Tamakkiisumik uummateqarlutit oqaluussisarit
Imm. 4: Oqaluussisarnerit pilersaarusiortaruk, sunniuteqarluarnerussaaq
1 Tamakkiisumik uummateqarluni tamanut oqaluussinermut peqataassagaanni inuttut pilersaarusiorluarnissaq pisariaqarpoq. Ullumikkut oqaluussisartunut uagutsinnut Jesus maligassiuilluarnerpaavoq. (Lúk. 10:1, 2; ap. sul. 1:8) Aammattaaq ukiuni hundredelinni siullerni taassuma ajoqersugaasa kiffartornerminni periaasiat ilinniarfigisinnaavarput. (ap. sul. 5:42; 2 Tim. 4:5) Oqaluussinerput qanoq ililluta pitsaanerusumik pilersaarusiorsinnaavarput, taamaalillutalu pitsaanerusunik angusaqarluta?
2 Piffissamik oqaluussiartorfissannik immikkoortitsisarit: Kiffartuussinerput tassaanngilaq inuunitta ilaa pingaanngitsoq imaluunniit soqutaanngitsoq. Piffissaq kiffartornermut atugassarput nalaatsornerinnakkut aalajangigassaanngilaq. Kiffartornerput sunniuteqarluartumik ingerlatissagutsigu kiffartuussinitta immikkoortortaanut assigiinngitsunut piffissamik immikkoortitsisariaqarpugut. (Evf. 5:15, 16) Oqaluussisartut ilarpassui isumaqarput qaammatit tamaasa nalunaaquttap-akunnerinik aalajangersimasumik amerlassusilinnik oqaluussinermut atugassaminnik anguniagaqartarneq iluaqutaasoq. Tassa sapaatit-akunnerini tamani oqaluussinermut peqataajumallutik pisassatik aaqqissuuttarpaat. Angajoqqaat kristumiut meeqqatik oqaluussinerup immikkoortortaanut assigiinngitsunut aalajangersimasumik peqataanissamut piffissamik immikkoortitsisarnissaannik ikiortariaqarpaat. — 5 Mos. 6:7; Uss. 22:6.
3 Piviusorsiortumik anguniagalertarit: Piviusorsiortunik anguniagalertaruit suliniuteqarnissat ajornannginnerusassaaq. Anguniakkatit angugukkit misigissavat naammassisaqarsimanermik nuannaarutiginninneq. (Uss. 13:12) Apustili Paulus ima kajumissaarisimavoq: ’Killigisarpulli naapertorlugu toraagaq ataaseq ornillugu ingerlaannarta.’ (Fil. 3:16) Oqaluussisarnerit, anersaakkut suliniutitit allat assigalugit, siumukarninnut toraagarlu ataaseq ornillugu ingerlaannarninnut takussutissaasariaqarpoq.
4 Assersuutigalugu, naqitigaaqqanik naammattunik pissamaateqartarpit? Atuagassianik nutaanik naammattunik sillimmateqartuaannarnissat isumagisarpiuk, atuagassiaatitillu eqitikujunnikuunngillat? Illumiit-illumut-allattuiffiit atorluartarpigit, soqutiginnittut allattuiffimmut allamut angerlarsimanngitsullu aamma allamut allattortarlugit?
5 Oqaluussiartunnginninni oqaloqatigiissutissaq uteqattaarluartaruk. Neqeroorutissami soqutiginartunik oqaloqatigiilernissamut tunngaviusinnaasunik qinerlertarit, taakkulu atorlugit sungiusarluartarit pulaakkavit soqutiginninnerat annerulerniassammat. Aammattaaq ’Ræsonnerebogip’ atortarnissaa eqqaamajuk. Allaat angalaarninni qupperapallattarsinnaavat siunnersuutit atoriaannaasut misissorlugit. Siunnersuutit tamakku maleruartarukkit oqaluussininni pitsaanerusunik angusaqassaatit.
6 Ulluni kingullerni makkunani ’Guutip iivangkiiliuanik sulinermut iluartumut’ tamakkiisumik peqataaneq immikkut pisinnaatitaaffiuvoq annertooq. (Rûm. 15:16) Sapinngisamik pitsaanerpaamik nalunaajaanitsigut, ’qarlut anitaannik’, kiffartornitta naammassinissaa ilungersuutigisariaqarparput. (Epr. 13:15; naleqqiuguk Hosea 14:3.) Taamaattumik oqaluussinermut aalajangersimasumik peqataasarsinnaaqqulluta piffissarput aaqqissuuttartigu, isumatuumillu anguniagalertarta Jehovap nersornaatissaanut kiffartuussinitta naammassinissaanut iluaqutaasussamik. (km 10/91 Vær helh. i forkyndelsen)