Marlunngorneq, septembarip 30-at
Guuti aalajaappoq, artukkassinnillu usserneqarnissarsi akuerinavianngilaa, usserneqarnissinnili pinertusaarsinnaaqqullusi ikiussavaasi. – Kor 1. 10:13.
Jehovamut tunniulluinnarnermik neriorsuutivit eqqarsaatiginera ussernartut suulluunniit nakkaannarfiginnginnissaannut nakussatsissutigissavat. Assersuutigalugu allap aapparisaa qaninniarujoorfigilernavianngilat. Jehovamummi neriorsuereersimavutit taamaaliorniarnak. Naleqqutinngitsumik misigissuseqarunnaarniarneq ilungersunarsinnaavoq. Taamaattumik misigissutsinik naleqqutinngitsunik ineriartortitsinngikkuit imminut artukkernavianngilatit. ‘Ajortut aqqutaat ingerlaviginavianngilat.’ (Uss 4:14, 15) Jiisusi ilaarlugu Guutip tunniulluinnarfigisimasavit iluarinngisaasa suulluunniit ingerlaannaq itigartittarnissaat aalajangiusimalluinnaruk. (Mat 4:10; Joh 8:29) Ussernartorsiorninni misilinneqarninnilu Jiisusip malittuarnissaa aalajangiusimalluinnarlugu ersersissinnaavat. Qularissanngilallu Jehovap ikiorumaaraatit. w24.03 9-10 § 8-10
Pingasunngorneq, oktobarip 1
Ilisimassuseq pavannga pisoq naalakkumasarpoq. – Jaak 3:17.
Naalannissat sapernartittarpiuk? Daavip sapernartippaa, taamaattumik Guuti qinnuigaa naalakkumassuseqarteqqulluni: “Anersaaqartinnga Guutimut naalasseriartumik!” (Tuss 51:14) Daavip Jehova asavaa, taamaattorli ilaannikkut naalannissani ajornakusoortittarpaa, soorlu aamma uagut taamaattartugut. Sooruna? Siullertut, ajortiliunerput pissutigalugu naalanngeqqajaasaratta. Aappaattut, Saatanip pikitsitsisinniarsariuartarmatigut. (Kor 2. 11:3) Pingajuattut, inuit pikitsitsiumatuut ‘maanna naalanngitsunut sunniuteqartumik isiginnittaaseqartut’ avatangiisigalugit inuugatta. (Ef 2:2) Naammalluinnanngissuserput kisiat akiornagu aamma Diaavulup sunniiniarnera taassumalu silarsuaata naalannginnissamut tatisineri akiortuartariaqarpagut. Jehovap taassumalu oqartussaassusiligaanut naalannissarput ilungersuutigisariaqarparput. w23.10 6 § 1
Sisamanngorneq, oktobarip 2
Illit viinni pitsaaneq aatsaat massakkut sassaalliutigaat. – Joh 2:10.
Jiisusip tupinnartuliornikkut imermik viinninngortitsinera qanoq ilinniarfigisinnaavarput? Maniguunneq pillugu ilikkagaqarpugut. Jiisusi tupinnartuliani naammassisaniluunniit allat pillugit oqarataanngisaannarpoq. Maniguullunili Ataatani ataqqinarsisittuaannarpaa. (Joh 5:19, 30; 8:28) Jiisusi ilaarlugu maniguukkutta naammassisagut pillugit oqarataartassanngilagut. Uagut pilluta oqarataarnaveersaarluta Guutimulli assissaqanngitsumut kiffartornerput tulluusimaarutigisigu. (Jer 9:22, 23) Taanna kisiat ataqqinarsisissavarput. Jehovamimmi ikiorneqanngikkutta suna naammassisinnaassagatsigu? (Kor 1. 1:26-31) Maniguukkutta ajunngitsuliagut allanut maluginiaqqunavianngilagut. Jehovap maluginiarlugillu pingaartimmagit naammagaarput. (Naleqqiuguk Matiusi 6:2-4; Hebr 13:16) Jiisusip maniguunnera taamatut ilaaraangatsigu Jehova nuannaartittarparput. – Pet 1. 5:6. w23.04 4 § 9, 11; 5 § 12