Jehovap Nalunaajaasuisa upperisaminnut ilaasimagaluartut qanoq pissusilersorfigisarpaat?

Sapinngisatsinnik kikkut tamaasa asannittumik, inussiarnersumik ataqqinnittumillu pissusilersorfiginiartarpagut. Jehovap Nalunaajaasuisa ilaat aallussilluarunnaarsimappat imaluunniit guutisiorunnaarsimappat oqaloqatiginiartarparput qularunnaarsinniarlugu asallugu Guutimullu qanilleqqinnissaanut ikiorusullugu. – Lukkarsi 15:4-7.

Ilaannikkulli ima ajortuliorsimatigisoqartarpoq ilagiinnit peerneqarnermik kinguneqarsinnaasumik. (Korintimiunut 1. 5:13) Taamaakkaluartorli uppeqaterput asagatsigu, ilagiinnit peerneqannginniassammat, sapinngisatsinnik ikiorniartarparput. Ilagiinnillu peerneqaraluarpat Biibilimi kajumissaarneqarnitsitut suli asannittumik ataqqinnittumillu pisarparput. – Makkorsi 12:31; Petrusimit 1. 2:17.

Sooq ilagiinnit peersitaasoqartarpa?

Biibilimi ersarissumik allassimavoq kristumiu ajortorujussuarmik eqqunngitsuliorpat isummaminillu allannguiumanani ilagiinnit peerneqartariaqartoq.a (Korintimiunut 1. 5:11-13) Biibilimi aamma allassimavoq ajortuliornerit suut ilagiinnit peerneqarnissamik kinguneqartitsisinnaasut. Taakkua ilagaat allasiorneq, imerajunneq, toqutsineq, ilaquttaminnik nakuuserneq tillituujunerlu. – Korintimiunut 1. 6:9, 10; Galaatiamiut 5:19-21; Timuutiusimut 1. 1:9, 10.

Imaanngilarli ingasattumik ajortuliortoq ingerlaannaq ilagiinnit peerneqartartoq. Ilagiinni utoqqaanertatb ajortuliortup iliuutsiminik ajortunik allannguinissaanik ikiorniaqqaartarpaat. (Romamiut 2:4) Uummataa killinniarlugu asannittumik saamasumillu oqaloqatigisarpaat. (Galaatiamiut 6:1) Taamaaliornikkut immaqa ajortuliortup paasilissavaa ajortumik iliuuseqarsimalluni aammalu peqqissimisariaqarluni. (Timuutiusimut 2. 2:24-26) Ajortuliorsimasorli sapinngisamik ikiorniarneqaraluarluni peqqissiminani Biibilip peqqussutaanik unioqqutitsiunnaanngikkuni ilagiinnit peerneqartariaqalissaaq. Taamaattoqartillugu utoqqaanertat ilagiinnut naatsumik nalunaaruteqartarput pineqartoq Jehovamik Nalunaajaasuujunnaartoq.

Ilagiinni utoqqaanertat marluk angut inuusuttoq saamallutik Biibilimi versit eqqartoraat. Aappaata angut inuusuttoq tuiatigut attorlugu oqaluuppaa. — Utoqqaanertat ajortuliortoq saamasumik inussiarnersumillu uummataa killinniartarpaat

Peerneqartoq ilagiinniikkunnaaraangat qanoq ajunngitsumik sunniuteqartarpa? Ilagiit Guutip najoqqutassiai maleruarlugillu pingaartissavaat. Aamma ilagiit ajortunik sunnerneqannginnissamut illersorneqassapput. (Korintimiunut 1. 5:6; 15:33; Petrusimit 1. 1:16) Tamatumalu saniatigut imaassinnaavoq ilagiinnit peerneqarsimasoq inooriaatsiminik ajortumik peqqissimilluni allannguinissaminut kajumissuseqalersoq. – Hebræerit 12:11.

Jehovap Nalunaajaasuisa ilagiinnit peerneqarsimasut qanoq pissusilersorfigisarpaat?

Biibilimi allassimavoq kristumiut ilagiinnit peerneqarsimasoq ‘ilagisarunnaassagaat, aap, nereqatigissanngikkaalluunniit’. (Korintimiunut 1. 5:11) Taamaattumik ilagiinnit peerneqarsimasoq ilagisarunnaartarparput. Taamaattorli isiginngitsuusaaginnarnagu ataqqinnittumik pisarparput. Naalagaaffilersaarfimmi ataatsimiinnitsinnut najuussinnaavoq, piumasullu ilassisinnaavaat.c Aamma ilagiinnut uternissaminut ikioqqulluni siunnersoqqullunilu utoqqaanertanut saaffiginnissinnaavoq.

Aappariit naalagaaffilersaarfiup isaariaani ilagiinnit peerneqarsimasoq asannittumik tikilluaqquaat. — Ilagiinnit peerneqarsimasoq ilagiit ataatsimiinnerannut najuussinnaavoq

Taavami ilagiinnit peerneqarsimasoq illoqatigisaminik Nalunaajaasuusunik aappaqarlunilu meeraqarpat? Ilaquttani guutisioqatigisinnaajunnaaraluarlugit suli ilaquttatut ataasioqatigiipput. Illoqatigiikkamik ilaqutariittut inooqatigiiginnartarput imminnullu asannittumik ataqqinnittumillu pisarnertik ingerlatiinnarlugu.

Ilagiinnit peerneqarsimasup utoqqaanertat qaaqqullugit oqaloqatigiumasinnaavai. Oqaloqatigiinnerminnilu utoqqaanertat Biibili atorlugu asannittumik siunnersorsinnaavaat Guutimullu saannissaanut kajumissaarlugu. (Zakaria 1:3) Ajortuliortarunnaaruni najoqqutassiallu Biibilimeersut ilumoorussilluni inuunermini maleruarusulerunigit ilagiinnut uteqqissinnaavoq. Ilagiinnut uteqqippat ilagiit ‘isumakkeerfigalugulu tuppallersassavaat’, soorlu itsaq kristumiut Korintimiittut siornatigut ajortuliorsimasoq iliuutsiminik allannguisimasoq taama pisimagaat. – Korintimiunut 2. 2:6-8.

Siornatigut ilagiinnit peerneqarsimasut misigisatik oqaluttuaraat

Ilagiinnit peerneqarsimasut kingornalu Guutimut kiffartoqqilersimasut oqaluttuaat maluginiakkit.

“Ilagiinnut uterniarlunga aalajangerama isumaqaraluarpunga utoqqaanertat ukiorpassuarni ilagiinnit peerneqarnerma nalaani sulerisimanikka tamaasa pillugit apersuutigissagaat. Taamaattoqanngilarli. Ima oqarput: ‘Maanna siumut isiginiaannassaatit.’ Taama oqarnerat eqqissiallaatigeqaara tikilluaqqusaasutullu misigalunga.” – Maria, USA.

“Uteqqinnera ilagiinniittut tamarmik nuannaarutigeqaat. Asaneqartutut misigitippaannga. Ilagiinniittut upperinnilersippaannga Jehovamit taakkunanngalu ilumut isumakkeerfigineqarsimaninnik. Taamaalillunga pereersut ajuusaarutigivallaarnagit ingerlariaqqissinnaalerpunga. Jehovamut attaveqarlualeqqinnissannik utoqqaanertat ikiuinissaminnut piareersimajuaannarput. Tuppallersarlungalu qularunnaarsinniartarpaannga Jehovap suli asallungalu naleqartikkaanga.” – Malcom, Sierra Leone.

“Jehovap innuttani asallugit ileqqussatigut minguitsuutinniartarneri eqqarsaatigigaangakku qamuuna killitsittarpunga. Ilagiinnit peersitsineq avataaniit sakkortorpasillunilu misigittaatsutut isikkoqarsinnaagaluartoq pisariaqarlunilu asanninnermut ersiutaavoq. Qujamasuutigisaqaara Guuti Ataataammat asannittoq isumakkeerfiginneriaannaasorlu.” – Sandi, USA.

Inatsisilerituut Jehovamik Nalunaajaasuunngitsut oqaasii

Eqqartuussiviit inatsisilerituullu immikkut paasisimasallit Jehovap Nalunaajaasuisa Biibilip najoqqutassiaanik unioqqutitsisunik ilagiinnit peersitsisarnerat pillugu qanoq oqarsimappat? Oqaasii maluginiakkit:

“Upperisarsioqatigiit Biibilip najoqqutassiaanik sapinngisaminnik maleruaaniarsarisut ajortuliorsimasumik peersitsisariaqarsinnaanerat naatsorsuutigineqarsinnaavoq. Tamanna pissusissamisuuinnarpoq aammalu pingaaruteqarluni, Biibilimmi najoqqutassiaanik maleruaajunnaarsimasoq upperisarsioqatigiinnut ilaajunnaartoq, peersitaanngikkuni ilagiinniittunut allanut ajortumik sunniuteqaratarsinnaammat.” – The High Court of Justice, Tuluit Nunaat Walesilu, juunip 7-at 2019, Otuo vs. Watch Tower Bible And Tract Society of Britain.
“Europami allanilu eqqartuussiviit aalajangersarsimavaat inunnik ataasiakkaanik ilagiinnit peersitsisarneq upperisarsioqatigiit pisinnaatitaaffiat naapertorlugu inatsisinik unioqqutitsinerunngitsoq, aamma inatsit tunngaviusoq Jehovap Nalunaajaasuisa unioqqutinngikkaat, tamannalu pillugu eqqartuussiviit akuliunneqartariaqanngitsut.” – Professori Paulo Pinto de Albuquerque, Europami Inuit Pisinnaatitaaffii pillugit Eqqartuussisummi eqqartuussisuusimasoq, Disfellowshipping and Discrimination of a Religious Minority: On Articles 9, 11 and 4 of the ECHR.

a Siornatigut eqqunngitsuliorsimasumik ilagiinnit peersitsisoqartariaqaraangat oqaaseq “ilagiinniit ilaajunnaarsitaasoq” atortaraluarparput. Maannakkulli Biibilimi allassimareersoq oqaaseq atorlugu “ilagiinnit peerneqartoq” atortalerparput.

b Utoqqaanertat angutaapput upperluartut misilittagaqarluartullu Biibili atorlugu ilinniartitsisartut ilagiinnilu ikiuisarnermikkut qiimmassaasarnermikkullu Jehovap innuttaanik paarsilluartut. Akeqanngitsumik taamaaliortarput. – Petrusimit 1. 5:1-3.

c Qaqutigoortumik peerneqartoq ilagiinnit qimagutiinnarani ilagiinnut ajortisaarisarpoq ilagiinniittullu Biibilip najoqqutassiaanik namminermisut malinnikkunnaarnissaannik kaammattorniartarlugit. Taamaattoqartillugu inuk taamak pissusilersortoq ‘ilassissaartarparput’. – Johannesimit 2. 9-11.