Guutip naalagaaffia uummatinniippa?
Akissut Biibilimeersoq
Naamik, Guutip naalagaaffia, tassa kunngeqarfia, kristumiut uummataanniinngilaq.a Kunngeqarfiup sumiinnera paasisinnaavarput Biibilimi ima taaneqarmat: “Qilaap Naalagaaffia.” (Matiusi 4:17, Biibili 2000-mi naqitigaq) Tassa Biibilimi ersersinneqarpoq Guutip kunngeqarfia tassaasoq qilammiit naalakkersuisut.
Guutip kunngeqarfia naalakkersuisoqarlunilu naalakkersugaqarpoq, aamma inatsiseqarpoq Guutillu piumasaata qilammi nunamilu naammassinissaanut oqartussaassuseqarluni. – Matiusi 6:10; Saqqummersitat 5:10.
Guutip kunngeqarfiata ‘inuiaqatigiit, naggueqatigiit immikkullu oqaasillit tamaasa’ nunarsuarmiittut naalakkersussavai. (Danieli 7:13, 14) Naalakkersuisinnaatitaanera innuttaasuninngaanniit pinnani Guutimeersuuvoq. – Tussiaat 2:4-6; Esaja 9:6.
Jiisusip apustilit aalajaatsut oqarfigai qilammeeqatigaluni Kunngeqarfimmi ‘issiavissaarsuarni issiassasut’. – Lukkarsi 22:28, 30.
Kunngeqarfik akeraqarpoq, akeqqallu taakku piuneerukkumaarpai. – Tussiaat 2:1, 2, 8, 9; 110:1, 2; Korintimiunut 1. 15:25, 26.
Biibilimi ilinniartitsissutigineqanngilaq Guutip kunngeqarfia uummatitsinniittoq imaluunniit inuup uummataani naalakkersuisoq. Kisianni Biibilimi ersersinneqarpoq ‘Kunngeqarfik pillugu tusarliussaq’, tassa ‘Kunngeqarfik pillugu nutaarsiassat nuannersut’, uummatitsinnut sunniuteqassasut. – Matiusi 13:19; 24:14.
Una qanoq paasisariaqarpa: ‘Guutip naalagaaffia ilussinniippoq’
Biibilimik nutsikkat ilaanni Lukkarsi 17:21-p nutserneqarnera inuit ilaasa paatsuunganartittarpaat. Assersuutigalugu tastamantitâĸ-mi 1961-imi naqitikkami ima allassimasoqarpoq: ‘Guutip naalagaaffia ilussinniippoq’. Versi tamanna paasilluarumallugu misissueriarta.
Guutip kunngeqarfia Jiisusip akerlilersortaasa uteriitsut toqutsiniartullu uummataanniinngilaq
Jiisusip akerlilersortini upperisarsiornikkut siuttut farisiiarit imminik toqutsiniartut oqaloqatigai. (Matiusi 12:14; Lukkarsi 17:20) Pisumi allami Jiisusip ima oqarfiginikuuai: “[Ilussigut] ilumoortuusaarnermik inatsisinillu unioqqutitsinermik ulikkaarpusi.” (Matiusi 23:27, 28) Taamaattumik Jiisusi isumaqarsoraajuk Kunngeqarfik uteriitsut taakkua uummataanniittoq?
Jiisusip oqaasii Lukkarsi 17:21-miittut Biibilimik nutsikkani allani eqqortumik ima nutserneqarsimapput: ‘Guutip naalagaaffia akornassinniippoq.’ (Uagut uingasunngortipparput; Biibili 2000-mi naqitigaq) ‘Guutip kunngeqarfia akorngassinniippoq.’ (Nunarsuup nutaanngornissaanik nutsigaq) Guutip kunngeqarfia farisiiarit ‘akornganniittoq’ isumaqaannarpoq Jiisusi kunngisut naalakkersuisussatut Guutimit toqqarneqarsimasoq taakkua saavanniittoq. – Lukkarsi 1:32, 33.
a Upperisarsiortut kristumiut amerlasuut ilinniartitsissutigaat Guutip kunngeqarfia inunniittoq imaluunniit inuit uummataanniittoq. Assersuutigalugu USA-mi baptistit ilaat (Southern Baptist Convention) nalunaaruteqarput Guutip kunngeqarfia tassaasoq “inuup uummatimini inuunerminilu Guutimit naalakkersorneqarnera”. Paavi Benedikt XVI atuakkiamini Jesus fra Nazaret-imi assingusumik nalunaaruteqarpoq allakkami “Guutip kunngeqarfia inummut tusarnaartumut tikiuttartoq”.