Suna pingaartinneruiuk?
1. Jiisusip qanoq ersersippaa kiffartorneq pingaartinnerugini?
1 Jiisusip kiffartorneq allanit tamanit pingaartinneruaa. Qasusuilluni sapinngisamik innunnut amerlasuunut oqaluussiniarluni Palæstinami kilometerit hundredilippassuit angalasimavai. Piffissaq annerusoq kiffartornermut atorniarlugu kisiallu samminiarlugu pilimanianngitsumik inuuvoq. (Matt 8:20) Inuppassuit napparsimasortatik ajorunnaarseqqullugit noqinniaraluaraangagu oqartarpoq: “Guutip naalagaaffianik iivangkiiliu illoqarfinni allanissaaq tusarliussassaraara; tamanna pillugu aallartitaavunga.” — Luk 4:43.
2. Sooq kiffartorneq Jiisusimut taama pingaaruteqartigaa?
2 Sooq kiffartorneq Jiisusimut taama pingaaruteqartigaa? Jehovap aqqanik illernarsitsinissaq pingaarnerpaatippaa. (Matt 6:9) Ataatani qilammiusoq asavaa, taamaattumillu piumasaanik iliorumallunilu peqqussutai tamaasa naalakkumavai. (Joh 14:31) Aammattaaq inuit isumassorpai ikiorusullugillu. — Matt 9:36, 37.
3. Qanoq ililluta ersersissinnaavarput kiffartorneq pingaartinnerullutigu?
3 Jiisusi ilaaruk: Kiffartornermik Jiisusitut pingaartitsiuarnissaq unamminiarnarsinnaavoq, silarsuummi piffissaajarusuppaatigut pututitsisinnaasunik allarpassuarnik neqeroorfigisarluta. (Matt 24:37-39; Luk 21:34) Taamaattumik pingaarnersiuisariaqarpugut, piareersarnissamut oqaluusinissamullu piffissamik aalajangersimasumik immikkoortitsilluta. (Fil 1:10) Pilimanianngitsumik inuunissaq ilungersuutigaarput silarsuarmillu tamakkiisumik atuinaveersaarluta. — 1 Kor 7:31.
4. Sooq eqqortumik pingaarnersiuiuarnissaq uagutsinnut pingaaruteqartupilussuua?
4 Piffissaq killeqarpat, inuk silatooq pingaarnersiuissaaq. Assersuutigalugu silapilussuaq takkutilersoq tusaamaguniuk ilaquttani isumannaatsumukaanissanut sanilinilu mianersoqqunissaanut ilungersorluni piffissaqarfiginiassavai. Suliassat pingaannginnerusut utaqqisinneqartariaqarput. Harmagedonimi silapilussuup pitoraatinnginneranut piffissakeqaaq. (Sef 1:14-16; 1 Kor 7:29) Imminut annaatissagutta tusartivullu annaallugit, ilagiinni oqaluussinermilu imminut nakkutigisariaqarpugut ajoqersuisutullu suliavut nakkutigalugit. (1 Tim 4:16) Aap, kiffartornermik pingaarnerutitsinerput annannissatsinnut aalajangiisuuvoq!