Ataatsimiinnernut piareersarit nuannaarutigikkillu
1 Qatanngutigiittut sapaatip-akunneranut akuttunngitsumik ataatsimoortarpugut iluaqutigalugillu. (1 Tim. 4:15, 16) Ataatsimiinnerilli qanoq nuannaarutigalugillu iluaqutigisinnaavavut?
2 Taamaaliorsinnaavugut sapaatip-akunneranut piareersarnissamut piffissamik immikkoortitsinitsigut. Ilaasa immaqa allanit piffissaq sivisunerusoq atorsinnaasarpaat. Qanorluunniilli ulapitsigigaluarutta silatusaarneruvoq piffissap piareersarnermut atornissaa. Ingammillu ilaqutariittut taamaaliortarneq iluaqutaavoq. — Evf. 5:15, 16.
3 Teokratiimik ilinniarfik: Sapaatip-akunneranut Biibilimi atuagassap malinnissaa noqqaassutigiuaruk. (Jos. 1:8) Pineqartussat piareersartakkit atuagassallu pisariaqartut nassartakkit taamaalillutit pisassiissutigineqartut pineqalerpata atorniassagakkit. Oqaluussiartuleruit paasissutissat qanoq atorsinnaanerlugit eqqarsaatigisakkit.
4 Oqaluussinermut tunngasumik ataatsimiinneq: Naalagaaffimmut kiffartorneq-mi pisassat misissukkit. Ilanngutassiat eqqartorneqartussat atuakkit. Pisassat ilaat Napasuliaq Alapernaarsuiffik-miit atuagassianiilluunniit allanit tigusaappat taanna aamma atuarneqarsinnaavoq. Saqqummiussinermik takutsitsisoqassappat taakkuttaaq siusissukkut piareersartakkit oqaluussiartuleruit atornissaannut piareersimaniassagavit.
5 Napasuliaq Alapernaarsuiffik-mik atuaqqissaarneq: Ilanngutassiaq siusinnerusukkut misissoruk akissutissallu ataasigut titartarlugit. Pineqartoq pitsaanerusumik paasisaqarfigissavat allassimaffiit innersuussutigineqarsimasut atuarnerisigut. Pisassap ilisimariikkannut sanilliullugit isumaliuutigilluartarnerisigut ilisimassutsimik annertunerusumik pigisaqalissutigissavat. Peqataallutit akissutissanik immikkoortunut ataaseq marlussunnilluunniit akissuteqarnissannik piareersarit. Tamatuma pingaaruteqartut ilagaat ’neriugisatsinnik qularnaatsumik nassuerutiginninnitsigut’. — Epr. 10:23.
6 Ilagiinni atuakkamik atuaqqissaaqatigiinneq: Siullermik pisassaq qimerlooqqaaruk; kapitalimi qulequttat misissukkit. Atuartillugit eqqarsaatit tunngaviunerusut maluginiakkit. Allassimaffiit eqqarsaammut tunngasut atuakkit. Nammineq oqaatsisit atorlugit apeqqutai akiniartakkit. Ilinniagassat naammassigaanni eqqarsaatit suut pineqartut eqqaaniarneqarsinnaapput. Misilillugu eqqaaniartakkit eqqarsaatit pingaarnerusut tunngaviunerusullu.
7 Ataatsimiinnerit nuannaarutigisakkit: Ataatsimiinnerit tamakkiisumik nuannaarutigissagukkit piffissakkut takkuttariaqarputit aallarniilluni qinunermut peqataaniassagavit, tassani Jehovap anersaaminik siulersuinissaa qinnutigineqartarmat. Naalagaaffimmik erinarsuutit qiimmassaatigalugillu nuannaarutigissavatit. Mikisunik meerartaqanngikkuit arlaannilluunniit tunorlermi issianissannut pissutissaqanngikkuit paasilissagaluarpat issiavinni saarliit ilaanni issianeq qanoq akornusersuinertaqannginnerutigisoq, taamaalillutit ataatsimiinnerit aamma annertunerusumik pissarsiffigissavatit. Angajoqqaat immaqa ataatsimiinnerup nalaani mikisunik meerartaminnik annissisariaqartut issiavinni paarlernut qanittumi issiagunik akornusersuineq annikinnerussaaq.
8 Allassimaffiit atuarneqartut tamaasa sapinngisamik qupperniartakkit. Taava tusakkatit ajunnginnerusumik eqqaamalluassavatit. Ilaquttannut ikinngutinnullu ilikkarsimasatit eqqartukkit paasissutissat tamakku isummanni pigiliulluinnassagakkit. Siunnersuutigineqartut tamakku malikkukkit ataatsimiinnerit annertunerusumik pissarsiffigalugillu nuannaarutigissavatit, taamaalillutit asanninnermut ajunngitsuliornermullu kajumississutigalugit’. — Epr. 10:24, 25. (kmD 95/12 Forbered dig til menighedens møder . . .)