Sooq Biibili atuaqqissaassavara?

Apeqqutit taamaattut eqqarsaatiginikuuigit? Taamaappat kisimiinngilatit. Inuit sumi tamaniittut inuunermi apeqqutit pingaarutillit isumaliutigisarpaat. Akissutissaqarpat?

Inuppassuit ima oqassapput: “Aap!” Sooq? Apeqqutigisartakkatik Biibilimi akissutissarsigamikkit. Illimmi, Biibilimi ajoqersuutigineqartut paaserusuppigit? Taava imaassinnaavoq Jehovapa Nalunaajaasuisa pilersaarusiukkamik Biibilimik ilinnik atuaqqissaaqatiginnikkusunnerat iluatigerusussagit.

Ilumoorpoq Biibilimik misissuinissamut tunngatillugu ima oqartoqartartoq: “Piffissaqanngilanga.” “Merserivara.” “Neriorsuerusunngilanga.” Allalli Biibilimi ajoqersuutigineqartunik ilinniarnissamut periarfissartik iluatigisarpaat. Taakkua ilaat ima oqaluttuarput:

• “Katuullini naaggaartunilu naalagiartarpunga, sikhit naalaffiat buddhistillu mattuffiat ornippakka universitetimilu teologiimik ilinniarlunga. Guutili pillugu apeqqutigisartakkama ilarpassui akissutissarsinngilakka. Taava Jehovap Nalunaajaasuisa ilaat kasuttorpoq. Taassuma Biibili tunngavigalugu akissutai killitsissutigigakkit neqeroorfigimmanga Biibilimik atuaqqissaaqatigisalerpara.” — Gill, Tuluit Nunaat.

• “Inuuneq pillugu apeqquterpassuakka palasip naammaginartumik akisinnaanngilai. Biibilili kisiat atorlugu Jehovap Nalunaajaasuisa ilaata apeqqutikka akivai. Ilikkagaqarnerorusunnersunga aperimmanga angipallappunga.” — Koffi, Benini.

• “Toqusimasut inunnik ajoqusiisinnaanerat upperaara, Biibilimili ajoqersuutigineqartoq paaserusuppara. Taamaattumik ikinngutima Nalunaajaasut ilaata Biibilimik atuaqqissaaqatigisalerpaanga.” — José, Brasilia.

• “Biibili atuarniarsarivara paasisaqarnangali. Taava Jehovap Nalunaajaasui takkupput Biibilimilu siulittuutit arlallit nassuiarlugit. Paasisaqarnerusinnaanerlunga paaserusuppara.” — Dennize, Mexico.

• “Guutip soqutigineraanga eqqarsaatigisarpara. Taamaattumik Biibilip Guutianut qinuvunga. Aqaguanilu Nalunaajaasut kasuttorput, Biibilimillu atuaqqissaaqatigineqarnissara akueraara.” — Anju, Nepali.

Misigisat tamakku Jiisusip oqaasiinik ukuninnga eqqaasitsipput: “Pilluarput iluarnermut kaattut imerusuttullu.” (Matthæusi 5:6) Aap, inuit inunnguuseralugu Guutimik ilisimasaqarnissaq pisariaqartippaat. Tamannalu Guutip kisimi matussusersinnaavaa, taamaaliortarporlu Oqaatsini, Biibili, aqqutigalugu.

Qanoq Biibilimik atuaqqissaartoqartarpa? Qanoq iluaqutigisinnaaviuk? Apeqqutit tamakku allaaserisami tulliuttumi akineqassapput.