Nutaarsiassaq nuannersoq oqaluussissutigaarput
1 ’Eqqissinermik nalunaarummik ajunngitsumik oqaluutiginnittut’ akornanniisinnaalluni pisinnaatitaaffissuuvoq. (Rûm. 10:15) Inunnut silarsuarmi atugarliorfiusumi ulapaarfiusumilu iluaqutaasumik tusarliussassaqarpugut. Qanoq ililluta paasitissinnaavavut ’tusagassanik nuannersunik’ aatsilluta? — Jes. 52:7.
2 Isumalluarnartumik tusarliussinissannut piareersarit: Pulaakkatsinnut sunniuteqarluartarpoq ineriartornartut pillugit oqaluuserigaangatsigu. Taamaattumik kiffartornissatsinnut atuagassianillu neqeroornissatsinnut piareersaraangatta tusarliussap nuannersortai pingaarnerutittariaqarpavut. Neriuut Biibilimeersoq qularuteqarnata angorniortumillu oqaluttuarigaangatsigu qiimmannartumik kinguneqarnissaa ilimagisinnaavarput. — Uss. 25:11.
3 Soorunami inuit silarsuarmi pissutsinut ajorsiartuinnartunut isumakuluuteqarpata misiginneqatigisariaqarpavut, kisianni inuiaat ajornartorsiutaannik piviusumik aaqqiissussamut, tassa Guutip naalagaaffianut, soqutiginnilersinniartariaqarpavut. ’Ulloq Jehovap akiniaaffissaa’ oqaluttuarigaluarutsiguluunniit takutittariaqarpavut tassaasoq ’qanilaartunut nutaarsiassaq nuannersoq’. (Jes. 61:1, 2; NV). Qularunnaarsittariaqarpavut Jehovap iliuusii tamarmik naggataatigut nuannernerpaamik pitsaanerpaamillu kinguneqarumaartut.
4 Nuannaarnivimmik sallusuissut saqqummiuguk: Oqaluuserisarput pillugu nuannaarnerput qulassuteqannginnerpullu inuit takusinnaagaangamikku tusarnaarniarumanerusarput. Inuunermik isumalluarnartumik isiginnittaaseqarutta tusarnaartitta ’neriunnitsigut tipaatsunnerput’ maluginiarnerussavaat. (Rûm. 12:12) Taamatut nutaarsiassaq nuannersoq tusaajumanerulissavaat. Kristumiutut qanoq ittumilluunniit kiffartortilluta tamatigut nuannaarneq isumalluarnerlu takutissallugit pissutissaqarluarpugut.
5 Nutaarsiassamik nuannersumik kiffatuuteqartutut paasissutissaannarnik saqqummiiniaannanngilagut. Oqaluussinitta allat maannakkut siunissamilu inuunermik pitsaanerusumik neriuuteqalersissinnaavai. (1 Tim. 4:8) Attavigisimasatta tamarmik oqaatsitsigut malugisinnaasariaqarpaat nuannaartuusugut isumalluartuusugullu. Nutaarsiassamut nuannersumut tusaajumanerulernissaannut iluaqutaassaaq. Qanoq oqartugut qanorlu oqalunnersugut eqqumaffigitigu, taamaalilluta iluartut tamarmik nutaarsiassamik nuannersumik oqaluuserisatsinnik ilassinninnissaannut kajumilersinniassagatsigik.