Annikilliornartussarsuaq suua?
Akissut Biibilimeersoq
Annikilliornartussarsuarmi inuit aatsaat taama naalliutsigissapput. Biibilimi siulittuut naapertorlugu “ulluni kingullerni” imaluunniit “naggatissap” nalaani tamanna pissaaq. (Timuutiusimut 2. 3:1; Danieli 12:4) “Ullut taakku inuit Guutimit pinngortinneqarneranniit maannamut asseqanngitsumik nalliuteqqinngisaannartussamillu annikilliorfiussapput.” – Makkorsi 13:19; Danieli 12:1; Matiusi 24:21, 22.
Annikilliornartussarsuarmi pisussat
Upperisarsiornermik eqqunngitsumik suujunnaarsitsineq. Upperisarsiorneq eqqunngitsoq tassanngaannartumik suujunnaarsinneqassaaq. (Saqqummersitat 17:1, 5; 18:9, 10, 21) Politikkikkut pissaanillit FN aqqutigalugu Guutimit atorneqarlutik upperisarsiorneq eqqunngitsoq suujunnaarsissavaat. – Saqqummersitat 17:3, 15-18.a
Upperisarsiornermik ilumoortumik saassussineq. Naalagaaffiit iligiit, Ezekielip allagaani ‘Gogimik nunamit Magogimeersumik’ taaneqartut, ilumoortumik upperisarsiortut saassutissavaat. Guutilli kiffani suujunnaarsitaaqqunagit illersussavai. – Ezekieli 38:1, 2, 9-12, 18-23.
Inunnik eqqartuussineq. Jiisusip inuit tamaasa eqqartuutissavai, “savanillu paarsisup savanik savaasanillu avissaartiterisarneratut avissaartitissavai.” (Matiusi 25:31-33) Jiisusi ‘qatanngutiminik’, qilammi kunngioqatissaminik, tapersersuisimaneq imaluunniit tapersersuisimannginneq tunngavigalugu inunnik eqqartuussissaaq. – Matiusi 25:34-46.
Kunngeqarfimmi naalakkersuisussat katersorneqarneri. Aalajaatsut Kristusi kunngioqatigissallugu toqqarneqarsimasut nunarsuarmiikkunnaarlutik qilaliartinneqassapput. – Matiusi 24:31; Korintimiunut 1. 15:50-53; Tessaluunikamiunut 1. 4:15-17.
Harmagedonni. “Guutip Killeqanngitsumik Pissaanillip ullussarsuani” sorsunnissaq taanna aamma ‘Jehovap ulluanik’ taaneqarpoq. (Saqqummersitat 16:14, 16; Petrusimit 2. 3:12; Esaja 13:9) Pillagassatut Kristusimit eqqartuunneqartut tamarmik suujunnaarsinneqassapput. (Sefania 1:18; Tessaluunikamiunut 2. 1:6-10) Aamma nunarsuaq tamakkerlugu politikkikkut pissaanillit, Biibilimi uumasumut nujuartamut arfineq-marlunnik niaqulimmut assersuunneqartut, ilanngullugit suujunnaarsitaassapput. – Saqqummersitat 19:19-21.
Annikilliornartussarsuup kingorna pisussat
Saatanip anersaapiluillu parnaarussaanerat. Inngilip pissaanillip Saatani anersaapiluillu “itinersuarmut”, soriarsinnaajunnaarnermut assersuutaasumut, naloriutissavai. (Saqqummersitat 20:1-3) Saatanip itinersuarmiinnera parnaarussaaqqanermut assersuunneqarsinnaavoq; tassaniitilluni sunniisinnaajunnaavissaaq. – Saqqummersitat 20:7.
Guutip kunngeqarfiata ukiuni tuusintini naalakkersuinerata aallartinnera. Guutip kunngeqarfia, inunnut pilluaqqussutisiarpassualik, ukiuni tuusintini naalakkersuissaaq. (Saqqummersitat 5:9, 10; 20:4, 6) “Inupparpassuit” kisinneqarsinnaanngitsut ‘annikilliornartorsuarmit aniguissapput’, taavalu Kunngeqarfiup ukiuni 1.000-ni naalakkersuinera aallartissaaq. – Saqqummersitat 7:9, 14; Tussiaat 37:9-11.
a Biibilip atuagartaani Saqqummersitani ‘arnaq atortittartorsuaq’ Babylonnersuarmik atilik upperisarsiornermut eqqunngitsumut assersuutaavoq. (Saqqummersitat 17:1, 5) Uumasoq aappallarissoq Babylonnersuarmik suujunnaarsitsisoq kattuffimmut assersuutaavoq, kattuffillu taanna nunarsuarmi naalagaaffinnut sinniisuuvoq taakkuninngalu ataasiussuseqalersitsinissamik siunertaqarluni. Siullermik Folkeforbunditut maannakkullu FN-itut ilisimaneqarpoq.