Tunisinerup pilluarnartua misigiuk

1-2. Tunisinerup tigusinermit nuannaarutiginerunissaanut pinngor­titaanerput qanoq iluaqutigisarparput?

JEHOVAP pinngor­tikkamisigut immikkut ittumik piginnaas­suseqar­tippaatigut: Tunisineq tigusinermit pilluar­nerulis­sutigisarparput. (ApS 20:35) Imaappa tunisik­kaangatta nuannaarutigineq ajoripput? Naamik. Tamatta tunisik­kaangatta nuannaar­tarpugut. Uagulli tunnius­saqaraangatta nuannaar­neruler­tarpugut. Taama pinngor­titaagatta pitsaal­luinnarpoq. Sooq?

² Jehovap taama pinngor­tikkamisigut nammineq pilluar­nissatsinnut sunniinissamut periarfis­sippaatigut. Tassa allanut tunisinissamut asannit­tuliornis­samullu periarfis­sarsiorutta nuannaar­nerulersin­naavugut. Taama pinngor­titaagatta tupinnangaarpoq, ilaa? – Tuss 139:14.

3. Sooq Jehova ‘Guutitut pilluartutut’ allaatigineqarpa?

³ Biibilimi paasitin­neqaratta tunisineq pilluar­narnerusoq tupinnanngilaq Jehova ‘Guutitut pilluartutut’ allaatigineqarmat. (Tim 1. 1:11) Jehova tunisisut siullersaraat, aamma allanut naleqqiullugu Jehova tunisinerpaajuvoq. “Taannami pissutigalugu inuullutalu aalallutalu maaniippugut”. (ApS 17:28) Ilumut, “tunissutit ajunngitsut naammal­luinnartullu tamarmik” Jehovameersuupput. – Jaak 1:17.

4. Sugutta pilluar­nerulissaagut?

⁴ Ilimanarpoq tamatta tunisinerup pilluarnartua suli misiginerorusut­taripput. Jehovallu tunisiumatunera ilaarutsigu tamanna piviusun­ngorsinnaavoq. (Ef 5:1) Allaaserisami matumani sammissavagut Jehovap maligas­saalluarnera aamma qanoq iliorsin­naanersugut misigigutta allat iliuutsigut qujamasuutigineq ajoraat. Tamanna tunisiuar­nissamut kajumis­sissutigis­savarput, taamaalillutalu pilluar­nerulissaagut.

JEHOVA ILAARLUGU TUNISIUMATUGIT

5. Jehovap ilaatigut sunik tunisarpaatigut?

⁵ Jehovap qanoq takutittarpaa tunisiumatulluni? Assersuutit arlaqan­ngitsut sammeriartigit. Jehovap pisariaqar­titatsinnik tunisarpaatigut. Immaqa piisaan­ngilagut, Jehovali ikiortigalugu amerlanersagut pisariaqar­titaminnik peqarput. Assersuutigalugu Jehovap nerisas­satsinnik atisassatsinnillu isumagisarpaatigut najugas­saqartit­tarlutalu. (Tuss 4:9; Mat 6:31-33; Tim 1. 6:6-8) Jehovap timikkut pisariaqar­titatsinnik ikiussalluta pisussaasutut misiginini pissutigiin­narlugu ikiortarpaatigut? Naamik. Taavami sumik pissuteqarpa?

6. Matiusi 6:25, 26 qanoq ilinniarfigaagit?

⁶ Jehovap asagamisigut pisariaqar­titatsinnik tunisarpaatigut. Jiisusip oqaasii Matiusi 6:25, 26-milu allassimasut eqqarsaatigeriakkit. (Atuakkit). Jiisusip pinngor­titamiittut assersuutigai. Timmissat pillugit ima oqarpoq: “Naajartor­tussanik siaruar­terineq ajorlutillu peqqumaasivinnut ilisassaminnik katersuineq ajorput.” Maluginiarulli nangilluni qanoq oqartoq: “Ataatassi qilammiusup nerisas­saqartittarpai.” Taava Jiisusi ima aperivoq: “Taakkunannga naleqar­nerunngin­nerpisi?” Suna paasissagipput kissaatigaa? Jehovap kiffani uumasunit pinngor­titaminit naleqar­nerusutut isigai. Jehovap uumasut pisariaqar­titaannik isumagisarunigit uaguttaaq isumagiumaaraatigut qularis­sanngilarput! Ataatatut ilaquttaminik isumassuisutut Jehovap asanninneq aallaavigalugu ilaquttani isumagisarpai. – Tuss 145:16; Mat 6:32.

7. Jehovap tukkornera sutigut ilaarsin­naavarput? (Aamma asseq takuuk).

⁷ Jehova ilaarlugu uaguttaaq asanninneq kajumis­sissutigalugu tunisisin­naavugut. Assersuutigalugu uppeqatinnik nerisassanik atisanil­luunniit pisariaqar­titsisumik nalunngisaqarpit? Jehovap illit uppeqatinnik ikiuitis­sinnaavaatit. Jehovap kiffaasa ajunaar­nersuaqaraangat ikiuukkumasarnertik ilisimaneqaatigaat. Assersuutigalugu COVID-19-imik nappaalanersuaqarmat qatanngutit allanik pisariaqar­titsisunik avitseqateqarput, soorlu nerisassanik, atisanik allanil­luunniit pisariaqar­tinneqartunik. Amerlasoorpassuillu nunarsuaq tamakkerlugu suliniuteqarnermut tukkorlutik tunissuteqarsimapput. Tamannalu pissutigalugu qatanngutit ajunaar­nersuaqarfin­niittut ikiorneqarsimapput. Qatanngutit tukkortut Hebræerit 13:16-mi allassimasut maleruarpaat. Ima allassimavoq: “Ajunngitsulior­tarnissarsi avitseqateqar­tarnissarsilu puioqinasiuk, Guutimmi pilliutit taamaattut iluaril­luinnarmagit.”

8. Sutigut Jehovap pissaanera iluaqutigisarparput? (Filippimiut 2:13)

⁸ Jehova pissatsitsisarpoq. Jehovap killeqan­ngitsumik pissaaneqartup kiffani aalajaatsut nakussatsik­kusuppai. (Filippimiut 2:13 atuaruk). Ussernartup akiornissaanut nakussatseq­qullutit sakkortuumil­luunniit misilin­neqarninni aalajaas­sinnaaq­qullutit qinunikuuit? Aamma immaqa ullormut nukissaqaq­qullutit qinunikuuvutit. Qinnutit akineqaraangat apustili Paulusi isumaqatigisarunarpat, taannami ima allappoq: “Guutip pissatsit­tarmanga suulluunniit nukissaqarfigaakka.” – Flp 4:13.

9. Jehovap pissaanerminik atuisarnera qanoq ilaarsin­naavarput? (Aamma asseq takuuk).

⁹ Naammal­luinnan­ngitsuugaluarluta Jehovap tukkorluni pissaanermik atuisarnera ilaarsin­naavarput. Allat nukissaannik tunisin­naanngik­kaluarlugit nukigut atorlugit ikiorsin­naavagut. Assersuutigalugu qatanngutigut utoqqalisut napparsimasul­luunniit angerlarsimaffianni ikiorsin­naavagut pisiniul­lugilluunniit. Periarfis­saqarutta ataatsimiit­tarfitsinni eqqiaaqataal­lutaluunniit aserfal­latsaaliueqataasin­naavugut. Taamaaliornikkut nukigut atorlugit qatanngutitsinnut ajunngitsuliungaarsin­naavugut.

10. Oqaatsitsigut allat qanoq nakussatsis­sinnaavagut?

¹⁰ Aamma eqqaamajuk oqaatsitigut allat qiimmas­sarsinnaagakkit. Kia iliuutsini pillugit ilinnit qiimmas­sarneqarnini qiimmas­saatigisinnaavaa? Tuppallersar­neqarnissamik pisariaqar­titsisumik nalunngisaqarpit? Taamaappat iliuuseqarlutit eqqarsaatigisat attavigiuk. Pulaarsinnaavat, sianerfigisinnaavat imaluunniit allagan­nguamik e-mailikkul­luunniit allaffigisinnaavat sms-erfigaluguluunniit. Qanoq oqassanerlutit ernumas­sutigis­sanngilat. Qamannga pisumik oqaasimininnguit uppeqativit aalajaan­nissaminut isumalluar­nissaminullu piffissami tamatumanerpiaq pisariaqar­tissinnaavai. – Uss 12:25; Ef 4:29.

11. Jehovap ilisimas­sutsini qanoq atortarpaa?

¹¹ Jehova ilisimas­suseqalersitsisarpoq. Jaaku ima allappoq: “Arlarsi ilisimas­sutsimigut inorsartoq Guutimut, kukkunersiuinani tamanut tukkorluni tunissuteqar­tartumut, qinujuaruni ilisimas­sutsimik tunineqassaaq.” (Jaak 1:5; q.a.i.) Oqaatsinit taakkunannga erserpoq Jehovap ilisimas­sutsini tukkorluni ingerlateq­qittaraa. Maluginiaruk Jehova ilisimas­suseqalersitsigaangami “isornar­torsiuinani,” imaluunniit “kukkunersiuinani”, taamaaliortartoq. Taassuminnga siulersor­neqarnis­satsinnik pisariaqar­titsilluta qinnuigigaangatsigu ajukkutilersinneq ajorpaatigut. Kissaatigaami ilisimassuseq qinnutigisas­sagipput. – Uss 2:1-6.

12. Ilisimasatsinnik ingerlatitseq­qiinissatsinnut qanoq periarfis­saqarpugut?

¹² Uagummi? Jehova ilaarlugu ilisimasatsinnik avitseqateqarsin­naavugut? (Tuss 32:8) Jehovap kiffai ilikkakkamik ingerlateq­qinnissaannut periarfis­sarpassuaqarput. Assersuutigalugu nutaat oqaluus­sinermik ilinniar­tittarpagut. Utoqqaanertat naammagit­tarlutik ilagiinni kiffartortunik qatanngutinillu angutinik imermut morsutsin­neqarsimasunik allanik ilagiinni suliassaminnik qanoq suliarin­ninnissaannik ilinniar­titsisarput. Sanaartornermi aserfal­latsaaliuinermilu misilit­tagaqarluartut misilit­tagakitsunik ilinniar­titseqataasin­naapput illut guutisior­nitsinni atorneqartartut paarineqarluar­niassammata.

13. Jehovap ilisimas­sutsiminik ingerlatitseq­qiisarnera qanoq ilaarsin­naavarput?

¹³ Allanik ilinniar­titsinermi Jehovap ilaarniarnissaa pingaaruteqarpoq. Eqqaamajuk Jehovap tukkorluni ilisimas­sutsini ingerlateq­qittarmagu. Taamatuttaaq uagut ilikkakkagut ingerlateq­qikkusuppagut. Suliatsinnik arsaarneqar­nissarput annilaangagineq ajoratsigu allat ilinniar­tinnissaannut tunuarsimaarneq ajorpugut. Aamma ima eqqarsarneq ajorpugut: ‘Kialluunniit ilinniar­tinngilaanga! Nammineq ilinniarniarli.’ Taamatut isiginnit­taaseqarneq Jehovap kiffaanit pissuserineqar­tussaanngilaq. Ilisimasagut allanut ingerlateq­qikkusuppagut sapinngisatsinnillu ilinniar­tillugit. (Tes 1. 2:8) Kissaatigaarput ‘allanik ilinniar­titsinissamut piukkun­narsissasut’. (Tim 2. 2:1, 2) Tamatta ilisimasatsinnik allanut ingerlatitseq­qiigutta tamatta ilisimas­suseqar­nerulerlutalu pilluar­nerulissaagut.

ALLAT QUJAMASUP­PASINNGIK­KAANGATA

14. Inuit ajunngitsuliorfigigaangatsigit amerlanertigut susarpat?

¹⁴ Ingammik anersaakkut qatanngutitta ajunngitsuliornigut qujamasuutigisarpaat. Immaqa allagan­nguamik nassittarpaatigut allatigul­luunniit qujamasunnertik ersersin­niarlugu iliuuseqar­tarlutik. (Kol 3:15) Qujamasunnermik ersersitsivigineqaraangatta taakku pillugit iliuuseqarnerput nuannaarutigineruler­tarparput.

15. Ilaasa qujamasunnertik ersersin­ngikkaluaraat suna eqqaamas­savarput?

¹⁵ Ilaannikkulli iliuuserisagut ilaannit qujamasuutigineqarneq ajorput. Piffissatsinnik nukitsinnillu atuinerput aamma aningaasatigut ikiuinerput soqutigerpasinneq ajorpaat. Taamatut pisoqaraangat qanoq nuannaarneq attatiin­narlugu pakatsinaveersaarsin­naavugut? Allassimaffik najoqqutarisarput, Apustilit Suliaat 20:35, eqqaamajuk. Tunisinitta qanoq qujamasuutigineqarnera apeqqutaatinnagu tunisineq pilluar­nartuaannarpoq. Tunisinerput qujamasuutigineqarpasin­ngikkaluartoq nuannaarutigisin­naavarput. Qanoq ililluta?

16. Tunisigaangatta suna eqqaamas­savarput?

¹⁶ Eqqaamajuk tunisigaangavit Jehova ilaartarakku. Inuit qujamasuppata qujamasun­ngikkaluaraangataluunniit Jehova ajunngitsunik tunissuteqartarpoq. (Mat 5:43-48) Jehovap neriorsorpaatigut ‘taarsiisoqarnissaa naatsorsuutiginagu’ tunisigutta ‘akissarsiassarput angiumaartoq’. (Luk 6:35) ‘Naatsorsuutinut’ ilaasinnaavoq qujamasunnermik ersersitsineq. Qutsavigineqan­ngikkaluarut­taluunniit Jehovap allanik nuannaarluta ikiuiniarnerput pillugu akilerumaarpaatigut. – Uss 19:17; Kor 2. 9:7.

17. Allanut tunissuteqarnermi suna pingaar­nerpaava? (Lukkarsi 14:12-14)

¹⁷ Tunisinerup siunertaa eqqaamajuarutsigu najoqqutassiaq pingaarutilik Jiisusip eqqaasaa maleruarsin­naavarput. (Lukkarsi 14:12-14 atuakkit). Imaanngilaq uagutsinnik qaaqqusinissamut periarfis­saqartunik qaaqqusineq ajortuusoq. Paasigutsiguli pissarsiaqar­niaannarluta tunissuteqar­tarsimalluta akillutaluunniit qaaqquneqar­nissarput naatsorsuutigalugu neriartoq­qusisarsimalluta sussaagut? Taamaappat Jiisusip oqaasii maleruar­niassavagut. Akisillutik tunissuteqarsin­naanngitsunut inoroorsaarsin­naavugut. Taava pilluassaagut Jehova ilaaratsigu. Taama isiginnit­taaseqarnerput aamma allat qujamasunnertik ersersin­ngikkaluarpas­sulluunniit nuannaarnerup attatiin­narnissaanut iluaqutigis­savarput.

18. Uppeqatitta ajortumik isumalersun­nginnis­saannut suna iluaqutigisin­naavarput?

¹⁸ Allat pissutiginiagaannik apeqqusiinaveersaartarit. (Kor 1. 13:7) Allat qujamasunnertik ersersin­ngippassuk apeqqutit uku eqqarsaatigisin­naavagut: ‘Ilumut qujamasun­ngillat? Imaluunniit qujamasun­nerminnik ersersitsinissartik puiuinnarpaat?’ Immaqa naatsorsuutigisatsitut iliuuseqan­nginnerannut allanik pissutis­saqarpoq. Qamannga pisumik qujamasus­sinnaapput qanorli oqaatigis­sanerlugu ersersis­sanerluguluunniit nalullugu. Imaassinnaavoq ikiorneqarnertik ajuusaar­narigaat, ingammik namminneq allanik ikiuisarsimagunik. Sunaluunniit pissutaagaluarpat kristumiutut asanninneq killitsis­sutigalugu uppeqatigut ajortumik isumalersorneq ajorpagut tunisinerullu nuannersua nuannaarutigiuarlugu. – Ef 4:2.

19-20. Allanik ikiuinermi sooq naammagit­tarnissaq pingaaruteqarpa? (Aamma asseq takuuk).

¹⁹ Naammagit­tartuugit. Tunisiumatuneq pillugu kunngi Saalumuut ima allappoq: “Nerisas­saatitit imaanut eqqakkit, kingunersuarilerpagu naniumaarpatit.” (Oqal 11:1) Oqaatsit taakkua ersersippaat inuit ilaasa kingusin­nerujus­suakkut qujamasunnertik ersersittaraat. Qatanngutip arnap tamanna misigaa.

²⁰ Nakkutilliisup angalasartup nuliata ukiorpaaluit matuma siornagut qatanngut arnaq imermut morsutsin­neqarlaaq aalajaatsuunissaq pillugu allaffigisimavaa. Ukiut arfineq-pingasut missaat qaangiummata allagai qatanngutip arnap akivai. Ima allappoq: “Allaffigisariaqarpakkit ukiut ingerlanerini, illit allaat nalusannik, ikiorsimagamma. Allagannguit qamuuna killitsinnaqaaq, allassimaffilli ilanngus­simasat qamuuna attorneqaatigaara, puiunngisaan­narpara.”a Ukiut ingerlanerini imaannaan­ngitsorsior­tarnini pillugit allareerluni qatanngut arnaq ima nangippoq: “Ilaannikkut suna tamaat sussakkeerusut­tarpara, Jehovamut kiffartorun­naarusut­tarnikuuvunga, akisussaaf­feqarusunnanga, tassa tunniutiin­narusullunga. Kisianni allassimaffik ilanngussat uummatikkut killinneqaatigalugu qaqeqqit­tarpunga aalajaan­nissannut iluaqutigalugu. Ukiut arfineq-pingasut ingerlaneranni allanit tamanit allagan­nguarnit qiimmas­saatiginerusaqan­ngilanga.” Eqqarsaatigiuk nakkutilliisup angalasartup nulia qanoq nuannaar­tigisimassasoq taama ‘kingusitsigisukkut’ allagarsigami! Aamma imaassinnaavoq uagut iliuuserisimasatta qujamasuutigineqar­nerannik kingusin­nerusukkut paasitin­neqartugut.

21. Jehovap tunisiumatunera sooq ilaartuarusuppiuk?

²¹ Sammeriik­katsitut Jehovap immikkut piginnaasaqar­tilluta pinngor­tissimavaatigut. Soorunami tunisik­kaangatta nuannaar­tarpugut, allanulli tunissuteqaraangatta pilluar­neruler­tarpugut. Uppeqatigut ikiorsin­naagaangatsigit nuannaarutigisaqaarput. Nuannaarutigisarparputtaaq qujamasunnertik ersersik­kaangassuk. Qujamasuf­figineqan­ngikkaluarut­taluunniit nuannaarutigisin­naavarput eqqortumik iliuuseqarsimagatta. Puiunngisaannaruk qanorluunniit annertutigisunik tunissuteqaraluaruit Jehovap ‘anneroqisunik tunisin­naagaatit!’ (Nal 2. 25:9) Jehova sunit tamanit annermik tunisisuuvoq! Tunissut allanit tamanit pilluar­narnerpaaq tassaavoq Jehovamit akissarsisin­neqarneq. Ataatatta qilammiusup tunisiumatuup ilaartuarnissaa aalajangiusimajuarisigu.