paarsisoq taanna nuna tamakkerlugu tusaamasaalissaaq. Kunngimut kiffartortussanngorpoq nipilersorfigisalissallugulu. Sorsuttartoq Goliati, inorujussuaq ima amiilaarnartigisoq allaat Israelikkut sakkutuuisa sapiinnerpaat sorsunnermi naapissallugu siooragisaat, toquppaa. Sakkutuut naalagaattut Daavi iluatsitsivoq filisterit ajorsartillugit. Inunnit nuannarineqaqaaq erinarsuusiortarpullu nersorniarlugu. Kunngi Saulimut siunnersortaasut siusinnerusukkut Daavi kukkilattariarsullaqqissuuneraannanngilaat aammattaarli ’sapiilluni sakkuaatillaqqissuunerarpaat, silatuumillu oqaluttarneralugu inugissuunerarlugulu’. — 1 Samueli 16:18; 17:23, 24, 45-51; 18:5-7.

5. Daavip suut pingaarniartunnguutigisimasinnaagaluarpai, qanorlu nalunngilarput maniguuttuujuarsimasoq?

⁵ Tusaamasaasoq, isikkorissoq, inuusuttoq, oqallorissoq, nipilersorlaqqissoq, sakkuaatillaqqissoq, Guutimit iluarisaasoq — Daavi taamaattuusimagunarpoq. Tamakku ilaat ataasiinnarluunniit pingaarniartunnguutigisimasinnaagaluarpaa, taamaalinngilarli. Kunngi Saulip panini nuliartaareqqummagu qanoq akinersoq malugeriaruk. Maniguulluni peqqusersuillunilu ima oqarpoq: „Uanga kinaagama naggueqatikkalu ataatamalu eqqarlerisai Israelimi suummata kunngip ningaarilissavaanga?“ (1 Samueli 18:18) Allassimaffik taanna Biibilimik misissueqqissaartartup imatut oqaaseqarfigaa: „Daavi isumaqarpoq inuttut kinaassutsini, inuiaqatigiinni inissisimaffini imaluunniit nagguini pissutigalugit kunngimut ningaanngornermik ataqqinaateqalernissani neriuutigisinnaanngilluinnarlugu.“

6. Sooq maniguuttuuneq ineriartortittariaqarparput?

⁶ Daavi maniguuppoq paasisimagamiuk Jehova sutigut tamatigut inunnit naammalluinnanngitsunit pissaaneqarnerungaartoq. Daavip tupigusuutigaa Guutip inuk malugisarmagu. (Tussiaat 144:3) Nalunngilaattaaq pingaartorsuussutigisinnaasani sunaluunniit Jehovap maniguulluni napatitsineranik, sernissuineranik isumassuineranillu pissuteqartoq. (Tussiaat 18:36) Tamanna ilinniarfigilluarsinnaavarput. Piginnaanivut, immikkut pisinnaatitaaffivut angusavullu makitasuunnguutiginngisaannartariaqarpavut. „Suna pigaajuk tunnissutisiarinngisat?“ apustili Paulusi allappoq. „Tunissutisigavillu sooq ajugaasimaarpit tunissutisisimanngitsutut?“ (1 Korinthimiut 4:7) Guutip anersaava illernartoq pissinnaajumallugu taassumanngalu iluarisaajumalluta maniguuttuuneq ineriartortittariaqarparput maniguuttuujuartariaqarlutalu. — Jaaku 4:6.

„Akiniaaqinasi“

7. Daavip kunngi Sauli qanga toqussimasinnaagaluarpaa?

⁷ Daavip tusaamasaanini pingaarniartuunnguutiginngilaa. Kunngi Saulilli, Guutip anersaavanik annaasaqarsimasup, Daavip tusaamasaanera ima sinngagitigilerpaa Daavi toqunnialerlugu. Naak Daavi ajortumik iliorsimanngikkaluarluni inuuinnarumalluni qimaasariaqarpoq inoqajuitsumilu inuusariaqarluni. Taamaalluni kunngi Sauli saammartitassaanani Daavimik malersuitilluni qaarusummut iserpoq, nalullugu Daavi sakkutuuilu tassani toqqorsimasut. Daavi sakkutuuminit kajumissaarneqarpoq Saulip toqunnissaanut periarfissaq tamanna, Guutimeersuugunartoq, atoqqullugu. Takorloorsinnaavarput tarrup ataani Daavi qanoq isussuunneraat: „Maanna nalliuppoq ulloq [Jehovap] oqaatigisimasaa ima oqarfigalutit: Akerartortit assannut tunniuppara, iluarisannillu iliorfigisinnaavat.“ — 1 Samueli 24:3-7.

8. Sooq Daavi akiniaanaveersaarpa?

⁸ Daavip kunngi Sauli ajortumik perusunngilaa. Upperami naammagittaramilu tamanna Jehovamut isumagisassanngortippaa. Kunngip qaarusuk qimammagu Daavip ima suaarpaa: „[Jehova] illit uangalu akunnitsinni eqqartuussissaaq! [Jehovap] ilinnut akiniukkumaarpaanga; uangali ajoqusinngilluinnassavagit.“ (1 Samueli 24:13) Daavip Sauli eqqunngitsuliortoq nalunngikkaluarlugu akinianngilaa, aamma Sauli mitaatiginngilaa nikanarsarnaguluunniit. Aamma periarfissani allani Daavi akiniaanaveersaartarpoq. Tatigaa Jehova pissutsinik aaqqiiumaartoq. — 1 Samueli 25:32-34; 26:10, 11.

9. Sooq akerlilersorneqalissagutta malersorneqalissaguttaluunniit akiniaasariaqanngilagut?

⁹ Immaqa Daavitut ajornartorsiuteqarputit. Imaassinnaavoq atuaqatinnit, suleqatinnit, ilaquttannit allanilluunniit ilittut upperisaqanngitsunit akerlilersorneqartutit imaluunniit malersorneqartutit. Akiniaaqinalli. Jehova utaqqiuk, qinnuigiullu anersaavanit illernartumit ikioqqullutit. Immaqa ileqqorissuunerit killissutigalugu uppertunngortoqassaaq. (1 Petrusi 3:1) Pissutsit qanorluunniit ikkaluarpata qularutigissanngilat Jehovap pissutsit atukkatit nalunngikkai, piffissanngorpallu iliuuseqarfigiumaarai. Apustili Paulusi ima allappoq: „Nammineerlusi akiniaaqinasi, asasakka, Guutilli kamaassinera periarfississiuk — allassimasoqarmat: ’Akiniut pigaara, uanga akiliiumaarpunga,’ oqarpoq [Jehova].“ — Romamiut 12:19.

„Ajoqersuussutiga naalaarsiuk“

10. Daavi qanoq ajortuliorpa, ajortulianilu qanoq isertorniaraluarpaa?

¹⁰ Ukiut ingerlapput. Daavi kunngitut nuannarineqalerpoq ataqqisaangaartoq. Aalajaalluinnartuunera kiisalu Jehovamut nersorinnissutitut tussiaasiai isumaqalersitsisinnaagaluarput, angutaasoq sualuttumik ajortuliunngisaannartussaasoq. Ajortuliorporli. Ullut ilaanni kunngip illumi qalianit arnaq pinnersoq uffartoq isiginnaarpaa. Paasivaa kinaasoq, Batsebamik ateqartoq uialu Uriasi sorsoqataasoq. Daavip Batseba aggersarpaa allasiorfigalugulu. Kingusinnerusukkut paasivaa naartusoq. Tamanna paasineqaraluaruni oqallisaangaalissaaq! Mosesip inatsisai malillugit allasiorneq toqumik pillarneqaataasarpoq. Kunngi isumaqannguatsiarpoq ajortuliaq isertorneqarsinnaasoq. Taamaattumik naalakkiivoq Uriasi Jerusalemimut angerlassasoq. Daavip neriuutigaa Uriasip Batseba innaatissagaa, taamaaliunngilarli. Daavip maanna isumatsangaarluni Uriasi sorsuffimmukarteqqippaa, sakkutuut naalagaannut Joabimut allakkisartillugu. Allakkamini naalakkiivoq Uriasi akiuuffiusumukartinneqassasoq toqusussanngorlugu. Joabi naalappoq, Uriasilu toqutaavoq. Pisarneq malillugu aliasuffiusoq qaangiummat Daavip Batseba nulissiuppaa. — 2 Samueli 11:1-27.

11. Natanip Daavimut suna oqaluttuaraa, Daavilu qanoq qisuariarpa?

¹¹ Pilersaarut iluatsittutut isikkoqarpoq. Daavilli nalunngittariaqaraluarpaa, Jehovap qanoq pisoqarsimanera nalunngilluinnaraa. (Hebræerit 4:13) Qaammatit ingerlapput, meerarlu inunngorpoq. Guutimit peqquneqarluni pruffiiti Natani kunngi Daavimukarpoq, angummillu pisuumik savaaterpassualimmik angutip piitsup savaatituaanik nuannareqisaanik toqutsisumik oqaluttuullugu. Oqaluttuaq Daavip naapertuilluarnermik nuannarisaqartup killitsissutigaa oqaluttuap isumavia pasitsaannagu. Ingerlaannaq angut pisooq taanna eqqartuuppaa, kamallunilu Natani ima oqarfigalugu: „Angut taamaaliortoq toqutassaavoq!“ — 2 Samueli 12:1-6.

12. Jehovap Daavi qanoq eqqartuuppaa?

¹² „Illinuna pineqartutit!“ pruffiiti akivoq. Daavi imminut eqqartuuppoq. Kamannera kanngusunninngoriataarpoq aliasunninngoriataarlunilu. Tupassimaqaluni Jehovap eqqartuussutaa allanngortinneqarsinnaanngitsoq Natanip oqaatigigaa tusarnaarpaa. Tuppallersaatissaqanngilaq. Daavip ajortuliornermigut Jehovap oqaasii sumiginnarpai. Akeqqap panaanik Uriasi toqussimavaa. Taamaattumik panaq Daavip illuaniittuassaaq. Isertorluni Uriasip nulia allasiorfigaa. Assingusumik nalaataqassaaq, isertortumiunngitsoq, kikkulli tamarmik takkuanni. — 2 Samueli 12:7-12.

13. Daavi Jehovamit perorsaatissinneqarami qanoq qisuariarpa?

¹³ Daavip pisuunerminik miserratiginninnginnini nersorneqaatigissavaa. Pruffiiti Natani kamaatilinngilaa. Allanilluunniit pisuutitsinianngilaq, iliuuserisimasaminulluunniit patsisissarsiornani. Ajortuliaminik paasitinneqarami Daavip akisussaasuunini akueraa, imalu oqarluni: „[Jehovamut] ajortuliorsimavunga.“ (2 Samueli 12:13) Annikilliuutai, imminut pisuutinnera qamanngalu pisumik allamik isumataarnera Tussiaat 51-imi allaaserineqarput. Jehova ima kimigiiserfigaa: „Ilinnit igeqinanga, anersaallu illernartoq uannit peerseqinagu!“ Qularinngilluinnarpaa Jehovap nallittuinermini uummat ajortuliorsimaneq pissutigalugu „peqqissimisoq artorsaateqangaartorlu“ itigartittanngikkaa. (Tussiaat 51:13, 19) Daavip Guutip anersaava tatigiuarpaa. Ajortuliami kingunipiluinut illersorneqanngikkaluarluni Jehovamit isumakkeerfigineqarpoq.

14. Jehovamit perorsaatissinneqarneq qanoq qisuariarfigisariaqarparput?

¹⁴ Tamatta naammalluinnanngitsuuvugut, tamattalu ajortuliortarpugut. (Romamiut 3:23) Immaqa ilaannikkut Daavitut sualuttumik ajortuliortarpugut. Ataatap asannittup meeqqaminik perorsaasarneratut Jehovap imminut kiffartorusuttut oqaaqqissaartarpai. Perorsaatissinneqarneq iluaqutigigaluarlutigu akueriuminaatsittarparput. Ilaatigummi ’iluaaginartarpoq’. (Hebræerit 12:6, 11) ’Ajoqersuussulli naalaartarutsigu’ Jehova eqqisseqatigissavarput. (Ussatit 8:33) Jehovamit pilluaqqusaajuassagutta siunnersuutaa akuerisariaqarparput, taassumanngalu iluarisaalernissaq sulissutigisariaqarlutigu.

Pisuussutit allanngujasut isumalluutigeqinagit

15. (a) Inuit ilaasa pisuussutitik qanoq atortarpaat? (b) Daavip pisuussutini qanoq atorusuppai?

¹⁵ Daavip ilaqutai nuimasuunatilluunniit pisuujusimannginnguatsiarput. Daavili kunngiutilluni pisoorsuanngorpoq. Nalunngisatsitut inuppassuit pisuussutinik katersisarput, piumatuujullutik pisuujunerulerniartarput pisuussutiminnilluunniit namminissarsiortumik atuisarlutik. Allat aningaasaanik tunissuteqartarput malugeqqusaarlutik. (Matthæusi 6:2) Daavilli pisuussutini allatut atorpai, qamanngami pisumik Jehova ataqqerusuppaa. Daavip Natani oqarfigaa Jehova naalaffiliuukkusullugu, angerutsip illerfiata Jerusalemimiittup taamanikkullu ’tupiinnarmiittup’ inissisimaffissaanik. Daavip kissaataa Jehovap nuannaarutigaa, Natanili aqqutigalugu paasitippaa Daavip ernera Salomo naalaffiliortuujumaartoq. — 2 Samueli 7:1, 2, 12, 13.

16. Naalaffiliornissaq piareersarlugu Daavi qanoq iliorpa?

¹⁶ Daavi sanaartornissarsuarmi atugassanik katersivoq, Salomolu ima oqarfigalugu: „Ilungersoqalunga pissarsiarisimagakkit kuulti talentinik 100.000-inik naleqartoq sølvilu talentinik millioninik naleqartoq [Jehovap] illuliuunnissaanut atugassat, taakkualu saniatigut kanngussak saviminerlu angingaaramik uuttorneqarsinnaanngitsut. Qisunnik ujaqqanillu aamma pissarsiaqareerpunga, illillu ilaartorumaarpatit.“ Nammineq pigisani tunniuppai kuulti talentinik 3000-inik nalilik aamma sølvi talentinik 7000-inik nalilik.a (1 Nalunaarsuutit 22:14; 29:3, 4) Allanut nersoqqusaarluni Daavi taamatut tukkorluni tunissuteqanngilaq. Taamaaliornera upperneranut Jehova Guutimullu asanninneranut ersiutaavoq. Nassuerutigaa pisuussutini Guutimeersuusut, Jehovamummi ima oqarpoq: „Suut tamarmik ilinnit pipput, makkuttaaq tunniussavut tassaapput ilinnit pisarisimasavut.“ (1 Nalunaarsuutit 29:14) Daavi tukkortuugami pallorfiginninnermik minguitsumik siuarsaaniarluni sapinngisaminik iliorpoq.

17. Siunnersuut Timotheusimut allakkat siulliit 6:17-19-imiittoq pisuunut piitsunullu qanoq atuuppa?

¹⁷ Uaguttaaq pigisavut ajunngitsuliornermut atortartigik. Pigisalerituujunermit pitsaaneruvoq Guutimit iluarisaalerniarneq. Taamatut piviusumik ilisimassuseqalertoqarsinnaavoq pilluartoqalersinnaallunilu. Paulusi ima allappoq: „Silarsuarmi matumani pisuut peqqusiffigissavatit makitaniaqqunagit pisuussutitilluunniit allanngujasut isumalluutigeqqunagit, isumalluutigeqqulluguli Guuti pisariaqakkatsinnik naammattunik tunniussisoq. Peqqusiffigissavatit ajunngitsulioqqullugit ajunngitsulianillu pisuussuteqaqqullugit, tukkortooqqullugit inoqatiminnullu tunniussisaqqullugit, katerseqqullugillu pisuussutinik siunissami toqqaviusinnaasunik ajunngitsunik inuunivik pigilersinnaaqqullugu.“ (1 Timotheusi 6:17-19) Qanorluunniit aningaasatigut atugaqaraluarluta Guutip anersaava tatigisartigu, inooriaaseqartalu ’Guutimi pisuunngortitsisumik’. (Lukasi 12:21) Ataatatsinnut qilammiusumut asannittumut ajunngitsumik attaveqarnermiit allamik erlinnarnerusoqanngilaq.

Iluarisatut Guutimut sassarniarit

18. Daavi kristumiunut qanoq maligassaalluarpa?

¹⁸ Daavip inuunini tamaat Jehovamit iluarisaalernissani noqqaassutigiuarpaa. Guuti ima erinarsorfigaa: „Saammaannga Guuti, saammaannga. Ilinni qimarnguffissarsiorpunga.“ (Tussiaat 57:2) Jehova tatigilussinnanngilaa. Utoqqalivoq ’ullussanilu naammatsillugit’. (1 Nalunaarsuutit 23:1) Kukkorujussuartaraluarluni Daavi Guutip nalunaajaasorpassuisa uppernermik asseqanngitsumik ersersitsisut ilaattut eqqaamaneqarpoq. — Hebræerit 11:32.

19. Iluarisatut Guutimut qanoq imminut sassaassinnaavugut?

¹⁹ Eqqaamajuk inuuninni allanngorneqaraangat Jehovap Daavimut iliorsimanermisorluinnaq napatissinnaagaatit pissatsissinnaagaatit oqaaqqissaarsinnaagaatillu. Apustili Paulusip Daavitulli inuunermini allanngorarnerpassuit misigai. Taannali aamma Guutip anersaavanik tatiginninnermigut aalajaattuarpoq. Ima allappoq: „Tamaasa pissatsitsisikkut atussallugit sapinngilakka.“ (Filippimiut 4:12, 13) Jehova tatigigutsigu inuunermi unamminiarnartut anigortissinnaassavai. Iluatsinnissarput kissaatigaa. Tusaagutsigu qanittumillu attaveqarneq ineriartortikkutsigu piumasaatut iliornissatsinnut pisariaqartumik nukissaqalersissavaatigut. Guutillu anersaava tatigiuarutsigu maanna naassaanngitsumullu ’iluarisatut Guutimut sassarsinnaassaagut’. — 2 Timotheusi 2:15, NV. (wE 4/1 04)

[Quppernerup ataani ilanngussaq]

Uteqqiinermi apeqqutit

• Pingaarniartunngorumanani qanoq iliortoqarsinnaava?

• Sooq akiniaassanngilagut?

• Perorsaatissinneqarneq qanoq isigissavarput?

• Sooq Guuti tatigisariaqarparput pisuussutit pinnagit?

[Qupp. 16, 17-imi assiliartaq]

Daavip Guutip anersaava tatigaa, taassuminngalu iluarisaanissaq noqqaassutigiuarlugu. Illit aamma taamaaliorpit?

[Qupp. 18-imi assiliartaq]

„Suut tamarmik ilinnit pipput, makkuttaaq tunniussavut tassaapput ilinnit pisarisimavavut“