Sooq Edeni pillugu oqaluttuaq ilinnut pingaaruteqartoq

ILISIMATUUT ilaasa Edeni pillugu oqaluttuamut akerliliissutigisartagaasa tupaallannarnerpaat ilagaat Biibilip sinneranit taperserneqannginneraanerat. Assersuutigalugu upperisarsiornermik misissueqqissaarnermik professori Paul Morris ima allappoq: “Biibilip sinnerani Edeni pillugu oqaluttuamut toqqaannartumik innersuussuteqanngilaq.” Immikkut ilisimasalinnik taaneqartartunit isumaqatigineqaraluarpalluunniit tamanna piviusunut akerliulluinnarpoq.

Naatsiivik Edeni, Adami, Eva pulateriaarsullu pillugit Biibilimi innersuussuterpassuaqarpoq.a Ilisimatuulli ikittut kukkusumik saqqummiussinerannit ilungersunarnerujussuaqarpoq. Upperisarsiornikkut siuttut Biibilimillu isornartorsiuisartut naatsiivik Edeni pillugu Mosesimik allakkani siullerni oqaluttuanik apeqqusiinermikkut Biibili tamaat saassuppaat. Qanoq?

Edenimi qanoq pisoqarsimaneranik paasinninneq Biibilip sinneranik paasinninnissamut pingaaruteqarpoq. Guutip oqaasia allanneqarpoq inuunermi apeqqutit pingaarutillit akissutissarsisinnaaniassagatsigik. Apeqqutinut taakkununnga Biibilimi akissutit naatsiivimmi Edenimi pisimasunut attuumassuteqarajupput. Assersuuteqariarta.

● Sooq utoqqalillutalu toqusarpugut? Adami Evalu Jehovamut naalattuarunik naassaanngitsumik inuusinnaagaluarput. Aatsaat taassumunnga pikitsitsigunik toqusussaapput. Ullormi pikitsitsiffigisaminnik toqujartulerput. (1 Mosesi 2:16, 17; 3:19) Naammalluinnartuujunnaarput, kinguaaminnullu ingerlateqqissinnaasatuaat tassaapput ajorti toqulu. Biibilimi nassuiarneqarpoq “inukkut ataasiinnakkut ajorti silarsuarmut tikiuttoq ajortikkullu toqu tikiulluni, taamatut toqu inunnut tamanut annguppoq tamarmik ajortuliormata”. — Romamiut 5:12.

● Sooq Guutip ajussuseq akueraa? Naatsiivimmi Edenimi Saatanip Guuti sallutuujunerarpaa pinngortitaminut ajunngitsumik erliguussisoq. (1 Mosesi 3:3-5) Jehovap naalakkersuinissamut pisinnaatitaanera apeqquserpaa. Adamip Evallu Saatani tapersersorniarlugu aalajangerput; tassa Jehovap kisimi oqartussaanera akueriumanngilaat oqarniarlutillusooq suut ajunngitsuunerannik suullu ajortuunerannik inuit namminneq aalajangiisinnaasut. Jehovap naammalluinnartumik naapertuilluassutsimini ilisimassutsiminilu nalunngilaa unnerluutiginninneq tamanna ataasiinnarmik eqqortumik iliuuseqarfigineqarsinnaasoq — tassa inuit namminneq aalajangikkamittut imminnut naalakkersorsinnaanissaannut piffissaqartillugit. Tamatuma kingunerisaanik ajussutsimit, Saatanip sunniineranik ilaatigut pissuteqartumit, ilumoortoq pingaarutilik una uppernarsarneqarpoq: Inuit Guuti ikiortiginagu namminneq aqutsisinnaanngillat. — Jeremia 10:23.

● Guutip nunarsuaq sumik siunertaqarfigaa? Jehova naatsiivimmi Edenimi nunarsuup qanoq alutornartiginissaanut najoqqutassiivoq. Adami Evalu peqquai kinguaaminnik nunarsuaq tamakkissagaat ‘imminnullu naalatsigitissagaat’ alutornassusermut aaqqiagiinnermullu najoqqutassiaq nunarsuarmut tamarmut atuutitillugu. (1 Mosesi 1:28) Tassa Guutip siunertaraa nunarsuup paratiisinngornissaa Adamip Evallu kinguaavisa naammalluinnartut ilaqutariittut ataasiussuseqarlutik inuuffigisaat. Biibilip ilarujussuani pineqarpoq Guutip aallaqqaammut siunertani qanoq piviusunngortissagaa.

● Sooq Jiisusi Kristusi nunarsuarmukarpa? Naatsiivimmi Edenimi pikitsitsineq pissutigalugu Adami Evalu taakkualu kinguaavi tamarmik toqumut pillagaapput, Guutilli asanninnermini inuit neriuutissippai. Ernini nunarsuarmut aallartippaa Biibilimi utertitsissutitut taaneqartoq pilersinniarlugu. (Matthæusi 20:28) Tamanna qanoq isumaqarpa? Jiisusi tassaavoq ‘Adami kingulleq’, ‘Adamitut siullertut’ unioqqutitsisutut innani, aalajaattuartoq. Jiisusi Jehovamut naalattuarnermigut inuttut naammalluinnartuujuarpoq. Kajumilluni inuunini utertitsissutitut pilliutigaa, taamaalillunilu inuit aalajaatsut tamaasa ajortiminnik isumakkeerfigineqarnissaannut siunissamilu Adamip Evallu ajortuliunngikkallaramik Edenimi inuunerattut inuunissaannut periarfissillugit. (1 Korinthimiut 15:22, 45; Johannesi 3:16) Taamaalilluni Jiisusi uppernarsaataavoq Jehovap nunarsuarmik Edenerpalaartutut paratiisinngortitsiniarluni siunertaata piviusunngornissaanut.b

Guutip siunertaa ersernerluttuunngilaq; aamma tassaanngilaq teologiimut tunngasoq timitaqanngitsoq. Eqquukkumaarpoq. Soorlu naatsiivik Edeni sumiiffiviusoq uumasunik inunnillu piviusunik najugarineqartoq, taamatuttaaq paratiisi Guutip neriorsuutigisaa qanittukkut nunarsuarmi piviusunngussaaq. Illit taamatut siunissaqassavit? Ilinnut piviusunngussava? Illit aalajangeeqataangaatsiartussaassaatit. Guutip kissaatigaa inuit sapinngisamik amerlanerpaat taamatut siunissaqarumaartut, allaat inuunerminni allamut saattoorsimasut. — 1 Timotheusi 2:3, 4.

Jiisusi toqungajalerluni angut inuunermini ajortumut saattoorsimasoq oqaluuppaa. Angut pinerluttuuvoq, nalunngilaa toqumut pillarneqartariaqarluni. Jiisusimulli tuppallersaatissarsiorluni neriuutissarsiorpoq. Jiisusip qanoq oqarfigaa? “Paratiisimeeqatigiumaarparma.” (Lukasi 23:43) Jiisusip angut pinerluttuusimasoq taanna — toqusunit makititaalluni Edenerpalaartumi naassaanngitsumik inuusinnaaneq pilluaqquneqaatigalugu — paratiisimiissasoq kissaappagu, illit taamatut aamma kissaakkusussavaatit, ilaa? Ilumut, aamma taassuma Ataataata taama kissaappaatit! Taamatut siunissaqarusukkuit Guuti naatsiivimmik Edenimik pinngortitsisoq ilisarisimalerniarlugu sapinngisannik iliuuseqarit.

[Quppernerup ataani ilanngussat]

[Qupp. 10-mi ungalusaq/assiliartat]

SIULITTUUT BIIBILIMIK ATAQATIGIISSITSISOQ

“Akerariissikkumaarpassi illit [pulateriaarsuk] arnarlu, illit kinguaassat taassumalu kinguaassaa. Taassuma niaqqut aserortissavaa, illillu taassuma kimmia aserortissavat.” — 1 Mosesi 3:15, NV.

Taanna tassaavoq Biibilimi siulittuut siulleq Guutip Edenimi oqaatigisaa. Pineqartut uku sisamat kikkuuppat: arnaq, taassuma kinguaava, pulateriaarsuk taassumalu kinguaava? ‘Akerariinnerat’ siulittuutaasoq qanoq erserpa?

PULATERIAARSUK

Saatani Diaavulu. — Saqqummersitat 12:9.

ARNAQ

Jehovap qilammi peqatigiissortai anersaat pinngortitaasut. (Galatiamiut 4:26, 27) Esajap siulittuutigaa ‘arnaq’ qitornartaarumaartoq anersaakkut inuianngortussamik. — Esaja 54:1; 66:8.

PULATERIAARSUUP KINGUAAVA

Saatanip piumasaatut iliorniarlutik aalajangertut. — Johannesi 8:44.

ARNAP KINGUAAVA

Pingaarnertut tassaavoq Jiisusi Kristusi, Jehovap peqatigiissortaanit qilammeersoq. ‘Kinguaamut’ tamatumunnga aamma ilaapput Kristusip anersaakkut qatanngutai, qilammi naalakkersueqatai. Kristumiut tanitat taakku tassaapput inuiaat anersaakkut ittut, “Israeli Guutip pigisaa”. — Galatiamiut 3:16, 29; 6:16; 1 Mosesi 22:18.

KIMMIK ASERORTERNEQARTOQ

Missiarsimut saassussineq annernartoq, katsorsarneqarsinnaasorli. Saatanip Jiisusi nunarsuarmiinnerani toqutaatippaa. Jiisusi makititaavoq.

NIAQOQ ASERORTERNEQARTOQ

Saatanimut saassussineq toqussutaasoq. Jiisusip Saatani naassaanngitsumik piujunnaarsissavaa. Taamaaliortinnanili ajortorpassuit Saatanip Edenimi aallartitai aaqqissavai. — 1 Johannesi 3:8; Saqqummersitat 20:10.

Atuagassiaaqqami Biibilimi suna tusarliunneqarpa?-mi, Jehovap Nalunaajaasuinit saqqummersinneqartumi, Biibili pingaarnersiorlugu eqikkarneqarpoq.

[Qupp. 11-mi assiliartaq]

Adamip Evallu ajortip kinguneri alianartut malugaat