Jehovap talia naappal­laanngisaannarpoq

1. Moorsisip Israalikkut Egyptenimit aniguisik­kamigit Jehovamik tatigin­ninnini qanoq ersersippaa?

HEBRÆERINUT ALLAKKANI uppernikkut maligas­siuilluartutut taaneqartuni Moorsisi immikkut maluginiarnarpoq. (Hebr 3:2-5; 11:23-25) Israalikkut Egyptenimit aniguisin­neqarneranni siulersoramigit upperluar­tuunini takutippaa. Faaruu sakkutuuilu siooraginngilai. Jehovamik tatigin­nilluni inuit immakkut aappalaartukkut ikaarneranni siulersoriarlugit inoqajuitsumut siulersorpai. (Hebr 11:27-29) Israalikkut amerlanersaasa Jehovap imminnik isumassuisin­naanera qularilerpaat, Moorsisilli Jehova tatigiuarpaa. Pakatsin­ngilarlu, Guutimi nerisassanik imermillu pilersitsisarpoq Israalikkut inoqajuitsumi inuugin­narsinnaaq­qullugit.a – Mos 2. 15:22-25; Tuss 78:23-25.

2. Sooq Guutip Moorsisi ima aperaa: “Naalakkap talia naappal­laarsoraajuk?” (Mosesimik 4. 11:21-23)

² Upperluar­tuugaluarluni Moorsisip Israalikkut tupinnar­tuliornikkut aniguisin­neqareernerata kingorna ukiup ataatsip missaa qaangiuttoq Jehovap inunnut neqinik tunisisin­naanera apeqquserpaa. Moorsisip takorlooruminaatsippaa Jehovap innuttaminut millionilinnut inoqajuitsumiittunut neqinik naammattunik pilersitsisin­naanera. Taamaattumik Jehovap Moorsisi ima aperaa: “Naalakkap talia naappal­laarsoraajuk?” (Mosesimik 4. 11:21-23 atuakkit). ‘Jehovap talia’ eqqaaneqarmat Guutip anersaava illernartoq, tassa nukinga sulisoq, pineqarpoq. Tassa Jehovap Moorsisi ima aperaalusooq: ‘Isumaqarpit oqaatigisakka piviusun­ngortis­sinnaan­ngikkikka?’

3. Sooq Moorsisip Israalikkullu ilinniutiginissaat pingaaruteqarpa?

³ Illit pisariaqar­titannik ilaquttavil­luunniit pisariaqar­titaannik Jehovap isumassuisin­naanera qularinikuuiuk? Moorsisi Israalikkullu Guutip isumassuisin­naaneranik qularinnittut qanoq ilinniutigisin­naanerlugit sammissavarput. Jehovallu taliata naappal­laanngisaan­narneranut uppernerput nakussatsin­niarlugu najoqqutassiat Biibilimeersut misissus­savagut.

MOORSISI ISRAALIKKULLU ILINNIUTIGIKKIT

4. Sooq Israalikkut ilarpassuisa Jehovap imminnik isumassuisin­naanera qularilerpaat?

⁴ Sooq Israalikkut ilarpassuisa Jehovap imminnik isumassuisin­naanera qularilerpaat? Israalikkut inuppaaluillu taakkununnga ilanngus­simasut Egyptenimiit nunamut neriorsuutigisamukarlutik sivisulaamik inoqajuitsumiipput. (Mos 2. 12:38; Mos 5. 8:15) Israalik­kuunngitsut mannatorneq qatsuppaat Israalikkullu amerlasuut aamma taamaaliulerlutik. Naammagit­taalliorpullu. (Mos 4. 11:4-6) Inuit Egyptenimi nerisar­takkatik qiisaffigilerpaat. Moorsisi naammagit­taalliorfigineqarami misigilerpoq nammineq isumassor­tariaqarlugit. – Mos 4. 11:13, 14.

5-6. Israalikkut allanit sunnerneqarnerat qanoq ilinniutigisin­naavarput?

⁵ Israalikkut inuppaalunnit imminnut ilanngus­simasunit qujamasun­ngitsunit sunnerneqarsimapput. Uagut aamma inunnit allanit qujamasun­ngitsunit sunnerneqarsin­naavugut Jehovallu tunissutai naammagiun­naarsin­naallugit. Taamatut pisoqarsinnaavoq siornatigut pigisimasatsinnut assingusumik pigisaqaleq­qikkusukkutta imaluunniit allat pigisaat pillugit sinngagilerutsigit. Kisianni pigisatta naammaginissaat ilikkarutsigu nuannaar­nerussaagut.

⁶ Israalikkut eqqaamasimasariaqaraluarpaat Guutip neriorsoraatik angerlarsimaf­fittaas­saminnut tikikkunik pigissaalis­sallutik. Neriorsuut tamanna inoqajuitsumi eqquunnani nunami neriorsuutigisami piviusun­ngortussaavoq. Uaguttaaq maannakkut piginngisagut eqqarsaatigival­laarnagit paratiisissami Jehovap tunissutigissagai eqqarsaatiginerus­savagut. Aamma allassimaffiit Jehovamik tatigin­ninnerulis­sutigisagut eqqarsaatigeq­qissaarsin­naavagut.

7. Sooq qularis­sanngilarput Jehovap talia naappal­laanngitsoq?

⁷ Immaqali eqqarsaatigivat sooq Guutip Moorsisi ima aperigaa: “Naalakkap talia naappal­laarsoraajuk?” Jehovap immaqa kissaatigaa Moorsisip uku eqqarsaatigissagai: (1) Jehovap pissaanerata killeqan­nginnera aamma (2) sumiittunil­luunniit, ungasis­sumiikkaluar­tunilluunniit, ikiuisin­naanera. Israalikkut inoqajuitsumiik­kaluartut Guutip naammat­torsuarnik neqitor­tissinnaavai. “Assamminik nukittuumik talerminillu isaassimasumik” Guutip pissaanini takutippaa. (Mos 5. 7:19) Taamaattumik misilin­neqaraangatta qularin­ngisaan­nassavarput Jehovap ikiorsin­naagaatigut. – Tuss 138:6, 7.

8. Israalikkut kukkunerattut qanoq kukkunaveersaarsin­naavugut? (Aamma asseq takuuk).

⁸ Jehovap inuiaat neqissaqartippai aqissiusarsuarnik tunillugit. Israalikkulli tupinnartuliaq tamanna pillugu Guuti qujaffigin­ngilaat, allaammi amerlasuut piumatuun­ngorput. Ulloq unnuarlu naallugit aqaguanilu ulloq tamaat aqissiusarsuarnik katersuipput. Jehovap piumatuut taakku kamaappai pillarlugillu. (Mos 4. 11:31-34) Uagut tamanna ilinniutigisin­naavarput. Piumatuun­ngornaveersaar­tariaqarpugut. Pisuujugaluarutta piitsuugaluarut­taluunniit ‘qilammi pisuussutinik katersinissarput’, tassa Jehovap Jiisusillu ikinngutigiler­nissaat, pingaar­nerpaatis­savarput. (Mat 6:19, 20; Luk 16:9) Taamaaliorutta qularis­sanngilarput Jehovap isumassus­sagaatigut.

9. Guutip tapersersuinera pillugu suna qularis­sanngilarput?

⁹ Jehovap aamma nalitsinni kiffami ikiornis­saannut piareersimajuarpoq. Tamannali isumaqanngilaq pigisatsinnik annaasaqan­ngisaan­nassasugut kaanngisaan­nassasugul­luunniit.b Jehovalli qimanngisaan­nassavaatigut. Qanorluunniit annikil­lioraluarutta ikiussavaatigut. Jehovap isumassuinissaa upperalugu qanoq ersersis­sinnaavarput? Ukununnga marlunnut tunngatillugu qanoq taamaaliorsin­naanersugut misissoriartigu: (1) Aningaasaqarnikkut ajornar­torsiutinik aaqqiiniarnermi aamma (2) utoqqaligutta inuussutis­saqarniar­nissatsinnik pilersaarusiornermi.

ANINGAASAQARNIKKUT AJORNAR­TORSIUTINIK AAQQIINIARNEQ

10. Aningaasaqarnikkut qanoq ajornar­torsiulersin­naavugut?

¹⁰ Naggatissaq qanilliar­tortillugu aningaasaqarnikkut ajornar­torsiutit amerlaneruler­nissaat ilimanarpoq. Politikkikkut eqqissiviil­liornerit, sorsunnerit, pinngortitami ajunaar­nersuit imaluunniit nappaalanersuit pissutigalugit suliffitsinnik, pigisatsinnik imaluunniit angerlarsimaf­fitsinnik annaasaqarsin­naavugut naatsorsuutigin­ngisatsin­nilluunniit aningaasar­tuuteqalerluta. Immaqa ilaquttagut isumagisin­naajumallugit allamik suliffit­taartariaqarsin­naavugut ilaqutariit­tulluunniit allamut nuuttariaqarsin­naalluta. Jehovamik tatigin­ninnitsinnik ersersitsisumik aalajangiinis­satsinnut suna iluaqutigis­savarput?

11. Aningaasaqarnikkut ajornar­torsiornermi suna iluaqutigissaviuk? (Lukkarsi 12:29-31)

¹¹ Isumakuluutitit Jehovamut oqaluttuarigukkit iluaqutigissavat. (Uss 16:3) Aalajangiil­luarnissamut ilisimas­susermik ‘isumakuluk­kunnaar­niassagavillu’ eqqissinermik qinnuigiuk. (Lukkarsi 12:29-31 atuakkit). Pisariaqar­titavit naammaginis­saannut ikioqqullutit qinnuigiuk. (Tim 1. 6:7, 8) Aningaasaqarnikkut ajornar­torsiornermi siunnersuutitsialaat paasiumallugit Biibililersaarutitsinni misissuigit. Amerlasuut jw.org-imi videut allaaserisallu iluaqutigisimavaat.

12. Ilaquttanut tunngatillugu aalajangiil­luarumalluni apeqqutit suut eqqarsaatigineqarsin­naappat?

¹² Ilaquttatik qimallugit suliffit­taartoqarsimavoq, amerlaner­tigulli tamanna aalajangiil­luarnerusimanngilaq. Suliffit­taannginninni aningaasaqarnikkut iluaqutissat kisiisa pinnagit pingaar­nerpaatut anersaakkut qanoq ilaqutariittut sunnerneqas­sanerlusi eqqarsaatigiuk. (Luk 14:28) Apeqqutit uku eqqarsaatigikkit: ‘Allamut nuullunga aapparalu najugaqatigiik­kunnaas­sagutta qanoq kinguneqarsinnaava? Taamatut suliffit­taassaguma ataatsimiinnernut tamanut najuussin­naassaanga, oqaluus­sisarsin­naassaanga uppeqatikkalu peqatigisarlugit?’ Meeraqaruit aamma apeqqut pingaarutilik una eqqarsaatigisariaqarpat: ‘Meeqqakkalu najugaqatigiin­ngikkutta qanoq “Jehovap iluarisaatut perorsarlugillu” siunnersorsin­naavakka?’ (Ef 6:4) Guutip eqqarsartaasia naapertorlugu aalajangiigit, ilaquttavit ikinngutivillu Biibilimik maleruaan­ngitsut siunnersuutaat pinnagit.c Tony, Asiap kitaani najugaqartoq, akissarsiaris­saarfiusunik suliffit­taarnis­saminik arlalinnik neqeroorfigineqartarpoq. Jehovamulli qinoreerluni, nulianilu oqaloqatigereerlugu, neqeroorutit itigartippai aningaasar­tuutiminnillu annikil­lisaaniarluni. Maanna Tony ima oqarpoq: “Inuit arlallit Jehovamik ilisarisiman­nilernis­saannut ikiornikuuakka, meeqqattalu Jehova asangaarpaat. Ilaqutariittut ilikkar­nikuuarput Matiusi 6:33 naapertorlugu inuugutta Jehovap isumagis­sagaatigut.”

UTOQQALINISSAMUT INUUSSUTIS­SAQARNIARNERMIK PILERSAARUSIORNEQ

13. Utoqqalinitsinni pisariaqar­titagut matussuser­neqarnias­sammata massakkut susinnaavugut?

¹³ Utoqqalinis­satsinnut pilersaarusior­nitsinni Jehova qanoq tatigitiginerlugu ersersis­sinnaavarput. Siunissami imminut pilersorsin­naanias­sagatta sulilluar­nissatsinnut Biibilimi kajumis­saarneqarpugut. (Uss 6:6-11) Ajornan­ngippat siunissamut aningaasanik katersinissaq pissusis­samisuuginnarpoq. Aningaasammi ilaatigut illersuutaapput. (Uss 10:15) Aningaasaqar­niarnerli inuunitsinni pingaar­nerpaatis­sanngilarput.

14. Hebræerit 13:5 oqimaaqatigiis­saarinitsinnut qanoq iluaqutigis­savarput?

¹⁴ Jiisusip assersuusiorluni nassuiarpaa aningaasanik katersisoq ‘Guutimili pisuujun­ngitsoq’ sianiitsuusoq. (Luk 12:16-21) Siunissami qanoq pisoqarnissaa kialuunniit ilisimanngilaa. (Uss 23:4, 5; Jaak 4:13-15) Jiisusilu oqarpoq imminut malinnit­tunngorusuttut tamarmik ‘pigisaminnik sussakkeerinis­saminnut’ piareersimasariaqartut. (Luk 14:33) Kristumiut siulliit Judiiamiittut taamaaliorsimapput, pigisaminnimmi annaasaqarnertik ‘nuannaarlutik akuerisarpaat’. (Hebr 10:34) Nalitsinni qatannguterpassuagut suliffimminnik annaasaqarsimapput politikkikkut partiit arlaannaal­luunniit tapersersorusun­nginnamikku. (Saqq 13:16, 17) Taamaalior­nissaminnut suna sapiillis­sutigisimavaat? Jehovap neriorsuutaa una upperil­luinnarpaat: “Qimanngisaan­narlutillu imminiin­ngisaan­nassavakkit.” (Hebræerit 13:5 atuaruk). Siunissami pisariaqar­titatsinnut pilersaarusior­niartarpugut, ilimagin­ngisatsinnillu pisoqas­sagaluarpat Jehovamit isumagineqar­nissarput tatigis­savarput.

15. Angajoqqaat kristumiut meeqqatik qanoq isigissavaat? (Aamma asseq takuuk).

¹⁵ Sumiiffiit ilaanni inuppassuit meeqqiortarput utoqqaligunik pilersuisus­samittut. Biibilimili allassimavoq angajoqqaat meeqqamik pisariaqar­titaannik isumagin­nittariaqartut. (Kor 2. 12:14) Soorunami angajoqqaat utoqqaliar­tulernerminni ikiorneqar­tariaqarsin­naapput, qitornarpassuillu kajumillutik taamaaliortarput. (Tim 1. 5:4) Kisianni angajoqqaat Jehovamik tatiginnittut nalunngilaat nuannaar­nerussallutik meeqqatik Jehovamut kiffartor­tunngor­nissaannut ikiorunikkit taakkunanngalu siunissami aningaasatigut ikiorneqar­nissartik pingaar­nerpaatin­ngikkunikku. – Joh 3. 4.

16. Angajoqqaat meeqqatik imminut pilersorsin­naalernis­saannut qanoq ikiorsin­naavaat? (Efesossimiut 4:28)

¹⁶ Meeqqavit imminut pilersorsin­naalernis­saannik ilinniar­tinneranni Jehovamik tatigin­ninnerit ersersittaruk. Meeraaneranniit sulilluarnissap pingaaruteqar­neranik ilinniar­titsigit. (Uss 29:21; Efesossimiut 4:28 atuaruk). Alliartor­neranni atuarfimmi ilinniarusus­suseqarluar­nissaannut ikiukkit. Angajoqqaat najoqqutassianik Biibilimeersunik misissuisin­naapput meeqqatik ilinniagaqar­nissamut tunngatillugu aalajangiil­luarsin­naaqqullugit ikiorlugit. Angajoqqaat kissaatigaat qitornamik imminut pilersorsin­naalernissaat oqaluus­sinerunis­saminnullu – immaqa allaat pioneriunis­saminnut – piffissaqar­nissaat.

17. Suna qularis­sanngilarput?

¹⁷ Kristumiut pisariaqar­titaminnik Jehovap ikiuisin­naanera ikiuerusus­susialu upperil­luinnarsin­naavaat. Naggatissaq qanilliar­tortillugu Jehovamik tatigin­ninneruler­tariaqarpugut. Qanorluunniilli pisoqaraluarpat pigisatigut Jehovamit isumassor­neqarnissarput upperiuartigu. Sumiikkaluarut­taluunniit Jehovap “assamminik nukittuumik talerminillu isaassimasumik” ikiorsin­naagaatigut qularis­sanngilarput.