Oqaluussinissatsinnut suup kajumissisittarpaatigut?
1. Asanninneq oqaluussinerlu qanoq imminnut ataqatigiippat?
1 Guutip naalagaaffia pillugu nutaarsiassamik nuannersumik oqaluussissutiginninneq ullumikkut pingaaruteqarnerpaavoq. Suliami ataatsimi tamatumani inassutit annerpaat marluk naalappavut, tassa Jehovamut aamma tullermut asanninneq. (Mark 12:29-31) Asanninnerup oqaluussisartutut aallussilluartuunissatsinnik kajumissisippaatigut. — 1 Joh 5:3.
2. Oqaluussinikkut Jehovamut asanninnerput qanoq ersersittarparput?
2 Jehovamut asanninneq: Asanninnitta, Jehova ikinngutiginerpaasarput, illersorlugu oqalunnissatsinnik kajumissisippaatigut. Ukiut 6.000-it missaani Saatanimit mamarlerneqarsimavoq. (2 Kor 4:3, 4) Tamanna pissutigalugu inuit upperaat Guutip inuit ajortuliortut anniarfimmi ikualasumi naalliutsittarai, Guutiusoq ataasiullunilu pingasuusoq paasissaanngitsuusoq aamma inunnik soqutiginninngitsuusoq. Allaat amerlasuut Guuteqannginnerarlugu isummersimapput. Guuterput qilammiusoq pillugu inuit eqqortumik ilisimasaqarnissaat kissaatigingaarparput! Guutimut nalunaajaasutut eqiasuilluta suliniuteqarnitsigut Guuti nuannaartingaassavarput Saatanilu assortorlugu. — Uss 27:11; Hebr 13:15, 16.
3. Nalunaajaanitsigut tullermut asanninneq qanoq ersersittarparput?
3 Tullermut asanninneq: Kinaluunniit nalunaajaaffigigaangatsigu tassunga asanninnerput ersersittarparput. Piffissami ajornartorsiorfiusumi inuit nutaarsiassamik nuannersumik tusagaqarnissartik pisariaqartingaarpaat. Amerlasuut Ninevemiusut, Jonap nalaani inuusutut, ‘talerpimmik saamimmillu paatsiveqartitsinngitsutut’ inissisimapput. (Jon 4:11) Nalunaajaanitsigut ajunngitsumik aamma pilluarluni qanoq inuusoqarsinnaasoq inuit ilinniartittarpavut. (Es 48:17-19) Taamaalillutik neriuuteqalertarput. (Rom 15:4) Tusaaniarunik ilikkakkatillu malillugit inuugunik ‘annassapput’. — Rom 10:13, 14.
4. Suna Jehovamit puiorneqanngisaannassava?
4 Meeqqat angajoqqaaminnut asanninnertik piffissani aalajangersimasuinnarni ersersitsineq ajorpaat. Killeqaratik asasarpaat. Taamatuttaaq Guutimut, aamma tullermut asanningaarnitta aaqqissukkamik oqaluussinerinnarmiinngitsoq, periarfissat tamaasa atorlugit oqaluussinissamut kajumissisissavaatigut. Oqaluussinerput ingerlatiinnassavarput. (ApS 5:42) Asanninneq taama ittoq Jehovamit puiorneqanngisaannassaaq. — Hebr 6:10.