Anersaaq illernartoq suua?

JIISUSIP ajoqersukkani ilaanni ima aperai: “Kia arlassi ataataasup ernermi aalisakkamik qinnuigippani pulateriaarsummik tunissanerpaa, mannimmilluunniit qinnuigippani skorpionimik tunissanerpaa?” (Lukasi 11:11, 12) Meeqqat Galilæamiittut manniit aalisakkallu mamaraat taamaattumillu ataataminnit perusutamik pinissaat aalajangiusimasarlugu.

Jiisusi oqarpoq anersaaq illernartoq ilungersorluta qinnutigiuassagipput, meeqqap kaattup nerisassanik piumasarneratut. (Lukasi 11:9, 13) Anersaap illernartup suuneranik ilisimasaqarnerput inuunitsinni tamatuma qanoq pingaaruteqartigisinnaaneranik paasinninnissamut iluaqutigissavarput. Siullermik misissoriartigu anersaaq illernartoq pillugu Biibilimi qanoq allassimasoqarnersoq.

‘Qutsinnerussaartup pissaanera’

Biibilimi erseqqissarneqarpoq anersaaq illernartoq tassaasoq pissaaneq, imaluunniit nukik, Guutip piumasaminik naammassinninnermut atortagaa. Inngilip Gabrielip Mariamut nalunaarutigigamiuk taanna angummit attorneqarsimanngikkaluarluni ernertaassasoq ima oqarfigaa: “Anersaaq Illernartoq ilinnut piumaarpoq, Qutsinnerussaartullu pissaanerata ulikkumaarpaatit. Taamaattumik meeraq erniusussaq taaneqassaaq Illernartumik, Guutip erneranik.” (Lukasi 1:35) Gabrielip oqaasii naapertorlugit anersaaq illernartoq ‘Qutsinnerussaartullu pissaanera’ imminnut atassuteqarput.

Biibilimi allassimaffinni allani aamma tamanna erserpoq. Pruffiiti Mika ima allappoq: “Peqangaarpunga pissaanermik [Jehovap] anersaavanik.” (Mika 3:8) Jiisusip ajoqersukkani neriorsorpai ‘Anersaamit Illernartumit tikinneqarunik pissatsitaajumaartut’. (Apustilit Suliaat 1:8) Aamma apustilip Paulusip eqqartorpaa ‘Guutip Anersaavata pissaanera’. — Romamiut 15:13, 19.

Paasissutissat tamakkua tunngavigalugit qanoq isummersinnaavugut? Erseqqippoq anersaaq illernartoq Guutillu pissaanera imminnut atassuteqarluinnartut. Anersaaq illernartoq atorlugu Jehova pissaanerminik atuisarpoq. Oqaatigilluaannarlugu anersaaq illernartoq tassaavoq Guutip pissaanera, imaluunniit nukinga, sulisoq. Nukiullu tamatuma sakkortussusia! Nukik nunarsuarmik avataarsuanillu pinngortitsinermi atorneqartariaqarsimasoq paasilluinnarsinnaanngilarput. Jehovap pruffiiti Esaja aqqutigalugu matuminnga eqqarsaatiginneqqulluta kajumissaarpaatigut: “Qilaap tungaanut qiviaritsi, takussagissilu! Kia pinngortippaa? Amerlaqisunik sakkutooqartillugu sorsukkiartortitsisartup tamaasa immikkut atiisigut taasarpai. Nakuussutsi pissaassutsilu angeqimmata ataasiinnarmilluunniit minitaqarsimanngilaq.” — Esaja 40:26.

Tassa Biibilimi ersersinneqarpoq nunarsuaq avataarsualu piusut Guutip ajugaqanngitsup ‘nakuussusia’, imaluunniit nukinga, pissutigalugu. Erseqqippoq Guutip nukinga sulisoq nalissaqanngilluinnartuusoq, aamma uagut piunitsinnut aalajangiisuusoq. — Takuuk ungalusaq “Anersaaq illernartoq atorlugu naammassineqartut”.

Jehovap anersaani illernartoq annertuutigut atorsinnaavaa, soorlu nunarsuaq avataarsualu pinngortikkamigit atorsimagaa. Aammali inuit pinngortitami iluaqutissaannut atorsinnaavaa. Biibili Guutip nukingata sulisup taassuma innuttaanik nunamiusunik qanoq nakussatsitsisarsimanera pillugu oqaluttuarpassuarnik imaqarpoq.

‘Jehovap anersaavata tikippaanga’

Jiisusip kiffartornera Guutip anersaavata illernartup kiffaanik qanoq nakussatsitsisarneranik paasisaqarfigilluarparput. Jiisusip inuit Nazaretimiittut ima oqarfigai: “[Jehovap] anersaavata tikippaanga.” (Lukasi 4:18) Jiisusi “Anersaamit pissatsitaalluni” sunik naammassisaqarpa? (Lukasi 4:14) Sunilluunniit nappaateqartunik ajorunnaarsitsivoq, imaq mallersoq qatsortippaa, inuit tusindillit aalisakkat timiusallu ikittunnguit atorlugit nerisippai allaallu toqusimasunik makititsilluni. Apustilip Petrusip Jiisusi allaatigaa ‘angutitut Guutimit qinigaasutut malunnangaartuliatigut tupinnartuliatigullu nalunaaqutiliatigullu Guutip taassumuunakkut suliaasigut’. — Apustilit Suliaat 2:22.

Ullumikkut anersaaq illernartoq taamatut tupinnartuliortitsineq ajorpoq. Taamaakkaluartorli uagutsinnut iluaqutaasunik maluginiarnartunik naammassisaqarsinnaavoq. Jiisusip ajoqersukkani neriorsoqqissaarpai Jehovap anersaani illernartoq pallorfiginnitsiminut kajumilluni tunniuttaraa. (Lukasi 11:13) Assersuutigalugu apustili Paulusi ima allappoq: “Tamaasa pissatsitsisikkut atussallugit sapinngilakka.” (Filippimiut 4:13) Anersaaq illernartoq illit inuuninnut taamatut sunniuteqarsinnaava? Apeqqut tamanna allaaserisami tulliuttumi sammineqassaaq.

[Qupp. 5-mi ungalusaq/​assiliartaq]

Sooq anersaaq illernartoq kinaassusiliunngitsuusoq

Anersaaq illernartoq Biibilimi imermut assersuunneqarpoq. Guutip innuttani siunissami pilluaqqusaanissaannik neriorsoramigit ima oqarpoq: “Nuna imerusuttoq imermik kueraaffigiumaarpara puilasullu puilalersillugit nunami panertumi. Kueraaffigiumaarpakka uanga anersaannik qitornatit, pilluaqqussutinnillu kinguaassatit.” — Esajas 44:3.

Guutip anersaani kiffaminut kueraraangagu, taakku ‘Anersaamik Illernartumik ilumioqangaalertarput’. Jiisusi, Johannesi Kuisisoq, Petrusi, Paulusi, Barnaba ajoqersukkallu ukiumi 33-mi piinsip ulluani katersuussimasut pillugit allassimavoq anersaamik illernartumik ilumioqangaartut ilumioqangaalersulluunniit. — Lukasi 1:15; 4:1; Apustilit Suliaat 4:8; 9:17; 11:22, 24; 13:9.

Manna eqqarsaatigeriaruk: Kinaassusilik inunnut assigiinngitsorpassuarnut ‘kuineqarsinnaava’? Oqartoqarsinnaava inuit eqimattat kinaassusilimmik ‘ilumioqangaartut’? Paasissaarpalunngilaq, ilaa? Inuit ilisimasaqarnermik, saammaannermik nuannaarnermillu ilumioqangaalersut Biibilimi eqqartorneqarput, kinaassusilimmilli ilumioqangaalersut eqqartorneqanngillat. — 2 Mosesi 28:3; Apustilit Suliaat 6:8; 13:52.

Oqaaseq grækerisooq oqariartaatsimi “anersaaq illernartoq”-mi “anersaaq”-mik nutserneqarsimasoq tassaavoq pneuʹma, ilaatigut nukimmik takussaanngitsumik isumaqartoq. Vine’s Expository Dictionary of New Testament Words-imi allassimavoq oqaaseq pneuʹma “pingaarnerpaamik [isumaqartoq] anori . . . aamma anersaartorneq; taava aamma isumaqarpoq anersaaq, anoritut takuneqarsinnaananilu attorneqarsinnaananilu sunniisinnaassuseqangaartoq”.

Tassa erseqqippoq anersaaq illernartoq kinaassusiliunngitsoq.a

[Quppernerup ataani ilanngussaq]

[Suminngaanneernera]

Photodisc/​SuperStock