Uppissusiisigut malissigik
1 Apustilip Paulusip upperneq ima nassuarpaa: ’Uppernerli tassa neriugisani nakimassutiginaveerlugit takunngisanilu nalorninarinagit.’ Ima nangippoq: ’Uppissuseqarnani Guutimut iluaritinneq ajornaqaaq.’ (Epr. 11:1, 6) Paulusip kajumissaarpaatigut uppernermik ersersitsissasugut, uppersuseqarluassasugut noqqaassutigissagippullu.— 2 Kor. 4:13; Kul. 2:7; 2 Tim. 2:22.
2 Biibilimi eqqartorneqartut amerlasuut uppernikkut maligassaalluartuusimapput. Eprîarinut agdlagkat kapitali 11-imi Paulusip nalunaajaasorpassuit uppernermikkut aalajaassimasut eqqartorpai. Taakkua ilagaat Abel, nalunaajaasuni siulliulluni uppernini pillugu toqutaasimasoq. Noa eqqaaneqarpoq Guutimik mianerinninneq inoqutimi annaannissaannut piumasarineqartoq uppernermigut takutikkamiuk. Abraham uppernini naalanninilu pillugit nersorneqarpoq. Moses uppernermigut takussaanngitsoq isigalugulusooq nakkaannannginnini pillugu nersualaarneqarpoq. Maligassaalluartorpassuit amerlangaarmata Paulusip tamaasa eqqartussagaluarpagit piffissaq naammassimassanngikkaluarpoq. Qujamasuutigisinnaavarput uppernikkut nakussatsinneqarsinnaagatta iliuutsit iluartut Guutimillu mianerinnittut qimerloorneratigut. — 2 Pît. 3:11.
3 Ukiuni hundredellinni siullerni Jesus ima aperisimavoq: ’Inuup ernera tikiukkuni uppernermik nunami nassaarumaarnerpa?’ (Lúk. 18:8) Ullumikkut uppernikkut maligassiuilluartunik nassaassaqarpa? Anguteqarpa arnaqarlunilu, inuusuttunik utoqqarnillu, Jehovamut aalajaatsunik uppertunik, soorlu Biibilip nalaani Guutip innuttai taamaassimasut.
4 Nalitsinni uppernikkut maligassat: Aap, sumiluunniit takusinnaavavut. Ilagiinnut nakkutilliisut akornatsinni siulersuisut uppernikkut maligassiuilluartuupput. (Epr. 13:7) Uppernerli eqqarsaatigalugu kisimik maligassiuisimanngillat. Ilagiinni tamani qatanngutinik ilumoortunik sivisuumik aalajaatsumillu Jehovamut kiffartuussisimasunik nassaassaqarpoq, amerlasuutigullu pissutsini ajornakusoortuni tamanna naammassineqartarsimavoq.
5 Nersortariaqarpavut qatanngutit arnat ukiorpassuarni uiminnik akerlilersorneqartuaraluarlutik aalajaattuartut. Angajoqqaat kisermaat meeqqanik kisimiilluni perorsaaneq unamminiarnartoq atortariaqartarpaat. Utoqqartaqarpugut uillarnernik ilagiit suliniutaannut peqataajuartunik, naak immaqa ilaquttanik tapersersortissaqanngikkaluarlutik. (Naleqqiuguk Lúkarse 2:37) Katsorsarneqarsinnaanngitsumik nappaatillit aamma uppernermik ersersitsilluartuupput. Aammattaaq amersuut aalajaallutik kiffartuussiuartarput naak kiffartuussinermut piginnaatitaaffinnik amerlanerusunik pisinnaanerminnut akornuteqaraluarlutik. Oqaluussisartunik inuusuttortaqarpugut sapiillutik uppernerminnik ersersitsisartunik naak atuarfimmi akerlilersorneqartaraluarlutik. Guutimut tunniusimanerput patajaallisinneqartarpoq pioneerit aalajaatsut assigiinngitsorpassuarnik ajornartorsiuteqaraluarlutik ukiut tamaasa qasusuittuartut takugaangatsigik. Paulusitut oqartariaqarpugut qatanngutit uppernikkut suliaat misigisaallu tamaasa eqqartorniaraluarutsigik piffissaq naammassanngikkaluartoq.
6 Aalajaallutik maligassiuisut taakkua tuppalliutigaavut kajumissaatigalugillu. (1 Tás. 3:7, 8) Uppissusiisigut malinniartariaqarpavut Jehovammi iluarinartuutippaa peqqusersuitsumik iliortoq. — Uss. 12:22. (kmD 6/96 Efterlign deres tro)