Ilinniagaqarnerit anersaakkullu anguniakkatit
1 Inuusukkallartilluni tunngaviusumik ilinniartitaaneq atuagarsornermut piginnaassuseqalersitsisinnaavoq tamannalu atuallaqqinnissamut allassinnaalluarnissamullu pisariaqarpoq aammalu nunalerutinut, oqaluttuarisaanermut, kisitsinermut ilisimatusarnermullu tunngasunik nalinginnaasunik ilisimasaqalersitsisarluni. Aammalu ilinniutaavoq paasisaqajasuunermut sammisamullu imaluunniit soqutigisamut aalajangersumut imaqarniliornissamut, ajornartorsiutinik aaqqiinissamut isumassarsillaqqinnissamullu. Taamatut ilinniartitaaneq inuunerup sinneranut iluaqutaassaaq. Inuunermi anersaakkut anguniakkat angunissaannut ilinniagaqarneq qinersimasaq qanoq sunniuteqarsinnaava, qanorlu ’silatussutsit isumatussutsillu’ angunissaannut ikiorsinnaavaatigut? — Uss. 3:21, 22.
2 Guutimut iluaqutaasutut sakkuutigit: Atuartuugallaravit malinnaalluartussaasimavutit ilinniagassatillu nakkutigilluarlugit. Atuarnermut atuaqqissaarnermullu ileqqorissuuneq pigiliukkukku Guutip oqaasianik misissuillaqqinnerulissaatit anersaakkullu imminut nukittunerulersillutit. (ap. sul. 17:11) Assigiinngitsunik ilisimasaqarluaruit inunnut assigiinngitsunik tunuliaqutalinnut assigiingitsunillu soqutigisalinnut upperisalinnullu oqaluussinissannut ikiussavaatit. Atuarfimmi iliniartitaanerit Guutip peqatigiissortaani kristumiutut akisussaaffilimmik naammassinninniarninni aamma iluaqutigilluassavat. — Naleqqiuguk 2 Tim. 2:21; 4:11.
3 Imminut pilersornissat ilinniaruk: Ilinniakkat aqqutigalugu piginnaasaqarluarfiit ilinniarsinnaavatit kingusinnerusukkut imminut napatinnissannut atorsinnaasatit. (Naleqqiuguk Timûtiusimut agdlagkat sujugdlît 5:8.) Suna ilinniassanerlugu aalajangernialeruit eqqarsaatigilluaqqaaruk. Suliffimmik killilimmik periarfissalimmik aalajangiussinnarnak arlaannik sumiikkaluaraanniluunniit suliffimmi atorfinissinnaanissannut imaluunniit atorfiup iluani atorneqarsinnaasumik qinersiguit ajunnginneruvoq. (Uss. 22:29) Taamatut ilinniagaqarnerpit imminut napatissinnaanissannut ikiuussavaatit, aammattaaq pisariaqartitsiffiunerusumi kiffartorumallutit aalajangeruit. — Naleqqiuguk ap. sul. 18:1-4.
4 Tunngaviusumik ilinniagaqarluarnerup annertunerusumik kiffartornissannut ikiussavaatit. Ilungersorlutit sulilluarit piginnaassutsit imminut napatinnissamut pisariaqartut anguniarlugit Jehovamut kiffartorninni iluaqutaanerulerniarlutit. Taava ilinniakkatit anersaakkut anguniakkannut ikiussavaatit.