Peerariinneq – Immikkoortoq 3: Peerariik­kunnaassaagut?

Sivisujaamik peerareereerlusi imaassinnaavoq qularilerit inooqatigiit­tussatut ilumut immissinnut tulluar­nerlusi. Peerariigin­nassavisi imaluunniit qimassavisi? Allaaserisaq una aalajanger­nissannut iluaqutigisinnaavat.

Allaaserisami matumani

• Qulalersimaguit eqqarsaatigisin­naasatit

• Aalajangerneq

• Peeqqat qimanniarlugu aalajangeruit

Qulalersimaguit eqqarsaatigisin­naasatit

Sivisujaamik peerareereersimasut immaqa paasilerpaat ilimagisaminniit assigiin­nginnerullutik. Assersuutigalugu:

• Aappaa sissamiik­kusunneruvoq aappaali qaqqasiorusun­nerulluni.

• Aappaa inuttut ammasuuvoq aappaali ittoortuulluni.

• Aappaa salloqqajaasarpoq aappaali unneqqaris­suujuaan­narluni.

Maluginiaruk taakkunani assigiin­ngissutit pingasuusut. Siullermi soqutigisaat assigiin­ngitsuupput, aappaanni inuttut assigiin­ngitsuupput pingajuannilu pingaartitaat assigiin­ngitsuullutik.

Eqqarsaatigisassaq: Katissagaluarussi taakkua pingasut arlaat sorleq unamminiar­nartinnerussaviuk? Marluullusi taakkua arlaannut naleqqus­sarusus­sinnaavisi?

Uiusoq nuliaasorlu assigiin­ngitsunik soqutigisaqaraluarlutik aamma assigiin­ngitsunik pissuseqaraluarlutik aappariil­luarsin­naapput. Eqqaamajuk: Imminnut tulluartut sutigut tamatigut assigiit­tariaqan­ngillat. Ilaannikkut uiusup nuliaasullu piffissap ingerlanerani soqutigisaat assigiileriar­tortarput inuttullu assigiin­ngitsuunertik ilinniarfigalugu.a

Kisianni katitassavit illit pingaar­titavit assinganik pingaar­titaqarnissaa pingaarutilerujussuuvoq – tassa upperisamut, inooriaatsimut aamma ileqqoris­saarnermut tunngatillugu isumaqatigiissaasi. Taamaan­ngikkussi mianersor­tariaqarputit immaqalu qimannissarsi eqqarsaatigilerlugu.

Maluginiaruk aappariinneq pillugu atuakkami qanoq allassimasoqartoq: “Misissuinerit ersersippaat aappariit upperisaqaqatigiin­ngitsut avinnissaat ilimanar­nerusartoq.”b

Najoqqutassiaq Biibilimeersoq: “Uppertuun­ngitsut ataqatigilis­sanngilasi, … tulluan­ngilasi.” – Korintimiunut 2. 6:14, quppernerup ataani ilanngussaq.

Aalajangerneq

Biibilimi allassimavoq ‘katittut ajornar­torsiuteqar­tassasut’. (Korintimiunut 1. 7:28) Taamaattumik tupigusuutigis­sanngilat peerariin­nissinni ajornar­torsior­tarussi.

Peeqqallu isumaqatigiin­ngissuteqar­tarussi isumaqar­tariaqanngilaq aappariis­sinnaan­ngitsusi. Apeqqutaaginnarpoq eqqissisimasumik aaqqiisin­naanersusi. Katissagussi marluullusi tamanna pikkorif­figisariaqarparsi.

Najoqqutassiaq Biibilimeersoq: ‘Immissinnut inussiar­nersumik pisassaasi, qamannga pisumik misigin­neqatigin­nittuussaasi, ilumoorlusi isumakkeerfigeqatigiit­tassaasi.’ – Efesossimiut 4:32.

Aappaatigulli isumaqatigiinnasi assortuutikulasarussi imaassinnaavoq immissinnut tulluan­ngitsusi. Immissinnut tulluan­ngikkussi pitsaaneruvoq maanna – imaanngitsoq aatsaat katereerussi – paasigussiuk.

Inerniliineq: Peeqqat ilinnut ilumut tulluar­tuunersoq imaluunniit katinnissamut ilumut piareersimanerlutit nalornillutit qularigukku tamanna sumigin­naqinagu.

Najoqqutassiaq Biibilimeersoq: “Silatuup perlussaq takusin­naasarpaa qimarnguf­fissarsior­tarlunilu, misilit­tagakitsorli ingerlaq­qittarpoq tamannalu ajunaarutigisarlugu.” – Ussatit 22:3.

Peeqqat qimanniarlugu aalajangeruit

Peerariik­kunnaar­niarneq misigis­sutsikkut annernarsinnaavoq. Arlarsili nalornis­suteqar­tuaannarpat, imaluunniit marluullusi taama misigigussi, pitsaanerusinnaavoq peerariik­kunnaarussi.

Peeqqat qimanniarlugu qanoq pitsaanerpaamik paasitis­sinnaaviuk? Sms-ikkut mail-ikkulluunniit qimanniarlugu paasiteqinagu, aatsaat allatut ajornarpat taamaaliorsin­naavutit. Piffissaal­luartukkut sumiiffimmi tulluartumi naapillusi oqaloqatigiigitsi.

Najoqqutassiaq Biibilimeersoq: “Immissinnut ilumoortumik oqaluffigisaritsi!” – Zakaria 8:16.

Qimannersi isumaqarpa kukkusimasusi? Naamik, taamaan­ngilluinnarpoq! Eqqaamassavat peerariinnerup siunertarimmagu taanna katissanerlugu qimassanerluguluunniit aalajangiinissat. Qimanniarlusi aalajangeraluarus­siluunniit pisimasoq ilinniarfigil­luarsin­naavarsi.

Una eqqarsaatigiuk: Peerariinnitta nalaa imminut pillunga qanoq ilinniarfigaara? Inuttut sulissutigisassannik paasisaqarfigaara? Peerartaaq­qinniaruma allaanerusumik qanoq iliuuseqarsin­naavunga?