Jehovap oqaluussinermut ilinniartittarpaatigut
1. Jehovap inuit suliassikkaangamigit, aamma qanoq iliortarpa?
1 Jehovap inuit suliassikkaangamigit, aamma naammassinissaanut iluaqutissaannik tunisarpai. Assersuutigalugu Jehovap Noa, siornatigut umiarsualiorsimanngisaannartoq, umiarsualioqqullugu peqqugamiuk qanoq iliornissaanik oqaluttuuppaa. (1 Mos 6:14-16) Anneruniajuitsoq savanik paarsisoq Mosesi, Israelikkut utoqqaanertaannut Faraomullu oqariartoqqullugu suliassinneqarami, Jehovap neriorsorpaa: “Uanga qarnit najorumaarpara, ajoqersorumaarpakkillu qanoq oqarnissannik.” (2 Mos 4:12) Aamma uagut, nutaarsiassamik nuannersumik oqaluussinissatsinnik suliassikkamisigut, Jehovap imminiinngilaatigut. Teokratiimik Ilinniarfimmi Oqaluussinermullu tunngasumik ataatsimiinnermi oqaluussinissamut ilinniartittarpaatigut. Ilinniartitaaneq tamanna qanoq iluaqutigisinnaavarput?
2. Teokratiimik Ilinniarfik qanoq iluaqutigisinnaavarput?
2 Teokratiimik Ilinniarfik: Ataatsimiinnissat tamaasa sioqqullugit sammisassanut piareersartarit. Saqqummiussisut sammisaminnut paasissutissat qanoq atorneraat tusaagukkit qanoq ilinniartitsisinnaanerlutit paasilissavat. (Uss 27:17) ‘Skolehåndbogen’, Teokratiimik Ilinniarfimmi atorneqartartoq, ataatsimiinnermut nassartaruk najoqqutassanillu allattuiffigisarlugu. Teokratiimik Ilinniarfimmik aqutsisup saqqummiussinerit tamaasa oqaaseqarfigigaangagit pingaarnerit atorusutatit titartakkit saneraanilu allattuiffissaq allattuiffigisarlugu. Teokratiimik Ilinniarfik iluaqutigilluarniaraanni nammineq peqataanissaq pitsaanerpaajuvoq. Peqataaniarlutit nalunaarnikuuit? Sammisassamik tunineqaruit piareersarluarit siunnersuutillu tunniunneqartut atorlugit. Oqaluussinermi ilikkakkatit atortakkit.
3. Oqaluussinermut tunngasumik ataatsimiinneq qanoq iluaqutigisinnaavarput?
3 Oqaluussinermut tunngasumik ataatsimiinneq: Siunnersuutit ataatsimiinnermi saqqummiunneqartut eqqaamalluarnerussavavut ataatsimiinneq sioqqullugu sammisassat atuartarutsigit akinissamullu piareersartarutta. Naatsunnguanik akissuteqartarutta amerlanerit akisinnaassapput. Takutitsinerit malinnaaffigeqqissaartakkit siunnersuutillu oqaluussininni pitsanngoriaataasinnaasut tamaasa atortarlugit. Guutip Naalagaaffianut Kiffartorneq-mi pingaartitatit toqqukkit.
4. Sooq teokratiimik ilinniartitsineq atorluartariaqarparput?
4 Suliassat Noamut Mosesimullu tunniunneqartut assigalugit nutaarsiassamik nuannersumik oqaluussineq aamma unamminiarnartuuvoq. (Matt 24:14) Ajoqersuisorsuarput, Jehova, tatigigutsigu ilinniartitsissutaalu atortarutsigu iluatitsilluassaagut. — Es 30:20.