Ukiuni hundredini Naalagaaffiup oqaluussissutigineqarnera!
1. Jehovap innuttai ukiut hundredingajaat matuma siornatigut qanoq kajumissaarneqarpat?
1 “Ata, kunngi naalakkersuivoq! Ilissi oqariartortigaasi. Taamaattumik kunngi taassumalu naalagaaffia oqaluussissutigisigik, oqaluussissutigisigik, oqaluussissutigisigik!” Ukiut hundredingajaat qaangiupput oqaatsit killitsinnartut taakku qatanngut Rutherfordimit oqaatigineqartut Jehovap innuttaasa Naalagaaffimmik tusarliussamik siaruarterinissamut kajumississutigimmatigit. Ullumikkuttaaq suli taamaaliorpugut. Kristumiut siulliit assigalugit Naalagaaffimmik nutaarsiassaq nuannersoq ‘qilaap ataani pinngortitanut tamanut oqaluussissutigaarput’. (Kol 1:23) Ukiut hundredit kingumut qiviarutta Guutip naalagaaffia oqaluussissutiginiarlugu periutsit suut atortarsimavavut? Naalagaaffiup pilersinneqarneraniit ukiut hundredinngulernera ilutigalugu Guutip naalagaaffia qanoq oqaluussissutigiuaannarsinnaavarput?
2. Guutip naalagaaffia qanoq ilisimaneqalersinniarneqarsimava?
2 Kingumut qiviarneq: Ukiuni qulikkuutaani Guutip naalagaaffia Biibililersaarutitsinni ilisimaneqalersinniarneqartuarsimavoq. Atuagassiaq Jehovap nalunaajaasuisa saqqummersittagaannit pingaarneq 1939-miilli ima qulequtserneqarpoq: Napasuliaq Alapernaarsuiffik — Jehovap naalagaaffianik tusarliussisoq. Atuagassiami tassani Guutip naalagaaffia taassumalu qanoq naammassisaqarumaarnera allaaserineqakulasarpoq. Aamma atuagassiami Vågn op!-imi Guutip naalagaaffia inuiannut neriuutissatuatut ersersinniarneqartarpoq. Taamaattumik qiimmattaatissaavoq atuagassiat taakku marluk ullumikkut silarsuarmi nutserneqarnerpaajullutillu naqiterneqarnerpaajummata! — Saqq 14:6.
3. Qangaanerusoq periutsit suut atorlugit Naalagaaffik oqaluussissutigineqartarpa?
3 Jehovap innuttaasa Naalagaaffik pillugu oqaluussissutiginninnerminni periutsit assigiinngitsut atortarsimavaat. Qangaanerusoq biilit højtaleritallit, radio oqaluttartullu angallattakkat atortarsimavaat. Naalagaaffimmik tusarliussisut taamani ikittunnguummata sapinngisamik amerlasuunut nutaarsiassaq anngunniarlugu periuseq tamanna iluaqutigisimaqaat. (Tuss 19:5) Ukiuni kingullerni nittartagarput jw.org aqqutigalugu paasissutissiisarpugut taamaalilluta inunnut millionilinnut, aamma nunani suliatsinnik inerteqqutaaffiusuni, Naalagaaffik tusarliuttarlutigu.
4. Qanoq immikkut ittunik suleriaaseqalersimavugut?
4 Jehovap innuttaasa immikkuullarissumik iliuuseqarlutik Naalagaaffimmik tusarliussaq aamma oqaluussissutigisarpaat. Assersuutigalugu illumiit illumut oqaluussisarnitta saniatigut 1990-ikkut qiteqqunneranni inuit naapittarfiini, biilit uninngaartarfiini suliffeqarfinnilu nalunaajaasalerpugut. Illoqarfissuarni inuppassuit aqqusaartagaanni ungasinngitsumi immikkut ittumik tamanut oqaluusseriaatsimik aaqqissuussivugut. Taamatuttaaq ilagiit amerlasuut namminneq illoqarfimminni inunnit angallaffiunerpaami atuagassianut ilitsiviit kaassuartakkat nerriviillu atorlugit nalunaajaasarput. Soorunami Naalagaaffimmik oqaluussissutiginninnitsinni illumiit illumut angalaartarnerput pingaarnerpaatittuaannassavarput. — ApS 20:20.
5. Ukiumi kiffartorfiusumi nutaami amerlasuut qanoq periarfissaqalerpat?
5 Siumut isigineq: Septembarimi ukioq kiffartorfiusoq nutaaq aallartippat amerlasuut pionerisut aallartittussaapput. Illimmi? Periarfissaqanngikkuit ilaanneeriarlutit ikiorti-pioneriusarsinnaavit? Tamanna ajornarpat Naalagaaffimmik sapinngisannik oqaluusseqataaninnik Jehovap pilluaqqujumaarpaatit. — Mal 3:10.
6. Sooq 2014-imi oktobarip qaammataa immikkuullarissuussava?
6 Oktobarip qaammataani 2014-imi Naalagaaffiup pilersinneqarneraniit ukiut hundredinngussapput. Tamatumunnga tulluartillugu qaammammi tamatumani atuagassiami Vagttårnet-imi (Napasuliaq Alapernaarsuiffik-mi novembari-decembari-mi) Guutip naalagaaffia pingaarnerutillugu allaaserineqassaaq. Sapinngisamik amerlasuunut atuagassiamik tamatuminnga agguaasseqataagit. Qanortoq siunissamut isumalluarluta tusarusuttunut tamanut “Guutip naalagaaffianik” tusarliussaq nuannersoq oqaluussissutigiuartigu! — ApS 8:12.