’Aalajaallusi Jehovap annaanniarlusi qanoq iliornissaa isiginnaaginnarsiuk’
„[Jehovap] najormanga siooragisassaqanngilanga, inuit qanoq iliorfigisinnaagaminnga?“ — TUSSIAAT 118:6.
1. Pisussat ajunaarutaasussat inuiaat qanittukkut misigiumaagaat suuppat?
ULLUMIKKUT inuiaat ajunaarnersuaq aatsaat taama ajunaarutaatigisussaq misigingajalerpaat. Jiisusip nalitsinni pissutsit qanoq ikkumaarnerat siulittuutigaa ajoqersukkanilu ima mianersoqqullugit: „Taamaannerani naalliunnartoqangaassaaq silarsuup pileqqaarneraniit maannamut asseqanngitsumik nalliuteqqinngisaannassasumillu. Ullullu taakku ikilisarneqanngippata ataatsimilluunniit annattoqassanngikkaluarpoq, qinikkalli pillugit ullut taakku ikilisinneqassapput.“ — Matthæusi 24:21, 22.
2. Annikilliornartussarsuaq sumit aallartitsaalinneqarpa?
2 Inuit takusinnaanngisaannik pissaanilissuit qilammiusut maanna annikilliornartussarsuaq aallartitsaalivaat. Apustilip Johannesip utoqqalisimasup tamatumunnga pissutaasumik Jiisusimit imminut saqqummersinneqartukkut paasitinneqarnini immikkut pisinnaatitaaffigaa. Takusani ima oqaluttuarai: „Takuakka inngilit sisamat nunarsuup sammiviini sisamani qeqartut nunarsuullu anorai sisamat noqillugit . . . Takuaralu inngili alla seqernup nuisarfianit qangattartoq Guutip uumasup naqitsisaa nassataralugu. Taassuma inngilit taakku sisamat . . . nipitoqisumik torlulaffigai: ’Nuna imarluunniit orpiilluunniit ajoqusinngikkallarsigit Guutitta kiffai qaavisigut naqissusereertinnagit.’“ — Saqqummersitat 7:1-3.
3. Annikilliornartussarsuaq aallartippat siullermik qanoq pisoqassava?
3 ’Guutitta kiffaanik’, tanitanik, inaarutaasumik naqissusiineq naammassineqangajalerpoq. Inngilit sisamat anorit aseruisussat iperarnissaat piareersimaffigaat. Iperarpatigit siullermik qanoq pisoqassava? Inngilip apeqqut tamanna ima akivaa: „Illoqarfissuaq taanna Babyloni taama tassanngaannartigisumik igitaassaaq periarfeerutitillugu.“ (Saqqummersitat 18:21) Tamanna pippat — upperisarsiornerup eqqunngitsup silarsuarmi tamarmi naalagaaffissua aserorneqarpat — qilammi nuannaartoqangaassaaq! — Saqqummersitat 19:1, 2.
4. Siunissami qanoq pisoqassava?
4 Nunarsuarmi inuiaqatigiit tamarmik iligiilerlutik Jehovap innuttaanut sorsussapput. Inuiaqatigiit taakku kristumiunik aalajaatsunik taakkuninnga nungutitsiniaanerminni iluatsissappat? Immaqa taamaappasissinnaavoq. Atali takoriartigu! Qilammi sakkutoorpassuit Kristusi Jiisusimit siulersorneqarlutik ’sakkutuut’ nunamiusut taakku nungutissavaat. (Saqqummersitat 19:19-21) Naggataatigut Diaavulu inngiliilu susinnaajunnaarnerup itinersuanut iginneqassapput. Taava inunnik tammartitsisinnaajunnaassapput, ukiunimi tusindini qilersorsimaneqassapput. Aniguisorpassuarnut qanoq eqqissiallannartigissava! — Saqqummersitat 7:9, 10, 14; 20:1-3.
5. Jehovamik ilumoorfiginnittuartut suna nuannaarutigiumaarpaat?
5 Pisussat nuannersut mianernartullu taakku qanittukkut misigissavavut. Taakku tamarmik Jehovap naalakkersuisinnaatitaaneranik, qilammi nunamilu kisimi oqartussaaneranik, qutsissisitsinermut tunngassuteqarput. Aamma makku eqqarsaatigeriakkit: Jehova ilumoorfigiuarutsigu aamma taassuma kisimi oqartussaanera illersorutsigu Jehovap aqqanik illernarsisitseqataanissamut siunertaanillu eqquutitseqataanissamut periarfissaqassaagut. Taamanikkussamut nuannissaqaaq!
6. Qanittukkut pisussat eqqarsaatigalugit maanna suna misissussavarput?
6 Pisussanut pingaarutilinnut tamakkununnga piareersareerpugut? Jehovap annaassinissamut pissaaneqarnera upperaarput? Taassuma piffissakkut eqqortukkut pitsaanerpaamillu uagutsinnik ikiuiartorumaarnera qularutiginngilarput? Apeqqutinik immitsinnut tunngasunik taamaattunik akisigaangatta apustilip Paulusip uppeqatiminut oqaasii uku eqqarsaatigisinnaavavut: „Siornatigut allagaasut tamarmik allassimapput uatsinnut ilinniutissaallutik, nikallujuilluta Allakkallu tunissutaat tuppallersaatigalugit neriuuterput aalajangiussinnaaqqullugu.“ (Romamiut 15:4) Uagutsinnut ilinniutissatut allanneqarsimasut uagutsinnut tuppallersaataallutillu uagutsinnik neriuuteqalersitsisut ilaat tassaavoq Jehovap qanoq ililluni Israelikkut naqisimannitsiminnit Egyptenimiunit naakkittaatsumik tigusaaqqanerannit aniguisitsisimaneranik oqaluttuaq. Jehova Israelikkunnik ikiuilluni aniguisitsimmat pisimasunik pissanganartunik taakkuninnga misissuineruneq maanna annikilliornartussarsuup qanilliartorasuarnerani qiimmassaatigisinnaaqaarput.
Jehovap innuttani aniguisippai
7. Ukiumi 1513-imi u.n.s. Egyptenimi sumik najummassimanartoqalerpa?
7 Ukioq 1513-iuvoq u.n.s. Jehovap Egyptenimiut perlunnik qulingiluanik perlussiortereerpai. Perluit qulingiluaat qaangiummat Faraop Mosesi anisippaa ima oqarluni: „Ilisimassavat kingorna uannut takkuteqqinngilluinnassagavit! Takkuteqqikkaluaruit toqutaassaatit!“ Mosesi ima akivoq: „Eqqortumik oqarputit, ilinnut takkuteqqinngisaannassaanga!“ — 2 Mosesi 10:28, 29.
8. Israelikkut inuuinnassagunik unnersuussutit suut malittariaqarpaat, qanorlu pippat?
8 Maanna Jehovap Mosesi oqaluttuuppaa Farao Egyptenimiullu tamarmik naggataasumik inaarutaasumilu perlussiortinneqarumaartut. Abibip (nisanip) ulluisa 14-ianni ilaqutariinni Egyptenimiuusuni tamani angut angajulliliaasoq uumasuutaannilu piaqqeqqaataasut toqussapput. Israelikkulli asattuunneqarsinnaapput Guutip Mosesimut unnersuussutaanik maleruaaqqissaarunik. Savaaqqap angutivissap aava illumik matserfiata saneraqutaanut marlunnut ikaarutaanullu qulaaniittumut tarnutissavaat isersimaannarlutillu. Unnuk taanna qanoq pisoqarpa? Mosesi nammineq ima oqaluttuarpoq: „Unnuap qeqqata nalaani [Jehovap] Egyptenimi angajulliliaasut tamaasa toqorarpai.“ Farao ingerlaannaq periarpoq. Mosesi Aronilu qaaqquai imalu oqarfigalugit: „Uanga innuttakkalu qimalluta aallarasuarniaritsi, [Jehovalu] guutisiorfigiartorsiuk soorlu taamaaliorumallusi piumasaqarsimasusi.“ Israelikkut ingerlaannaq aallarput. Israelikkuunngitsut „peqataaniartorpassuit assigiinngeqisut“ saniatigut Israelikkut 3 millioninit amerlanerugunarput. — 2 Mosesi 12:1-7, 29, 31, 37, 38.
9. Aqqut sorleq atorlugu Guutip Israelikkut Egyptenimit siulersorpai, aamma sooq?
9 Israelikkut angallavigisassaat sivikinnerpaaq tassaassagaluarpoq Imaq Akullersuaq sinerlugu Filisterillu nunaat aqqutigalugu angalagunik. Tamannali taakkununnga akeraasut nunagaat. Taamaattumik Jehovap innuttani — qularnanngitsumik sorsulinnginniassammata — aqqutikkut inoqajuitsumi Immap Aappalaartup eqqaatigoortukkut siulersorpai. Angalasut arlalinnik millioniliugaluartut, angalanerat aaqqissugaalluartumik ingerlavoq. — 2 Mosesi 13:17, 18.
’Jehovap annaanniarlusi qanoq iliornissaa isiginnaaginnarsiuk’
10. Sooq Guutip Israelikkut Pi-ha-Kirotimi tammaarnissaannik unnersuuppai?
10 Taava pissutsit tupaallannartumik allanngoriataarput. Jehovap Mosesi ima oqarfigaa: „Israelikkut oqarfigikkit sangullutik Pi-ha-Kirotimi tammaaqqullugit Migdolip immallu akornanni; tassa Ba’al-Sefonip akiani tammaassaasi immap killingani.“ Inupparpassuit unnersuussutit malimmatigit qaqqat Immallu Aappalaartup kangerliumarngata akornanni mattussaasutut ilerput. Qimaariarfissaqanngilluinnarpasipput. Jehovaliuna pilersaaruteqartoq. Mosesimut ima oqarpoq: „Farao manngertitikkumaarpara, malersulersillugu; uangalu Faraop sakkutoorpassuisalu pineqarneratigut naalannassusera takutikkumaarpara, Egyptenimiullu paasissavaat uanga tassaasunga [Jehova].“ — 2 Mosesi 14:1-4.
11. (a) Farao sua, Israelikkullu tamanna qanoq periarfigaat? (b) Israelikkut naammagittaalliutaat Mosesip qanoq akivaa?
11 Faraop, Israelikkunnik Egyptenimit aallartitsinermigut kukkusimasutut misigisup, taakku malersorsuataalerpai qamutit sorsuutit pitsaanersiukkat 600-t atorlugit. Egyptenimiut sakkutuui ersermata Israelikkut annilaangasorujussuanngorput Mosesimullu ima suaartarlutik: „Egyptenimi ilivissaqannginnermat anisippisigut inoqajuitsumi toqoqqulluta?“ Jehovap aniguisitsinissaa qularinagu Mosesi ima akivoq: „Erseqinasi! Aalajaallusi [Jehovap] annaanniarlusi qanoq iliornissaa isiginnaaginnarsiuk . . . . [Jehova] illersorlusi sorsukkumaarpoq, ilissili qanoq ilioriassanngilasi.“ (1990) — 2 Mosesi 14:5-14.
12. Jehovap innuttani qanoq ikiorpai?
12 Jehovap Israelikkut illersorlugit nammineq sorsukkumaarnera pillugu Mosesip oqaasiinut naapertuuttumik maanna pissaanilissuit qilammiusut Jehovamit najorneqarlutik akuliupput. Jehovap inngiliata napasoq nuiaasoq Israelikkunnik siulersuisoq Israelikkut tammaarfiata tunuatungaanut tupinnartuliornikkut nuuppaa. Egyptenimiut akornanni taartitsisoq, Israelikkut akornanni qaamatitsivoq. (2 Mosesi 13:21, 22; 14:19, 20) Guutip peqqussutaanut naalalluni Mosesip maanna assani isatsippaa. Oqaluttuaq ima nangippoq: „[Jehovap] unnuaq tamaat imaq nigorsimatippaa assarnersuakkut . . . Israelikkut immap qeqqatigut panertukkut [ingerlasinnaanngorput], saneraannilu talerpiata saamiatalu tungaanni imaq qarmarsuartut ippoq.“ Egyptenimiut malersuinertik ingerlatiinnarpaat, Jehovalli innuttani illersorpai. Egyptenimiut paatsiveerutitippai taavalu Mosesi ima oqarfigalugu: „Assat immap qulaagut isatsiguk ermit uterlutik Egyptenimiut qamutaallu qimussersuilu uluguteqqullugit.“ Faraop sakkutoorpassui suujunnaarsinneqarluinnarput sakkutuumik ataatsimilluunniit aniguisoqarnatik! — 2 Mosesi 14:21-28; Tussiaat 136:15.
Israelikkut aniguisitaanerat ilinniarfigiuk
13. Israelikkut aniguisitaanerminnut qanoq periarpat?
13 Tupinnartuliornikkut aniguisitaaneq tamanna aniguisitaasunut qanoq sunniuteqarpa? Mosesi Israelikkullu erinarsorusuummerput Jehovalu unnersiutigalugu! Ima erinarsorput: „[Jehova] tussiarfigissavara qutsissingaartitaammat. . . . [Jehova] kunngiuvoq naassaanngitsumik.“ (2 Mosesi 15:1, 18) Aap, eqqarsaatigisaat siulleq tassaavoq Guutimik nersuinissaq. Pisimasumi tamatumani Jehovap kisimi oqartussaalluni Guutiunini ilumut ersersippaa.
14. (a) Israelikkut misigisaat Jehova pillugu qanoq ilinniutigisinnaavavut? (b) Ukiumut 2008-mut allassimaffimmi qanoq allassimasoqarpa?
14 Pisimasut pissanganartut tamakku qanoq ilinniutigisinnaavavut, aamma qanoq ilillutik uagutsinnut tuppallersaataallutillu uagutsinnik neriuutissiippat? Erseqqippoq Jehova misilinneqarnerit kiffami atortariaqagaasa suulluunniit iliuuseqarfiginissaannut piareersimasartoq. Atortariaqagaat suulluunniit iliuuseqarfigisinnaavai. Jehova assarnersuartitsilermat Imaq Aappalaartoq Israelikkunnut ajoqutaajunnaarpoq. Aamma Jehovap Imaq Aappalaartoq atorlugu Faraop sakkutuui ulugutitsippai ipitillugit. Tamakku eqqarsaatigalugit tussiaasiortutut ima oqarsinnaavugut: „[Jehovap] najormanga siooragisassaqanngilanga, inuit qanoq iliorfigisinnaagaminnga?“ (Tussiaat 118:6) Aamma Paulusip oqaasii Romamiunut allakkani 8:31-miittut tuppallersaatigisinnaavavut: „Guutip illersorpatigut kia assortussavaatigut?“ Oqaatsit isumassarsiarititaasut taakku pissutigalugit tatiginningaalerpugut, annilaangavallaarunnaarpugut, qularpallaarunnaarlutalu neriuuteqangaalerpugut. Taamaattumik ukiumut 2008-mut allassimaffik una tulluartupilussuuvoq: „Aalajaallusi [Jehovap] annaanniarlusi qanoq iliornissaa isiginnaaginnarsiuk“! — 2 Mosesi 14:13, 1990.
15. Israelikkut Egyptenimit aniguisitaanerat eqqarsaatigalugu naalanneq qanoq pingaaruteqartigaa, aamma ullumikkut qanoq pingaaruteqartigaa?
15 Israelikkut Egyptenimit aninerat sumik allamik ilinniarfigisinnaavarput? Tassa Jehovamut naalattariaqartugut taassuma qanorluunniit iliuuseqaqqugaluarpatigut. Israelikkut poorskimut piareersaatit immikkuualuttorpassuit tamaasa iliuuserinissaannut tunngatillugu naalapput. Aamma nisanip 14-iani unnukkut naalallutik isersimaannarput. Naggataatigullu Egypteni qimakkamikku aaqqissugaalluartumik aallaqquneqarnertik malillugu iliorput. (2 Mosesi 13:18) Ullumikkut „inussiaq aalajaallunilu silatooq“ aqqutigalugu uagutsinnut unnersuussutigineqartunik maleruaanissarput pingaaruteqarluinnarpoq. (Matthæusi 24:45, NV) Guutip tunutsinnit oqaasii uku naalaqqissaartariaqarpavut: „’Aajuna aqqusineq, taanna ingerlavigissavarsi!’ Talerpimmukarumavusimi saamimmukarumallusilu.“ (Esaja 30:21) Annikilliornartussarsuup aallartinnissaa qanilliartortillugu sukumiisumik ilitsersuunneqassagunarpugut. Ullut ajornartorsiorfiusut makku ajorata anigorsinnaassagutsigit Jehovamut kiffaasut ilumoorfiginnittut allat ingerlaqatigisariaqarpavut.
16. Guutip Israelikkunnik aniguisitsigami pisunik aqutsinera sumik ilinniarfigisinnaavarput?
16 Aamma eqqaamajuk Israelikkut Jehovamit allamukartinneqaramik qaqqat Immallu Aappalaartup akornanni qimaariarfissaqanngippasissumiilersut. Iliuuserisaat ajorluinnarpasippoq. Jehovalli suut tamaasa nakkutigai, pisimasorlu tamanna taassuma ataqqinartinneqarneranik innuttaasalu annaanneqarnerannik kinguneqarpoq. Ullumikkut peqatigiissortanut tunngasut aalajangersimasut iliuuseqarfigineqartarnerat immaqa paasilluarsinnaanngilarput, Jehovalli tusarliisartuni aalajaatsut aqqutigalugit siulersuinerata tutsuiginissaanut pissutissaqarluarpugut. Ilaannikkut uagutsinnut akeraasut iluatseqqajaarpasilersinnaasarput. Paasinnissinnaassuserput killeqarmat immaqa tamatumunnga tunngassuteqartut ilaannaat paasisinnaavavut. Taamaakkaluartorli Jehovap pisut piffissakkut eqqoqqissaartukkut aqussinnaavai, soorluttaaq itsaq Israelikkut iluaqutissaannut taamaaliorsimasoq. — Ussatit 3:5.
Jehova tatigiuk
17. Sooq Guutip siulersuinissaa qularutiginngilluinnarsinnaavarput?
17 Israelikkut napasoq nuiaasoq ullukkut siulersuisartoq napasorlu innerusoq unnukkut qaammarsaasartoq kingumut eqqarsaatigigaangamikkit tatiginningaartarnerat takorloorsinnaaviuk? Erseqqippoq „Guutip inngilia“ angalaneranni taakkuninnga siulersuisimasoq. (2 Mosesi 13:21, 22; 14:19) Ullumikkut qularutiginngilluinnarsinnaavarput Jehovap innuttani najortarai siulersorniarlugit, sernissorniarlugit aniguisinniarlugillu. Neriorsuut una uummammiuliussinnaavarput: „[Jehovap] imminut ilumoortut [imminiiginnarneq ajorpai]. Taakku sernissorneqartuartarput.“ (Tussiaat 37:28) Inngilerpassuit pissaaneqaqisut taakku Guutip kiffaanik ullumikkut ikiuisartut puiunngisaannartigit. Taakkua ikiuineratigut tapersersuineratigullu ’aalajaassinnaalluta [Jehovap] annaanniarluta qanoq iliornissaa isiginnaaginnarsinnaavarput’. — 2 Mosesi 14:13, 1990.
18. Sooq „Guutip sakkutuussutai tamarmiusut“ atisariaqarpavut?
18 Sallusuissummi ’aalajaannissamut’ tamatta suna iluaqutigisinnaavarput? Anersaakkut sakkutuussutinik apustilip Paulusip Efesosimiunut allakkamini allaatigisaanik atuinerput iluaqutigisinnaavarput. Maluginiariaruk oqaaqqissaaraatigut ’Guutip sakkutuussutaanik tamarmiusunik’ atiseqqulluta. Anersaakkut sakkutuussummut tamatumunnga ilaasut tamaasa atorpavut? Ukiumi 2008-mi pitsaassaaq tamatta immikkut imminut misissoqqissaarutta sakkutuussummut ilaasut tamarmik immikkut inissaminniinnerat sukalluarsimanerallu qulakkeerniarlugu. Uagutsinnut akeraasup, Saatani Diaavulup, sanngiiffivut nalunngilai, nakkutilliinngitsiarnitsinnilu pakasarniartarpaatigut sanngiiffitsinniluunniit saassunniartarluta. Anersaanut pissaanilinnut ajortunut ’sorsuttariaqarpugut’. Jehovamilli nakussatsinneqarnitsigut sorsunnermi tamatumani ajugaasinnaavugut! — Efesosimiut 6:11-18; Ussatit 27:11.
19. Pinertusaarutta suna pilluaqqussutisiarisinnaavarput?
19 Jiisusip ajoqersukkani ima oqarfigai: „Pinertusaarnissigut inuunersi pigittuinnassavarsi.“ (Lukasi 21:19) Qanortoq aalajaallutik misilinneqarnerminni tamani pinertusaartunut ilaagisa taamaalillutalu Guutip ajunngissusia pisassarinngisaraluaq iluaqutigalugu ’aalajaalluta [Jehovap] annaanniarluta qanoq iliornissaa isiginnaaginnarsinnaaniassagatsigu’.
Qanoq akissavit?
• Qanittunnguakkut pissanganartunik sunik pisoqassava?
• Ukiumi 1513-imi u.n.s. Jehovap annaassinissamut pissaaneqarnini qanoq takutippaa?
• Siunissami sunissat aalajangiusimaviuk?
[Qupp. 27-mi issuagaq]
Ukiumut 2008-mut allassimaffik imaappoq: „Aalajaallusi [Jehovap] annaanniarlusi qanoq iliornissaa isiginnaaginnarsiuk.“ — 2 Mosesi 14:13, 1990.
[Qupp. 24-mi assiliartaq]
„Siornatigut allagaasut tamarmik allassimapput uatsinnut ilinniutissaallutik“
[Qupp. 25-mi assiliartaq]
Faraop malartitassaannginnera pissutaalluni Egyptenimi ajunaarnersuaqarpoq
[Qupp. 26-mi assiliartaq]
Israelikkut aniguipput Jehovap imminnut peqqussutai tamaasa malillugit ilioramik