Jiisusi oqaluus­sinermi aallussil­luartuusoq ilinniarfigiuk

1. Jehovap innuttai kristumiuunerartunit qanoq allaaneruppat?

JEHOVAP kiffaasa oqaluus­sinermi aallussil­luartuunertika kristumiuunerartunit allaanerus­sutigaat. (Tit 2:14) Ilaannikkulli immaqa oqaluus­sinissamut kajumis­suseqarpiarneq ajorputit. Immaqa utoqqaanertaasup akisussaaf­fimminik isumagin­nilluartartup ima oqartup misigissusii ilisaris­savatit: “Ilaannikkut oqaluus­serusunneq ajorpunga.”

2. Oqaluus­sinermi aallussil­luartuujuarnissaq sooq ilaannikkut sapernarsin­naasarpa?

² Imaassinnaavoq Jehovamut kiffartoriaatsit allat oqaluus­sinermit pissanganar­tinnerugigut. Sooq taama misigisin­naavugut? Immaqa suliatta kinguneri ingerlaannaq takusin­naasaratsigit misigisarlutalu angusaqarluta, soorlu ajunaar­nersuaqar­tillugu ikiuinermi, uppeqatitsinnik qiimmas­saaqataanermi aamma ataatsimiit­tarfitsinnik sanaartoqataanermi aserfal­latsaaliuinermilu. Uppeqatigut suleqatigigaangatsigit eqqisseqatigiinneq asaqatigiinnerlu misigisarpagut. Aamma nalunngilarput taakkununnga iliuuserisagut pingaar­tinneqartartut. Kisianni immaqa ukiorpassuarni ikittuinnarnik ajunngitsumik qisuariar­toqarfiusumi oqaluus­sisarsimavugut. Allaallu imaassinnaavoq inussiar­niiffigineqar­tartugut. Aamma nalunngilarput naggatissaq qanilliar­tortillugu akerlilersor­neqarnerulis­sasugut. (Mat 10:22) Oqaluus­sinermi aallussil­luartuujuar­nissamut allaallu oqaluus­sinermik nuannarin­ninneruler­nissamut suna iluaqutigis­savarput?

3. Jiisusip assersuusiaanit taanna pillugu qanoq ilikkagaqarpugut? (Lukkarsi 13:6-9)

³ Oqaluus­sinermi qanoq aallussil­luartuusin­naanerput pillugu Jiisusi ilinniarfigisin­naavarput. Jiisusi oqaluus­sinermini aallussil­luartuujuarpoq. Piffissallu ingerlanerani allaat oqaluus­sinerulerpoq. (Lukkarsi 13:6-9 atuakkit). Viinnequteqarfimmi sulisumut imminut assersuuppoq. Sulisup orpik fiiginequt ukiuni pingasuni naggoris­sarsimagaluarpaa, inerititaqan­ngilarli. Viinnequteqarfimmili sulisup neriuutigiuarpaa orpik taanna inerititaqalissasoq. Taanna assigalugu Jiisusi ukiut pingasut missaanni juutinut oqaluus­sisarsimavoq, taakkualu amerlanersaasa upperfigilin­ngilaat. Jiisusilli juutit imminiigin­narnagit oqaluus­siffigiuarpai. Aap, uummataannik killiiniarluni suli iliuuseqar­nerulerpoq.

4. Jiisusi sisamatigut qanoq ilinniarfigisin­naavarput?

⁴ Allaaserisami matumani Jiisusip ingammik kiffartornermi naalernerani qaammatini arfinilinni kingullerni aallussil­luartuunera sammissavarput. (Lukkarsi 10:1-imut studienote “Derefter” takuuk). Ilaarutsigu ilinniar­titsissutaalu naalakkutsigit aallussil­luartuujuarsin­naavugut. Maanna Jiisusi sisamatigut qanoq ilinniarfigisin­naagipput sammeriartigu: (1) Jehovap piumasaa pingaar­nerpaatippaa, (2) Biibilimi siulittuutit paasillugillu taakku naapertorlugit iliuuseqartarpoq, (3) Jehovamit ikiorneqar­nissani upperaa aamma (4) oqaluus­siffigisani isumalluarfigiuarlugit.

JEHOVAP PIUMASAA PINGAAR­NERPAATIPPAA

5. Guutip piumasaatut iliornissani pingaar­nerpaatillugu Jiisusip qanoq ersersippaa?

⁵ Jiisusi aallussil­luarluni ‘Kunngeqarfik pillugu nutaarsiassat nuannersut’ oqaluus­sissutigisarpai nalunnginnamiuk Guutip tamanna kissaatigigaa. (Luk 4:43) Jiisusip oqaluussineq inuunermini pingaar­nerpaatit­tuarpaa. Allaat kiffartornermi naalernerani ilinniar­titsiniarluni “illoqarfimmiit illoqarfimmut nunaqarfimmiillu nunaqarfimmut angalaartarpoq”. (Luk 13:22) Aamma ilinniartitani oqaluus­sinermik ilinniar­tittarpai. – Luk 10:1.

6. Kiffartoriaatsit allat oqaluus­sinermut qanoq attuumas­suteqarpat? (Aamma asseq takuuk).

⁶ Nutaarsiassanik nuannersunik oqaluussineq Jehovap Jiisusillu uagutsinnut suliassiis­sutaasa pingaar­nersaraat. (Mat 24:14; 28:19, 20) Taamaattumik Jehovamut kiffartoriaatsit allat oqaluus­sinermut attuumas­suteqarput. Assersuutigalugu ataatsimiit­tarfilior­tarpugut inuit oqaluus­siffigisar­takkagut Jehova guutisiorfiginiarlugu tassunnar­tarnias­sammata. Betelimi allanilu ikiuuttarpugut oqaluussineq siuarsar­niarlugu. Ajunaar­nersuaqar­tillugu uppeqatitsinnik ikiuisarpugut ataatsimiit­tarnertik oqaluus­sisarnertillu nangeqqis­sinnaanias­sammatigit. Oqaluussineq Jehovap suliassiis­sutaasa pingaar­nersarigaat eqqaamagutsigu sapinngisamik oqaluus­seqataasar­nissamut kajumis­suseqar­nerulissaagut. János, Ungarnimi utoqqaanertaasoq, ima oqarpoq: “Imminut eqqaasit­tarpunga iliuuserisar­takkatta guutisiornermut tunngasut suulluunniit oqaluussineq taarsersin­naanngikkaat. Uagutsinnummi suliassiis­sutigineqartut pingaar­nersaraat.”

7. Sooq Jehovap oqaluus­siuarnissarput kissaatigaa? (Timuutiusimut 1. 2:3, 4)

⁷ Jehovap inunnut isiginnit­taasiatut isiginnit­taaseqarutta oqaluus­sinermi aallussil­luarnerulersin­naavugut. Jehovap kissaatigaa inuit amerlanersaasa nutaarsiassat nuannersut tusassagaat annaanneqas­sasullu. (Timuutiusimut 1. 2:3, 4 atuakkit). Tamanna angujumallugu oqaluus­sinermi pikkorin­neruler­niassagatta ilinniar­tittarpaatigut. Assersuutigalugu quppersagaq Inoqatit asajuk ilinniar­tillugulu atorlugu ilinniar­tinneqar­tarpugut inunnik qanoq oqaloqateqalersin­naasugut, piffissap ingerlanerani Biibilimik misissuisaler­niassammata Jiisusimillu malinnit­tunngor­niassammata. Maannak­korpiaq inuit Jehovamut kiffartulin­ngikkaluarlutik immaqa siunissami annikil­liornar­tussarsuup naannginnerani taamaalior­nissaminnut periarfis­saqalissapput. Imaassin­naavorlu maanna tusarliussarput taamanik­kussamut eqqaassagaat Jehovamullu kiffartorusulis­sallutik. Aatsaalli oqaluus­siuarutta taamaat­toqarsin­naassaaq.

BIIBILIMI SIULITTUUTIT PAASILLUGILLU NAAPERTORLUGIT ILIUUSEQARPOQ

8. Biibilimi siulittuutit Jiisusip inuunerminut qanoq sunniuteqartippai?

⁸ Jiisusip paasisimavaa siulittuutit Biibilimeersut qanoq eqquukkumaarnersut. Assersuutigalugu nalunngilaa kiffartornini ukiunik pingasunik affarmillu sivisus­suseqassasoq. (Dan 9:26, 27) Aamma naalliulluni toqutaas­salluni siulittuutigineqartoq nalunngilaa. (Luk 18:31-34) Tamakku paasisimagamigit imminut suliassiis­sutigineqartoq naammas­siumallugu piffissamik atorluaalluni aallussil­luarluni oqaluus­sisarpoq.

9. Sooq siulittuutit Biibilimeersut aallussil­luarluta oqaluus­sinissatsinnut kajumis­sissutigaagut?

⁹ Biibilimi siulittuutigineqartut eqqarsaatigeq­qissaarutsigit aallussil­luarluta oqaluus­sinissatsinnut kajumis­sissutigis­savagut. Paasivarput naggatissaq qanillisoq. Biibilimi siulittuutigineqarpoq ulluni kingullerni inuit qanoq ikkumaarnerat aamma tamatuma nalaani qanoq pisoqarumaarnera, taakkualu eqquunneri takusarpagut. Biibilimi aamma siulittuutigineqarpoq naggatissap nalaani “Kujalliup kunngia Avannarliullu kunngia” akerariik­kumaartut. (Dan 11:40) Paasivarput tassani Tuluit Nunaata USA-llu naalagaaf­fissuata aamma Ruslandip iliisalu akerariinnerat pineqartoq. Aamma paasivarput Danieli kapitali 2-mi siulittuummi inuusaliap isigai Tuluit Nunaata USA-llu naalagaaf­fissuannut assersuutaasut. (Dan 2:43-45) Upperil­luinnarparput qanittuararsuakkut Guutip kunngeqarfiata inuit naalagaaffii suujunnaarsissagai. Siulittuutinit taakkunannga ersersin­neqarpoq naggatissaq qanillisoq, taamaat­tumillu piffissarput atorluarlugu oqaluus­sissaagut.

10. Siulittuutit Biibilimeersut oqaluus­siuarnis­satsinnut aamma allatigut qanoq kajumis­sissutigisin­naavagut?

¹⁰ Biibilimi siulittuutigineqartut allanut oqaluttuarerusungaarpagut. Carrie, qatanngut arnaq Kunngiitsuuffimmi Dominicami kiffartortoq, ima oqarpoq: “Jehovap siunissamut neriorsuutai nuanningaartut allanut oqaluus­sinissannut kajumis­sissutigaakka.” Ima nangippoq: “Inuit ajornar­torsiortut takugaangakkit eqqarsar­tarpunga paasisariaqaraat neriorsuutit Biibilimeersut aamma taakkununnga tunngasut.” Siulittuutinit Biibilimeersunit ersersin­neqarmat Jehovap oqaluus­sinitsinni ikiorusuk­kaatigut oqaluus­siuarnis­satsinnut kajumis­sissutaavoq. Leila, Ungarnimi najugalik, ima oqarpoq: “Esaja 11:6-9 ersersin­neqarpoq Jehovap ikiuineratigut kinaluunniit allanngorsinnaasoq. Tamanna oqaluus­sinissannut kajumis­sissutigaara allaat oqaluussama tusarnaarnissaa ilimagin­ngikkaluaraangak­kuluunniit.” Christopher, qatanngut angut Zambiameersoq, ima oqarpoq: “Makkorsi 13:10-mi siulittuutigineqartutut nutaarsiassat nuannersut nunarsuaq tamakkerlugu oqaluus­sissutigineqarput. Siulittuummillu tamatuminnga eqquutitseqataasin­naagama qujamasut­tarpunga.” Illit siulittuutit sorliit oqaluus­siuarnissannut kajumis­sissutigaagit?

JEHOVAMIT IKIORNEQAR­NISSANI UPPERAA

11. Jiisusi aallussil­luarluni oqaluus­siuarniassagami sooq Jehovamit ikiorneqar­tariaqarpa? (Lukkarsi 12:49, 53)

¹¹ Jiisusip upperaa aallussil­luarluni oqaluus­siuarniassagami Jehovamit ikiorneqarumaarluni. Ataqqin­nilluni oqaluus­sisaraluarluni nalunngilaa Kunngeqarfimmik nutaarsiassat nuannersut pissutigalugit inuit ilaat kamalissasut sakkortuumillu akerlilersuilissasut. (Lukkarsi 12:49, 53 atuakkit). Upperisarsiornikkut siuttut Jiisusip oqaluus­sissutigisai nuannarin­nginnamikkit arlaleriarlutik toqunniarsarigaluarpaat. (Joh 8:59; 10:31, 39) Jiisusilli nalunnginnamiuk Jehovap najoraani oqaluus­siuarpoq. Ima oqarpoq: “[Aallartitsisima] najorpaanga. Iluarisaatut iliortuaannarama imminiin­ngisaan­narpaanga.” – Joh 8:29.

12. Jiisusip ilinniartitani akerlilersor­neqaraluarlutik oqaluus­siuarnis­saannut qanoq piareersaappai?

¹² Jiisusip ilinniartitani eqqaasippai Jehovamit ikiorneqarumaarnertik upperisin­naagaat. Arlaleriarluni neriorsortarpai malersor­neqalis­sagunik Jehovamit ikiorneqarumaartut. (Mat 10:18-20; Luk 12:11, 12) Taamaattumik mianersor­tooqquai. (Mat 10:16; Luk 10:3) Ilitsersorpai inuk soqutigin­ninngitsoq tusarnaar­tinniarlugu pinngitsaalinias­sanngikkaat. (Luk 10:10, 11) Aamma oqarfigai malersor­neqalerunik qimaassasut. (Mat 10:23) Jiisusi aallussil­luartuugaluarluni Jehovamillu tatigin­nittuugaluarluni pisariaqan­ngitsumik imminut navianar­torsiortinneq ajorpoq. – Joh 11:53, 54.

13. Sooq Jehovamit ikiorneqarnissat upperil­luinnarsin­naaviuk?

¹³ Akerlilersor­neqartilluta aallussil­luarluta oqaluus­siuarnias­sagatta Jehovamit ikiorneqar­tariaqarpugut. (Saqq 12:17) Sooq Jehovamit ikiorneqarnissat upperil­luinnarsin­naaviuk? Jiisusip qinnutaa Johannesi kapitali 17-imi allaatigineqartoq eqqarsaatigiuk. Jiisusip Jehova qinnuigaa apustilit sernigeq­qullugit. Qinnutaalu Jehovap akivaa. Apustilit malersor­neqaraluarlutik aallussil­luarlutik oqaluus­siuarnis­saminnut Jehovamit ikiorneqarnerat Apustilit Suliaanni allaatigineqarpoq. Jiisusip Jehova aamma qinnuigaa nutaarsiassanik nuannersunik upperinnittut sernigeq­qullugit. Tassa aamma illit sernigeq­quaatit. Jiisusip qinnutaatut Jehova suli iliortarpoq. Soorlu apustilit ikiortarsimagai, aamma illit ikiortas­savaatit. – Joh 17:11, 15, 20.

14. Qanoq nalunngilarput aallussil­luarluta oqaluus­siuarsin­naasugut? (Aamma asseq takuuk).

¹⁴ Naggatissaq qanilliar­tortillugu aallussil­luarluta nutaarsiassanik nuannersunik oqaluus­siuarnissarput ajornakusoor­nerulersinnaavoq. Jiisusilli neriorsorpaatigut pisariaqar­titatsinnik ikiorneqas­sasugut. (Luk 21:12-15) Jiisusip ilinniar­titaasalu inuit tusarnaarusun­nerlutik namminneq aalajangiisuutit­tarpaat. Uagullu aamma taamaalior­tarpugut assortuuteqatigin­ninnaveersaar­tarlutalu. Allaat nunani suliatsinnik killilersuif­fiusuni uppeqatigut imminnut pinnatik Jehova tatigisaramikku oqaluus­siuarsin­naasimapput. Soorlu Jehovap kristumiut siulliit pissatsittarai, aamma uagut naammas­sinerarlugu paasititsinissami tungaanut oqaluus­silluar­niassagatta pissatsit­tarpaatigut. (Tim 2. 4:17) Jehova tatigiuarukku aallussil­luarlutit oqaluus­siuarsin­naanerit upperil­luinnarsinnaavat.

OQALUUS­SIFFIGISANI ISUMALLUARFIGIUARPAI

15. Jiisusip oqaluus­siffigisani isumalluarfigiuarlugit qanoq ersersippaa?

¹⁵ Jiisusip oqaluus­siffigisani isumalluarfigiuarpai. Taamaat­tumillu nuannaar­tuarpoq oqaluus­sinermilu aallussil­luartuarluni. Assersuutigalugu ukiup 30-p naalernerani Jiisusip nutaarsiassanik nuannersunik amerlasuut tusarnaarusunnerat maluginiarpaa, narsaatinullu katersuif­figeriaan­naasunut assersuullugit. (Joh 4:35) Aappaaguani ilinniartitani ima oqarfigai: “Karrit katersugassat amerlaqaat.” (Mat 9:37, 38) Kingusin­nerusukkullu ima oqaqqippoq: “Karrit katersugassat amerlaqaat. … Taamaattumik katersuinermi ittuusoq qinnuigisiuk sulisunik aallartitseq­qullugu.” (Luk 10:2) Jiisusip upperiuaannarpaa inuit nutaarsiassanik nuannersunik tusarnaarusulissasut, taamaalioraangatalu nuannaartarpoq. – Luk 10:21.

16. Oqaluus­sinermi isumalluar­tuunissamut Jiisusip assersuusiai qanoq iluaqutigaagut? (Lukkarsi 13:18-21) (Aamma asseq takuuk).

¹⁶ Jiisusip ilinniartitani eqqaasippai tusarliussartik nuannerluin­nartunik kinguneqartoq. Tamannalu aallussil­luartuujuar­nissaminnut iluaqutigaat. Assersuusiaasa ilaat marluk sammeriartigit. (Lukkarsi 13:18-21 atuakkit). Jiisusip Kunngeqarfimmik tusarliussaq siinuppip inerittussaanut unitsitas­saanani orpissuan­ngortumut assersuuppaa. Tamanna isumaqarpoq tusarliussaq unitsitas­saanngitsoq inuppassuillu tusassagaat. Kunngeqarfimmik tusarliussaq aamma seernarsaammut assersuuppaa. Taamaaliorpoq Kunngeqarfimmik tusarliussaq nunarsuaq tamakkerlugu oqaluus­sissutigineqassammat inuillu allanngus­sutigis­sammassuk. Imaassinnaavoq allannguutit taakku ingerlaannaq takuneqarsinnaaneq ajortut, soorlu naqittakkap pullakkiar­tornera ingerlaannaq malugineqarsinnaaneq ajortoq. Jiisusip taamaalilluni ilinniartitani paasitippai tusarliussaq oqaluus­sissutigisartik ilassil­luarneqarumaartoq.

17. Oqaluus­sinermi isumalluar­nissatsinnut sunik pissutis­saqarpugut?

¹⁷ Nunarsuaq tamakkerlugu oqaluus­sinermi angusagut eqqarsaatigigaangatsigit aallussil­luarluta oqaluus­sinissatsinnut kajumis­suseqaler­tarpugut. Ukiut tamaasa soqutiginnittut millionillit eqqaaniaaqataasarput Biibilimillu ilinniar­tinneqar­tarlutik. Imermut morsutsin­neqartorpassuit oqaluus­seqatigiler­tarpagut. Oqaluus­sinitsinni tusarnaarusuttut qassius­sanersut naluarput. Nalunngilarpulli Jehova inupparpas­suarnik katersuissasoq, taakkulu annikil­liornar­tussarsuarmit aniguissasut. (Saqq 7:9, 14) Tassa katersuinermi ittuusup, Jehovap, qularinngilaa inuit suli amerlanerusut tusarusulissasut. Taamaattumik oqaluus­siuarpugut.

18. Allanit qanoq malugitik­kusuttarpugut?

¹⁸ Kristumiut ilumoortut aallussil­luarlutik oqaluus­sinertik ilisarnaatigiuarpaat. Assersuutigalugu apustilit nakimaallutik aallussil­luarlutillu oqaluus­simmata inuit ‘paasilerpaat Jiisusi ilagisimagaat’. (ApS 4:13) Uaguttaaq nakimaalluta aallussil­luarlutalu oqaluus­serusuppugut inuit maluginias­sammassuk Jiisusi ilaartaripput.