Ilinnut iluaqutaasut sulissutigaagit?
1 Millionilippassuit ajornartorsiutit qanoq anigorsinnaanerlugit paasiumasarpaat ajunngitsumillu inuulerlutik. Atuakkanut imminut ikiornissamut ilitsersuutitalinnut imaluunniit peqatigiiffinnut assigiinngitsunut saaffiginninniarnerusarput qanoq ajunnginnerusumik inuunissamut siunnersuutinik ujartorlutik. Immaqa ilaasa ilaatigut iluaqutissarsiffigisarpaat. Ullumikkulli inuit inooriaasiisigut takuneqarsinnaava eqqissineq inooriaaserlu nalerisimaarnartoq inuit ilitsersuutaat iluaqutigalugit angusimagaat? Taamatut oqartoqarsinnaagunanngilaq. — 1 Kor. 3:18-20.
2 Akerlianilli Pinngortitsisorput tusarumasunut tamanut akeqanngitsumik pitsaanerpaamik unnersuussuteqarpoq. Kissaatigaa unnersuussutimi kikkunnit tamanit iluaqutigineqarnissaat. Ajoqersorumalluta tukkorluni oqaatsini isumassarsiarititaasoq pilersippaa, Guutillu naalagaaffia pillugu nutaarsiassamik nuannersumik nunarsuarmi tamarmi oqaluussisoqartillugu. (Tus. 19:8, 9; 2 Tim. 3:16) Inuunermi pilluarneq Jehovallu peqqussutaanik maleruaaneq ataqatigiilluinnarput. — Jes. 48:17, 18.
3 Jehovap unnersuussutaa silarsuup matuma neqeroorutigisinnaasaanit, soorlu atuakkanit imminut ikiorsernissamut ilitsersuutinit imaluunniit inuttut ineriartornissamut pikkorissartitsinernit tamanit, pitsaanerpaajuvoq. Pitsaanerpaamik ataavartumillu ikiorneqarsinnaavugut Jehovap oqaatsimigut peqatigiissortamigullu pilersittagai tamakkiisumik atorutsigik. — 1 Pît. 3:10-12.
4 Ilagiit ataatsimiittarneri iluaqutigikkit: Ullumikkut Jehovap takutippaa soqutiginnilluinnarluni aqqummigut ajoqersorumalluta, unnersuussutaalu eqqumaffigigutsigu iluaqutigissavarput. Sapaatip-akunneranut tallimariarluta ataatsimiittarnivut Jehovap asannilluni isumassuineranut takussutissaapput. Ataatsimeeqataagaangatta Guuti pillugu ilisimasaqarnerulersarpugut. Jehovamut qanimut attaveqarnerulernitsigut ajortunut imminut illersornissarput ilikkassavarput. Taava anersaakkut ineriartussaagut.
5 Taamaaliorutta naammanngilaq. Ataatsimiinnerni ’neruttornissatsinnut’ periarfissaqarpugut. (2 Kor. 6:13) Ilagiinni allat ilisarisimalernissaannik ilaqarpoq. Kajumissaaqatigiinneq Paulusip Romamiunut allakkamini taasaa iluaqutigaarput. (Rûm. 1:11, 12) Taamaattumik hebræerinut allakkamini kristumiut peqatigiinnerinut najuutinnginnermik ileqquliussisimasut ilungersorluni kajumissaarpai isummaminnik iliuutsiminnillu allanngueqqullugit. — Epr. 10:24, 25.
6 Allat inuulluarnissaannik soqutiginninneq inuunermi nalerisimaarnivimmut attuumassuteqarluinnarpoq. Allat pilluarnerannut allisaataasumik iliuuseqarnissatsinnut kajumissaarneqarpugut. Taamaattumik kristumiutut ataatsimiinnivut uagutsinnut ilagisartakkatsinnullu iluaqutaapput. Uatsinnut piumasarineqartoq tassaavoq uummatitsigut kajuminnissarput.
7 Apustilip Paulusip Timoteusimut allakkamini siunnersuigami assingusumik taasaqarpoq: ’Imminik Guuti mianerissallugu sungiusarniarit.’ (1 Tim. 4:7) Imminut ima aperisinnaavugut: ’Imminik sungiusarpunga? Ataatsimiinnerni tusakkakka iluaqutigaakka?’ Ataatsimiinnerni tusakkavut eqqumaffigisarutsigik atornissaallu ilungersuutigigutsigik angersinnaavugut. Uppissutsikkut takusinnaasariaqarparput Jehova tassaasoq innuttaminut Ajoqersuisorsuaq, ilinniartitaanitsinnullu taanna tunuliaqutaasoq. — Jes. 30:20.
8 Teokratiimik Atuarfik oqaluussinermullu tunngasumik ataatsimiinneq: Ataatsimiinnerit taakku marluk aaqqissorneqarput kristumiutut kiffartornitsinni piginnaaneqarnerulernissatsinnut ikiorniarluta. Teokratimik Atuarfik pilersinneqarpoq oqaluussisartut akuttoqatigiimmik ilitsersorneqarnissaat siunnersorneqarnissaallu siunertaralugu. Tamanut oqalugiartussatut Guutillu oqaasianik ajoqersuisutut siumukarnertik ersersissallugu periarfissaqarput. Atuarfilli pitsaanerpaamik pissarsiffigiumagukku peqataasutut nalunaarsimasariaqarputit, peqataaffigalugu, akuttoqatigiimmik pisassaqartarlutit malinnaallutillu. Ilitsersorneqarneq ilassillugulu atorukku siumukarnissannut iluaqutigisinnaavat.
9 Oqaluussinermut tunngasumik ataatsimiinnermi kristumiutut kiffartornerup pingaaruteqassusianik ilinniartinneqartarpugut qanorlu ajoqersuganngortitsilluta sulinissatsinnik takutinneqarluta. Ataatsimiinnerni taakkunani saqqummiunneqartut ilaquttatillu tamakkiisumik iluaqutigisarpisigit? Kristumiut aappariit oqarsimapput: „Oqaluussinermut tunngasumik ataatsimiinnermi eqqaaneqarpoq ilaqutariittut ullormut allassimaffik oqaloqatigissutigisassagipput. Siornatigut taamaaliorneq ajorpugut, maannali aallartissimavarput.“ Tamanna qanoq iluaqutigaat? Oqarput: „Neritilluta oqaloqatigiinnivut nuannernerulersimapput. Neritilluta assortuuttarunnaarsimavugut.“ Meeqqat mikigaluarlutilluunniit ataatsimiinnerit iluaqutigaat? Aap. Anaanaq oqarpoq: „Malunnarluinnarpoq ataatsimiinerit meeqqatsinnut sunniuteqartorujussuusut. Ullut ilaanni ernerput arfinilinnik ukiulik salluliorluni oqaluttuartoq naammattoorparput. Sapaatip-akunneranili tassanerpiaq oqaluussinermut atuarfimmi oqalugiaammi siullermi salluneq pineqarpoq. Kanngusuppaseqaluni ataatani isigaa. Oqalugiaatip isumaa paasisimavaa, taamaalioqqinnanilu.“
10 Pioneereq arnaq oqarpoq oqaluussinermut tunngasumik ataatsimiinnermi qanoq oqaluussinissatsinnut piareersartoqarsinnaaneranik siunnersuutit nuannaarutigisimallugit. Sooq? Oqarpoq: „Assigiiaaginnarmik ingerlalersooqqajaasarpunga. Ilaatigut isumaqartarpunga Guutip Naalagaaffianut Kiffartorneq-mi siunnersuutit sunniuteqarunnanngitsut. Ataatsimiinnermili misileqqullugit kajumissaarneqaraangatta piumassuseqalertarpunga allaat aallartinnissannut utaqqisinnaananga. Oqaluussineq pissanganarnerulersittarpaa.“ Pulaaqqaakkap Biibilimik atuaqqissaaqatigilernissaanut siunnersuut sapaatip-akunneri arlallit atoreerlugu pulaaqqaakkani arnaq inuusuttoq, Guutimut ikioqqulluni qinusimasoq, atuaqqissaaqatigilerlugu iluatsitsivoq.
11 Oqalugiaammi nammineq aalajangigassanut atatillugu Biibilimit siunnersuuteqartoqaraangat Jehovamit toqqaannartumik oqarfigineqartutut misigisarpit? Qatanngut angut taama misigisimavoq. Oqarpoq: „Qanittukkut qatanngutip oqalugiaatimini aliikkutassat kristumiunut suut naleqqunnersut suullu naleqqutinnginnersut sammivai. Ulloq taanna tikillugu tv-kkut tilluuttut isiginnaarlugit nuannarisimavakka. Ataatsimiinnerulli tamatuma kingorna imminut oqarfigisimavunga timersuut taanna kristumiunut aliikkutassatut naleqqutinngitsut ilagigaat. Maanna isiginnaassaarsimavakka.“ Aap, naak qatanngut taanna nakuusernermik nuannarisaqarsimagaluaqaluni maniguulluni Jehovap siulersuinera qisuariarfigaa. — Tus. 11:5.
12 Tamanut ammasumik oqalugiaat, Napasuliaq Alapernaarsuiffik-mik atuaqqissaaqatigiinneq ilagiillu atuakkamik atuaqqissaaqatigiinerat: Tamanut ammasumik oqalugiaammi Biibilimut tunngasut assigiinngitsorpassuit sammineqartarput. Oqalugiaatit tamakku qanoq pissarsivigisarpigit? Kristumiup uiusup qanoq pissarsivigisimanerlugit oqaluttuaraa: „Tamanut ammasumik oqalutigiaammi anersaakkut inerititat sammineqarput. Oqalugiartup eqqaavaa taakku tamaasa ineriartortikkumallugit piginnaaneq aalajangersimasoq ataaseq sapaatip-akunnerani ataatsimi sulissutigisassamisut qinertarlugu. Sapaatillu-akunnera qaangiukkaangat inerititaq taanna ulluinnarni atornera qanoq ingerlasimanersoq eqqarsaatigisarsimavaa. Sapaatip-akunneratalu tulliani inerititaq alla sulissutigisarlugu. Isumassarsiaq tamanna iluarisimavara ingerlaannarlu taamaaliulerlunga.“ Qatanngutip tusakkani iluaqutigai pissutigalugu atoramigit.
13 Napasuliaq Alapernaarsuiffik-mik atuaqqissaarnerup Biibilimi najoqqutassat pisuni assigiinngitsuni atornissaannut ilinniartippaatigut. Naak inuunermik isumakuluutissarpassuaqaraluarluta isummakkut uummatikkullu eqqissisimajuaannarnissatsinnut ikiorpaatigut. Napasuliaq Alapernaarsuiffik-mik atuaqqissaarnitsigut sallusuissutsip qaamanera qaammarissiartuinnartillugu nutaanik paasissutissinneqartuartarpugut. Assersuutigalugu Napasuliaq Alapernaarsuiffik 1. maj 1999-imoortumi ilanngutassiat atuaqqissaakkavut: „Tamakku Tamarmik Taamaalissapput“, „Atuartup Qarsupiinnarnaveerligit“ aamma „Eqqumagit Eqiasuillutillu!“ iluaqutigisorujussuusimavavut. Allaaserisat taakku ilinnut qanoq sunniuteqarsimappat? Iliuutsikkut takutippiuk Jesusip siunissaq pillugu mianersoqqussutaa ilumoorullugu? ’Maajunnartoq nungutitsisoq inimi illernartumi ittoq’ takulerutsigu misilinneqarnissatsinnut piareersimavit? (Mat. 24:15-22) Anguniakkanni inuuninnilu ingerlaviginiakkanni erserpa nunap piisigut katersuiniartuunngitsutit, Jehovalli aqqata illernartinnissaa ilinnut pingaarnerpaasoq? Napasuliaq Alapernaarsuiffik-mik atuaqqissaaqatigiinnerup maannakkut iluaqutissatsinnik ilinniartippaatigut.
14 Sapaatip-akunneri tamaasa ilagiinni atuakkamik atuaqqissaaqatigiinnermi qanoq ilikkagaqartiginersugut eqqarsaatigiuk. Ungasinngitsukkut Danielimik Allakkat atuaqqissaarlugu aallartippugut. Qaamaatini sisamani Biibilip atuagartaata taassuma atuaqqissaarnerani saapatip-akunneri tamaasa uppernitta alliartornera maluginnginnerparput? Jehovap pruffiitiatut asasaatut Danielitut uppernerput alliartortipparput atajuarsinnaajumalluta.
15 Inuuneq pilluarnartoq qanoq angusinnaagipput Jehovap ilinniartippaatigut: Guutip inatsisai malikkaangatsigik aliasuutissarpassuit pinngitsoortarpavut. Paasisarparputtaaq inuunermi pilluarneq sunaasoq. Jehovap siulersuinerata malinneratigut isiginnaartuuginnarnata sulinerani peqataasarpugut. Jehovallu piumasaanik iliortut pilluarput. — 1 Kor. 3:9; Jâko 1:25.
16 Ilagiit ataatsimiinnerini tusartakkatit qanoq atorusunnerlugit eqqarsaatigeqqissaartakkit. (Juá. 13:17) Guuti ilungersorlutit uummatikkullu iluunngarlutit kiffartuuguk. Taava nuannaangaassaatit. Inuunerit pisuunerulissaaq siunertaqarnerulerlunilu. Aap, nammineq iluaqutigissavat.