Inuusuttuususi — siunissarsi ajunngitsumik tunngaviliorlugu aallartereerpisi?
„Uangami nalunngilakka ilissi pillusi pilersaarutigisakka, . . . pilluarnissamik pilersaaruteqarama ajunaarnissamik pinnanga. Siunissaqartissavassi neriuutissaqartillusilu.“ — JEREMIA 29:11.
1, 2. Inuusuttuuneq pillugu assigiinngitsunik qanoq isumaqartoqarpa?
INERSIMASUT amerlanerit inuusuttuunertik nuannersutut eqqarsaatigisarpaat. Inuusuttuunerminni kajumissuseqarnertik iliuuseqarusussuseqarnertillu eqqaamavaat. Akisussaaffikinneruffitsik, nuannisaarfitsik, inuunerminnilu periarfissarpassuaqarfigisartik tamanna nuannersutut eqqarsaatigisarpaat.
2 Inuusuttuuguit qularnanngitsumik allatut isumaqarputit. Inuusuttuunermi timikkut misigissutsikkullu allanngorarnerit immaqa artornartippatit. Atuarfimmi avatangiisinnit immaqa tatineqangaarputit. Immaqa nassuiartuartariaqarpat ikiaroornartutorusunnginnerit, imigassartorusunnginnerit inuunerlukkusunnginnerilluunniit. Aammattaaq ilarpassuasi kalluunnaveersaarneq uppernissinnulluunniit tunngasoq alla pillugu isummertariaqarput. Taamaattumik inuusuttuuneq artornartuusinnaavoq. Taamaattoq inuusuttuunermi aamma periarfissarpassuaqarpoq. Una apeqqutaavoq: Periarfissat taakku qanoq atussavigit?
Inuusuttuunerit nuannaarutigiuk
3. Salomop inuusuttut qanoq siunnersorpai, qanorlu mianersoqquai?
3 Qularnanngitsumik utoqqaat inuusuttuunertik qaangiutipallannerarlugu oqaluttut tusartarpatit, ilumoorpullu. Inuusuttuuneq ukiualuinnarnik sivisussuseqarpoq. Taamaattumik inuusutsillutit nuannaarutigiuk! Kunngi Salomo taama siunnersuivoq, imami allappoq: „Qiimasaarniarit, inuusuttuusutit, inuusutsillutit, uummatit nuannaarniarli inuusunnerpit ulluini. Aqqutigiumasatit aqqutiginiakkit, isivillu alianaagisaat malillugit pisarlutit.“ Aammattaarli inuusuttut ima mianersoqquai: „Annikilliorneq uummatinnit peeruk, ajortorlu inuunermit nigorsimatiguk.“ Imalu nangippoq: „Inuusuttuuneq ullaallu aappillernera [inuunerullu ullaava, NV] piunngitsuupput!“ — Oqaluussisartup oqaasii 11:9, 10.
4, 5. Inuusuttut siunissamut piareersarunik sooq silatusaassappat? Assersuuteqarit.
4 Salomo qanoq isumaqarsoraajuk? Assersuunneqarsinnaavoq inuusuttup angisuumik tunissutisineranut, immaqa kingornussarsineranut. Sumut atussavaa? Nuannaarniutinut tamaasa atorsinnaavai Jiisusip assersuusiaani ernerup tammaraluartup iliorneratut. (Lukasi 15:11-23) Aningaasaataaruppalli susoqassava? Qularnanngivissumik akisussaassuseqanngitsuliorsimanini peqqissimissutigissavaa. Takorlooriaruk aningaasat tunissutisiami amerlanersaat silatuumik aningaasaliinermut atorai taamaalillunilu siunissamut tunngavissaqarlualersoq. Kingusinnerusukkut aningaasaliinini iluaqutigileruniuk, peqqissimisimassasoraajuk inuusutsilluni aningaasaatini nuannaarniutinut atunnginnamigit? Soorunami naamik!
5 Ukiut inuusuttuuffigisatit Guutimit tunissutitut isigikkit, taamaappummi. Qanoq atussavigit? Siunissaq eqqarsaatiginagu kajumissuseqarnerit iliuuseqarusussuseqarnerillu nuannaarniutinut festeriaqattaarnernullu atulussinnarsinnaavatit. Taamaalioruilli ’inuusuttuunerit inuunivillu ullaava piunngitsuussapput’. Pitsaanerungaassaaq inuusuttuunerit siunissamut piareersarnermut atorukku.
6. (a) Salomop inuusuttut qanoq siunnersorpai? (b) Jehovap inuusuttut qanoq iliorfigerusuppai, tamannalu qanoq iluaqutigisinnaavaat?
6 Inuusuttuunerpit atorluarnissaanut iluaqutigisinnaasannik Salomo najoqqutassiivoq. Ima allappoq: „Pinngortitsisit eqqaamaniaruk inuusuttuunerpit ulluini.“ (Oqaluussisartup oqaasii 12:1) Tassaavoq iluatsinnissamut matuersaat. Jehova tusaajuk, piumasaatullu iliorit. Jehovap itsaq Israelikkut qanoq iliorfigerusunnerlugit ima oqarfigai: „Uanga nalunngilakka ilissi pillusi pilersaarutigisakka, . . . pilluarnissamik pilersaaruteqarama ajunaarnissamik pinnanga. Siunissaqartissavassi neriuutissaqartillusilu.“ (Jeremia 29:11) Jehovap aamma illit ’siunissaqartikkusuppaatit neriuutissaqartikkusullutillu’. Qanoq iliorninni tamani, qanoq eqqarsarninni tamani qanorlu aalajangiininni tamani Jehova eqqaamagukku siunissami ingerlalluassaatit qularnaatsumillu neriuutissaqassallutit. — Saqqummersitat 7:16, 17; 21:3, 4.
„Guuti qaninniarsiuk“
7, 8. Inuusuttut Guutimut qanittumik qanoq attaveqalersinnaappat?
7 Jaakup kajumissaarpaatigut Jehova eqqaamaqqullugu ima oqarami: „Guuti qaninniarsiuk, taava taanna ilissinnut qanillissaaq.“ (Jaaku 4:8) Jehova Pinngortitsisuuvoq, Kisimi Oqartussaasoq qilammiittoq, pallorfigineqarnissamut unnersiutigineqarnissamullu kisimi qinngaqqunanngitsuusoq. (Saqqummersitat 4:11) Taamaattoq qanilligutsinni qanillissavaatigut. Asannittumik uagutsinnik soqutiginninnera eqqarsaatigalugu nuannaajallaatigaat, ilaa? — Matthæusi 22:37.
8 Assigiinngitsorpassuartigut Jehova qanillisinnaavarput. Assersuutigalugu apustili Paulusi ima allappoq: „Qasusuillusi qinusaritsi, eqqumaniaritsi qinullusi qujaniarlusilu.“ (Kolossemiut 4:2) Allatut oqaatigalugu Guutimut qinuneq ileqquliuttariaqarpat. Ataatat qatanngulluunniit kristumiu ilagiinniittoq qinoqatigiissitsigaangat „amen“-niiginnartarneq naammagiinnaqinagu. Uummammiutit Jehovamut oqaluttuarinikuuigit oqaluttuullugulu sunik eqqarsaateqarnerlutit, ernumagisaqarnerlutit unamminiagaqarnerlutillu? Allanut oqaluttuarissallugit kanngusuutigisannik oqaluttuunnikuuiuk? Qamannga pisumik ilumoortumillu qinnutit eqqissiallannartarput. (Filippimiut 4:6, 7) Jehovamut qanillissutigisarpavut, malugisinnaatittarpaatigullu taassuma aamma qanilligaatigut.
9. Inuusuttut Jehova qanoq tusaasinnaavaat?
9 Aamma allatut Jehova qanillisinnaavarput, soorlu oqaatsini isumassarsiarititaasuni ukunani ersertoq: „Siunnersuutit tusaaniartarniakkit ajoqersuussutillu pigiliullugit, taava naggataatigut ilisimassusermik pigisaqalissaatit.“ (Ussatit 19:20) Aap, Jehovap oqaasiinut tusaaniartuartillutit naalattuartillutillu siunissat ajunngitsumik tunngaviliortuassavat. Jehova tusaallugu qanoq ersersissinnaaviuk? Qularnanngitsumik kristumiut ataatsimiinneri aalajangersimasumik najuuffigisarpatit oqaatigineqartunullu tusarnaartarlutit. Aamma ilimanarpoq ilaqutariittut atuaqqissaaqatigiinnermut ilaasartutit taamaalillutillu ’ataatat anaanallu ataqqigitit’. (Efesosimiut 6:1, 2; Hebræerit 10:24, 25) Tamanna ajunngilluinnarpoq. Aammali ’piffissaqqissoq atortarpiuk’ ataatsimiinnernut piareersarnermut, Biibilimik atuarnermut allanillu paasissutissarsiornermut? Atuakkatit malillugit inuuniarsarivit ’siuneqartutut iliulerlutit’? (Efesosimiut 5:15-17; Tussiaat 1:1-3) Taamaalioruit Jehova qanittumik attaveqarfigilissavat.
10, 11. Inuusuttut Jehovamut tusaanertik qanoq iluaqutigingaarsinnaavaat?
10 Ussatit-nut aallaqqaasiummi isumassarsisinneqarluni allattup atuagaq taanna sooq allanneqarsimanersoq ima nassuiarpaa: „[Ussatit ukua] paasinnitsissavaat ilisimassusermik ajoqersuussutinillu, siunersisaqartillugit oqaatsinik silassorissunik, ilassinnitsillugillu ajoqersuussutinik silatuunik naapertuilluarnermik, iluarnermik peqqusersuissusermillu. Misilittagakitsoq paasisimasaqalersissavaat angullu inuusuttoq ilisimasaqalersillugu isumatussuseqalersillugulu.“ (Ussatit 1:1-4) Taamaattumik Ussatit — aamma Biibili tamaat — atuaraangakkit allassimasullu maleruaraangakkit ’naapertuilluarnerulernissannut peqqusersuinnerulernissannullu’ iluaqutigissavatit, taavalu Jehovap nuannaarutigalugu imminut qanittumik attaveqalersissavaatit. (Tussiaat 15:1-5) ’Iluarneq, paasisimasaqarneq, ilisimasaqarneq isumatussuseqarnerlu’ ineriartortinnerujartortillugit aalajangiillaqqissigaluttuinnassaatit.
11 Inuusuttut taama silatusaarsinnaatiginerat ilimagissallugu piviusorsiornerua? Aap, inuusuttorpassuimmi kristumiut taamaaliortarput. Taamaalillutillu allanit ataqqisaalerput, ’inuusuttuunerallu pissutigalugu taakkuninnga nikassaasoqanngilaq’. (1 Timotheusi 4:12) Angajoqqaavisa pissutissaqarluarlutik tulluusimaarutigaat, Jehovalu oqarpoq uummatini nuannaartikkaat. (Ussatit 27:11) Taakkua inuusuttuugaluarlutik tatigisinnaavaat oqaatsit isumassarsiarititaasut uku aamma imminnut atuuttut: „Assuarnaatsoq malugiuk, peqqusersuitsoq isiguuk pilluarnartumik siunissaqarmat.“ — Tussiaat 37:37.
Silatusaarlutit aalajangiisarit
12. Inuusuttut pingaarutilik suna aalajangiiffigisariaqarpaat, aamma sooq tamanna sunniuteqangaartarpa?
12 Inuusuttuutilluni aalajangigassaqarnartarpoq, aalajangikkallu ilaat ukiorpassuarni, aap inuunerup sinnerani, qanoq ingerlanermut sunniuteqartarput. Silatuumik aalajangiisaruit pilluarnerulissaatit ingerlallualissallutillu. Silatusaanngitsumik aalajangiinitit inuuninnut tamarmut sunniuteqarnerlussinnaapput. Aalajangerfigisariaqakkatit marluk misissoriartigik. Siullermik: Kikkut ilagisartagarissavigit? Sooq tamanna eqqarsaatigissallugu pingaaruteqarpa? Biibilimi ima ussateqarami: „Ilisimasunik peqateqartoq ilisimassuseqalersarpoq, sianiitsunilli ikinnguteqartoq ajortumeertussaasarpoq.“ (Ussatit 13:20) Allatut oqaatigalugu ilagisartakkatsitut ilisarpugut — ilisimassuseqalinngikkaangatta sianiitsunngortarpugut. Qanoq ittoorusunneruit?
13, 14. (a) Ilagisartakkatta saniatigut aamma suut ilagisartakkatut oqaatigineqarsinnaappat? (b) Inuusuttut qanoq iliornaveersaartariaqarpat?
13 Ilagisartakkat eqqartorneqaraangata qularnanngitsumik inuit ilagineqartartut eqqarsaatigineqartarput. Aammattaarli TV filmillu isiginnaaraangakkit, nipilersuutit tusarnaaraangakkit, atuakkat atuaraangakkit ilaatigullu interneti atoraangakku ilagisaqartarputit. Nakuuseqqajaasunut inuunerloqqajaasunullu kajungernartut, ikiaroornartunik atornerluinermut, imerajunnermut allamulluunniit Biibilimi najoqqutassianut naapertuutinngitsunut kajumissaarisut aliikkutarisarutsigik ilagisassavavut „sianiitsut“, Jehovaqanngitsutut pissusilersortut. — Tussiaat 14:1.
14 Immaqa isumaqarputit kristumiut ataatsimiinneri najuuffigisarakkit ilagiinnilu suliniuteqartaravit filmit nakuusernertallit ajoqutiginagit isiginnaarsinnaallugit nipilersuutilluunniit nuannersut pitsaavallaanngikkaluartunik taallallit ajoqutiginagit tusarnaarsinnaallugit. Immaqa aamma isumaqarputit internetimi nittartagaq tiingasulersaarutip takupallannera ajoqutaanngitsoq. Taama isumaqaruit kukkuvutit, apustili Paulusimi ima allappoq: „Ikinngutipalaaqarneq ileqqorikkaluartunut aseruutissiisarpoq.“ (1 Korinthimiut 15:33) Ajoraluartumik inuusuttorpassuit kristumiut ileqqorlussisimapput silatusaarnatik ajortunik ilagisartagaqarniarlutik aalajangersimagamik. Taamaattumik ikinngutipalaaqarnaveersaarnissat aalajangiuguk. Taamaalioruit Paulusip siunnersuutaa una malissavat: „Silarsuarmut matumunnga naleqqussarniaqinasi, allanngoritsili isummassigut nutaanngortitaajuarlusi sianigileqqullusiuk sunaasoq Guutip piumasaa: ajunngitsoq, iluarinartoq, naammalluinnartoq.“ — Romamiut 12:2.
15. Inuusuttut aalajangertariaqagaat alla suua, tamatumunngalu tunngatillugu ilaannikkut qanoq tatineqartarpat?
15 Aalajangertariaqakkat alla atuarunnaaruit sulerinissannut tunngavoq. Suliffissaaleqiffiusumiikkuit qanorluunniit ittumik suliffissarsisariaqarlutit misigisinnaavutit. Pigissaarfiusumiikkuit periarfissarpassuaqarsinnaavoq, ilaallu pilerinangaarsinnaapput. Ilinniartitsisuit angajoqqaavilluunniit pitsaanerpaamik siunertaqarlutik aningaasaqarnikkut toqqissisimassutigisinnaasannik, imaluunniit allaat pisuunnguutigisinnaasannik, suliffissarseqqullutit kajumissaarsinnaavaatsit. Taamatulli ilinniagaqassaguit immaqa Jehovamut kiffartornissannut piffissakipallaarujussualissaatit.
16, 17. Inuusuttut suliffissaminnik aalajangiiniaraangamik oqimaaqatigiissaarinissaminnut allassimaffiit assigiinngitsut qanoq iluaqutigisinnaaneraat nassuiaruk.
16 Aalajangiitinnak Biibilimi siunnersortissarsiortarnissat eqqaamajuk. Biibilimi kajumissaarneqarpugut suleqqulluta, ersersinneqarporlu imminut pilersornissarput pisussaaffigigipput. (2 Thessalonikamiut 3:10-12) Aammali allanik eqqarsaatigisassaqarpoq. Kajumissaarusuppatigit allassimaffiit uku atuaqqullugit eqqarsaatigeqqullugulu inuusuttut suliffissaminnik aalajangiiniaraangamik oqimaaqatigiissaarinissaminnut qanoq iluaqutigisinnaaneraat: Ussatit 30:8, 9; Oqaluussisartup oqaasii 7:11, 12; Matthæusi 6:33; 1 Korinthimiut 7:31; 1 Timotheusi 6:9, 10. Allassimaffiit taakku atuareerlugit Jehova qanoq isumaqarnersoq paasisinnaaviuk?
17 Suliffik ima pingaartigilinngisaannartariaqarpoq Jehovamut kiffartornermit pingaaruteqarninngorluni. Ukiuni qulini aqqaneq-marlunniluunniit atuartooreerlutit pisariaqartitannik suliffissarsisinnaaguit ajussanngeqaaq. Ilinniagaqaqqittariaqaruit angajoqqaatillu oqaloqatigiissutigisinnaavarsi. „Sunali pingaartittariaqartoq“ puiunngisaannaruk — tassa anersaakkut ittut. (Filippimiut 1:9, 10) Jeremiap allatsiatut Barukitut kukkussuteqaqinak. Kiffartuutigeqquneqartoq pingaartikkunnaarlugu ’ujartulerpaa angisooq’. (Jeremia 45:5) Ilaanni puiorpaa silarsuarmi matumani ’angisuut’ suulluunniit Jehovamut qaninnerusumik attaveqalersissinnaanngikkaanni Jerusalemilluunniit aserugaaneranit aniguisissinnaanngikkaanni. Ullumikkut pissutsinik tamatumunnga assingusunik atugaqarluta oqarsinnaavugut.
Anersaakkut ittut pingaartikkit
18, 19. (a) Eqqaamiuit amerlanersaasa suna ilisarnaatigaat, qanorlu isiginnittaaseqarfigigaanni pitsaassava? (b) Sooq inuppassuit anersaakkut kaattutut misiginngillat?
18 Nutaarsiassani meeqqat nunani kaannersuaqarfiusuniittut assinginik takunikuuit? Qularnanngitsumik naakkigingaarsimassavatit. Eqqamiutit taamatulli naakkigitigaagit? Sooq taamaattariaqarpit? Amerlanersaat aamma kaammata. Taakkua misigaat kaannersuaq Amosip ima oqarluni siulittuutigisaa: „Ullut nalliukkumaarput, oqarpoq Guuti [Jehova], taava kaannersuaq nunamut nalliutitikkumaarpara — imaanngitsoq timiusamik nererusunneq, imaanngitsoq imermik imerusunneq, tassaasorli [Jehovap] oqaasia tusarusullugu noqqaaneq.“ — Amosi 8:11.
19 Ilumoorpoq anersaakkut kaannersuarmit tamatumannga eqqugaasut amerlanerit anersaakkut pisariaqartitaqarnertik miserratigimmassuk. Inuppassuit anersaakkut kaassorinngillat. Allaat ilaat anersaakkut nerisarissaarsoripput. Taamaappulli qaarsilagamik ’ilisimassutsimit silarsuarmiittumit’, ilaatigut pigisaleritunermit, ilisimatuussutsikkut isummiussanit, ileqqussatigut isummanit assigiinngitsunit assigisaannillu. Isumaqartoqarpoq ’ilisimassutsip’ tamatuma Biibilimi ajoqersuutit pisoqalisikkaat. ’Silarsuulli ilisimassutsimigut Guuti ilisimalinngilaa’. Taamaattumik silarsuup ilisimassusia Guutimut qanimut attaveqalissutigisinnaanngisaannassavat. Tassaavormi ’Guutimi sianiissusiinnaasoq’. — 1 Korinthimiut 1:20, 21; 3:19.
20. Jehovamik pallorfiginninngitsunik ilaarserusunneq sooq sianiilliornerua?
20 Meeqqat perlilersut assingi takugukkit soorunami taakkutut atugaqarusunngisaannassaatit. Ilaqutariinnili kristumiuni inuusuttoqarpoq anersaakkut perlilersutut takusartakkamittut inoorusullutik ersersitsisunik. Isumaqarunarput silarsuarmi inuusuttut inuulluataartut ajornartorsiuteqanngitsullu. Puiorpaalli inuusuttut taakku Jehovamut attaveqanngitsut. (Efesosimiut 4:17, 18) Aammattaaq puiortarpaat anersaakkut kaannerup kingunipilui — soorlu inuusuttuaqqat kissaatiginngisamik naartulertarnerat aamma inuunerlunnerup, erngunnerup ikiaroornartunillu atornerluinerup timimut misigissutsinullu sunniutaat. Anersaakkut kaanneq pikitsitsiumatuunngortitsisinnaavoq, qamuuna neriuutaarutsitsisinnaavoq inuunermilu najoqqutassaarutsitsisinnaalluni.
21. Jehovamut pallorfiginninngitsut kukkusumik isiginnittaaseqarnerattut qanoq isiginnittaaseqalernaveersaarsinnaavugut?
21 Atuarfimmi Jehovamut pallorfiginninngitsut ilagigaangakkit taakkua isumaannit aqunneqarteqinak. (2 Korinthimiut 4:18) Ilaat uppernermut tunngasut nikanarsarlugit oqalussapput. Aammattaaq inuunerlunneq, aalakoorneq oqaasipiluttarnerlu pissusissamisoorluinnartutut isigineqalersinniarlugit tusagassiuutini sunniiniartoqartuaannarpoq. Sunniiniarneq tamanna akioruk. ’Upperluartunik ilerasuuteqanngitsunillu’ peqateqartarnerit aalajangiusimajuaruk. ’Tamaviaarlutit Naalagaq kiffartuuttuaruk’. (1 Timotheusi 1:19; 1 Korinthimiut 15:58) Oqaluussineq naalagaaffilersaarfimmilu pisartut ulapputigikkit. Atuartuutillutit ilaannikkut ikiorti-pioneriusarit. Tamanna anersaakkut oqimaaqatigiissaariuarnissannut nakussatsissutigissavat. — 2 Timotheusi 4:5.
22, 23. (a) Sooq inuusuttut kristumiut allat paasinngisaannik aalajangiigajuttassappat? (b) Inuusuttut qanoq kajumissaarneqarpat?
22 Anersaakkut ittumik isiginnittaaseqaruit allat paasinngisaannik aalajangiisarunarputit. Assersuutigalugu angut inuusuttoq kristumiu nipilersullaqqissuuvoq atuarfimmilu fagini tamani karakteerigissaartuulluni. Atuarunnaarami piffissaq tamaat oqaluussisartoorusukkami ataatani igalaanik qillissaasartutut suleqatigilerpaa. Taama aalajangernera ilinniartitsisuisa paasinngilaat, illilli Jehova qanimut attaveqarfigigukku qularutiginngilarput paasigit.
23 Inuusuttuuninni periarfissarpassuit pingaarutillit qanoq atussanerlugit eqqarsaatigilerukku, kajumissaarumavatsigit ’katerseqqullutit pisuussutinik siunissami toqqaviusinnaasunik ajunngitsunik inuunivik pigilersinnaaqqullugu’. (1 Timotheusi 6:19) Inuusuttuunini inuunerillu tamaat ’Pinngortitsisit eqqaamaniarlugu’ aalajangerit. Aatsaat taamaalilluni siunissamut — kipinngisaannartussamut — tunngavissaqarluartoqalersinnaavoq.
Qanoq isummerpit?
• Inuusuttut siunissartik pilersaarusiulerunikku siunnersuut Biibilimeersoq suna iluaqutigissavaat?
• Inuusuttut qanoq ’Guuti qanillisinnaavaat’?
• Inuusuttut aalajangigaat suut siunissaannut sunniuteqassappat?
[Qupp. 10-mi assiliartat]
Inuusuttuuninni kajumissuseqarnerit tamaat iliuuseqarusussuseqarnerillu tamaat imminut atussavigit?
[Qupp. 12-imi assiliartaq]
Inuusuttut kristumiut ilisimassuseqartut anersaakkut ittut pingaartinnerussavaat