Ataatsimiinnerni qiimmas­saqatigiinneq

1. Sooq ataatsimiinnerni akisarpugut?

SOOQ ilagiinni ataatsimiit­tarpugut? Pingaarnertut Jehova guutisiorfiginiarlugu. (Tuss 26:12; 111:1) Aamma ulluni makkunani ajornar­torsiorfiusuni qiimmas­saqatigiin­niarluta ataatsimiigiar­tarpugut. (Tes 1. 5:11) Nappaanikkut akissuteqar­nikkullu taamaalior­tarpugut.

2. Ataatsimiin­nitsinni akissuteqar­nissamut suut periarfis­saappat?

² Sapaatit-akunneri tamaasa ilagiit ataatsimiinnerini oqaaseqar­tarnissamut periarfis­saqartarpugut. Assersuutigalugu weekendini ataatsimiinnerni Napasuliaq Alapernaarsuiffik-mik atuaqqis­saaqatigiinnermi akissuteqar­tarsinnaavugut. Ulluinnarni ataatsimiinnerni anersaakkut erlinnartuni, ilagiit Biibilimik misissueqatigiin­neranni akissuteqarfiusin­naasunilu allani akissuteqar­tarsinnaavugut.

3. Suut akunnat­toorfigisarsin­naavagut, qanorlu Hebræerit 10:24, 25-lu iluaqutigisin­naavagut?

³ Tamatta Jehova guutisiorfigerusullugulu uppeqatigut qiimmas­sarusuppagut. Akissuteqar­niaraangatta immaqa nangaasin­naavugut annilaangasaratta imaluunniit nappaasaraluarluta tiguneqar­tannginnatta. Taama misigisarutta susinnaavugut? Apustilip Paulusip hebræerinut allagaani tamanna akissutis­sarsisin­naavarput. Ataatsimeeqatigiit­tarnerup pingaaruteqarnerata eqqartornerani allappoq ‘qiimmas­saqatigiittarneq’ pingaar­tissagipput. (Hebræerit 10:24, 25 atuakkit). Nappaanissat annilaangas­sutigisarukku eqqarsaatigisinnaavat akissut naakkaluartoq allat qiimmas­saatigisin­naagaat. Nappaasaraluarluta tiguneqakulan­ngikkutta nuannaarutigiin­narsinnaavarput allat akissuteqar­nissamut periarfis­saqartarnerat. – Pet 1. 3:8.

4. Allaaserisami matumani suut pingasut sammissavagut?

⁴ Allaaserisami matumani siullertut sammissavarput ilagiinni amerlaf­fiunngitsuni, tassa akisinnaasut ikikkaangata, qanoq qiimmas­saqatigiis­sinnaasugut. Taava sammissavarput ilagiinni amerlaf­fiusuni, tassa akisinnaasut amerlagaangata, qanoq qiimmas­saqatigiis­sinnaasugut. Kiisalu sammissavarput akissutigut qanoq allanut ilumut qiimmas­saataasin­naanersut.

ILAGIINNI IKIFFIUSUNI

5. Najuuttut ikikkaangata qanoq kajumis­saaqatigiis­sinnaavugut?

⁵ Ilagiinni ikiffiusuni atuaqqis­saaqatigiinnermi aqutsisoq akerusuttunik qinigas­sakittarsinnaavoq. Ilaannikkullu immaqa nappaasoqarnissaa aqutsisup utaqqisariaqartarpaa. Tamanna najuuttunut qiimmaal­laataanavianngilaq. Susinnaavit? Nappaarusus­suseqar­nerusinnaavit? Taamaakkuit allat akinissaannut kajumis­sisissavatit.

6-7. Akissuteqar­niaraangatta qanoq annilaangan­nginnerulersin­naavugut?

⁶ Nappaanissammi annilaangagisarukku? Taamaakkuit kisimiin­ngilatit. Uppeqatinnut qiimmas­saataanerujumallutit annilaangasarnerit sulissutigisinnaavat. Qanoq taamaaliorsinnaavit?

⁷ Siunnersuutit Napasuliaq Alapernaarsuiffik-miittut iluaqutigisin­naassavatit.b Ilaatigut siunnersuutigineqarpoq piareersarluar­tarnissaq. (Uss 21:5) Sammineqartussat paasilluarukkit nappaarusus­suseqar­nerussaatit. Aamma siunnersuutigineqarpoq naatsumik akisinnaanissannut piareersarsin­naasutit. (Uss 15:23; 17:27) Naatsumik akissuteqar­niaruit annilaangan­nginnerussaatit. Immaqalu uppeqatinnut akissutit paasinar­nerussalluni. Aamma akissutiginiakkatit atuaannarnagit nammineq oqaaseqatigiilioruit piareersarluarsimal­lutillu paasilluarsimagitit ersersissavat.

8. Sapinngisannik iliuuseqar­tarnerit Jehovap qanoq isumaqarfigaa?

⁸ Siunnersuutimmi ilaat misilereerlugu suli akinissat annilaangagisarukku? Qularutigis­sanngilat sapinngisannik iliuuseqar­tarnerit Jehovap pingaartikkaa. (Luk 21:1-4) Jehovap artorsik­kusunngilaatit. (Flp 4:5) Aalajangerit sapinngisannik iliuuseqar­tarniarlutit. Anguniagaqartarit eqqissisimasarsin­naaqqul­lutillu Jehova qinnuigisarlugu. Aallaqqaammut naatsumik akinissat anguniagarisinnaavat.

ILAGIINNI AMERLAF­FIUSUNI

9. Ilagiinni amerlaf­fiusuni suna ajornar­torsiutaasinnaava?

⁹ Ilagiinni amerlaf­fiusuniikkuit immaqa ajornar­torsiutit allarluinnaavoq. Immaqa nappaasartut amerlangaarmata tiguneqan­ngitsuukulavutit. Assersuutigalugu Dorthep ataatsimiinnerni akisarnini nuannarisorujussuuaa.c Akisarnini guutisiornertut, allanut qiimmas­saataanertut ilumoor­tunillu Biibilimeersunik imminut eqqaasitsissutit isigisarpai. Ilagiinnulli amerlaf­fiunerusunut nuukkami nappaagaangami tiguneqar­tarnera akuttutsippoq, ilaannikkullu tiguneqan­ngivittarluni. Ima oqarpoq: “Nikallor­taqaanga. Misigivunga pisinnaatitaaffiga annaallugu. Ilaannikkullu misigisarpunga nappaanera piaaralutik takunngitsuusaartaraat.”

10. Akinissatsinnut qanoq periarfis­sarinnerulersin­naavugut?

¹⁰ Dorthetut misigivit? Taamaappat nappaasarnerit unitsik­kusunnagu qanoq iliorsinnaavit? Ataatsimiinnernut tamanut immikkoortut arlallit akinissaannut piareersarsin­naavatit. Nappaaninni siullermi tiguneqan­ngikkuit piareersakkavit tulliinut suli periarfis­saqassaatit. Napasuliaq Alapernaarsuiffik-mik atuaqqis­saarnissamut piareersaraangavit allaaserisap tamarmiusup imminut ataqatigiinnera eqqarsaatigisaruk. Taamaaliortaruit iluaqutaasumik akissuteqarsin­naassaatit. Aamma immikkoortut ilaanni Biibilimeersut itinerusut nassuiaruminaatsut nassuiarluarsin­naajumallugit piareersarluartakkit. (Kor 1. 2:10) Sooq? Taamaattut sammineqaraangata akerusuttut ikinnerusarmata. Siunnersuutimmi tamakku maleruar­taraluarlugit suli tiguneqar­tanngikkuit? Ataatsimiinneq sioqqullugu atuaqqis­saaqatigiinnermi aqutsisartoq oqarfigisinnaavat immikkoortumut aalajangersimasumut akerusullutit.

11. Filippimiut 2:4-mi qanoq kajumis­saarneqarpugut?

¹¹ Filippimiut 2:4 atuaruk. Apustilip Paulusip isumassarsisitaalluni kristumiut kajumis­saarpai allat iluaqutissaat eqqumaf­figisas­sagigut. Ataatsimiinnerni qanoq taamaaliorsin­naavugut? Eqqaamas­savarput allat uagutsitulli aamma akerusut­tarmata.

12. Ataatsimiinnerni qanoq qiimmas­saqatigiis­sinnaavugut? (Aamma asseq takuuk).

¹² Assersuutigeriartigu ikinngutitit oqaloqatigerujoor­tillugit oqalungaaravit immaqa taakku oqaaseqarpian­ngitsoor­tippatit. Oqaaseqar­tikkusut­tarpagut, ilaa? Taamatulli ataatsimiinnerni amerlanerpaat akinissaannut periarfis­sikkusuppagut. Uppeqatigut uppernerminnik ersersitsinis­saannut periarfis­sikkutsigit taakkununnga qiimmas­saataanerpaassaaq. (Kor 1. 10:24) Qanoq taamaaliorsin­naanersugut sammeriartigu.

13. Najuuttut allat akinissaannut qanoq periarfis­sissinnaavigit?

¹³ Siullertut, allat periarfis­sikkumallugit akissutigut naatsuutis­sinnaavagut. Utoqqaanertat oqaluus­sisartullu misilit­tagaqarluartut maligas­siuisin­naapput. Aappaattut, naatsumil­luunniit akissuteqaraluaruit eqqartukkatit amerlaval­laartin­naveersaakkit. Immikkoortumi sammineqartut tamaasa akissuteqarfigigukkit allat periarfis­sakitsis­savatit. Assersuutigalugu immikkoortumi matumani marlunnik siunnersuuteqarpoq. Siulliullutit tiguneqaruit sammineqartup aappaannaa akissuteqarfigalugu akissutit naatsuutiguk.

14. Nappaakulanermut tunngatillugu suna eqqarsaatigis­savarput? (Aamma asseq takuuk).

¹⁴ Nappaakulanermut tunngatillugu suna eqqarsaatigis­savarput? Nappaakulaval­laartarutta aqutsisoq misigitis­sinnaavarput tigusariaqaraatigut, immaqa allat akinissaannut suli periarfis­sinneqan­ngitsut. Taamaat­toqartillugu allat nappaanis­saminnut nangaalersin­naapput. – Oqal 3:7.

15. (a) Tiguneqan­ngikkaangatta qanoq qisuariar­tassanngilagut? (b) Aqutsisup najuuttut tamaasa qanoq eqqumaf­figisinnaavai? (Takuuk ungalusaq “Aqutsisunut”).

¹⁵ Nappaasut amerlagaangata immaqa akerusun­nerugaluarluta tiguneqan­ngitsoor­tarpugut. Ilaannikkullu tiguneqan­ngitsuuit­tarluta. Taamaat­toqaraangat ajuallatsis­sutiginaveersaarlugulu nikallus­sutigisaqinagu. – Oqal 7:9.

16. Akisut qanoq qiimmas­sarsinnaavagut?

¹⁶ Akikulasar­nerorusuk­kaluarlutit tiguneqakulan­ngikkuit allat akissutaat tusarnaaq­qissaarsin­naavatit ataatsimiin­nerullu kingorna akissutaat pillugu nersualaarlugit. Akinngik­kaluarlutit nersualaarin­ninnerit qiimmas­saataangaassaaq. – Uss 10:21.

ALLATUT QIIMMAS­SAQATIGIINNEQ

17. (a) Angajoqqaat meeqqami ukiuinut naleqquttumik akinissaannik qanoq piareersaqatigisin­naavaat? (b) Video naapertorlugu suut sisamat piareersarnermi iluaqutaasin­naappat? (Takuuk quppernerup ataani ilanngussaq).

¹⁷ Ataatsimiinnerni allatut qanoq qiimmas­saqatigiis­sinnaavugut? Angajoq­qaajuguit meeqqavit ukiuinut naleqquttumik akinissaannut piareersaqatigisin­naavatit. (Mat 21:16) Ilaannikkut meeqqanut naleqqutin­ngitsut, soorlu aappariinnermi ajornar­torsiutit atoqatigiin­nikkullu eqqunngitsuliorneq, ataatsimiinnermi sammineqaraluartut immaqa immikkoortoq ataaseq marlulluunniit meeqqap akissuteqarfigisinnaavai. Aamma meeqqatit paasitikkit nappaagaangamik immaqa ilaannik­kuinnaq tiguneqar­tarsinnaasut. Taamatut nassuiaan­neqarnertik tiguneqan­ngikkaangamik pakatsin­nginnis­saminnut iluaqutigissavaat. – Tim 1. 6:18.d

18. Akigaangatta qanoq imminut malugeq­qusaarnaveersaarsin­naavugut? (Ussatit 27:2)

¹⁸ Tamatta Jehovamut ataqqinaataasumik uppeqatitsinnullu qiimmas­saataasumik akissuteqar­nissamut piareersarsin­naavugut. (Uss 25:11) Ilaannikkut nammineq misigisatsinnik naatsumik oqaaseqar­taraluarluta imminut pilluta oqaaseqarpal­laarnaveersaar­tariaqarpugut. (Ussatit 27:2 atuaruk; Kor 2. 10:18) Jehova, innuttai ataatsimut isigalugit Biibililu pingaar­nerutis­savagut. (Saqq 4:11) Immikkoortup apeqqutaani nammineq misigisatsinnik oqaluttuaq­quneqarutta soorunami taamaaliorsin­naavugut. Immikkoortup tulliani assersuuteqarpoq.

19. (a) Najuuttut tamaasa eqqarsaatigisarutsigit qanoq kinguneqassava? (Romamiut 1:11, 12) (b) Akissuteqarnermut tunngatillugu suna nuannaraajuk?

¹⁹ Akinissamut aalajangersimasunik najoqqutas­saqanngilaq, akissutittali tamatigut qiimmas­saataanissaa pingaaruteqarpoq. Taamaattumik akissuteqakulasarusuppugut. Aamma akinissamut periarfis­saqartarnerput nuannaarutigaarput allallu uagutsitulli akerusut­tarnerat pingaar­tillugu. Ataatsimiinnerni allat soqutigisaat pingaar­tinnerugutsigit ‘tamatta qiimmas­saqatigiissaagut’. – Romamiut 1:11, 12 atuakkit.