’Inunnik tunissutit’ Guutip savaataanik ilungersorlutik paarsisuupput
1 Jehovap ernini aqqutigalugu asannittumik ’inunnik tunissutinik’ tunisimavaatigut. (Ef 4:8, 11, 12) Suliassarpassuaqarput, ilaatigut Guutip savaataanik ilungersorlutik paarsisutut kiffartorput. (1 Pet 5:2, 3) Tamavitta tunissut taanna pisariaqartilluinnagarput iluaqutigaarput. Paarsisut taakku tamarmik anersaakkut ingerlalluarnissaat soqutigaat ajornartorsiuteqarpata, ilagiinni nutaajuppata, sanngiissuteqarpata imaluunniit ajortumik ingerlalersimappata. — Fil 2:4; 1 Thess 5:12-14.
2 Silarsuarmi pisartut toqqisisimananngitsut ernumatitsileraangata paarsisooqataasut taakkua „assigissavaat anorersuarmut oqquiffik sialussuarmullu oqqiffik“. Aliasukkaangatta nanertisimagaangattaluunniit tuppallersagassaagutta qimmassagassaallutalu ’inoqajuitsumi kuunnguaq kuuttutut, nunami imissaaleqisumi qaarsorsuup alanngortaasut’ nukissaqalerseqqittarpaatigut. — Es. 32:2.
3 Unittooqqasut kajumissaarsigit: Ilaannikkuinnaq ataatsimiigiartartut unittooqqasullu ilagiit suliaannut aalajangersimasumik peqataaqqittalernissaannut kajumissaarniarlugit utoqqaanertat immikkut ittumik suliniuteqarput. Amerlasoorpassuit asannittumik paarsisunit pulaarneqartarnertik iluaqutigalugu ilagiit ataatsimiinnerinut aalajangersimasumik peqataaqqittalersimapput anersaakkullu siuariartoqqillutik taamaalillutillu oqaluussinissamut kajumissuseqaqqilerlutik. Utoqqaanertat taamaaliornermikkut Jehovap asannittumik isumassuinera Jiisus Kristusillu ilagiinnik aqutseriaasia ilaarpat. Jiisusip maligassiuussimavaatigut, savaatinimi taammarsimasut tamaasa ataasiakkaarlugit isumassorpai. — Matt 18:12-14; Joh 10:16, 27-29.
4 Anersaakkut sanngiilliortoqarnersoq paarsisooqataasut nakkutigaat. Nikallungasut, aalajangersimasumik ataatsimeeqataasanngitsut oqaluusseqatasanngitsulluunniit qularnanngitsumik ikiorneqarnissartik pisariaqartippaat. Aamma utoqqaanertat ikiorusuppaat silamiut atisalersoriaasiinut maleruutiinnalersimasut ilagiinniluunniit isornartorsiuisumik isiginneqqajaalersimasut. Ilumoortumik soqutiginnillutik tunniusimalluinnarlutillu utoqqaanertat isumassuiumatuut piumassutsiminnik allaat ’inuunertik tunniulluugu’, taamatut pissuseqalersimasoq Jehovamut asanninnermik ineriartortitseqqileqqullugu ikiorusuppaat. — 1 Thess 2:8.
5 Kristumiut tunniulluinnarsimasut ilaat ilagiinnut attaveqarunnaavissimapput, peqiilliorneq, aningaasatigut ajornartorsiorneq ilaquttanilluunniit assortorneqarneq isumakuluutigivallaarlugit anersaakkut unittuuissimallutik. Utoqqaanertat isornartorsiuinatik inussiarnersumik paasitinniarlugit ikiorusuppaat Jehovap savaatini tamaasa isumassorai piffissanilu atoruminaatsuni nikallortinnaveersaarniartarai. (Tuss 55:23; 1 Pet 5:7) Savanik paarsisut eqeersimaartut taakku paasitikkusuppaat ’Guuti qaninniarunikku taanna qanillissasoq’ kingumullu nakussatseqqillugit. — Jak. 4:8; Tuss. 23:3, 4.
6 Napparsimasut utoqqaallu pingaartissigit: Paarsisooqataasut asannittut arajutsisaqannginnissartik aamma eqqumaffigaat. Ilagiit tamangajammik utoqqarnik napparsimasunik, utoqqaat illuaniittunik assigisaanilluunniit ilaqarput. Pissutsit atukkatik pissutigalugit paasinarluinnartumik Naalagaaffimmik tusarliussaq pillugu oqaluussisinnaanerat killeqarpoq. Immaqa pulaartutik, uninngaqatitik peqqissaasulluunniit oqaluussiffissatuaraat. Taamaakkaluartoq naammassisaat naleqangaartoq oqaluussinermut tamarmiusumut ilaavoq. (Matt 25:15) Qaammatip ingerlanerani minutsit 15-niinaalluunniit oqaluussisinnaasimagunik, nalunaarutigisinnaavaat, akuttoqatigiimmillu oqaluussisartutut ilanngunneqartassapput.
7 Eqqaaniaanissap qanilliartornerani paarsisut ’inunnik tunissutaasut’ qatanngutimi anersaakkut pisariaqartitaat immikkut eqqumaffigaat. Ilagiinniit qimagussimasut tamarmik qatanngutit qanimut peqatigalugit nuannaarnerup eqqissinerullu misigiteqqilernissannut ikiorniarlugit utoqqaanertanut piffissaalluassaaq. Nuannaarutigisarparput ’pingaartumik uppeqatitta’ ilagiinni ataatsimiinnerit peqataaffigeqqileraangatigit utertitsissutitullu pilliummut upperinninnertik oqaluussinikkut uppernarsaqqileraangamikku. — Gal 6:10; Luk 15:4-7; Joh 10:11, 14.