Siuneqassutsit ineriartortiguk
1 Guutip innuttai sumi tamani ulluni kingullerni ajornartorsiorfioqisuni, tatineqangaartarput amerlasuunillu misilinneqartarlutik. (2 Tim. 3:1-5) Tamatta uppernitsinni aalajaattuarnissatsinnut qiimmassarneqarnissarput pisariaqartipparput. (1 Kor. 16:3) Tassani Jehovap ikiussavaatigut akuttunngitsumik oqaasianik nerisarutta, anersaavalu tatigalugu ilaagiivinut qanimut attaveqarutta. — Tuss. 37:28; Rom. 8:38; Saqq. 2:10.
2 Siorna immikkut ataatsimeersuaararnerput pissutissaqarluartumik ima qulequtaqarpoq: „Silatussutsimi inersimasuugitsi.“ Paulusip oqaasia 1 Korinthimiut 14:20-mit issuagaavoq allassimasoq: „Qatanngutit, silatussutsikkut meeqqat assiginiaqinasigit. Ajorsutsimi meeraagitsi, silatussutsimili inersimasuullusi“. Sammisat qanoq isumaqarfigaagit?
3 „Qiimmaallannaq!“ „Tassa pisariaqartilluinnagarput!“ Taama ilai oqarsimapput. Allaat angutip Jehovamut Nalunaajaasuunngitsup, pannni aqqaneq marlunnik ukiulik immikkut ittumik ataatsimeersuaararnermi kuisinniartoq takuniarlugu aggersimasup sammisat soqutiginarnerarpai ilaquttaminullu iluaqutaalluarsinnaanerarlugit. Illittaaq taamatut misigivit? Sammisani qulequttat pingaarnerit misissoriartigit.
4 Siuneqassuserput ineriartortinniarlugu ilisarsineq eqqorluartoq pisariaqartipparput: Oqalugiaammi aallarniutaasumi, „Silaqassutsikkut maannakkut siuariartorit“, oqalugiartup erseqqissarpaa, ulluinnarni unamminiarnartut akiorsinnaajumallugit suna pisariaqartoq. Sunaanersoq eqqaamaviuk? Pikkorissuseq kisimi apeqqutaanngilaq. Ajortunut naakkaanarumanata, Biibilimik paasisaqarniarnitsigut siuariartariaqarpugut. Aatsaat taamaaliorsinnaavugut Guutip ikiuineratigut. Tussiaasiortutut iluunngarluta Guuti qinnuigisariaqarparput inatsisai oqaaqqissaarutaalu paasisinnaaqqullugit, uummammik tamakkiisumik kiffartorfigisinnaajumallugu. — Tuss. 119:1, 2, 34.
5 Oqalugiaatip tulliani, „Qanoq ililluta Biibilimik paasinninnikkut inersimasunngorsinnaasugut“, angalasartup nakkutilliisup takutippaa, Jehovap oqaatsimigut peqatigiiffinilu aqqutigalugu pisariaqartitatsinnik isumagigaatigut. Paasinninneq imatut nassuiarneqarpoq „pineqartumik isumasiuisinnaaneq paasiniarlugulu qanoq attuumassuteqarnersoq, immikkuualuttortaasa ataqatigiinneri paasisinnaallugit ataatsimullu isumaa paasillugu“. Piginnaassutsip tamatuma ineriartortinnissaanut kia ikiorsinnaavaatigut? Jehovap anersaakkut siumukarnissatsinnut ikiuisussat inuit tunissutit isumagisimavai. (Ef. 4:11, 12) Peqatigiiffiata nunamiitup, Guutip oqaasianik ullut tamaasa atuartarnissatsinnut ilagiillu ataatsimiinnerinut tamanut najuuttarnissatsinnut kajumissaarpaatigut. (Tuss. 1:2) Nammineq ilaqutariittullu atuaqqissaaraangatta aamma ataatsimiinnissamut oqaluussinissamullu piareersaraangatta Biibilip atuagassiaatittalu atornissaannut ajoqersorneqartarpugut. Tamakku atorluarpigit? Aalajangersimasumik Biibilimik atuaqqissaartarpit? Tamanna pingaaruteqarnerpaavoq, silarsuup isumaanit, mutinit, ilisimaqqissaarniutaanit salloqittaataanillu sunnertissanngikkuta. — Kol. 2:6-8.
6 Siuneqassuserput ineriartortittariaqarpoq: Oqalugiartup qaaqqusap oqalugiaatimini siullermi, „Anersaakkut peqqissutsit paariuk siuneqassutsivit ineriartortinneratigut“-mi, nassuiarpaa silarsuarmiut naliginnaasumik ajunngitsumik ajortumillu immikkoortitsisinnaaneq sapernartikkaat. (Es. 5:20, 21) Pissutaavoq Guutip najoqqutassiai naapertuilluartut maleruarnagillu akuerinnginnamikkik. Uagulli kristumiut ilagiivi aqqutigalugit anersaakkut ilinniartinneqarsimavugut, taamaattumik Guutip najoqqutassiai ilisimavavut inuunitsinnilu najoqqutaralugit. Taamaattumik paasisinnaavarput sunaasoq Jehovap piumasaa, ajunngitsoq iluarinartoq naammalluinnartorlu. — Rom. 12:2.
7 Silarsuup eqqarsariartaasia paatsiveqanngitsoq inerititaalu ajortut ingalassimaniarlugit siuneqassuserput ineriartortittuartariaqarparput. Qanoq ililluta taamaaliussagut. Hebræerit 5:12-14-mi apustilip Paulusip erseqqissarpaa ’immuk’ kisiat inuussutigisinnaanngikkipput, anersaakkulli nerisassat tamuasariallit pisariaqartikkivut, soorlu ilagiit atuakkamik atuaqatigiinneranni Esajap siulittuutai atuaraangatsigit. Tamannalu ilutigalugu ilikkakkavut atorniartariaqarpavut. Taamaaliorutta Jehovap najoqqutassiaasa eqqortuunerat paasissavarput. Siuneqassuserputtaaq ineriartortissavarput ajunngitsunik ajortunillu immikkoortitsisinnaalerluta.
8 Ajoraluartumik ilaat anersaakkut sanngiillisimapput. Sooq? Jehovap isaani suna ajortuusoq sunalu ajunngitsuusoq eqqumaffigisimannginnamikku. Akerlianilli radiukkut fjernsynikkullu oqaluttunit Biibilip najoqqutassiaanut akerliusunik, nipilersuutinit ineriartornanngitsunit imaluunniit computerikkut allaqatigiittarnikkut sunnertissimapput. Ilisimassuseqarluarutta inunnit ileqqorluttunit, sianiitsunit ajortunillu sunnertinnavianngilavut. — Uss. 13:20; Gal. 5:7; 1 Tim. 6:20, 21.
9 Inuusuttut ’ajorsutsikkut meeraasariaqarput’: Sammisassani marlunnik oqalugiaateqarpoq pingaartumik inuusuttut siuneqassutsimik ineriartortitsinissaanik kajumissaarisunik. Oqalugiartup takutippaa ’ajorsutsikkut meeraaneq’ isumaqartoq misilittagakitsuuginnassasugut, imaappoq, Jehovap isaani ajortut tungaatigut meeqqatut minguitsumik pissuseqassasugut. (1 Kor. 14:20) Kajumissaarneqarpugut piffissarput qanoq atorneripput eqqumaffigeqqullugu, ajortunut tamanut sunnertinnissamullu ingalassimannissinnaaqqulluta. (Ef. 5:15-17) Kajumissaarneqarpugut naatsorsoqqullugu anersaamut tunngasunik paasinnikkiartuinnarnitsinnut toqqaannartumik iluaqutaanngitsunik, qanoq atuartigisarnersugut. Taamaalioreerpit? Suna inerneraa? Biibilimik atuartarnitta saniatigut, atuagassat peqatigiiffiup saqqummersittaasa malinnaaffiginissaat aalajangiussimasariaqarparput. Tamatta iluaqutigissavarput, aamma inuusuttut, ’ilisimassuseqalernissatsinnut’. — Uss. 4:7-9.
10 „Paasisimasaqassuseqarlutit Biibilip najoqqutassiai malinnerisigut iluaqutigikkit“: Tassa immikkut ittumik ataatsimeersuaararnermi oqalugiaatip kingulliup qulequtaa. Oqalugiartup qaaqqusap nassuiarpaa Jehova paasisimasaqassutsimut inuunartumut pilerfiusoq, inuit ilisimassusiannit annerungaartumik. Takorluulaariaruk Jehovap paasisimasaqassusianik ’pissarsisinnaallutit’. Tukkorluni ilumoorlutik ujaasisunut uppernikkullu qinusunut agguaattarpaa. (Uss. 2:3-5, 9; 28:5) Neqeroorutaa pilerigaajuk?
11 Biibilimi atuaraangatta najoqqutassiat maluginiarnissaannut Kajumissaarneqarpugut. (2 Tim. 3:16, 17) Jehovap qanoq oqarnera ilisimallualerumallugu misissorluartakkit. Najoqqutassiat tamakku eqqarsaatigilluakkit, eqqarsaatikkut uummatikkullu aalajangiullugit. Siuneqassutsit ineriartortissavaa inuuninni silatusaartunik aalajangiisinnaalersillutit. (Josva 1:8) Inuit ilaasa atugarisinnaasaat qiviariartigit, Biibilillu najoqqutassiaasa qanoq iluaqutaasinnaaneri takullugit.
12 ’Isikkoq, atisalersoriaaserlu eqqarsaatigalugit suna eqqumaffigisariaqarpara?’ Silarsuarmi atisalersoriaatsimi mutiusumi anersaaq pikitsitsiumatorpasittarpoq. Anersaap taamaattup inuit torinngitsumik peqqusaarpaluttumillu atisalersortissinnaavai. Pissutsit taamaattut akiornissaanut Biibilimi najoqqutassat suut ikiussavaatigut? Siuneqassuserput ineriartortissimagutsigu najoqqutassamik 1 Timotheusi 2:9, 10-milu allassimasumit siulersortikkumassaagut, ’isornaatsunik perroorniutaanngitsunillu atisaqarluta’. . . . ’soorlumi [inuit] Guutimik mianerinnilluartut ileqqussaqartut’. Najoqqutassiat allat atorneqarsinnaasut 2 Korinthimiuni 6:3-mi aamma Kolossemiut 3:18, 20-milu eqqaaneqarput.
13 ’Ilaqutariit nukittujuartinniarlugit qanoq iliorsinnaavunga?’ Ilaqutariinni oqaloqatigiilluartarnissaq pingaaruteqarpoq. Jaaku 1:19-mi allassimavoq: „Kinaluunniit tusarasuartarli, kisianni oqalukkumaataartuulluni kamajaatsuullunilu.“ Ilaqutariinni inoqutigiit imminnut tusarnaartarlutillu oqaloqatigiissinnaasariaqarput. Oqaatsivut eqqortuugaluarlutik sakkortuumik, ajorumaappaluttumik misigissuseqarpalunngitsumillu oqaaserineqarunik iluaqutaanavianngillat. Uiugutta, nuliaagutta, angajoqqaajugutta meeraaguttaluunniit oqaatsivut ’tamatigut inussiarnersumik tarajulimmillu’ oqaatigisariaqarpavut. — Kol. 4:6.
14 ’Piumatussutsimit sunnertissimavunga?’ Silarsuup piumatussuseq piviusumik pillualersitsisinnaanngitsoq, inuunermilli ilungersunarnerulersitsiinnartartoq siuarsarpaa. (Oqal. 5:10; Luk. 12:15; 1 Tim. 6:9, 10) Piumatussutsip nigalianut pisaritinnginnissatsinnik ikiorniarluta Jiisusip najoqqutassamik pingaarutilimmik ajoqersorpaatigut: Isit qaamatiguk. Aalajaatsumik pilimanianngitsumillu inuuniaraanni anersaakkut soqutigisat Naalagaaffillu allanit tamanit salliutinneqartariaqarput. — Matt. 6:22, 23, 33.
15 Suna anguniagarisariaqarparput: Guutip oqaasiani najoqqutassiat naapertuilluartut, aalajangiinissatsinnut iluaqutigisinnaasavut nassaarisinnaavavut. Najoqqutassiat tamakku ilinniarluartariaqarpavut paasilluarlugillu inuunitsinni qanoq atorsinnaanerivut. ’Piginnaassutsip atortuinnarnerisigut sungiusarlugu ajunngitsumik ajortumillu immikkoortitsisinnaalernerput’ uagutsinnuinnaq iluaqutaassanngilaq, aammali Jehovamut ataqqinaataassaaq. — Heb. 5:14.