Atuagaq ’Ilisarsineq’ ikiortigalugu qanoq ajoqersuganngortitsisoqarsinnaasoq
1 ’Inuunermut naassaanngitsumut eqqortumik isumallit’ sallusuissummik ilinniartinnissaat ajoqersuganngortinnissaallu kristumiunut tamanut anguniagassaavoq kissaatiginartoq. (ap. sul. 13:48 NV; Mat. 28:19, 20) Jehovap peqatigiissortaata anguniagassamut tamatumunnga atortussamik pitsaasumik tunisimavaatigut — atuagaq Ilisarsineq inuunermut naassaanngitsumut sammisoq. Atuakkap taaguutaata erseqqissarpaa angerlarsimaffimmi atuaqqissaaqateqartarnerit pingaaruteqassusiat, inuunermimmi naassaanngitsumik pissagaanni Jehova, kisimi ilumut Guutiusoq, erneralu Jesus Kristus pillugit ilisarsisariaqarpoq. — Juá. 17:3.
2 Peqatigiiffiup atuagassiaataanik angerlarsimaffimmi Biibilimik atuaqqissaarnermi atugassat atuagaq ’Ilisarsineq’ maanna pingaarnersaraat. Atuagaq taanna atorlugu maanna inuit sallusuissummik paasiuminartumik, ersarissumik naatsumillu ilinniartissinnaavavut. Tamanna ilinniartup uummataanik angusiniarnermi iluaqutaassaaq. (Lúk. 24:32) Atuaqqissaarnermi aqutsisup soorunami ilinniartitseriaatsit pitsaasut atortariaqarpai. Tamanna tunuliaqutaralugu ilanngutassiaq manna sananeqarsimavoq. Siunnersuutinik ilinniartitseriaatsinillu pitsaasunik ukiuni arlalinni sunniuteqarluarsimasunik takutitsisimasunik imaqarpoq. Siuneqassuseqartumik, ataasiakkaallu pissutsit atugaat naapertorlugit, siunnersuutit uani saqqummiunneqartut ilaat tamaasaluunniit malinneri iluaqutigissavatit. Ilanngutassiaq toqqoruk, akuttunngitsumillu saqqummertaruk. Atuagaq ’Ilisarsineq’ ikiortigalugu, pitsaanerusumik ajoqersuganngortitsinissannut iluaqutigisinnaavat.
3 Siuariartortumik angerlarsimaffimmi Biibilimik atuaqqissaaqateqartarit: Ilinniartitannut inuttut soqutiginnigit Kristusimut ajoqersuganngortussaavoq anersaakkullu qatanngutissaraat. Asannittuugit, inussiarnersuugit qiimasuullutillu. Tusarnaarluartuunikkut tunuliaqutaa pissutsillu atugai ilikkarnerusinnaavatit, taamaalillutit sukkut anersaakkut taperserneqarnissaq pisariaqartinneraa nalilernerusinnaavat. Ilinniartoq pillugu imminut pilliutigeriaannaagit. — 1 Tás. 2:8.
4 Atuaqqissaaqatigiinneq aallartereerpat siunnersuutigineqarpoq atuakkami ’Ilisarsineq’-mi kapitalit normuisa tulleriinneri najoqqutaralugit atuaqqissaaqatigiissutigineqassasut. Taamaalilluni ilinniartup siuariartortumik sallusuissut paasiartulissavaa, atuakkami Biibililersaarutit tunngaveqarluartumik tulleriinneqarmata. Atuaqqissaarneq paasiuminartuusariaqarpoq soqutiginartuulluni, uummaarissuulluni siumukartuullunilu. (Rûm. 12:11) Pissutsit ilinniartullu paasinnittaasia apeqqutaallutik qularnanngitsumik kapitalit amerlanersaat akunnerup ataatsip ingerlanerani naaneqarsinnaapput, atuaqqissaarneq tuaviuutinngikkaluarlugu. Ilinniartoq siumukarluarnerusinnaavoq ilinniartitsisup ilinniartullu sapaatip-akunneranut atuaqqissaartarnissamik isumaqatigiissutertik eqqortittarunikku. Amerlanerni atuagaq 19-nik kapitalilik ukiup affaata missaata ingerlanerani naaneqarsinnaavoq.
5 Kapitalit aallartitsinnagit eqqartugassaq pillugu naatsumik oqaaseqarlutit soqutiginnilersinniarsinnaavat. Malugissavat kapitalit qulequtaat tamarmik eqqartorneqartussap pingaarnersarimmagu, erseqqissartariaqarlunilu. Qulequtaaqqat tamarmik pingaarnersamik ataatsimik erseqqissaapput, tamatumalu kapitalip pingaarnersaanik eqqaamasissavaatit. Oqaluppallaaqinak. Ilinniartorli oqaaseqartittaruk. Nalunngeriigai tunngavigalugit apeqquteqaqqittarlutit tunngaveqartumik eqqarsarluni eqqortumik inerniliinissaanut ikiorsinnaavat. (Mat. 17: 24-26; Lúk. 10:25-37; takuuk ’Skolehåndbogi’, qupperneq 51 immikkoortoq 10.) Atuagaq tunngavingeqqissaartaruk. Saniatigut allamik ilanngussaqaruit pingaarnerit immaqa ersernerlulissapput takuneqanngitsoorluniluunniit atuaqqissaarnerlu sivisunaassalluni. (Juá. 16:12) Atuaqqissaarnerup nalaani eqqartukkamut attuumassuteqanngitsumik apeqquteqarpat, amerlanertigut tamanna atuaqqissaarnerup naggataani eqqartorsinnaavat. Sapaatip-akunneranut atuakkami pisarsi allamut sangutinngikkaluarlugu atuaqqissaarsinnaavarsi. Ilinniartitat nassuiaaguk apeqqutaasa amerlanersai atuakkap ingerlanerani akineqartarumaartut. — Takuuk ’Skolehåndbogi’, qupperneq 93 immikkoortoq 14.
6 Ataasiullunilu pingasuusumik ajoqersuut, tarnip toqusuitsuuneranik ajoqersuut, anniarfimmik ajoqersuut allanilluunniit eqqunngitsunik ajoqersuutinik ilinniartitat aalajangiusimasaqarpat, atuakkamilu ’Ilisarsineq’-mi nassuiaataasut upperinngippagit, ’Ræsonnerebogi’ atuagassiarluunniit alla pineqartumik nassuiaasoq tunniussinnaavat. Oqarfigiuk pineqartoq eqqarsaatingereerpagu eqqartorumaarlugu.
7 Jehovap siulersuinissaanik pilluaqqusinissaanillu qinunikkut atuaqqissaarneq aallarnerneratigut naggaserneratigullu, atuaqqissaarneq ataqqinartumut inissinneqassaaq; ataqqinnippasinneq pilersinneqassaaq Jehovalu Ajoqersuisutut ilumoortutut pingaartinneqassaaq. (Juá. 6:45) Ilinniartoq suli topatortarpat, atuaqqissaarnerup nalaani pujortannginnissaanik qinnuigisariaqarsinnaavoq. — ap. sul. 24:16; Jâk. 4:3.
8 Allassimaffiit, assilissat, uteqqiinermilu apeqqutit atorlugit sunniuteqarluartumik ilinniartitsigit: Ilinniartitsisut pikkorissut, qanorluunniit amerlatigisunik atuagassat atuaqqissaarsimagaluarunigit, kapitalit tamaasa ilinniartoq eqqarsaatigalugu atuassavaa. Taamaalilluni ilinniartup apeqqutai piareersarfigineqarsinnaapput. Ilinniartitsilluassagaanni pisassat pingaarnersaat paasisimalluartariaqarput. Allassimaffiit quppertakkit pineqartumut qanoq naleqqunnersut takujumallugu, aalajangerullu atuaqqissaarnermi sorliit atuarneqassanersut. Eqqarsaatigiuttaaq assilissat apeqqutillu uteqqiissutissat kapitalit naaneriniittut atorlugit qanoq ilinniartitsisinnaanerlutit.
9 Allassimaffiit atortarnerisigut ilinniartoq paasitissavat ilumut Biibili atuaqqissaaraa. (ap. sul. 17:11) Ungalusaq qupperneq 14-imiittoq, „Biibili ilisimaarillualeruk“, atorlugu ilinniartiguk nammineerluni allassimaffiit qanoq nassaarisinnaanerai. Ilinniartiguk qanoq ililluni allassimaffiit sorliit issuarneqartut takusinnaanerai. Piffissaq apeqqutaatillugu allassimaffiit innersuussutigineqaannarsimasut quppertarsinnaavasi. Immikkoortuni assigiinngitsunut qanoq tapersiinersut erseqqissaanersulluunniit ilinniartumut oqaluttuaritikkit. Immikkoortup ilaa pingaarnerit tunngaviat paasitillugu erseqqissaruk. (Neh. 8:8) Nalinginnaasumik pisariaqartassanngilaq atuakkami allassimasut saniatigut allassimaffinnik allanik atuinissaq. Erseqqissaruttaaq Biibilip atuagartaasa atiisa tulleriinnerisalu ilisimanerisa iluaqutaassusiat. Ilinniartup Napasuliaq Alapernaarsuiffik-mi 1. januaarimoortumi 1992 qupperneq 25-28-mut atuarunigit iluaqutigilluarsinnaavai. Naleqquppat kajumissaarsinnaavat Ny Verden-nutsigaq atortaqqullugu. Ingerlanissinni ilanngussat assigiinngitsut, innersuussutitai Biibilimilu ujarlerfissiartai qanoq atorneqarsinnaanersut takutittarsinnaavatit.
10 Håndbog for den teokratiske skole-mi ilinniagassap 34-p nassuiarpaa assilissat atorneqartarnerisa tusarnaartut eqqarsalersittarai isummanillu nutaanik paasiuminarsisitsisartut. Siuneqassusermut misigissutsinullu oqaluttarput, taamaattumik tusarliussaq tusarnaartut isumaannut isertarpoq sakkortussusermik pissutsinik oqaatiginninnerinnarmit anguneqarsinnaanngitsumik. (Mat. 13:34) Atuagaq ’Ilisarsineq’ ilinniartitsissutinik amerlasuunik assiliartaqarpoq paasiuminartunik sunniinertuunilli. Assersuutigalugu kapitali 17-imi assiliaq atorlugu paasitinneqarpugut qanoq ililluni Jehovap anersaakkut ittumik inuussutissanik, atisassanik angerlarsimaffissamillu ilagiit kristumiut aqqutigalugit isumagisaraatigut. Atuakkap ’Ilisarsinerup’ assiliartaasa kusanartut misigissutsitsinnik eqeersaaqataasinnaapput. Qupperneq 185-imi immikkoortumi „Makititaaneq nuannaarnartoq“, immikkoortup 18-ip sunniuteqarnera immaqa sakkortusinneqarsinnaavoq ilinniartup assiliaq qupperneq 86-imiittoq takoqqikkuniuk. Tamatuma Guutip naalagaaffiata ataani makititaanissap piviusutut eqqarsaatigilertissinnaavaa.
11 Ilinniartoq atuarnerit tamaasa anersaakkut siumukariartortariaqarpoq. Taamaattumik uteqqiissutitut apeqqutit ungalusamiittut, „Suna ilikkarpiuk“ kapitalit naggataanniittut pinngitsoorteqinagit. Ilinniartup akissutinik eqqortumik akinissaa pineqaannanngilaq. Arlallit inummut namminerisamut apeqqutaapput ilinniartup uummammiuinik qulaarisut. Assersuutigalugu takuuk qupperneq 31-imi ilinniartoq ima aperineqartoq: „Jehova Guutip pissusii suut ingammik nuannaraagit?“ — 2 Kor. 13:5.
12 Ilinniartoq atuaqqissaarnissamut piareersartarnissaanik ilinniartiguk: Ilinniartoq pisassamik piareersartartoq, akissutissaanillu ataasigut titartuisartoq namminerlu oqaatsini atorlugit qanoq oqaatigissanerlugit eqqarsaatiginnittartoq sukkanerusumik anersaakkut siumukartarpoq. Maligassiuinikkut kajumissaarisarnikkullu piareersartarnissaanik ilinniartissinnaavat. Atuakkanni takutiguk oqaatsit eqqarsaatillu pingaarnerit qanoq erseqqissarsimanerlugit. Nassuiaruk apeqqutit toqqartumik akissutaat qanoq nassaarineqarsinnaasut. Kapitalimik ataatsimik piareersaqatigiinneq iluaqutaalluarsinnaavoq. Kajumissaaruk nammineq oqaatsini atortaqqullugit. Tassuunakkut taamaallaat paasisinnaavat sammisarsi paasisimaneraa. Akissutit atuakkamiit atuaannarpagit eqqarsartissinnaavat aperalugu nammineq oqaatsini atorlugit allamut nassuiarniaruniuk qanoq oqassanersoq.
13 Pitsaassaaq ilinniartoq kaammattorukku sapaatip-akunneranut piareersaleraagami allassimaffiit issuarneqanngitsut quppertaqqullugit, atuaqqissaarnermi tamaasa atuarnissaannut piffissaqanngimmat. Ilungersornera nersualaaruk. (2 Pît. 1:5; takuuk Napasuliaq Alapernaarsuiffik 1. septembarimoortumi 1993, qupperneq 16-17-lu, ilinniartitsisumut ilinniartumullu atuaqqissaarneq qanoq annerusumik pissarsiaqarfigisinnaanerannik siunnersuuteqartoq.) Tamatuma ilinniartoq ilagiit ataatsimiinnerinut piareersartarnissaanik oqaaseqarluartarnissaanik ilinniartissavaa. Atuaqqissaartarnermik pitsaasumik ileqqoqalernissaanik ilikkartissavaa atuagaq ’Ilisarsineq’ atuaqqissaarlugu naareernerata kingorna sallusuissummi siumukartuarnissaanik iluaqutissaanik. — 1 Tim. 4:15; 1 Pît. 2:2.
14 Ilinniartoq Jehovap peqatigiissortaanut siulersoruk: Ajoqersuganngortitsisut akisussaaffigaat ilinniartut Jehovap peqatigiissortaanik soqutiginnilersitsissallutik. Ilinniartoq anersaakkut ineriartornerussaaq peqatigiiffik akueriguniuk pingaartikkuniullu paasiguniullu tassunga ilaanissaq pisariaqartoq. Kissaatigaarput Guutip innuttaanik peqateqartarnini nuannarissagaa naalagaaffilersaartarfimmukartarnissanilu qilanaarisassagaa, anersaakkut misigissutsikkullu taperserneqarneq kristumiut ilagiivisa neqeroorutigisinnaasaannik iluaquteqarfigisinnaasamini.— 1 Tim. 3:15.
15 Atuagassiaaraq Jehovap Nalunaajaasui — Ataasiussuseqarlutik Guutip peqqusaanik silarsuarmi tamarmi naammassinnittut suliarineqarsimavoq inuit ataasiakkaat ilisimatinniarlugit peqatigiiffimmik takussaasutuamik ullumikkut Jehovap piumasaminik naammassinninniarnermini atortagaanik. Atuaqqissaaqatigiinneq aallartippat ilinniartoq atuagassiaaqqamik tunineqarsinnaavoq. Aallaqqaammulli ilinniartoq ataatsimiinnernut qaaqquneqartuartariaqarpoq. Susoqartarnera nassuiaruk. Tamanut ammasumik oqalugiaatissap qulequtaa oqaluttuariuk ilanngutassiarluunniit Napasuliaq Alapernaarsuiffik atuaqqissaarutigineqartussaq takutiguk. Immaqa aamma naalagaaffilersaartarfimmut ataatsimiittoqannginnerani ilagisinnaavat, ataatimiigiaqqaaruni sungiussisimanerussammat. Imaassinnaavoq aamma periarfissaqarsinnaasutit ataatsimiigialerussi aanissaanut neqeroorfigissallugu. Takkuppat tikilluaqqusaasutut iluarusussimaartutullu misigitittariaqarparput. (Mat. 7:12) Oqaluussisartunut allanut ilisaritiguk, aamma utoqqaanertanut. Neriuppugut ilagiit anersaakkut ilaquttamisut isigilerumaarai. (Mat. 12:49, 50; Mák. 10:29, 30) Sapaatip-akunneranut ataasiarluni ataatsimiigiartarnissaanik anguniagaqaqqullugu ikiorsinnaavat, kingornalu allanik nutaanik anguniagaqartillugu. — Epr. 10:24, 25.
16 Atuakkamik ’Ilisarsineq’-mik atuaqqissaarneq siumukartillugu immikkoortut ilagiit ataatsimiinnerinut akuttunngitsumik najuuffigisariaqarnerannik takutitsisut erseqqissarsinnaavatit. Ingammik maluginiakkit qupperneq 52, 115, 137-39, 159 aamma kapitali 17. Illit nammineerlutit Jehovap peqatigiissortaanut pingaartitsinerit ersersiguk. (Matt. 24:45-47) Ilagiit ajunngitsumik eqqartukkit ataatsimiinnernilu ilikkarsimasannik oqaluttuarit. (Sl. 84:10; 133:1-3) Ilinniartup iluaqutigissavaa Peqatigiiffiup videofilmiliai tamaasa takugunigit, Jehovas Vidner og deres organisation aallarniutigalugu. Soqutiginnittut peqatigiiffimmut siulersornissaannik siunnersuutissanik allanik suli kissaateqaruit Vagttårnet 15. apriilimoortumi 1985, qupperneq 24-28, aamma Tillæg til Rigets Tjeneste apriilimoortumi 1993 atuarsinnaavatit.
17 Ilinniartoq allanut oqaluussinissaanik kajumissaaruk: Inuit atuaqqissaaqatigigaangatsigik anguniagarisarparput ajoqersuganngornissaat Jehovamik nalunaajaatiginnissinnaasut. (Jes. 43:10-12) Taamaattumik ilinniartitsisup ilinniartoq kajumissaartariaqarpaa Biibilimit ilikkakkani allanut oqaluttuarisarnissaat. Ima aperisinnaavoq: „Ilaquttannut tamanna qanoq nassuiassagaluarpiuk?“ imaluunniit „Allassimaffik sorleq uppernarsaatissatut atussagaluarpiuk ikinngutinnut nassuiarniarukku?“ Atuakkami ’Ilisarsineq’-mi immikkoortut oqaluussinissamut kajumissaarisut pingaartikkit, soorlu qupperneq 22, 93-95, 105, 106 aamma kapitali 18. Naleqqussorilerukku ilinniartoq naqitaaqqat ilaannik tunisinnaavat allanut sukkulluunniit oqaluussileruni atugassaanik. Siunnersuutigiuk ilaquttami ilaat atuaqqissaaqatigiinnermut qaaqqusinnaagaa. Ikinnguteqarpa immaqa aamma atuaqqissaarusussinnaasunik? Taava immaqa atassuteqarfiginissaanut ikiorsinnaassavaatit.
18 Ilinniartup Teokratiimik atuarfik oqaluussinermullu tunngasumik ataatsimiinnerit najuuffigisarunigit annertunerusumik ajoqersorneqaatigissavai nutaarsiassamillu nuannersumik oqaluussisartunngornissaminut kajumississalluni. Atuarfimmut ilaarusulerpat imaluunniit kuisimanngitsutut oqaluussisartunngorusulerpat, atuakkami Organiseret til at fuldføre vor tjeneste qupperneq 94-96-imi najoqqutassat eqqartorneqartut malittariaqarpavut. Pisinnaanngissuteqarpat ajornartorsiummut tassunga tunngasumik peqatigiiffiup atuagassiaataanni siunnersuutissarsiorsinnaavutit. Ilinniartup immaqa tupatorunnaarniarneq ajornartorsiutigaa akiaroornartunilluunniit allanik pinngitsuugaqarsinnaanngilaq. ’Ræsonnerebogi’-mi kristumiut ileqqut ulorianartut tamakkua ingalassimanissaannut pissutissaalluartunik Biibilimeersunik allassimasoqarpoq, quppernerlu 369-mi aamma 370-imi amerlasuut ileqqumik asoorussisimanerannut iluaqutaasoq allaatigineqarpoq. Ajornartorsiut pillugu qinoqatigiuk; taamaalilluni Jehovamut tunaartarinninneq ilikkassavaa. — Jâko 4:8.
19 Tamanut oqaluussinermut piukkunnaateqarnersoq aalajangerniarlugu malittarisassaq Vagttårnet 15. januaarimoortumi 1996, qupperneq 16, immikkoortoq 6-mi allaatigineqarpoq. Ilinniartoq pisinnaanngoraangat oqaluussinerani ulloq siulleq sungiusaqatigisassallugu pitsaassaaq. Inuit qisuariarneri angalaartarfinnilu akerliliisarnerit nalinginnaasut ajunngitsumik eqqartukkit. Ajornanngippat pitsaanerussaaq ilinniartoq siullermik illumiit illumut angalaaqataappat; kingusinnerusukkut kiffartuussinernut allanut ilinniartinneqarsinnaavoq. Naatsunik paasiuminartunillu saqqummiussisaruit malikkuminartinnerussavai. Ineriartornartuugit, qiimasuullutit kiffartuussinermillu nuannarinnilluarit. Qularnanngitsumik sunnertissaaq. (ap. sul. 18:25) Ajoqersuganngorlaap akuttoqatigiissumik ilungersuussisumillu tusagassamik nuannersumik oqaluussisartuunissaq anguniagarisariaqarpaa. Immaqa kiffartuussinermi pilersaarusiornerani ikiorsinnaavat. Oqaluussisartutut siumukarnissaanik ikiorniarlugu siunnersorsinnaavat Vagttårnet-ini uku atuaqqullugit: 15. novembari 1984, qupperneq 15-25; 15. juuli 1988, qupperneq 9-20; 15. januaari 1991, qupperneq 15-20; aamma 1. januaari 1994, qupperneq 20-25.
20 Ilinniartoq tunniulluinnarnermut kuisinnermullu siulersoruk: Ilinniartunut ilumoortunut atuakkamik ’Ilisarsineq’-mik atuaqqissaarneq Guutimut tunniulluinnarnisamut kuisinnissamullu piukkunnarsinissamut naammassaaq. (Naleqqiuguk apustilit suliait 8:27-39; 16:25-34.) Ilinniartorli tunniulluinnarnissamut kajumissinavianngilaq Jehovamut tunniusimasumik asanninnermik ineriartortitsinngikkuni. (Tus. 73:25-28) Atuaqqissaarnerup nalaani Jehovap pissusiinik pingaartitsinissamut ineriartornartut eqqumaffigikkit. Misigissutsitit itisuut Guutimut ersersikkit. Qamannga pisumik nammineerluni Jehovamut attaveqarnissaanik ikioruk. Guuti ilumut ilisarissaguniuk asalissaguniullu, aalajaalluni kiffartuutissavaa, Guutimummi tunniusimalluarneq Jehova kinaassusilittut misigissuseqarfiginninnermut tunngavoq. — 1 Tim. 4:7, 8; takuuk ’Skolehåndbogi’, qupperneq 76, immikkoortoq 11.
21 Ilinniartup uummataa anguniarsariuk. (Tus. 119:11; ap. sul. 16:14; Rûm. 10:10) Sallusuissut imminut qanoq attuumassuteqarnersoq takusariaqarpaa ilikkakkanilu qanoq atussanerlugit aalajangertariarqarlugu. (Rûm. 12:2) Sallusuissut sapaatit-akunneri tamaasa tusartakkani ilumut upperaa? (1 Tás. 2:13) Isumatusaarlutit iliartitavit isummaminik ima aperinikkut ersersitsisissinnaavat: Qanoq isumaqarfigaajuk? Inuuninni qanoq malissinnaaviuk? Akissutai naapertorlugit suna iserfiginerussanerlugu paasisinnaavat. (Lúk. 8:15; takuuk ’Skolehåndbogi’, qupperneq 52, immikkoortoq 11.) Atuakkami ’Ilisarsineq’-mi quppernerni 172-mi aamma 174-mi assiliartaasa oqaasertaat imaapput: „Qinunikkut Guutimut tunniulluinnareerpit?“ aamma „Kuisinnissannut suna tunuarsimaassutigaajuk?“ Apeqqutit taakkua ilinniartumik qisuariartitsisinnaapput.
22 Oqaluussisartoq kuisimanngitsoq kuisikkumappat malittarisassaq Vagttårnet 15. januaarimoortumi 1996, qupperneq 17, immikkoortoq 9-mi allaatigineqarpoq. Atuagaq ’Ilisarsineq’ allanneqarsimavoq apeqqutit ’Organisationsbogi’-mut ilanngussat ilinniartumut akisinnaasunngorlugit, utoqqaanertallu sammisassatik. Atuakkami ’Ilisarsineq’-mi atuaqqissaarnermi apeqqutit naqinneqarsimasut pingaartissimagukkit, ilinniartoq akilluarsinnaassaaq kuisinnissamut piareersarnermi utoqqaanertat apeqqutaannut.
23 Atuagaq ’Ilisarsineq’ naallugu atuaqqissaarsimasut ikiukkit: Ilinniartup atuagaq ’Ilisarsineq’ naallugu atuaqqissaareeraangagu ilumoornera Guutimullu kiffartuussinissamut soqutiginninnera nalilerneqarsinnaassaaq. (Mat. 13:23) Taamaattumik atuakkami qulequtaaqqat kingullersaat ima aperivoq: „Qanoq iliussavit?“ Ilinniartup Guutimut attaveqarneq ineriatortissimasassaa, ilikkakkani malillugit inuusariaqarnera Jehovamullu asanninnerminik takutitsiniarluni iliuuseqapallattariaqarnera eqqarsaatigeqqullugit immikkoortumi kingullermi kajumissaarneqarpoq. Atuakkamik ’Ilisarsineq’-mik atuaqqissaarsimasut atuagassiamik allamik atuaqqissaarnissaannik aaqqissuussisoqarsimanngilaq. Ilinniartoq Guutimik ilisarsinermik ajunngitsumik qisuariarsimanngitsoq inussiarnersumik toqqartumillu nassuiaaguk anersaakkut ineriartorniarluni qanoq iliortariaqarnersoq. Atassuteqarfigiinnarsinnaavat inuunermut naassaanngitsumut alloriarnissaanut matumik ammasoqartillugu. — Nal. oq. 12:13.
24 Ajoqersuganngorlaaq sallusuissummik ilassinnittoq kuisittorlu, sallusuissummi sorlanilluassaguni ilisarsinermi paasinnittaatsimilu inerilluarnerusariaqarpoq. (Kul. 2:6, 7) Atuagaq ’Ilisarsineq’ naareerlugu Biibilimik atuaqqissaarneq ingerlatiinnarnagu, ikiuiniarsinnaavutit anersaakkut inerilluarnissamut ikiortariaqarneranik ikiorlugu. (Gal. 6:10; Epr. 6:1) Paasinnittaatsinilu ullut tamaasa Biibilimik atuaanikkut, Napasuliaq Alapernaarsuiffik-mik atuagassianillu allanik kiffaqatigiit saqqummersitaannik atuaqqissaarnikkut alliartortissinnaavaa. (Mat. 24:45-47; Tus. 1:2; ap. sul. 2:41, 42; Kul. 1:9, 10) Atuagaq Organiseret til at fuldføre vor tjeneste atuaruniuk allassimasullu maleruarlugit, kiffartuussinermi naammassinninnissaminut iluaqutigilluassavaa. — 2 Tim. 2:2; 4:5.
25 Ilinniartitseriaaseq ineriartortiguk: Peqquneqarpugut ’ajoqersuganngortitseqqulluta maleruaanissaannillu ajoqersueqqulluta’. (Mat. 28:19, 20) Ilinniartitseriaaseq ajoqersuganngortitsinerup avissaartinneqarsinnaanngitsumik ilagimmagu, ilinniartitsilluarnerunissarput noqqaassutigissavarput. (1 Tim. 4:16; 2 Tim. 4:2) Qanoq ilinniartitsinermi pitsaanerulersinnaanersugut siunnersuutinik allanik perusukkuit, uku atuarsinnaavatit: „Lær undervisningens kunst“ aamma „Nå ind til dine tilhøreres hjerte“, ’Skolehåndbogi’-mi Ilinniagassaq 10-miittut aamma 15-imiittut; ilanngutassiaq „Undervisning, belæring“ Hjælp til forståelse af Bibelen-imiittoq, Vagttårnet-inilu ilanngutassiat uku: „Byg med ildbestandige materialer“ aamma „Nå ind til hjertet når du underviser“, 1. novembarimoortumi 1984; „Forstår du at ræsonnere ud fra Skrifterne?“, 1. marsimoortumi 1986, aamma „Ajoqersuganngortitsinikkut nuannaarneq naniuk“, 1. marsimoortumi 1996.
26 Atuagaq ’Ilisarsineq’ atorlugu ajoqersuganngortitsiniarninni, Jehova, ’Guuti naajartortitsisartoq’, tusagassamik nuannersumik inuit uummataannik angusiniarninni ilungersuutitit pilluaqqoqqullugit qinnuvigiuaruk. (1 Kor. 3:5-7) Ilisarsinermik inuunermut naassaanngitsumut sammisumut allat paasinninnermik, pingaartitsinermik iliuuseqarnermillu ilinniartinnerisa nuannersortaa qanortoq misigigiuk.