Pisariaqartitsiffiunerusumi kiffartorsinnaavit?
1 Ilagiinni oqaluussisartunik, ilagiinni kiffartortunik utoqqaanertanilluunniit pisariaqartitsiffiusumut nuunnissat eqqarsaatiginikuuiuk? ’Ikiuiartoqquneqaruit’ qanoq qisuariassagaluarpit? Apustili Paulusitut iliuuseqassagaluarpit? — Aps. 16:9, 10.
2 Savalimmiuni Kalaallit Nunaannilu, qeqertanilu qallunaat nunaanniittuni isorlernilu najugalinnut piffissaq tamaat kiffartortunik anersaakkut nukittuunik, utoqqaanertanik ilaqutariinnillu oqaluussisartunut nukittorsaataasinnaasunik pisariaqartitsisoqarpoq. (Kol. 4:11) Danmarkimi utoqqaanertat ilaqutallit ilagiinnut sanilerisaminnut attaveqalernissaat pisariaqartinneqarpoq.
3 Immikkut kiffartornissamut piareersimaniarlutik eqqarsaatersortut Jehovamit siulersorneqarnissamut qinusariaqarput, akissaa naatsorsorlugu. (Naleqqiuguk Lukasi 14:28-30.) Sumukarnissamut piareersartariaqarpoq.
4 Nuukkaanni unamminiarnarsinnaavoq ilagiinnut mikisunut naleqqussarluni inuuneqalernissaq, ikinngutit ilaquttallu ilagiuminarnerutissimasat ungasillillugit. Suliffik aamma ajornartorsiorfiusinnaavoq, silaannaq assigisaallu naapertuunnissaq. Ilagiinnut allanut nuukkaanni ataatsimiigiarnissamut oqaluussiartornissamullu angallanneq sivisunerusoq atortariaqalersinnaavoq, meeqqat aammalumi inersimasut ikinngutitaartornissaq ineriartortittariaqassavaat. Suliassaq taamaattoq qanoq ajunngitsumik suliarineqarsinnaava?
5 Upperneq tatiginninnerlu iluaqutaasut: Guutip peqqusineratut Abrahami najugaqarfini Ur qimappaa nuliani, soralussani ataatanilu utoqqalilersoq Tera ilagalugit Karanimut kilometerit 1000-nik ungasissusilimmut aallarput. (1 Mos. 11:31, 32; Neh. 9:7) Terap toqunerata kingorna Abrahami 75-nik ukioqartoq Karani qimappaa nunamullu Guutip takutikkumasaanut aallarluni. Abrahamip, Sarap Lotillu „pisuussutitik katersorsimasatik tamaasa nassarpaat“. (1 Mos. 12:1, 4, 5) Abrahami pisariaqartitsiffiusumut nuunngilaq, angalanerali piumasaqaateqarpoq. Sumik?
6 Abrahamimut upperneq tatiginninnerlu piumasaqaataasimavoq. Eqqarsariartaatsini inooriaatsinilu allanngortittariaqarsimavaa. Ilaquttami akornanni toqqissisimassuseq qimattariaqarsimavaa. Taamaakkaluartoq tatigilluinnarpaa Jehovap nammineq inoqutinilu isumagiumaaraani. Ullumikkut amerlasuut Jehovamut tatiginninnermik tassunga assingusumik takutitsinikuupput.
7 Jehova oqarpoq tusagassaq nuannersoq oqaluussissutigineqassasoq „inuiannut tamanut nalujunnaarsillugu, taavalu naggatissaq nalliutissaaq“. (Matt. 24:14) Tamanna eqqarsaatigalugu, illit ilagiinnut pisariaqartitsiffiusunut nuunnissannut periarfissaqarpit? Pisariaqartitsisorpassuaqarpoq.
8 Pisariaqartitsiffiusumut nuunneq: Soraarnerussutisiaqarpit? Aningaasatigut allat isumalluutigaagit? Taamaanngippat, namminersulersinnaavit? Sumiikkaluaruilluunniit qarasaasiaq oqarasuaallu ikiortigalugit suliatit ingerlassinnaavigit? Suliannut assingusumik immaqa suliffittaarsinnaavutit? Naak immaqa pigisatigut pisariaqartitatit appartariaqaraluartut suliffimmik allamik misileerusussinnaavit? Nuussinnaanngikkuit ilaquttatit taamaasiornissaannut ikiorsinnaavigit? Allat periarfissallit kajumissaarsinnaavigit ilungersorneranilu tapersersorlugit?
9 Qinnutikkut eqqarsaatersuutigilluareerlugu misigiguit pisariaqartitsiffiusumut nuukkusullutit, ilaquttatit ilagiinnilu utoqqaanertat oqaloqatigikkit. Tulliullugulu allagaqarit utoqqaanertanullu tunniullugu, allagaq immikkoortortaqarfimmut nassiutsinnagu maluginiakkaminnik tapersiissutissaminnilluunniit ilanngussaqarsinnaaqqullugit.
10 Allakkanni suna allassaviuk? Qassinik ukioqarnerlutit ilisimatiguk, qanga kuisissimanerlutit, ilagiinni sunik akisussaaffeqarnerlutit, katisimallutit meeqqanillu nukangasunik meeraqarnerlutit. Oqaluttuariuttaaq sumi kiffartorusunnerlutit, silaannaq isugutattoq nillertorluunniit sapinnginnerit imaluunniit nunami avinngarusimasumiissinnaanerlutit. Oqaatsit allat qallunaatuumit/kalaallisuumit allaanerusut sapinngisatit eqqaakkit.
11 Ilungersuussisuuit? Avatangiisitit najoqqutaralugit pisariaqartitsiffiusumi kiffartulersinnaavit? Taamaappat eqqaamajuk Jehova imminut tatiginnittut imminullu pilliutigeriaannaasut pilluaqqussutissarpassuaqartimmagit. — Tus. 34:8; Mal. 3:10.