Isit qaammarippa?
1. ’Isi qaamasoq’ qanoq isumaqarpa?
1 Iliuutsitit isigisannit sunnerneqartarput. Jiisusip oqaasii naleqqulluarput: “Isi qaammarippat timi tamarmi qaamasuussaaq”! (Matt 6:22) Isi anersaakkut “qaammarippat”, taava siunertamut ataasiinnarmut sammissaaq — tassa Guutip piumasaanik iliornissamut. Naalagaaffik salliupparput, nunap piinillu imaluunniit sammisassanik pisariaqanngitsumik oqaluussinitsinnik akornusersortinnata.
2. Suup isumarput akornusersinnaavaa, suulli ikiorsinnaavaatigut?
2 Imminut misissornissaq pisariaqarpoq: Sunik atorfissaqartitsinitsinnik pilerisaarutinit imaluunniit allat pigisaannit isumarput sunnerneqarsinnaavoq. Kissaatigisamik anguniagaqartinnani imaluunnit annertuumik pisiaqannginnermi piffissamik, aningaasanik nukinnillu atuinissamik ‘naatsorsueqqaarnissaq’ pitsaassaaq imminullu aperaluni ‘Jehovamut kiffartorninnut pitsanngorsaataassava imaluunniit akornutaassava?’ (Luk 14:28; Flp 1:9-11) Aamma silatusaarnerussaaq akuttoqatigiimmik eqqarsaatigeqqissaartassallugu qanoq ililluta inuunerput pisariunnginnerusumik atorsinnaanerlugu suli annerusumik oqaluussisinnaajumalluta. — 2 Kor 13:5; Ef 5:10.
3. Qatanngutip arnap inuunerminik pisariunnginnerusumik allannguinera qanoq ilinniarfigisinnaavarput?
3 Qatanngut arnaq pioneritut aallartikkami aalajangerpoq ulloq naallugu suliffini tigummiinnarniarlugu, naak ullup affaannaanik sulileraluaruni pisariaqartitani matussuserluarsinnaagaluarlugit. Naggataatigut paasilerpaa: “Naalakkanut marlunnut kiffartorsinnaasoqanngilaq. Pilerigisakka pilliutigisariaqarpakka pisariaqartitannakka matussuserumallugit. Paasilerpara nunap pii pisoqalisartut uangalu pilerigiuaannarukkit imminut qasutiinnassallunga.” Atugarisaata ajornarunnaarsikkamiuk inuunermik pisariunnginnerusumik allannguinissaa allamillu suliffittaarluni pioneritut ingerlaannarnissamik periarfissaqalerpoq.
4. Isip qaamasuujuaannarnissaa sooq maanna pingaaruteqarpa?
4 Piffissap inuuffigisatta pingaaruteqassusiata suli annerusumik isip qaammarissuunissaa pingaaruteqarnerulersippaa. Ullut tamaasa pissutsit aaqqissuussaanerata naggatissaat Guutillu silarsuassaa nutaaq qanilliartuaartarparput. (1 Kor 7:29, 31) Oqaluussinermik ulapputeqartuarutta imminut tusartivullu annassinnaassaagut. — 1 Tim 4:16.