Jehovap eqqarsaatai nammineq pigiliuppigit?

1, 2. Anersaak­kut siumukar­til­luta suna ilin­niar­tar­par­put? As­sersuuteqarit.

TAKORLOORUK nukap­piaraq tunisit­toq. Angajoq­qaavisa oqarfigaat qujas­sasoq. Nukap­piaraq im­maqa nam­mineq piuman­ngik­kaluarluni naalap­poq. Peroriar­tor­til­lunili angajoq­qaami eq­qarsar­taasiat al­lal­lu inus­siar­nisaar­nerat pingaar­tin­neruleriar­tor­pai. Maan­na nam­mineerluni qujamasut­talerami qaman­nga pisumik qujasaler­poq.

² Aam­ma uagutsin­nut­taaq taamatut pisoqar­tar­poq. Sal­lusuis­sut ilin­niaq­qaaleratsigu Jehovap tun­ngaviusumik peq­qus­sutaasa naalat­tar­nis­saat qanoq pingaaruteqar­tigisoq paasivar­put. Anersaak­kul­li siumukar­til­luta Jehovap eq­qarsar­taasia – nuan­narisai, nuan­narin­ngisai as­sigiin­ngitsunul­lu tun­ngatil­lugu isigin­nit­taasia – ilik­kariar­tor­tar­par­put. Jehovap eq­qarsar­taasia aalajangik­katsin­nut iliuutsitsin­nul­lu sun­niuteqar­tik­kaangatsigu nam­mineq pigiliut­tar­par­put.

3. Sooq Jehovatut eq­qarsar­taaseqaler­niar­neq unam­miniar­narsin­naava?

³ Jehovatut eq­qarsar­nis­sap ilin­niar­nera nuan­narisin­naagaluarlugu naam­mal­luin­nan­ngitsuugat­ta ilaan­nik­kut unam­miniar­narsin­naavoq. As­sersuutigalugu ileq­qus­satigut minguitsuuneq, pigisalerituneq, oqaluus­sineq, aam­mik ator­nerluineq al­lal­lu pil­lugit Jehovap isumaa nalun­ngilar­put. Ilaan­nik­kul­li sooq taama isigin­nit­taaseqar­neranut pis­sutaasut paasiuminaatsis­sin­naavavut. Jehovap eq­qarsaatai nam­mineq pigiliun­niar­nerini siumukar­niarluta qanoq iliorsin­naavugut? Taman­nalu maan­na siunis­samilu eq­qor­tulior­nis­samut qanoq iluaqutigisin­naavar­put?

GUUTIP EQQARSAATAI QANOQ PIGILIUSSINNAAGIVUT

4. ‘Eq­qarsar­taatsimik nutaan­ngor­titsineq’ qanoq paasisariaqar­pa?

⁴ Romamiut 12:2 atuaruk.a Al­las­simaf­fim­mi matumani Jehovatut eq­qarsar­taaseqaler­niarluta susariaqar­tugut apustilip Paulusip nas­suiar­paa. Al­lap­poq ‘silarsuarmit matuman­nga ilusilersor­tik­kun­naas­sasugut’. Soorlu al­laaserisap siuliani sam­migip­put silarsuarmi isigin­nit­taatsit pis­suserineqar­tul­lu itigar­tit­tariaqar­pavut. Aam­mali Paulusi al­lap­poq ‘eq­qarsar­taaser­put nutaan­ngor­tit­tariaqarip­put’. Tas­sa Guutip oqaasia atuaq­qis­saar­tariaqar­par­put, eq­qarsaatai paasiniarlugit eq­qarsaatigeq­qis­saarlugil­lu taas­suma eq­qarsar­taasia pigiliun­nias­savar­put.

5. Atuar­nerup atuaq­qis­saar­nerul­lu as­sigiin­ngis­sutaat nas­suiaruk.

⁵ Atuaq­qis­saar­neq suk­kasuumik atuapal­lan­nerunanilu apeq­qutit akis­sutaan­nik titar­tuinerin­naan­ngilaq. Atuaq­qis­saaraangat­ta Jehovap qanoq it­tuunera, iliuuserisai qanorlu eq­qarsar­taaseqar­nersoq eq­qarsaatigisar­par­put. Jehovap taama peq­qusineranut iner­teq­quteqar­neranul­lu pis­sutaasut paasiniar­tar­pavut. Aam­ma inuunitsin­ni eq­qarsar­taasitsin­nilu qanoq al­lan­nguisariaqar­nerluta eq­qarsaatigisar­par­put. Soorunami atuaq­qis­saaraangat­ta tamak­ku tamaasa tamatigut eq­qarsaatigeq­qis­saarsin­naan­ngilavut. Kisian­ni atuaq­qis­saar­nitsin­ni pif­fis­sap af­faa eq­qarsaatigin­neq­qis­saar­nermut ator­tarutsigu pitsaas­saaq. – Tuss 119:97.

6. Guutip oqaasia eq­qarsaatigeq­qis­saaraangatsigu susoqar­tar­pa?

⁶ Guutip oqaasianik eq­qarsaatigin­neq­qis­saar­tarut­ta nuan­nersumik kinguneqas­saaq. Jehovap eq­qarsar­taasia naam­mal­luin­nar­tuusoq ‘paasil­lualer­tar­par­put’, tas­sa im­mitsin­nut qularun­naarsit­tar­pugut. Taas­suma isigin­nit­taasia paasiar­tuler­tar­par­put isumaqatigineruler­tarlugulu. ‘Eq­qarsar­taaser­put nutaan­ngor­titaasar­poq.’ Pif­fis­sap ingerlanerani Jehovap eq­qarsaatai nam­mineq pigiliuk­kiar­tor­tar­pavut.

EQQARSAATIVUT ILIUUTSITSINNUT SUNNIUTEQARTARPUT

7, 8. (a) Pigisat pil­lugit Jehova qanoq isigin­nit­taaseqar­pa? (Al­laaserisap aal­laq­qaataani as­silis­sat takuk­kit). (b) Jehovatut isigin­nit­taaseqarut­ta suna pingaar­ner­paatis­savar­put?

⁷ Eq­qarsaativut iliuutsitsin­nut sun­niuteqar­tar­put. (Mark 7:21-23; Jaak 2:17) Taman­na paasiniarlugu as­sersuuteqalaariar­ta. Siul­ler­tut, Jiisusip inun­ngor­neranit oqalut­tuamit erser­poq pigisanut tun­ngatil­lugu Jehova qanoq eq­qarsar­taaseqar­nersoq. Josefi Marialu, aningaasaater­pas­suaqan­ngik­kaluar­tut, er­nerminik perorsaasus­satut Guutip nam­mineerluni toq­qar­pai. (3 Mos 12:8; Luk 2:24) Jiisusi inun­ngormat Mariap taan­na “[im­mul­lugu] nersutaatit nerisarfian­nut ilivaa akun­nit­tarfim­mi inis­saqan­ngin­namik”. (Luk 2:7) Jehovap piumaguni Jiisusip ajun­ngin­nerungaar­tumi inun­ngor­nis­saa isumagisin­naagaluar­paa. Ilaqutariin­nili anersaak­kut it­tunik pingaar­titsisuni Jiisusip peroriar­tor­nis­saa Jehovap pingaar­ner­paatip­paa.

⁸ Pigisat tungaatigut Jehova qanoq isigin­nit­taaseqar­nersoq Jiisusip inun­ngor­nera pil­lugu oqalut­tuamit ilin­niarfigaar­put. Angajoq­qaat ilaasa qitor­namik pitsaaner­paanik pigisaqar­nis­saat piumasarisar­paat, al­laat Jehovamut at­taveqar­neran­nut ajoqutaas­sagaluar­pat. Erseq­qip­porli anersaak­kut it­tut Jehovap sunit tamanit pingaar­ner­paatik­kai. Jehovap tamatumun­nga tun­ngatil­lugu isigin­nit­taasia nam­mineq pigiliun­nikuuiuk? Iliuutsitit sumik ersersitsip­pat? – Hebræerit 13:5 atuaruk.

9, 10. Naak­kius­sineq pil­lugu Jehovatut eq­qarsar­taaseqar­nerluta qanoq paasisin­naavar­put?

⁹ As­sersuut al­la tas­saavoq up­per­nik­kut naak­kius­sutaasumik iliuuseqar­tumut tun­ngatil­lugu Jehovap isigin­nit­taasia. Jiisusi oqar­poq: “Min­nin­nguit uan­nut up­per­tut ukua ilaan­nik tam­mar­titsisoqar­pat taas­sumun­nga pitsaanerus­sagaluar­poq aseror­teriviup ujarat­taa qungasianut qilerul­lugu im­mamut igik­kaan­ni.” (Mark 9:42) Oqaatsit taak­ku sak­kor­tungaaramik! Jiisusi angusisarluin­narmat arlaat ajoqersuk­kat ilaan­nik naak­kius­sutaasumik soqutigit­taal­luni iliuuseqar­toq Jehovap iluarinavian­ngik­kaa ilimagisin­naavar­put. – Joh 14:9.

¹⁰ Up­per­nik­kut naak­kius­sineq pil­lugu Jehovatut Jiisusitul­lu isigin­nit­taaseqar­pugut? Iliuutsivut sumik ersersitsip­pat? As­sersuutigalugu im­maqa atisalersoriaaseq isik­koris­sariaaserluun­niit aalajangersimasoq nuan­naraar­put. Ilisimagutsiguli isik­koris­sariaaseq taman­na pil­lugu ilagiin­niit­toq arlaat mamiatsal­luniluun­niit pileris­susipiloqalersin­naasoq? Qatan­ngutitsin­nik asan­nin­ner­put pis­sutigalugu nam­mineq piumasavut tunul­lius­sin­naavavut?

11, 12. Jehovap uumigisaanik uumigisaqar­neq im­minul­lu naalak­kersin­naaneq ineriar­tor­tik­kutsigit im­minut qanoq il­lersus­saagut?

¹¹ As­sersuutit pingajuat: Jehovap naaper­tuil­luan­ngin­neq uumigaa. (Es 61:8) Soorunami nalun­ngilaa naam­mal­luin­nan­ngis­suser­put pis­sutigalugu ilaan­nik­kut eq­qor­tulior­nis­sar­put saper­nar­tit­tarip­put. Nam­minermisul­li ajor­tumik uumigin­nin­nis­sar­put piumasaraa. (Tussiaat 97:10 atuaruk). Sooq Jehovap ajor­toq uumigineraa eq­qarsaatigeq­qis­saar­neratigut as­singanik isigin­nit­taaseqaler­nis­samut iluaqutigalugulu ajor­tulior­nerit ingalas­simanis­saan­nut nukis­saqalis­sutigis­savar­put.

¹² Ajor­tup uumiginis­saa ilin­niarutsigu eq­qun­ngitsut, Biibilimi aalajangersimasumik eq­qaaneqan­ngik­kaluar­tut, im­mik­koor­tin­nis­saan­nut iluaqutigis­savar­put. As­sersuutigalugu ileq­qus­satigut as­suar­nar­toq qitit­tariaaseq lap dancing-imik taaneqar­tar­toq silarsuarmi nalingin­naaleralut­tuin­nar­poq. Inuit ilaat isumaqar­put taamaalior­neq atoqatigiin­ner­tut in­ngim­mat ajor­tulior­nerun­ngitsoq.b Guutil­li, ajor­tumik sumil­luun­niit uumigin­nit­tup, eq­qarsar­taasianut taamaalior­neq naaper­tuup­pa? Im­minut naalak­kersin­naanermik ineriar­tor­titsinik­kut Jehoval­lu uumigisaanik uumigin­nin­nik­kut sumil­luun­niit ajor­tulioq­qajaanerit ingalas­simal­luin­nar­tigit. – Rom 12:9.

SUJUMAARNERLUTIT MAANNA EQQARSAATIGEREERUK

13. Silatusaar­tumik aalajangiisin­naanias­sagat­ta sooq Jehovap isigin­nit­taasii siumut eq­qarsaatigereer­tariaqar­pavut?

¹³ Atuaq­qis­saaraangat­ta siunis­sami uagutsin­nut pisin­naasut pil­lugit Jehovap isigin­nit­taasia eq­qarsaatigisariaqar­par­put. Arlaan­nik pisoqariataas­sagaluar­pat ingerlaan­narlu aalajangis­sagaluarut­ta tupaq­qaval­laar­navian­ngilagut. (Uss 22:3) Biibilimi as­sersuutit ilaat eq­qarsaatigeriar­tigit.

14. Potifarip nulianut Josefip akis­sutaa qanoq ilin­niarfigaar­put?

¹⁴ Potifarip nulianit qanin­niarfigineqar­nerminut ingerlaan­naq Josefip itigar­titsineranit erser­poq aap­pariin­neq pil­lugu Jehovap isigin­nit­taasia eq­qarsaatigeq­qis­saarsimagaa. (1 Mosesi 39:8, 9 atuaruk). Potifarip nulia ima akivaa: “Qanoq taama kan­ngunar­tigisumik ilius­saanga Guutimut ajor­tuliorlunga?” Erser­poq Jehovap isigin­nit­taasia nam­mineq pigilius­simagaa. Il­lim­mi? Suleqatip­pit qanin­niarujoorfigiler­patit sus­savit? Arlaatami atoqateqar­nis­samik pileritsan­nar­tumik mobilin­nut nas­sip­patit?c Jehovamut ilumoorfigin­nin­nis­sat ajor­nan­ngin­nerujus­suus­saaq tamak­ku pil­lugit taas­suma isigin­nit­taasia paasiniarlugulu pigilius­simaguk­ku suniar­nerlutil­lu aalajangiutereersimaguk­ku.

15. Hebræerit pingasut as­sigalugit qanoq Jehovamut ilumoorfigin­nit­tuarsin­naavugut?

¹⁵ Hebræerit pingasut Shadrakitut, Meshakitut Abed-Negotul­lu ilisimaneqar­tut maan­na as­sersuutigeriar­tigit. Kun­ngip Nebukadnesarip guutiliaminik kuultiusumik pal­lorfigin­neq­qum­matik aalajangersimal­luin­narlutik itigar­titsip­put. Jehovamut ilumoorfigin­nit­tuarunik qanoq pisoqas­sanersoq eq­qarsaatigereersimagaat aalajangersimal­lutik akineran­nit erser­poq. (2 Mos 20:4, 5; Dan 3:4-6, 12, 16-18) Nalitsin­nimi? Up­perisarsior­nermut eq­qun­ngitsumut tun­ngatil­lugu nal­liut­torsior­nermut it­tup­pit aningaasanik taperseeq­qup­patit qanoq ilius­sagaluar­pit? Taamatut pisoqar­nis­saa utaq­qiin­nar­nagu tamak­ku pil­lugit Jehovap isumaa maanna eq­qarsaatigeq­qis­saas­sal­lugu silatusaar­nerus­saaq. Taamatul­lu pisoqas­sagaluar­pat hebræerit pingasut pisimanerat­tut eq­qor­tulior­nis­sar­put eq­qor­tumil­lu akinis­sar­put ajor­nan­ngin­nerus­saaq.

16. Jehovap eq­qarsar­taasianik paasin­nil­luar­neq nakorsar­nermut tun­ngatil­lugu pinar­toqar­pat qanoq piareersimas­sutigisin­naavar­put?

¹⁶ Aam­ma nakorsar­nermut tun­ngatil­lugu pinar­tumik pisoqar­til­lugu Jehovamut ilumoorfigin­nit­tuar­nis­sap pingaaruteqas­susianik eq­qarsaatigin­neq­qis­saareer­neq iluaqutigisin­naavar­put. Soorunami aalersor­tin­nis­sar­put imaluun­niit aap akui pingaar­nerusut sisamat atorlugit aalersor­tin­nis­sar­put akuerin­ngilar­put. (ApS 15:28, 29) Aam­mul­li tun­ngatil­lugu nakorsaariaatsit as­sigiin­ngitsut kristumiut tamarmik im­mik­kut nam­mineerlutik Biibilimi najoq­qutas­siat tun­ngavigalugit aalajangiisariaqar­put. Suniar­nerluni aalajangiinis­saq qaquguk­kut pitsaaner­paava? Nap­parsim­mavim­mi im­maqa an­niarluta aalajangiipal­lan­nis­samul­lu tatineqar­til­luta? Soorunami naamik. Maan­na pif­fis­saq­qip­poq misis­sueq­qis­saar­nis­samut, nakorsar­nermut tun­ngasutigut piumasavut pil­lugit erseq­qis­sumik im­mersueq­qis­saar­nis­samut nakorsamil­lu oqaloqateqar­nis­samut.d

17-19. Sooq Jehovap eq­qarsar­taasiata maanna ilin­niar­nis­saa pingaaruteqar­pa? As­sersuuteqarit.

¹⁷ Kiisalu, Petrusip ‘im­minut ajun­ngisaarfiginis­samik’ (NW) siun­nersuinerlun­neranut Jiisusip akipal­lan­nera eq­qarsaatigiuk. Guutip im­minut piumasaa nunarsuarmilu inuunerminut toqunis­saminul­lu tun­ngasut siulit­tuutit Jiisusip eq­qarsaatigeq­qis­saarsimar­pasip­pai. Tamatumin­nga ilisimasaqar­nini ilumoorfigin­nit­tuar­nis­saminut im­minul­lu pil­liutigeriaan­naanis­saminut nukis­saqalis­sutigaa. – Matthæusi 16:21-23 atuakkit.

¹⁸ Nalitsin­ni, Jehovap ikin­ngutigis­sagitsin­ni sapin­ngisatsin­nil­lu oqaluus­seqataanis­sar­put kis­saatigaa. (Matt 6:33; 28:19, 20; Jaak 4:8) Inun­nil­li ajun­ngitsumik isumaqar­tunit Petrusip Jiisusimut pineratut nangar­tar­neqarsin­naavugut. As­sersuutigalugu qaf­fasin­nerusumik akis­sarsiagis­saar­nerusumil­lu atorfim­mik it­tup­pit neqeroorfigip­patit, ataatsimiigiar­tar­nin­nul­li oqaluus­seqataasar­nin­nul­lu ajoqutaasumik? Atuar­tuuguim­mi, angajoq­qaan­nit nuul­lutit ilin­niagaqaq­qin­nis­san­nut periarfis­sin­neqaruit? Taamatut pisoqar­pat aalajangiin­ngin­nin­ni qinoq­qaar­tariaqar­pit, misis­sueq­qis­saarlutit ilaqut­tan­nil­lu utoq­qaaner­tanil­luun­niit oqaloqateqarlutit? Pitsaanerus­saaq maanna tamak­ku pil­lugit Jehovap isigin­nit­taasia paasiniarlugulu nam­mineq pigiliun­niaruk­ku. Siunis­sami taamatut neqeroorfigineqas­sagaluaruit us­ser­nar­torsior­pal­laar­nak Jehovamik kif­far­tor­nis­sat aal­lun­niarlugu aalajangius­simagak­ku qanoq ilior­niar­nerlutit ilisimas­savat.

¹⁹ Misilin­neqarsin­naanin­nik ilimagin­ngisan­nik pisin­naasut al­lat im­maqa eq­qaasin­naas­savatit. Soorunami pisin­naasunut tamanut piareersarsin­naan­ngilagut. Nam­minerli atuaq­qis­saar­nitsin­ni Jehovap eq­qarsar­taasia eq­qarsaatigeq­qis­saar­tarutsigu ilik­kak­kavut eq­qaamasin­naanerus­sal­lutigil­lu pis­sutsini suniluun­niit atoriaan­naanerus­savavut. Atuaq­qis­saaraangat­ta Jehovap isigin­nit­taasia paasiniar­tar­tigu, eq­qarsar­taasia nam­mineq pigiliul­lugu maan­na aam­ma siunis­sami silatusaar­tumik aalajangiinis­samut qanoq iluaqutigisin­naanerlugu eq­qarsaatigisarisigu.

JEHOVAP EQQARSARTAASIA ILLILLU SIUNISSAT

20, 21. (a) Sooq silarsuar­taas­sami kif­faan­ngis­suser­put nuan­naarutigis­savar­put? (b) Maan­na inuuner­put qanoq nuan­naarutigisin­naavar­put?

²⁰ Silarsuar­taas­saq qilanaaringaar­par­put. Nunarsuarmi paratiisiusumi naas­saan­ngitsumik inuunis­samut amerlanersavut neriuuteqar­put. Pis­sutsit maan­na atuut­tut alianar­tuinit Guutip naalagaaf­fia aqutsiler­pat aniguisin­neqas­saagut. Soorunami aam­ma nam­mineq iluarisavut pilerigisavul­lu malil­lugit aalajangiinis­samut kif­faan­ngis­suseqas­saagut.

²¹ Imaan­ngilarli kil­leqan­ngitsumik kif­faan­ngis­suseqas­sasugut. Maniguut­tut Jehovap inatsisaanit eq­qarsar­taasianil­lu siulersor­til­lutik aalajangiisas­sap­put. Nuan­naangaar­nermik eq­qis­sineqangaar­nermil­lu kinguneqas­saaq. (Tuss 37:11) Taman­na nal­ler­tin­nagu Jehovap eq­qarsar­taasiata pigiliun­niar­nera nuan­naarutigisin­naavar­put.