Jiisusip oqaasii isummannut sunniuteqartikkit
‘Guutimit aallartitaasoq Guutip oqaasiinik oqaluttarpoq.’ — JOHANNESI 3:34.
1, 2. Qaqqami oqaluutsimi Jiisusip oqaasii sumut assersuunneqarsinnaappat, aamma sooq oqartoqarsinnaava Guutip oqaasianik tunngaveqarluartoq?
DIAMANTIT silarsuarmi annerpaartaasa ilaat tassaavoq Cullinan I, aamma the Great Star of Africa-mik taaneqartartoq, 530-nik caraatilik (106 grammit sinnerlugit oqimaassusilik). Ujarak erlinnartoq taanna nalilerujussuuvoq! Ujaqqammilli erlinnartumit tamatumannga suli naleqarnerupput Jiisusip qaqqami oqaluutsimini oqaasii. Tamannalu tupinnanngilaq, Jiisusimmi oqaasii Jehovamit aallaaveqarput. Jiisusi pillugu Biibilimi ima allassimasoqarpoq: ‘Guutimit aallartitaasoq Guutip oqaasiinik oqaluttarpoq.’ — Johannesi 3:34-36.
2 Qaqqami oqaluuseq immaqa akunnerup affaa inorlugu sivisussuseqaraluarluni allakkanit arfineq-pingasunit Allakkanit Hebræerisuuneersunit 21-nik issuaanertaqarpoq. Tassa “Guutip oqaasiinik” tunngaveqarluarpoq. Guutip ernerata asasaata oqalugiaataani torrallatami tamatumani oqaaserineqartut nalissaqanngitsut ilarpassui qanoq atorsinnaanerivut misissoriartigu.
“Qatanngutit eqqisseqatigiartoqqaarallaak”
3. Jiisusip ajoqersukkani kamattuarnerup sunniutai pillugit mianersoqqoreerlugit qanoq siunnersorpai?
3 Kristumiutut eqqisseqatigiissitsisuullutalu pilluarpugut Guutip anersaava illernartoq pigigatsigu, taannalu eqqissinermik nuannaarnermillu ineriartortitsisarpoq. (Galatiamiut 5:22, 23) Jiisusip kissaatiginngilaa ajoqersukkami eqqissiunnaarlutillu nuannaarunnaarnissaat. Taamaattumik kamattuarnerup sunniutai toqussutaasinnaasut pillugit mianersoqquai. (Atuaruk Matthæusi 5:21, 22).a Tamatuma kingorna ima oqarpoq: “Tunissutissat pilliivimmukaakkukku tassanilu eqqaalerlugu qatanngutit illit pillutit unnerluussutissaqartoq, taava tunissutissat pilliivimmut qimallugu qatanngutit saammaakkiartoqqaarallaak [eqqisseqatigiartoqqaarallaak, NV], taavalu aatsaat kingorna tunissutissat pilliutigiartorlugu.” — Matthæusi 5:23, 24.
4, 5. (a) ‘Tunissutissaq’ Jiisusip Matthæusi 5:23, 24-mi eqqartugaa suua? (b) Qatanngummik ajuallassimasumik eqqisseqateqarnissaq sooq pingaaruteqarpa?
4 ‘Tunissutissaq’ Jiisusip eqqaasaa tassaavoq naalaffimmi Jerusalemimiittumi pilliutigineqartoq sunaluunniit. Assersuutigalugu uumasunik pilliutit pingaaruteqangaarput inuiaat guutisiornerannut ilaagamik. Pilliummilli tamatumannga pingaaruteqarnerusoq, Jiisusip oqarneratut, tassaavoq qatanngummik ajuallassimasumik eqqisseqateqarnissaq Guutimut tunissuteqartinnani.
5 ‘Eqqisseqatigiinneq’ saammaateqatigiinnertut paasisariaqarpoq. Jiisusip oqaasii taakku sumik ilinniarfigisinnaagatsigit? Tassa allanut pissusilersornerput Jehovamut attaveqarnitsinnut sunniuteqartartoq. (1 Johannesi 4:20) Aap, itsaq Guutimut pilliutigineqartut inoqatit iluamik pinngikkaanni naleqarneq ajorput. — Atuaruk Mika 6:6-8.
Maniguunnissaq pingaaruteqarpoq
6, 7. Qatanngut ajuallatsissimasaq eqqisseqatigeqqikkumallugu sooq maniguunnissaq pisariaqarpa?
6 Qatanngummik ajuallassimasumik eqqisseqateqarnissaq qularnanngitsumik maniguunnitsinnut misilinneqaataassaaq. Maniguuttut eqqortumik iliorsimasoralutik eqqortumik iliorsimanertik uppernarsarniarlugu uppeqatitik oqqateqatigineq ajorlugilluunniit isumaqatiginnginneq ajorpaat. Tamanna pissutsinik nuanniillisitsissaaq — soorlu itsaq kristumiut Korinthimiittut nalaanni taamaattoqarsimasoq. Apustili Paulusi taamaattoqarnera pillugu eqqarsalernartumik ima allappoq: “Akornassinni saqitsaassutinik eqqartuussisunut suliassanngortitsisarnersi tassaareerpoq sapersinneq. Sooq pitsaanerutinnginnerpisiuk iluaatsuliorfigitinneq? Sooq pitsaanerutinnginnerpisiuk ajunaaruteqarneq?” — 1 Korinthimiut 6:7.
7 Jiisusi oqanngilaq qatanngupput saaffigissagipput nammineq ilumoornitsinnik taassumalu kukkuneranik qularunnaarsinniaannarlugu. Eqqisseqatigeeqqilernissaq siunertaasussaavoq. Eqqisseqatigiikkumalluta qanoq misiginerput unneqqarilluta oqaatigisariaqarparput. Aamma oqaloqatigisatta misigissutsikkut annersinneqarsimanera akuerisariaqarparput. Uagullu nammineq kukkusimagutta maniguulluta utoqqatsertariaqarpugut.
“Isivit talerpilliup tammartippatit”
8. Jiisusip oqaasii Matthæusi 5:29, 30-mi allassimasut pingaarnersiukkit.
8 Jiisusi qaqqami oqaluutsimi kinguaassiuutinut tunngatillugu ileqqussat pillugit iluaqutaasumik siunnersuivoq. Nalunngilaa avativut naammalluinnanngitsut uagutsinnut ajortumik sunniisinnaasut. Taamaattumik ima oqarpoq: “Isivit talerpilliup tammartippatit, peeruk igillugulu. Ilinnummi pitsaaneruvoq timinni avativit ilaat ataaseq annaassallugu timivit tamarmiusup Anniarfimmut [Gehennamut, NV] iginneqarnissaanit. Talerpippit tammartippatit, kipiuk igillugulu. Ilinnummi pitsaaneruvoq avativit ilaat ataaseq annaassallugu timivit tamarmiusup Anniarfimmut [Gehennamut, NV] pinissaanit.” — Matthæusi 5:29, 30.
9. ‘Isitta’ imaluunniit ‘talerpitta’ qanoq ‘tammartissinnaavaatigut’?
9 ‘Isi’ Jiisusip eqqartugaa arlaannik maluginiaasinnaassutsitsinnut assersuutaavoq, ‘talerpillu’ assavut atorlugit iliuuserisinnaasatsinnut. Mianersunngikkutta avatit taakkua tammartissinnaavaatigut ‘Guutimik saqeqatiginnikkunnaarsilluta’. (1 Mosesi 5:22; 6:9, NV) Guutimut naalannginnissamut ussernartorsioraangatta iliuuseqarujussuartariaqarpugut, isi peerlugulusooq imaluunniit talerpik kipillugulusooq.
10, 11. Kinguaassiuutitigut inuunerlunnginnissamut suna iluaqutigisinnaavarput?
10 Isivut ileqqorlunnermut tunngasunik isiginnaannginniassammata qanoq ililluta aqussinnaavavut? Jobi Guutimik mianerinnittoq ima oqarpoq: “Isikka isumaqatigiissuteqarfigisimavakka niviarsiaq pileritsaallugu isigiumanagu.” (Jobi 31:1) Jobi aappaqarpoq Guutillu ileqqussatigut inatsisaanik unioqqutitsinnginnissaminik aalajangiusimannilluni. Uaguttaaq taamatut isiginnittaaseqartariaqarpugut, aappaqaraluarutta aappaqanngikkaluaruttaluunniit. Kinguaassiuutitigut inuunerlukkumanata Guutip anersaavanit illernartumit siulersortittariaqarpugut, taannami inunni Guutimik asannittuni ilaatigut imminut naalakkersinnaanermik ineriartortitsisarpoq. — Galatiamiut 5:22-25.
11 Kinguaassiuutitigut inuunerlukkumanata imminut ima aperisariaqarpugut: ‘Isima atuakkani, tv-mi internettikkulluunniit ileqqussatigut kanngunartunik uannik isiginnaarusussuseqalersitsinissaa atuarusussuseqalersitsinissaaluunniit akueraara?’ Aamma ajoqersukkap Jaakup allagai uku eqqaamasariaqarpavut: “Kinaluunniit usserneqartarpoq nammineq pilerissutsiminit nassataritilluni kajumitsatsitaallunilu; pilerissutsillu ilumileraangami ajorti erniarisarpaa, ajortillu inersimaleraangami toqu erniarisarpaa.” (Jaaku 1:14, 15) Guutimut tunniulluinnarsimasoq angutaaguni arnamut arnaagunilu angummut ileqqorluttumik pissutiginiagaqarluni ‘isigiuaruni’ (NV) iliuuseqarujussuartariaqarpoq, isini peerlugulusooq igillugulu. — Atuaruk Matthæusi 5:27, 28.
12. Paulusip siunnersuutaa suna kinguaassiuutitigut pilerissusipilunnik akiuinissamut iluaqutigisinnaavarput?
12 Assannik eqqunngitsumik atuineq Jehovap ileqqussatigut najoqqutassiaanik unioqqutitserujussuarnermik kinguneqarsinnaammat, ileqqussatigut minguitsuujuarnissarput aalajangiusimalluinnartariaqarparput. Taamaattumik Paulusip siunnersuutaa una malittariaqarparput: “Toqutissigit nunamut atasut ilissinniittut: Kinguaassiuutitigut inuunerlunneq, minguttuuneq, pileritsaassineq [tiinngartuneq, NV] kajungerisapiluillu aamma piumatuuneq, tassa guutipilussiorneq.” (Kolossemiut 3:5) Oqaaseq “toqutissigit” kinguaassiuutitigut pilerissusipiluit akiorniarlugit sukannersumik imminut piumaffigisariaqarnermut erseqqissaataavoq.
13, 14. Kinguaassiuutitigut inuunerluppalaartumik eqqarsartaaseqannginnissarput kinguaassiuutitigullu inuunerluttuliunnginnissarput sooq pingaaruteqarluinnarpa?
13 Inuk inuuinnarumalluni taleersinnissaminut niuersinnissaminulluunniit piumassuseqarsinnaavoq. Isitta assattaluunniit assersuutaasumik iginnissaa pingaaruteqarluinnarpoq, anersaakkut inuunitsinnik navianartorsiortitsisinnaasunik kinguaassiuutitigut inuunerluppalaartumik eqqarsartaaseqarumanata kinguaassiuutitigullu inuunerluttuliorumanata. Naassaanngitsumik piuneerunneqarnermik — Gehennatut eqqartorneqartumik — pinngitsuuisinnaavugut aatsaat eqqarsartaatsikkut, ileqqussatigut anersaakkullu minguitsuujuarutta.
14 Ajorti naammalluinnanngissuserlu kingornussat pissutigalugit ileqqussatigut minguitsuujuarniarluni iliuuseqarnissaq pisariaqarpoq. Paulusi ima allappoq: “Timiga peqqarniisaarfigaara naalatsillugulu pinngitsaalillugu allanut oqaluussisartunga narrugisaaqqunanga.” (1 Korinthimiut 9:27) Taamaattumik ileqqussanut tunngatillugu Jiisusip oqaasiisa maleruarnissaat aalajangiusimatigu Jiisusillu utertitsissutitut pilliutaanik qujamasuutiginninnginnermik ersersitsisumik iliuuseqanngisaannarluta. — Matthæusi 20:28; Hebræerit 6:4-6.
“Tunisiuartaritsi”
15, 16. (a) Jiisusi tunisineq eqqarsaatigalugu qanoq maligassiuiva? (b) Jiisusip oqaasii Lukasi 6:38-mi allassimasut qanoq paasisariaqarpat?
15 Jiisusip oqaasii maligassiuilluarnerpaaneralu tunisiumatunermik siuarsaapput. Taanna tunisiumatungaarpoq inuit naammalluinnanngitsut iluaqutissaannut maanga nunarsuarmut pinermigut. (Atuaruk 2 Korinthimiut 8:9). Kajumilluni qilammi naalannassutsi iperarpaa inunngorniarluni inuuninilu inuit ajortillit pillugit tunniunniarlugu, inuillu taakkua ilaat Guutip naalagaaffianik taassuminnga kingornusseqatiginnittut qilammi pisuussuteqalissapput. (Romamiut 8:16, 17) Jiisusi tunisiumatunissamut ilumut kajumissaarivoq ima oqarami:
16 “Tunisigitsi [Tunisiuartaritsi, NV], taava ilississaaq tunineqassaasi. Uuttukkap imai ajunngitsut naqittaassat aalaterussat qammisimasullu ilissinnut tunniunneqarumaarput [saassinnut tunniukkumaarpaat, 1936]. Uuttuutigisassinnimmi uuttuiffigineqarumaarpusi.” (Lukasi 6:38) Oqariartaatsimi “saassinnut tunniukkumaarpaat”-mi pineqarpoq niuffaffimmi tuniniaasup pisisup qallersaataanut qiterummik aalajangeriarlugu qummoorneqarsimasumut pisiaanik immiussisarnera. Qallersaataa qummoorsimasoq puussianngortarporlusooq pisisup assigiinngitsunik immersinnaasaa. Tunisiumatugutta imaassinnaavoq uagut nammineq naammangaartunik tunineqartugut, assersuutigalugu immaqa annikilliornitsinni. — Oqaluussisartup oqaasii 11:2.
17. Tunisineq eqqarsaatigalugu Jehova qanoq maligassiuilluarnerpaava, aamma qanoq tunisineq nuannaarutaassava?
17 Jehovap nuannaarlutik tunisisut asavai, aamma akissarsisittarpai. Taanna nammineq maligassiuilluarnerpaavoq, ernituani tunniukkamiuk “taassumunnga uppertoq kinaluunniit tammaqqunagu naassaanngitsumilli inooqqullugu”. (Johannesi 3:16) Paulusi ima allappoq: ‘Naammangaartunik siaruarterisoq aamma naammangaartunik katersuiumaarpoq. Kinaluunniilli tunisissaaq uummammigut aalajangiisimanermisut, pinaasernani pinngitsaalineqarnaniluunniit; kajumittumimmi tunisisoq Guutimit nuannarineqartuuvoq!’ (2 Korinthimiut 9:6, 7) Pallorfiginninneq ilumoortoq siuarsarniarlugu piffissarput, nukivut pigisavullu atortarutsigit nuannaarnerulissallutalu akissarsisinneqangaassaagut. — Atuakkit Ussatit 19:17; Lukasi 16:9.
“Siuninni qarlortartitseqinak”
18. Pissutsini qanoq ittuni Ataatatsinnit qilammiusumit ‘akissarsisinneqarnavianngilagut’?
18 “Mianersuutiginiarsiuk iluassutsissi inunnut nittarsaannissaa, taakkununnga takoqqullusi. Nittarsaattarussiummi Ataatassinni qilanniittumi akissarsiassaqassanngilasi.” (Matthæusi 6:1) Jiisusip oqaaseq ‘iluassuseq’ atoramiuk pissusilersorneq Guutip piumasaanut naapertuuttoq pivaa. Una pinngilaa, allanik isigisoqartillugu ajunngitsuliortoqanngisaannassasoq, ajoqersukkanimi oqarfiginikuuai ‘qaamasortik inunnut qaamateqqullugu’. (Matthæusi 5:14-16) Ataatatsinnilli qilammiusumit ‘akissarsiassaqanngilagut’ imminut ‘nittarsaanniarluta’, malugineqarumalluta nersorneqarumallutalu iliuuseqartarutta, isiginnaartitsisartut isiginnaartitsisarfimmi pisarnerattut. Tamanna pissutiginiagarigutsigu Guutimut qanittumik attaveqalernavianngilagut Guutillu naalagaaffiata naalakkersuinerani pilluaqqussutit misiginaviarnagit.
19, 20. (a) Jiisusip suna pivaa oqarami ‘piitsunut tunissuteqaraanni’ ‘qarlortartitsisoqartassanngitsoq’? (b) Talerpiup qanoq iliorneranik saamiup arajutsisinnissaa qanoq paasisariaqarpa?
19 Eqqortumik isiginnittaaseqarutta Jiisusip oqaaqqissaarutaa una malillugu iliussaagut: “Piitsunut tunissutinik tunissuteqartaraangavit siuninni qarlortartitseqinak ilumoortuusaartut synagogini illullu akornanni iliortarnerattut inunnut nersoqqusaarlutik. Ilumut oqarfigaassi: Taakkua akissarsiassartik pereerpaat.” (Matthæusi 6:2) Jiisusi apustiliilu aningaasanik katersaqarput piitsunik ikiuinermut atorsinnaasaminnik. (Johannesi 12:5-8; 13:29) Piitsunut tunissuteqaraanni qarlortartoqarneq ajormat, Jiisusip ilallattaaraluni assersuusioriaaseq atorunarpaa oqarami piitsunut tunissuteqaraangatta siunitsinni ‘qarlortartitsisassanngitsugut’. Tunissuteqarnerput allanut malugeqqusaarutigissanngilarput, soorlu farisiiarit taamaaliortarsimasut. Jiisusip taakku ilumoortuusaartuunerarpai tukkornertik takoqqusaarutigisarmassuk “synagogini illullu akornanni”. Taakkua “akissarsiassartik pereerpaat”. Inunnit akuerineqarneq immaqalu synagogimi rabbinerit nuimasut sanianni issiavinni sallerpaani issiasarneq kisiisa akissarsiassaraat, Jehovammi taakkua tunerusunngilai. (Matthæusi 23:6) Jiisusilli ajoqersugai piitsunut tunissuteqaraangamik qanoq pissusilersortartussaappat? Jiisusi taakkununnga uagutsinnullu tamanna pillugu ima oqarpoq:
20 “Piitsunut tunissutinik tunissuteqartaraangavit talerpivit qanoq-iliornera saamippit arajutsigiliuk illit piitsunut tunissutit isertortukkut tunissutaaqqullugu. Ataatavillu isertortumut isigisup akilissavaatit.” (Matthæusi 6:3, 4) Assavut amerlanertigut suleqatigiittarput. Taamaattumik talerpiup qanoq iliorneranik saamiup arajutsisinnissaa imatut paasisariaqarpoq ajunngitsuliornerput malugeqqusaarutigissanngikkipput, inunnut saamitta talerpimmut qanitsigineratut uagutsinnut qanitsigigaluartunulluunniit.
21. “Isertortumut isigisup” ilaatigut qanoq akilissavaatigut?
21 Tunissuteqarnerput usorsitsaatiginngikkutsigu ‘piitsunut tunissutivut’ isertortukkut tunniunneqassapput. Taava Ataatatta, “isertortumut isigisup” akilissavaatigut. Ataatarput qilammiusoq, inunnut takussaanngitsoq, inunnut isertortumiittuassaaq. (Johannesi 1:18) Jehovamit, ‘isertortumut isigisumit’, akilerneqarnermut ilaapput ‘taassumani peqataaneq’, tassa taassumunnga anngigisaqarani attaveqalerneq, ajortulianik taassumannga isumakkeerfigineqarneq inuunermillu naassaanngitsumik tunineqarneq. (Ussatit 3:32; Johannesi 17:3; Efesosimiut 1:7) Tamanna inunnit akuerineqarnerminngarnit pitsaanerungaarpoq!
Sallusuissutit anersaakkut ittut naleqangaartut
22, 23. Sooq Jiisusip oqaasii pigiliuttariaqarpavut?
22 Qaqqami oqaluuseq sallusuissutinik anersaakkut ittunik naleqangaartunik, silarsuarmi ajornartorsiutinik ulikkaartumiitilluta ilinniarfigilluarsinnaasatsinnik, ulikkaarpoq. Jiisusip oqaasii pigiliukkutsigit isummatsinnullu inooriaatsitsinnullu sunniuteqartikkutsigit pilluassaagut.
23 Kinaluunniit Jiisusip oqaasiinik ‘tusartoq maleruaasorlu’ pilluaqqusaassaaq. (Atuaruk Matthæusi 7:24, 25). Taamaattumik Jiisusip siunnersuutaanik malinninnissarput aalajangiusimatigu. Taassuma qaqqami oqaluutsimi oqaaserisai suli allat allaaserisat ataqatigiit pingajuanni sammissavavut.
[Quppernerup ataani ilanngussaq]
a ‘Anniarfik’ versip 22-p naanerani eqqartorneqartoq allassimaqqaarfiit grækerisuut naapertorlugit tassaavoq “Gehenna”, naassaanngitsumik toqunermut assersuutaasoq.
Qanoq akissavit?
• Qatanngummik ajuallassimasumik eqqisseqateqarnissaq sooq pingaaruteqarpa?
• ‘Isitsinnit talerpillermit’ qanoq ililluta tammartitaanaveersaarsinnaavugut?
• Tunisineq qanoq isigissavarput?
[Qupp. 17-mi assiliartaq]
Qatanngummik ajuallassimasumik eqqisseqateqarnissaq pingaaruteqarpoq
[Qupp. 18, 19-mi assiliartat]
Jehovap nuannaarlutik tunisisut pilluaqqusarpai