Jehovap kiffani utoqqaat asannilluni isumassorpai

„Guutip iluaatsuunnginnami puiorsimanngilai suliasi asanninnersilu aqqanut takutissimasarsi.“ — HEBRÆERIT 6:10.

1, 2. (a) Utoqqaq qeersooq takugukku immaqa suna eqqaassaviuk? (b) Jehovap kristumiut utoqqaat qanoq isigai?

QATANNGUTIT utoqqaat ilagiinniittut qeersuut takugaangakkit immaqa Danielip allagaani allassimasut eqqaasarpatit. Takorruukkami Danielimut takorroortitamini, Jehova Guuti imminut qeersuutut takutippoq. Danieli ima allappoq: „Imaattumik takusaqarpunga: Issiavissaarsuit inissititerneqarput, innalu ittuinnartoq arlaannut ingippoq. Atisai aputitut qaqortigaat; nujaalu savap meqquisut minguitsigipput.“ — Danieli 7:9.

² Savap meqqui suliarineqarsimanngitsut qaqortuugajupput. Taamaammat nutsat qaqortut taaguullu „ittuinnartoq“ Guutip ukioqqortungaarneranik ilisimassuseqangaarneranillu ilisimatitsipput, taakkualu pissutigalugit ataqqinningaartariaqarpugut. Ittuinnartup, Jehovap Guutip, angutit arnallu utoqqaat imminut aalajaallutik kiffartortut qanoq isigigamigit? Guutip oqaasiani allassimavoq ’nutsat qeersuusut niaqorutaasartut kusanangaartut naapertuilluarnerup aqqutaaniikkaangata.’ (Ussatit 16:31, NV) Aap, kristumiu aalajaatsoq qeersuunngorsimappat, tamanna Guutip isaani kusanartarpoq inersimalluarnermut uppernarsaataammat. Qatanngutitit utoqqaat Jehovap isiginninneratut isigaagit?

Sooq taama pingaartinneqartigippat?

3. Sooq uppeqativut utoqqaat taama pingaartitsigaavut?

³ Guutimut kiffaasut utoqqaat asasaasut taakkunatut ittut ilaat tassaapput Jehovap Nalunaajaasuisa Siulersuisoqatigiivinut ilaasortaasut, maanna nakkutilliisuusut angalasartut siornatigullu nakkutilliisuusimasut angalasartut, pionerit aallussilluartut oqaluussisartullu kristumiut inersimalluartut — qatanngutit angutit arnallu aalajaallutik ilagiitsinni kiffartortut. Immaqa ilisarisimasaqarputit ukiuni qulikkuutaani nutaarsiassamik nuannersumik oqaluussissutiginnissimasunik, inuusunnerusunullu kajumissaataasumik maligassiuisimasunik taakkualu inuunerannut sunniuteqaqataasimasunik. Qatanngutit utoqqaat ilaat akisussaafferujussuaqarsimapput nutaarsiassarlu nuannersoq pillugu malersugaaneq naammagalugu atorsimallugu. Jehova ’inussiarlu aalajaallunilu silatooq’ utoqqaat Guutip naalagaaffiata iluaqutissaanut iliuuserisimasaannik sulilu iliuuserisartagaannik tamanik qujamasuutiginningaarput. — Matthæusi 24:45, NV.

4. Sooq uppeqativut utoqqaat ataqqisariaqarlugillu qinnuttariaqarpavut?

⁴ Utoqqaat aalajaatsut taakkunatut ittut Jehovamik Guutimik pallorfiginnittunit allanit qujamasuffigineqartariaqarlutillu ataqqineqartariaqarput. Allaat inatsimmi Guutip Mosesi aqqutigalugu innuttaminut tunniussaani utoqqarnik isumassuillunilu ataqqinninneq Jehovamik mianerinninnermut atassuserneqarpoq. (3 Mosesi 19:32) Utoqqaat aalajaatsut taakku qinnuttuartariaqarpavut Guutilu qutsavigalugu taakkua asannittuliaat pillugit. Apustilip Paulusip suleqatini asasani, inuusuttut utoqqaallu, qinnuttarpai. — Atuaruk 1 Thessalonikamiut 1:2, 3.

5. Jehovamut kiffaasunik utoqqarnik peqateqartarneq qanoq iluaqutigisinnaavarput?

⁵ Aamma ilagiinniittut tamarmik utoqqarnik peqateqartarnertik iluaqutigisinnaavaat. Jehovamut kiffaasut utoqqaat aalajaatsut atuaqqissaarnermikkut, qimerluuinermikkut misigisimasatillu pissutigalugit nalissaqanngitsumik ilisimassuseqalersimapput. Naammagittarnissaq misiginneqataanissarlu ilikkarsimavaat, ilikkarsimasaminnillu kinguaariinnut tulliuttunut ingerlatitseqqinnertik nuannaarutigingaartarlugulu nalerisimaarutigingaartarpaat. (Tussiaat 71:18) Ilissi inuusuttuususi, puilasuliamit itisuumit imermik qaloorisoqartarneratut utoqqaat ilisimassusiannik ’qaloorinissigut’ ilisimasaqalerniartarussi silatusaassaasi. — Ussatit 20:5.

6. Utoqqarnut qanoq ersersissinnaaviuk taakkuninnga ilumut pingaartitsillutit?

⁶ Utoqqaat ilisimatittarpigit Jehovap taakkuninnga pingaartitsineratut pingaartitsigalugit? Ilaatigut taamaaliorsinnaavutit oqaluttuullugit aalajaannerat pillugu qanoq asatigalugit isumaallu qanoq pingaartitsigalugit. Aamma siunnersuutaannik malinninnikkut taakkuninnga ilumoorlutit ataqqinninnerit ersersissavat. Kristumiut utoqqaat ilarpassuisa inuusukkallaramik utoqqaat aalajaatsut imminnut siunnersuutigisimasaat pitsaasut taakkuninngalu malinninnerminnik inuunerminni qanoq iluaqutiginnissimanertik eqqaamavaat.a

Iliuuseqarnikkut asannillutit isumassuigit

7. Jehovap kikkut utoqqarnik isumassuinissamut akisussaanerpaatippai?

⁷ Guutip utoqqarnut ilaqutaasut taakkuninnga isumassuinissamut akisussaanerpaatippai. (Atuaruk 1 Timotheusi 5:4, 8.) Jehovap nuannaarutigisarpaa ilaqutariit ilaquttaminnut utoqqalisimasunut pisussaaffimminnik naammassinnikkaangata taamaalillutillu nammineq utoqqarnik isumassuinermisut isumassuinertik ersersikkaangassuk. Guutip ilaqutariit taakkua iliuuserisaat pilliutigisaallu tamaasa pillugit annertoqqusersortarlugillu pilluaqqusarpai.b

8. Sooq ilagiit qatanngutinik utoqqarnik isumassuisariaqarpat?

⁸ Aamma Jehovap ilagiit qatanngutinik utoqqarnik aalajaatsunik ikiorneqarnissaminnik pisariaqartitsisunik, uppertunilli kajumittunillu isumassuisinnaasunik ilaqutaqanngitsunik, tapersersuisarnerat nuannaarutigisarpaa. (1 Timotheusi 5:3, 5, 9, 10) Taamaalillutik ilagiit ersersittarpaat ’isumaqatigiillutik inooqatigiillutik misiginneqataasarlutillu, qatanngutigiittut asaqatigiillutik, nallittuisarlutik’. (1 Petrusi 3:8) Taakkua utoqqarnik isumassuisarnerat Paulusimit torrallallugu assersuusiarineqarpoq taassuma uparuarmagu „avat ataaseq naalliukkaangat avatit tamarmik [naallioqatigisaraat]“. (1 Korinthimiut 12:26) Iliuuseqarnikkut utoqqarnik misiginneqatiginninnitsigut ersersittarparput najoqqutassiaq Paulusip siunnersuutaanut matumunnga tunngaviusoq malillutigu: „Nanertuutigisassinnik ersoqatigiigitsi, taamaaliornikkut Kristusip inatsisaa naammassiumaarassiuk.“ — Galatiamiut 6:2.

9. Utoqqalineq qanoq nanertuutaasinnaava?

⁹ Utoqqaat suut nanertuutigisarpaat? Ilarpassui qasujapput. Immaqa misigisarput pisariunngikkaluartulluunniit — soorlu nakorsiarneq, akiligassanik akiliineq, asaaneq nerisassiornerlu — nukissaqarfiginagit. Utoqqaliartortilluni amerlanertigut nererusussuseerukkiartornartarlunilu imerusussuseerukkiartornartarmat, immaqa nerisariaqaraluarnermissut imertariaqaraluarnermissullu nererusutsiginatillu imerusutsiginngillat. Aamma anersaakkut inuussutissanut tunngatillugu taamaalisoqarsinnaavoq. Isigiarsunneq tusillannerlu pissutigalugit kristumiut ataatsimiinnerini atuarnissaq tusarnaarnissarlu erloqinarsisinnaapput, aamma ataatsimiigiarniarluni aninissamut piareersarnerinnarluunniit nukeerunnarsinnaavoq. Allat utoqqarnik taakkunatut ittunik ikiuiniarlutik suut iliuuserisinnaavaat?

Illit qanoq ikiuisinnaasutit

10. Utoqqaat ikiorneqarnissaat qulakkeerniarlugu utoqqaanertat qanoq iliorsinnaappat?

¹⁰ Ilagiit ilarpassuini utoqqarnik ikiuinermut tunngatillugu maligassiuilluartoqarpoq. Qatanngutit asannittut utoqqaat pisiniuttarpaat, nerisassiuuttarpaat asaassuttarlugillu. Atuaqqissaarnissaannut, ataatsimiigiarlutik aninissamut piareersarnissaannut aalajangersimasumillu oqaluusseqataasarnissaannut ikiortarpaat. Ikinngutaasa inuusunnerusut angalaaqatigisarpaat ingerlanneqarnissaallu isumagisarlugu. Utoqqaat ilaasa angerlarsimaffitsik qimassinnaanngikkunikku ataatsimiinnerit oqarasuaatikkut immiunneqarneriluunniit tusarnaarsinnaavaat. Utoqqaanertat periarfissat tamaasa atorlugit qulakkeerniartassavaat atorluarsinnaasunik aaqqissuussisoqarnissaa, utoqqaat ilagiinniittut pisariaqartitaat isumagineqarniassammata.c

11. Ilaqutariit qatanngummik utoqqarmik ikiuisimanerat oqaluttuariuk.

¹¹ Oqaluussisartut ataasiakkaat aamma inoroorsaarsinnaallutillu tukkorsinnaapput. Qatanngut angut utoqqaq nuliani toqummat soraarnerussutisiani kisiisa atorlugit ineqarnermut akiligassap akilernissaanut akissaaruppoq. Taassuma nulianilu ilaqutariit — aappariit inuusuttuaqqanik marlunnik panillit — illorujussuallit Biibilimik atuaqqissaaqatigisarsimavaat. Ilaqutariit taanna illuminni ineeqqanik marlunnik atugassippaat. Ukiuni 15-ini nereqatigiittarlutillu nuannisaaqatigiittarlutillu qatanngutigiittut tunniusimaqatigiipput. Inuusunnerusut taakkua qatanngutip utoqqaap uppernera misilittagartuuneralu amerlasoorpassuartigut iluaqutigaat, aamma taassuma nuannersumik peqatigiittarnertik nuannaarutigaa. Qatanngutip utoqqaap taassuma 89-inik ukioqarluni toqussi tikillugu ilaqutariit taakkua najugaqatigai. Ilaqutariit taakkua taassuminnga peqateqarnerminni pilluaqqussuterpassuit pillugit Guuti suli qutsavigisarpaat. Uppeqatimik kristumiut ilaannik ikiuinertik pillugu ’akissarsinngitsuunngillat’. — Matthæusi 10:42.d

12. Qatanngutinik utoqqarnik asannillutit isumassuiniarlutit qanoq iliorsinnaavit?

¹² Imaassinnaavoq ilaqutariit taakkua pisimanerattut qatanngummik utoqqarmik ikiuisinnaanngitsutit, immaqali utoqqaat ilaat ataatsimiigiarnissaannut angalaarnissaannulluunniit ikiorsinnaavatit. Aamma pulaaqqusinnaavatit asiaqatigalugilluunniit. Pulaarsinnaavatit, ingammik napparsimappata angerlarsimaannalersimappataluunniit. Aamma tamatigut inersimasutut inersimalluartutut pisinnaallugillu pisariaqarpatit. Qatanngutit utoqqaat eqqarsartaatsikkut pisinnaatillugit taakkununnga tunngasunik aalajangigassaqaraangat aalajangeeqataatinneqartariaqarput. Eqqarsartaatsikkut piginnaasaqarpiarunnaarsimagaluartulluunniit malugisinnaavaat ataqqinnittumik pineqarnerlutik.

Jehovap suliasi puiornavianngilai

13. Kristumiut utoqqaat misigissusiinik innimiginninnissaq sooq pingaaruteqarpa?

¹³ Utoqqaat misigissusiinik innimiginninnissaq pingaaruteqarpoq. Utoqqaat inuusunnerminnisulli aamma peqqikkallarnerminnisulli suliaqartigisinnaannginnerminnik assut aliasuutiginnittarnerat nalinginnaavoq. Assersuutigalugu qatanngut arnaq suliniuteqartorujussuulluni ukiuni 50-ini Jehovamut kiffartorsimasoq pioneriusimasorlu sanngiillissutigisaminik nappaateqalerpoq aatsaallu ilungersuangaatsiaqqaarluni ataatsimiinnermut najuussinnaalluni. Maanna sapinngisamininnguani siornatigut kiffartorsimanerminut sanilliukkamigit qissaserpoq. Nakalluni qullilillunilu ima oqarpoq: „Maannakkut suliakka suunngillat.“

14. Jehovamut kiffaasut utoqqaat Tussiaatini allassimasut qanoq qiimmassaatigisinnaavaat?

¹⁴ Utoqqalisimaguit, taava taamatut misigissutsikkut naalliuuteqartarpit? Imaluunniit ilaannikkut Jehovamit immineerneqarsimasutut misigisarpit? Tussiaasiortoq ukiuni inuuffigisamini kingullerni immaqa taamatut misigisarsimavoq, Jehovami ima qinnuigaa: „Ilinnit igeqinanga utoqqaliguma, qimaqinanga nukeerutileruma. . . . Qimaqinanga, Guuti, utoqqanngoruma qeersuunngorumalu.“ (Tussiaat 71:9, 18) Soorunami Jehovap tussiaasiortoq immineernavianngilluinnarpaa, aamma illit immineernavianngilaatit. Tussiaammi allami Daavip ersersippaa Guutimit ikiorneqarnissani annertoqqusersorneqarnissanilu qularutiginagu. (Atuaruk Tussiaat 68:20.) Qatanngutaaguit utoqqaq aalajaatsoq qularutiginngilluinnarsinnaavat Jehovap najoraatit aamma ullut tamaasa napatittuarumaaraatit.

15. Utoqqaat isumalluartumik inuunermut isiginnittaaseqarnissamut suna iluaqutigisinnaavaat?

¹⁵ Ilissi Jehovamut nalunaajaasut utoqqaat, Guutip ataqqinaatissaanik iliuuserisimasasi sulilu iliuuserisartakkasi taassuma eqqaamajuarpai. Biibilimi allassimavoq: „Guutip iluaatsuunnginnami puiorsimanngilai suliasi asanninnersilu aqqanut takutissimasarsi.“ (Hebræerit 6:10) Taamaattumik isumalluanngitsumik eqqarsartaaseqalernaveersaaritsi, isumaqalernaveersaarlusi utoqqaanersi pissutigalugu Jehovamit atorneqarsinnaajunnaarlusi. Nikallornartut isumalluarnanngitsullu eqqarsaatigiunnaarlugit isumalluarnartulli eqqarsaatiginiarlugit sapinngisassinnik ilioritsi. Pilluaqqussutisiasi siunissamullu neriuutersi nuannaarutigisigit! ’Siunissaqarpugut neriuuteqarlutalu’ — allanit nallerneqarsinnaanngitsunik — Pinngortitsisullu tamanna uppernarsarpaa. (Jeremia 29:11, 12; Apustilit Suliaat 17:31; 1 Timotheusi 6:19) Neriuutersi eqqarsaatigeqqissaarsiuk, uummatikkut isumakkullu inuusuttuujuarnissarsi sulissutigisiuk, ilagiinniinnissilu pingaaruteqassusia suusupaginngisaannarsiuk!e

16. Sooq qatanngut angut utoqqaq utoqqaanertaajunnaartariaqarsoriva, utoqqaanertaqatigiilli taanna qanoq kajumissaarpaat?

¹⁶ Johanimik oqaluttuaq sammeriartigu. 80-inik ukioqarluni nuliani aalajaatsoq, Sannie, katsorsarneqarsinnaanngitsumik nappaatilik, ulloq unnuarlu paaqqutarisariaqarpaa.f Qatanngutit arnat ilagiinneersut nikittaallutik Sannie najortarpaat Johan ataatsimiigiarsinnaallunilu oqaluusseqataasinnaaniassammat. Qanittukkulli Johan misigissutsikkut ima qasutigilersimavoq utoqqaanertaajunnaarnissani eqqarsaatigilerlugu. Qullililluni ima aperivoq: „Sooq utoqqaanertatut ingerlaannassaanga? Ilagiinni iluaqutaajunnaavippunga.“ Utoqqaanertaqataasa qularunnaarsippaat taassuma misilittagai naliliisinnaassusialu iluatinnangaartut. Suliarisinnaasai killeqaraluartut utoqqaanertatut ingerlaannaqqusorujussuuaat. Johanip tamanna qiimmaallaatigeqalugu utoqqaanertatut ingerlaannarpoq, ilagiinniittunut tamanut nuannaarutaallunilu pilluaqqussutaasumik.

Jehova utoqqarnik ilumut isumassuivoq

17. Kristumiut utoqqaat Biibilimi qanoq neriorsoqqissaarneqarpat?

¹⁷ Biibilimi erseqqissarneqarpoq utoqqaat utoqqalinerup kingunerisaanik ajornartorsiuteqaraluarlutik anersaakkut ineriartortuarsinnaasut. Tussiaasiortoq ima allappoq: „Ikkunneqarsimapput [Jehovap] naalaffiani . . . Utoqqalingaarlutik allaat inerititaqassapput orpittut uummaasutut qorsuusutut.“ (Tussiaat 92:14, 15) Apustili Paulusi, timikkut nappaammik akiugaqarsimagunartoq, ’nikallunngilaq, naak inuusini qalleq aseroriartoraluartoq’. — Atuaruk 2 Korinthimiut 4:16-18.

18. Sooq qatanngutit utoqqaat taakkuninngalu isumaginnittut allanit ikiorneqartariaqarpat?

¹⁸ Ullumikkut utoqqarpassuarnit ersersinneqarpoq utoqqaat ineriartortuarsinnaasut. Unamminiarnartulli nappaatinut utoqqalinermullu attuumassuteqartut nikallornarsinnaapput, ilaqutaasunik isumassuillutillu tunniusimasunik ikiortissaqaraluartunulluunniit. Aamma isumassuisut qasulluinnalersinnaapput. Ilagiit utoqqarnut taakkuninngalu isumaginnittunut asannittuliornissaq immikkut pisinnaatitaaffigalugulu akisussaaffigaat. (Galatiamiut 6:10) Taamatut ikiuisarnitsinni erserpoq inuit taama ittut oqarfigiinnartanngikkivut ’aallassasut oqortunillu atisissasut naammatsillutillu nerissasut’, ikiornagillu. — Jaaku 2:15-17.

19. Sooq kristumiut utoqqaat aalajaatsut siunissamut isumalluarsinnaappat?

¹⁹ Utoqqalineq qatanngutip ilagiinni oqaluussinermilu qanoq iliuuseqartigisinnaaneranut sunniuteqarsinnaavoq, Jehovali kiffaminut utoqqarnut ilumoorfiginnittunut piffissap ingerlanerani asanninnikilliartorneq ajorpoq. Kristumiulli aalajaatsut taakkua tamaasa taassuma pingaartingaarpai, imminiiginnanngisaannassavaalu. (Tussiaat 37:28; Esaja 46:4) Jehovap taakku utoqqaanerat tamaat napatillugillu siulersussavai. — Tussiaat 48:15.

[Quppernerup ataani ilanngussat]

Qanoq akissavit?

• Sooq qatanngutit utoqqaat aalajaatsut illit pingaartippigit?

• Qanoq ililluta uppeqatitsinnik utoqqarnik asannilluta isumassuisinnaavugut?

• Jehovamut kiffaasut utoqqaat isumalluartumik inuunermut isiginnittaaseqarnissamut suna iluaqutigisinnaavaat?

[Qupp. 22-mi assiliartat]

Utoqqaat ilagiinniittunit pingaartinneqangaarput