Apeqquteqarfik

◼ Oqaluussisartut internetikkut inuit nunami allami najugallit nalusatik oqaluussiffigisinnaavaat atuaqqissaaqatigalugilluunniit?

Oqaluussisartut ilaat inunnik nunani oqaluussinitsinnik killilersuiffiusuni oqaluussisartoqarpallaanngitsuniluunniit najugalinnik internetikkut Biibilimik atuaqqissaaqateqartarput. Ilaannikkut tamanna angusaqarfiulluartarpoq. Oqaluussisartulli mailikkut allaqatigiittarfitsigulluunniit (chatikkut) inunnik nalusaminnik allaqateqarnerat navianaateqarsinnaavoq. (Takuuk Rigets Tjeneste juuli 2007-imoortoq, qupp. 3) Inuit eqqortuliorusuttut Naalagaaffimmik tusarliussamik oqaluussiffiginissaat siunertaagaluartoq taamatut allaqateqarneq qatanngutip inunnik ajortumik sunniisartunut, ilaatigut tunussisimasunut, attaveqalerneranik kinguneqarsinnaavoq. (1 Kor 1:19-25; Kol 2:8) Tamatuma saniatigut nunami oqaluussinermik killilersuiffimmi inerteqquteqarfiusumiluunniit attaveqaqatigiinneq oqartussaasunit nakkutigineqarsinnaammat qatanngutivut navianartorsiulersissinnaavavut. Taamaattumik oqaluussisartut inuit nunani allani najugallit nutaarsiassamik nuannersumik oqaluussiffigiumallugit internetikkut attaveqarfigisassanngilaat.

Immikkoortortaqarfimmit ilitsersuussutinik tunineqarsimanngikkutta nunami allami najugalik tikeraartoq torrutiinnarlugu oqaluussiffigisarput angerlarnerata kingorna attaveqarfigissanngilarput. Aallannginneranili takutissinnaavarput qanoq jw.org-imi paasissutissanik aallertoqarsinnaallunilu immikkoortortaqarfimmut attaveqartoqarsinnaasoq. Aamma najugaata ungasinngisaani naalagaaffilersaarfimmukarnissaanik kajumissaarsinnaavarput. Soorunami nunat ilaanni naalagaaffilersaarfeqanngilaq. Nalunaajaasunit pulaarneqarusuppat jw.org-ikkut attavigineqarnissamut nunaminiluunniit Biibilimik atuaqqissaaqatigineqarnissamut immersuinerani ikiorsinnaavarput. Soqutiginnittup nunami najugaqarfiani pissutsit qanorpiaq ittuunersut qanorlu anersaakkut ikiuilluartoqarsinnaasoq immikkoortortaqarfiup nunami sulinermik nakkutilliisup ilisimalluarneruaa.

Pulaartagarput nunamut allamut nuuppat nunamiluunniit allami najugalimmik, internetikkut ilisarisimalersimasatsinnik, atuaqqissaaqateqartarutta qulaani malittarisassat maleruartariaqarpavut. Soqutiginninnerali ineriartortinniarlugu oqaluussisartumit pulaarneqarnissaata tungaanut attavigisinnaavarput. Biibilimulli tunngasumik allakkatigut, oqarasuaatikkut atortorissaarutilluunniit elektroniskiusut atorlugit inummik nunami oqaluussinermik killilersuiffiusumi inerteqquteqarfiusumiluunniit najugalimmik eqqartueqateqarnermi mianersoqqissaartoqartariaqarpoq. – Matt 10:16.