Qularis­sanngilat Jehovap asagaatit

1. Sooq Jehova inuunerit tamaat kiffartorfiginiarlugu aalajangersimavit? (Aamma asseq takuuk).

JEHOVA kiffartorfiginiarlugu aalajangeravit eqqaamaviuk? Jehova ilisarisimalerlugulu asalerakku taassumunnga tunniul­luinnarsimavutit. Neriorsorpat piumasaa inuuninni salliun­niarlugu aamma uummatit, tarnit, isumat nukitillu tamakkerlugit asaniarlugu. (Mak 12:30) Taamanimiilli taassumunnga asanninnerit sakkortusiar­tuinnarsimavoq. Qanoq akissavit ima aperineqaruit: “Jehova ilumut asaviuk?” Nangaan­ngivillutit akissaatit: “Taanna allanit tamanit asaneruara!”

2-3. Suna upperis­sagipput Jehovap kissaatigaa, allaaserisamilu matumani suna sammissavarput? (Jeremia 31:3)

² Taavami ima aperineqaruit qanoq akissavit: “Jehovap illit asagaatit upperaajuk?” Jehovamit ilumut asaneqar­nerlutit qularigukku qanoq akinissat nangaas­sutigissaviuk? Qatanngut arnaq meeraanermini atugarliorsimasoq ima oqarpoq: “Nalunngilara Jehova asallugu. Tamanna qularutigin­ngilara. Qularutigikulasarparali Jehovamit asaneqar­nerlunga.” Qanorli paasisin­naaviuk Jehovap illit qanoq misigis­suseqarfigigaatit?

³ Jehovap kissaatigaa ilinnik asanninnini qularis­sanngikkit. (Jeremia 31:3 atuaruk). Tassami Jehovap imminut qanillisippaatit. Jehovamut tunniul­luinnarlutillu imermut morsutsin­neqaravit erlinnangaartumik tunineqarputit – tassa soraajuitsumik asannin­neranik. Tassa Jehovap asangaarpaatit qimanngisaan­nassallutillu. Taamaattumik kiffani aalajaatsut – aamma illit – ‘erligisamisut’ isigai. (Mal 3:17, New World Translation) Jehovap kissaatigaa Paulusitut misigis­sasutit. Taanna qularnani ima allappoq: “Qularin­ngilarami toqup, inuunerup, inngilit, naalakkersuisut, maanna pisut, pisussat, pissaanerit, qutsissut, atsissut pinngor­titalluunniit allat Guutip asannin­neranit … avissaar­tissinnaan­ngikkaatigut.” (Rom 8:38, 39) Allaaserisami matumani sammissavarput sooq qularutigis­sanngikkipput Jehovap asagaatigut tamatuminngalu upperin­ninneruler­nissamut suut iluaqutigisin­naagigut.

SOOQ QULARIS­SANNGIKKIPPUT JEHOVAP ASAGAATIGUT

4. Saatanip qanoq salloqit­tarniar­tarpaatigut, qanorlu akiorsin­naavarput?

⁴ Jehovap uagutsinnik asanninnera upperigutsigu Saatanip ‘salloqit­taaniar­tarnera aalajaalluta akiorsin­naavarput’. (Ef 6:11, q.a.i.) Saatanip Jehovamut kiffartorun­naarsin­niarsarisarpaatigut. Assersuutigalugu sallulluni isumaqalersin­niartarpaatigut Jehovap asanngik­kaatigut. Tamannali salluliuutaavoq ajortoq. Biibilimi Saatani løvimut assersuun­neqarpoq. (Pet 1. 5:8, 9) Løvit uumasunik imminut illersor­nissamut nukissaqan­ngitsunik saassus­sisarput. Tamatumunnga assingusumik misigisagut nikallornartut, maanna ajornar­torsiutigut siunissamul­luunniit isumakuluutigut pissutigalugit sanngiik­kaangatta Saatanip saassut­tarpaatigut. (Uss 24:10) Saatanip neriuutigaa sanngiil­linerput pissutigalugu Jehovamut kiffartorun­naassasugut. Saatanili salloqit­taataalu ‘akiorsin­naavagut’ upperil­luinnarutsigu Jehovap asagaatigut. – Jaak 4:7.

5. Sooq Jehovamit asaneqartutut misigisariaqarpugut?

⁵ Jehovap asanninnera upperigutsigu taassumunnga qaninnerulissaagut. Sooq taamaappa? Jehovap asannit­tussatut asaneqar­tussatullu pinngor­tippaatigut. Asaneqaraangatta asannit­tuliornissamut kajumis­sisarpugut. Taamaattumik Jehovamit asaneqartutut misigigaangatta taanna asaneruler­tarparput. (Joh 1. 4:19) Asanerujar­tortillugulu taassuma asanerujar­tussavaatigut. Soorlu Biibilimi ima allassimavoq: “Guuti qanillisiuk, taava ilissinnut qanillissaaq.” (Jaak 4:8) Jehovamit asaneqarnerput upperil­luinnarumallugu susinnaavugut?

JEHOVAP ASANNINNERA UPPERIL­LUINNARUMALLUGU QANOQ ILIORSIN­NAASUGUT

6. Jehovamit asaneqarnerput upperiumallugu suut qinnutigisin­naavagut?

⁶ Jehovap sooq asagaatit paasiumallugu taassumunnga ikioqqullutit qinujuarit. (Luk 18:1; Rom 12:12) Jehova qinnuigisaruk – pisariaqarpat ullormut arlaleriarlutit – qanoq misigis­suseqarfigigaatit paasiumallugu ikioqqullutit. Ilaannikkulli misigis­sutsikkut nuanniil­liungaaraangavit Jehovamit asaneqarnerit upperiuminaatsit­tarsinnaavat. Eqqaamajulli Jehova illit uummatinnit annerusoq. (Joh 1. 3:19, 20) Illit imminut ilisarisimaninniit ilisarisimaneruaatit; ilinni nammineq takusin­naanngisatit takusinnaavai. (Sam 1. 16:7; Nal 2. 6:30) Taamaattumik nangaas­sutiginagu ‘uummammiugisatit tamaasa’ taassumunnga aniatittakkit, asannin­neranillu upperin­nilluin­nalernissamut ikioqqusarit. (Tuss 62:9) Taava qinnutitit naapertorlugit iliuuseqartarit siunnersuutit tulliuttut maleruar­nerisigut.

7-8. Jehovap uagutsinnik asannin­neranik Tussiaatini qanoq qularun­naarsin­neqarpugut?

⁷ Jehovap oqaasii upperikkit. Biibilimik allattut isumassarsisillugit allatsippai qanorpiaq ittuunerminik. Assersuutigalugu Jehovap isumassuingaarnera Daavip ima allaatigaa: “Naalakkap qanippai sequmis­simasumik uummatillit, annaattarpai aserortersimasumik anersaallit.” (Tuss 34:19) Nikallungagaangavit kiserliorsin­naasarputit. Jehovali neriorsuivoq taama misigigaangavit qanittuarumallutit. Daavi tussiaasiamini allami ima allappoq: “Qullikka toqqortaraatit illit imiisivinni amiusumi.” (Tuss 56:9) Aliasul­lutillu anniaateqaraangavit Jehovap takusarpaa. Asangaarpaatit anniaatitillu maluginiar­tarlugit. Soorlu inoqajuitsumi angalasup imiisivimmi imissamaatini pingaar­tingaaraa, Jehovap qiallutit qullitit pingaar­tillugillu eqqaamajuassavai. Tussiaat 139:3-mi Jehova pillugu ima allassimavoq: “Aqqutikkalu tamaasa nalunngil­luinnarpatit.” Jehovap iliuutsigut tamaasa takusarpai ajunngitsulior­nigulli pingaartumik maluginiar­tarlugit. (Hebr 6:10) Sooq? Taassumunnga iluarisaajumallutit iliuuserisatit tamaasa pingaar­tikkamigit.a

⁸ Jehova allassimaffiit tuppallernartut taakku aqqutigalugit ima oqarporlusooq: “Paasitik­kusuppakkit qanoq asatiginerlutit.” Siusinnerusukkulli sammeriik­katsitut Saatanip sallulluni isumaqalersin­niartarpaatigut Jehovap asanngik­kaatigut. Taamaattumik ilaannikkut Jehovap ilinnik asanninnera qularileraangakku apeqqutit uku eqqarsaatigisin­naavatit: ‘Kina upperissavara? “Sallumut ataataasoq”? Imaluunniit “Guuti sallusin­naanngitsoq”?’ – Joh 8:44; Tit 1:2.

9. Jehovap asannitsini qanoq neriorsorpai? (Mosesimik 2. 20:5, 6)

⁹ Eqqarsaatigiuk Jehovap asannitsini qanoq misigis­suseqarfigisarai. Jehovap Moorsisimut Israalik­kunnullu oqaasii maluginiakkit. (Mosesimik 2. 20:5, 6 atuakkit). Neriorsuivoq asannitsini ataavartumik asannit­tuliorfigiumaarlugit. Jehova ilumoorfigin­nittuummat upperil­luinnarsin­naavarput kiffani aalajaatsut ajattun­ngisaan­nassagai. (Neh 1:5) Taamaattumik qularilerukku Jehovap ilumut asaneraatit imminut ima aperisin­naavutit: ‘Jehova asavara?’ Jehova asagukku sapinngisannillu piumasaatut iliortaruit taava ilinnik asanninnera qularis­sanngilat. (Dan 9:4; Kor 1. 8:3) Allatut oqaatigalugu, Jehovamut asanninnerit qularin­ngikkukku taava sooq taassuma ilinnik asanninnera qularissaviuk? Jehovammi asanningaarnera ilumoorfigin­ninneralu upperil­luinnarsin­naavarput.

10-11. Utertitsis­sutitut akiliut qanoq isigissavarput? (Galaatiamiut 2:20)

¹⁰ Utertitsis­sutitut akiliut eqqarsaatigeq­qissaartaruk. Jiisusip Kristusip utertitsis­sutitut pilliutaa tassaavoq Jehovap inunnut tunissutaa naleqar­nerpaaq. (Joh 3:16) Tamannali aamma ilinnut tunissutaava? Aap! Apustilip Paulusip misigisaa eqqarsaatigiuk. Kristumiun­ngunngik­kallarami ingasattumik ajortuliorsimavoq naammal­luinnan­ngissutsinilu akiortuar­tariaqarlugu. (Rom 7:24, 25; Tim 1. 1:12-14) Taamaattorli utertitsis­sutitut pilliut imminut pilluni Jehovamit tunissutitut isigaa. (Galaatiamiut 2:20 atuaruk). Eqqaamajuk Jehovamit isumassarsiarititaalluni Paulusi taama allattoq. Biibilimilu allassimasut ilinniarfiginias­sagatsigit allanneqarsimapput. (Rom 15:4) Paulusip oqaasiinit erserpoq Jehovap kissaatigigaa Jiisusi illit pillutit toqusimasoq upperissagit. Utertitsis­sutitut akiliut taamatut isigigukku Jehovap ilinnik asanninnera upperil­luinnarsinnaavat.

¹¹ Jehovap Jiisusi uagut pilluta toqunissaa siunertaralugu nunarsuarmukar­timmagu qujamasungaarpugut. Aammali nunarsuarmukar­tinneqarpoq Guuti pillugu ilumoortut ilinniar­titsissutiginias­sammagit. (Joh 18:37) Jehovap uagutsinnik qanoq asannitsiginera ilumoortunut Jiisusip ilinniar­titsissutigisaanut ilaavoq.

JIISUSIP ILINNIAR­TIPPAATIGUT JEHOVAP QANOQ ASATIGIGAATIGUT

12. Sooq Jehova pillugu Jiisusip oqaasii upperisin­naavagut?

¹² Jehovap qanorpiaq ittuunera Jiisusip nunarsuarmiik­kallarami kajumilluni oqaluttuaraa. (Luk 10:22) Jiisusip Jehova pillugu oqaasiinik upperin­ninnissatsinnut pissutis­saqarluarpugut. Jiisusip nunarsuarmukan­nginnermini ukiuni milliardilik­kuutaanni Jehova qilammeeqatigaa. (Kol 1:15) Nalunngilaa Ataatami qanoq asatigigaani. Aamma Jehovap qitornani aalajaatsut qilammiittut nunarsuarmiittullu qanoq asatigigai takusimavaa. Jiisusip inuit Jehovamit asaneqar­nerminnik upperin­ninnissaannut qanoq ikiorpai?

13. Jehova pillugu Jiisusip sumik paasitin­niarpaatigut?

¹³ Jiisusip kissaatigaa Jehovap qanoq misigis­suseqarfigigaatigut paasissagipput. Iivangkiiliuni Jiisusip Jehova ‘Ataatamik’ 160-init amerlanerusoriarluni taavaa. Ilinniar­titanilu oqaluuk­kamigit oqarpoq ‘Ataatarsi’ imaluunniit ‘Ataatarsi qilammiusoq’. (Mat 5:16; 6:26) Tamatumali siornatigut Jehova kiffaminit upperluartunit ‘Ajugaqan­ngitsumik’, ‘qutsinnerpaamik’, ‘pinngor­titsisumik’ taaguutinillu allanik taaneqartarpoq. Jiisusilli Jehova ‘Ataatatsinnik’ taanerusarpaa. Tamatumannga erserpoq Jehovap kiffani qanitarerusukkai, soorlu ataataasup asannittup meeqqani qanitarerusukkai. Aap, Jiisusip ilinniar­tippaatigut Jehovap ataataal­luartutut meeqqaminik asanningaartutut asagaatigut. Jiisusip Jehova pillugu ‘Ataatamik’ taasineranut assersuutit marluk misissoriartigit.

14. Jiisusip qanoq paasitip­paatigut Ataatatta qilammiusup tamatta immikkut naleqatik­kaatigut? (Matiusi 10:29-31) (Aamma asseq takuuk).

¹⁴ Siullertut sammeriartigit Matiusi kapitali 10-mi Jiisusip oqaasiisa ilaat. (Matiusi 10:29-31 atuakkit). Timmiaaqqat Jehovamik asannis­sinnaanatillu guutisiorsin­naanngillat. Taamaattorli Ataatatta qilammiusup timmiaaraq sumiinnersoq nalunngilaa. Jehovap timmiaaraq naleqar­timmagu takorlooruk inuk asannitsini aalajaallunilu guutisiortoq qanoq naleqar­tingaar­tigigaa! Jiisusi aamma oqarpoq Ataatatta nutsagut qassiunersut nalunngikkaa. Jehovap uagut pilluta soqutaarpasin­ngitsut nalunngimmagit upperil­luinnarsin­naavarput ilumut isumassorlutalu soqutigigaatigut. Ersarippoq Jiisusip kissaatigigaa Ataatatta qilammiusup tamatta immikkut naleqar­tingaaraatigut qularis­sanngikkipput.

15. Jiisusip oqaasii Johannesi 6:44-mi allassimasut Ataatat qilammiusoq pillugu sumik ersersitsippat?

¹⁵ Jiisusip ‘Ataatamik’ taasineranut assersuut alla maluginiaruk. (Johannesi 6:44 atuaruk). Ataatavit qilammiusup imminut qanillisippaatit, tassa asannilluni imminut kajungilersippaatit. Sooq? Takugamiuk eqqortumik pissutiginiagaqartutit. (ApS 13:48) Jiisusip oqaasii Johannesi 6:44-mi allassimasut immaqa Jeremia 31:3-mi allassimasunut innersuus­sutaapput. Tassani Jehovap innuttani ima oqarfigai: “Asavakkit soraajuitsumik asannis­suseqarlunga, taamaattumik ilinnut ilumoornera atatittuarpara.” (Jer 31:3; aamma takuuk Hosea 11:4). Eqqarsaatigiuk tamanna ilinnut qanoq isumaqartoq: Ataatatta qilammiusup asannittup illit ajunngitsortatit, immaqa nammineq maluginian­ngisatit, maluginiar­tuarpai.

16. (a) Jiisusip Jehova pillugu sumik ilinniar­tippaatigut, aamma sooq oqaasii upperisin­naavagut? (b) Jehovap ilinnut Ataataal­luarnerpaaneranik upperin­ninnerit qanoq nakussatsis­sinnaaviuk? (Ungalusaq “Jehova uagutsinnut Ataataal­luarnerpaasoq” takuuk).

¹⁶ Jiisusip ilinniar­tippaatigut nammineq kisimi Jehova ataataginagu aammali illit ataatagigit. Jiisusip qularun­naarsik­kusuppaatit Jehovap asangaarlutillu isumassoraatit. Taamaattumik Jehovap ilinnik asanninnera qularilerukku imatut eqqarsarsin­naavutit: ‘Jiisusip Ataatatsinnik ilisarisiman­ninnerpaajusup sallunngisaan­nartullu oqaasii upperil­luinnarsin­naavakka, ilaa?’ – Pet 1. 2:22.

UPPERNERIT NAKUSSATSITTUARUK

17. Sooq Jehovap uagutsinnut asannin­neranik upperin­ninnerput nakussatsit­tuassavarput?

¹⁷ Jehovap uagutsinnut asannin­neranik upperin­ninnerput nakussatsit­tuartariaqarparput. Paaseriik­katsitut Saatanip akerarsuatta Jehovamut kiffartorun­naarsin­niarsarisarpaatigut. Saatanip sanngiil­lisinniarluta isumaqalersin­niartarpaatigut Guutip asanngik­kaatigut. Saatanili sallutooq upperis­sanngilarput! – Job 27:5.

18. Jehovap asannin­neranik upperin­ninnerit qanoq nakussatsis­sinnaaviuk?

¹⁸ Allaaserisami matumani sammivarput Jehovap asanninnera qulariun­naarniarlugu qanoq iliorsin­naasugut. Jehova ikioqqullutit qinnuigisinnaavat paasiumallugu sooq asagaatit. Allassimaffiit Jehovap asannin­neranik ersersitsisut eqqarsaatigeq­qissaartakkit. Eqqaamajuk Jehovap asannitsini asajuassagai. Jehovap ernini Jiisusi aamma illit pillutit pilliutigigaa puiunngisaannaruk. Kiisalu upperil­luinnaruk Jiisusip oqarneratut Jehova illit Ataatagigit. Imalu aperineqariataaruit: “Jehovap illit asagaatit upperaajuk?” Qularnak ima akissaatit: “Ilaana! Aamma ullut tamaasa sapinngisannik ersersitsivigisarpara taanna asallugu!”