Uterfigeqqittuartariaqarpavut
1 Nutaarsiassaq nuannersoq tusaqqaarakku sallusuissut ingerlaannaq ilassiviuk? Taamaanngippat, qujamasussaqaatit Jehovap nalunaajaasuisa uterfigeqqittuartarsimammatit Biibilimik atuaqqissaarnermik akuersinissavit tungaanut. Tamanna eqqarsaatigissallugu pitsaassaaq oqaluussiffigisartakkami aalajangersimasumi arlaleriarluni nalunaajaasarnermi.
2 Inuit atugaat allanngorartuaannarput. Ajornartorsiutit nutaat takkuttarput, nunagisami imaluunniit silarsuarmi nunani allani annilaarnartut tusartarpaat, aningaasatigut ajornartorsiutinit imaluunniit ilaqutariinni nappaatinit imaluunniit toqusoortoqarneranit eqqorneqartarput. Pissutsit taama ittut pissutigalugit inuit paaserusulersinnaavaat suna ernumanartunut tamakkununnga pissutaanersoq. Eqqumaffigisariaqarparput inuit suna eqqarsaatigineraat oqariartuutitsinnillu tuppallersarlugit.
3 Annaassiniarneq: Eqqarsaatigeriakkit ajunaarnersuaqarfiusumi annaassiniarnermik sulisut. Immaqa ilaat aniguisoqarpianngitsumi sulipput, kisianni ujaarlernertik taamaatinneq ajorpaat allat allami annassimasunik nassaaraangata. Uagut annaassiniarnerput suli taamaateqquneqanngilaq. Ukiut tamaasa inunnik tuusintilikkuutaanik ’annikilliornartumit angisuumit’ aniguerusuttunik nassaartarpugut. — sar. 7:9, 14.
4 ’Kinaluunniit Jehovap aqqanik torlorfiginnittoq annakkumaarpoq.’ (Rûm. 10:13-15) Oqaatsit taakkua oqaluussiuartariaqarnissatsinnik tamatta immikkut puiutsaalisariaqarpaatigut. Oqaluussisalerattali maannamut meeqqat perorsimapput siunissartillu inuunerullu siunertaa sunaanersoq namminneq eqqarsaatigisinnaalersimallugit. Naluarput kikkut tusaarusussanersut. (Nal. oq. 11:6) Amerlasuut akerliusimagaluartut sallusuissut ilassisimavaat. Suliassarinngilarput inuit eqqartuunnissaat, kisianni tusarnissaannik silarsuatoqqamillu aniguinissaannik periarfissinnissaat suliassaraarput. Jesusip ajoqersugai siulliit ilaarlugit ’annerusumik’ inuit tusarlerniarsarisariaqarpavut Guutillu naalagaaffianik tusagassamik soqutiginnilersinniarsaralugit. — Mat. 10:6, 7.
5 Suli oqaluussisinnaanerput Jehovap nallittuissusianut ersiutaavoq. (2 Pît. 3:9) Inunnut oqaluussiuartuaraangatta Guutip asanninnera ersersittarparput taamaalillutalu unnersiutigineqarneranut peqataalluta.