Pruffiitit maligassariniarsigit — Joeli
1. Joelip maniguuttuunera oqaluussinitsinni qanoq ilaarsinnaavarput?
1 Pruffiiti Joeli kinaava? ‘Petuelip erneratut’ taamaallaat ilisaritippoq. (Joel 1:1) Pruffiitip nammineq oqariartortuunini pinnagu Jehovap oqariartuutaa pingaartippaa. Taamatuttaaq uagut inuttut nersorneqarnissaq imaluunniit akuerineqarnissaq pinnagu oqaluussinitsinni Jehova Biibililu pingaarnerutittarpavut. (1 Kor 9:16; 2 Kor 3:5) Allaammi oqariartuutitsinnit nakussatsinneqartarpugut. Joelimik siulittuutip qanoq ullumikkut aallussillualersillutalu neriuteqalersissinnaavaatigut?
2. Jehovap ullussaata qanillinerata qanoq kajumissisissavaatigut?
2 “Naalakkap ullussaa qanillivoq.” (Joel 1:15) Naak oqaatsit ukiut tusindillit matuma siornatigut allanneqarsimagaluartut eqquutilernerisa nalaanni inuuvugut. Silarsuarmi pissutsit ajorsigaluttuinnartut soqutigisaqannginnerlu aamma illaruaatiginninneq angalaarfigisartakkatsinni takusartakkavut uppernarsaataalluarput pissutsit aaqqissuussaanerata ajortup naggatissaani inuusugut. (2 Tim 3:1-5; 2 Petr 3:3, 4) Naggatissap qanillinera eqqarsaatigigutsigu inuunitsinni oqaluussinerup pingaartinnerunissaanut pissutissaqarluarpugut. — 2 Petr 3:11, 12.
3. Sooq annikilliornartussarsuaq qanilliartortillugu oqaluussineq pingaaruteqarnerulerpa?
3 “Naalagaq innuttaasa qimarnguffigissavaat.” (Joel 4:16) Sajutitsineq versimi allaatigineqartoq annikilliornartussarsuarmi Jehovap eqqartuussineranut assersuutaaginnarsinnaavoq. Tuppallersaatigisinnaavarput ilisimagatsigu Jehovap kiffani upperluartut piffissami tamatumani aniguisikkumaarmagit. (Saqq 7:9, 14) Oqaluussinermik ulapputeqarutta aamma Jehovap tapersersuinera nakussatsitsineralu misigigutsigit annikilliornartussarsuarmi iluaqutigiumaakkatsinnik uppernerulerlutalu aalajaannerulissaagut.
4. Sooq nuannaarluta toqqissisimallutalu siunissaq ornissinnaavarput?
4 Naak Joelip oqariartuutaa nikallornartutut allaatigineqaraluartoq Guutip innuttaanut aniguisitaanissamik neriuuteqalersitsivoq. (Joel 3:5) Taamaattumik siunissaq toqqissisimalluta ornitsigu Guutillu naalagaaffianik nutaarsiassaq nuannersoq qamannga pisumik oqaluussissutigisigu oqaatsit Joeli 2:23-mi allassimasut malillugit: “Naalagaq Guutersi tipaatsuutigisiuk qiimasuutigalugulu.”