“Inuit tamaasa eqqisseqatiginiarsigit”
1. Kamattumik naammattuuigutta Biibilimi siunnersuut suna malissinnaavarput?
1 Jehovap innuttai eqqissinermik nuannarisaqartuupput eqqissinerlu oqaluussissutigaat. (Es 52:7) Piffissalli ilaanni inuit kasuttorfigisavut kamattut naammattoortarpavut. Pissutsini taama ittuni eqqissisimanissatsinnut suut iluaqutigisinnaavavut? — Rom 12:18.
2. Sooq paasinnittuunissarput pingaaruteqarpa?
2 Paasinnittuugit: Naak ilaasa sallusuissut nuannarinagu kamannermik ersersitsigaluartut immaqa allat oqariartuutitsinnut pissuteqanngitsumik kamattarput. Imaassinnaavoq taakkununnga piffissaanngitsukkut kasuttortugut. Immaqa pulaagaq nammineq ajornartorsiutiminik pissuteqartumik kamappoq. Nutaarsiassaq nuannersoq pissutigalugu kamakkaluarpat eqqaamassavarput, taamatut qisuariarnera eqqunngitsumik ajoqersorneqarsimaneranik pissuteqarunarmat. (2 Kor 4:4) Paasinnittuugutta eqqissisimaniarsarissaagut qisuarneralu inuttut tigunagu. — Uss 19:11.
3. Pulaagaq qanoq ataqqinnippaluttumik pissusilersorfigissavarput?
3 Ataqqinnittuugit: Angalaarfigisartakkatsinniittut amerlasuut isummaminnik aalajangiusisimasuupput. (2 Kor 10:4) Tusarnaarusunnerlutik tusarnaarusunnginnerlutilluunniit namminneq aalajangissavaat. Pulaakkap upperisaa pillugu nikassaasutut mitallerpaluttutullunniit nipeqassanngilagut. Ingerlaqquppatigut ataqqinnilluta qimagutissaagut.
4. Inussiarnersumik oqalunneq qanoq isumaqarpa?
4 Inussiarnersumik oqalugit: Inuit ilaasa ajortunik oqaluffigigaluarpatigut sallaatsumik inussiarnersumillu akisassaagut. (Kol 4:6; 1 Petr 2:23) Oqallinnermik aallartitsiniaannarata isumaqatigiissutigisinnaasatsinnik oqaaseqarniarsinnaavugut. Tulluarpat inussiarnersumik aperisinnaavarput sooq taama isumaqarnersoq. Ungasilliartortiinnarnagu ilaatigut oqaloqatigiinnerup kipitiinnarnissaa pitsaanerusarpoq. — Uss 9:7; 17:14.
5. Oqaluussinermi eqqissisimasuunerput qanoq iluaqutigisinnaavarput?
5 Eqqissisimasumik qisuariarutta imaassinnaavoq pulaagaq tullissaani nalunaajaaffigineqaruni qanoq qisuariarnerput eqqaamasimallugu tusarnaartoq. (Rom 12:20, 21) Naak assortuiniaannaraluartoq ullut ilaanni uppeqatigilersinnaavarput. (Gal 1:13, 14) Sallusuissulluunniit soqutigilinngikkaluarpagu imminut naalakkersinnaallutalu eqqissisimagutta Jehovamut tusarliussamullu ataqqinaataassaaq. — 2 Kor 6:3.