Eqqaaniaalluni nalliuttorsiornissaq qujamasunnermik ersersitsinissamut periarfissaavoq

1. Eqqaaniaalluni nalliuttorsiornissap nalaa sumut periarfissaalluarpa?

¹ Apriilip 14-ianni eqqaaniaalluni nalliuttorsiornissaq Jehovap ajunngissusianik qujamasunnermik ineriartortitsinissatsinnut ersersitsinissatsinnullu periarfissaalluarpoq. Lukasi 17:11-18-imi oqaluttuami ersersinneqarpoq Jehovap Jiisusillu qujamasunneq qanoq isigigaat. Ajoraluartumilli pupissuni ajorunnaarsinneqartuni quliusuni ataasiinnaq qujaniarluni uterpoq. Utertitsissutitut tunissut iluaqutigalugu siunissami nappaatit tamarmik atuukkunnaarsinneqassapput naassaanngitsumillu inuunissaq piviusunngortinneqassalluni. Qularutissaanngilaq taamanikkussamut pilluaqqussutissat taakku pillugit ullut tamaasa Jehova qutsavigisarumaaripput. Sapaatilli akunnerini tulliuttuni qujamasunnerput qanoq ersersissinnaavarput?

2. Pilliutitut utertitsissut pillugu qujamasunnerput qanoq ineriartortissinnaavarput?

² Qujamasunneq ineriartortiguk. Qujamasunneq eqqarsaatikkut pilersarpoq. Eqqaaniaalluni nalliuttorsiornissamut tunngatillugu utertitsissummut qujamasunnerput ineriartortinniarlugu Biibilimi immikkut atuagassatut pilersaarutit qaammatisiutini aamma ullut tamaasa allakkat misissortakkit-mi takuneqarsinnaapput. Pilersaarusiaq taanna najoqqutaralugu ilaqutariittut atuartarsinnaavisi? Atuartarnitsigut pilliutitut utertitsissummut pingaartitsinerput ineriartortittuassavarput. Taamaaliornerpullu pissusilersornitsinnut iluaqutaassaaq. — 2 Kor 5:14, 15; 1 Joh 4:11.

3. Eqqaaniaalluni nalliuttorsiornissap nalaani qujamasunnerput qanoq takutissinnaavarput?

³ Qujamasunnerit ersersiguk. Qujamasunneq iliuuseqarnikkut ersertarpoq. (Kol 3:15) Assersuutigalugu pupissup ajorunnaarsinneqartup Jiisusi qutsavigiumallugu ilungersorluni ujarpaa. Qularnanngitsumik tupinnartuliornikkut ajorunnaarsinneqarnini qiimmatsassimalluni allanut oqaluttuarisimassavaa. (Luk 6:45) Eqqaaniaalluni nalliuttorsiornissamut qaaqqusinermut immikkut ittumik suliniuteqarnermut ilungersorluta pilliutitut utertitsissut pillugu suleqataanissatsinnut qujamasunnitta killippaatigut? Eqqaaniaalluni nalliuttorsiornissap nalaani ikiorti-pioneriunikkut oqaluussinitsinniluunniit annertusisitsinitsigut qujamasunnitsinnik ersersitsissalluta periarfissaqarpugut. Unnummi eqqaaniaalluni nalliuttorsiornermi qujamasungaarnitsigut qaaqqusat tikilluaqqunissaannut taakkualu apeqqutaasa akinissaannut piareersimassaagut.

4. Eqqaaniaalluni nalliuttorsiornissaq qanoq immikkut ittunngortissinnaavarput?

⁴ Ukioq manna eqqaaniaalluni nalliuttorsiornissaq kingulliussava? (1 Kor 11:26) Naluarput. Nalunngilarpulli eqqaaniaalluni nalliuttorsiorneq qaangiuppat qujamasunnermik ersersitsinissatsinnut periarfissaq immikkut ittoq aamma qaangiutissasoq. Periarfissaq taanna atorluarusuppiuk? Qanortoq tamatta qanitsinnit uummatittalu eqqarsaataannik Jehova, utertitsissummik pilersitsisoq, nuannaartitsigu! — Tuss 19:15.