Arfininngorneq, oktobarip 18-iat
“Qinujuarussi tunineqassaasi, ujarlertuarussi nanisissaasi kasuttortuarussilu ammaanneqassallusi.” – Luk 11:9.
Naammagittarnerulerusuppit? Taamaappat qinnutigiuk. Naammagittartuuneq anersaap inerititaanut ilaavoq. (Gal 5:22, 23) Taamaattumik Jehova anersaamik illernartumik qinnuigisinnaavarput anersaap inerititaata taassuma ineriartortinnissaanut ikioqqulluta. Naammagittassuserput misilinneqarpat anersaaq illernartoq qinnutigiuassavarput naammagittarsinnaanissatsinnut ikioqqulluta. (Luk 11:13) Aamma Jehovamut ikioqqusinnaavugut taassuma isiginnittaasiatut isiginnittaaseqaqqulluta. Taava qinnutigereersimagutsigu ullut tamaasa sapinngisamik naammagittartuuniartariaqarpugut. Naammagittartuunissarput qinnutigiuarutsigu anguniartuarlugulu uummatsitsinni sorlanitsikkiartuaassavarput inuttullu ilisarnaatigilerlugu. Aamma Biibilimi maligassaalluartut eqqarsaatigeqqissaarnissaat iluaqutigisinnaavarput. Inunnik naammagittartunik Biibilimi assersuutissarpassuaqarpoq. Maligassaalluartut taakkua eqqarsaatigeqqissaarnerisigut qanoq naammagittarsinnaanerluta ilinniarsinnaavarput. w23.08 22-23 § 10-11
Sapaat, oktobarip 19-iat
“Itisuumut avalagit qassutitillu ningillugit.” – Luk 5:4.
Jiisusip Petrusi qularunnaarsippaa Jehovap pisariaqartitaanik isumagiumaaraa. Jiisusip makititaasimasup tupinnartuliornermigut Petrusi apustileqataalu aalisakkanik pisaqartippai. (Joh 21:4-6) Qularnanngitsumik tupinnartuliaq tamanna pissutigalugu Petrusi qularunnaarpoq ajornaquteqanngitsumik pisariaqartitaminik Jehovamit isumagineqarsinnaalluni. Immaqa Petrusip Jiisusip oqaasii eqqaavai Guutip kunngeqarfianik salliutitsiuartut isumagiumaarai. (Mat 6:33) Taamaattumik Petrusip oqaluussineq aalisartuunerminngarnit pingaarnerutilerpaa. Ukiumi 33-mi ullormi piinsimi Petrusi sapiilluni oqaluussimmat inuit tuusintillit uppertunngorput. (ApS 2:14, 37-41) Tamatuma kingorna Samaariamiut juutiunngitsullu Jiisusimik upperinnilernissaannik ikiorpai. (ApS 8:14-17; 10:44-48) Taamaalilluni Jehovap Petrusi aqqutigalugu inuppassuit assigiinngitsunik tunuliaqutallit ilagiinnut ilanngutitippai. w23.09 20 § 1; 23 § 11
Ataasinngorneq, oktobarip 20-at
Sinnattukkama isumaanik nassuiaaffiginngikkussinga aamma sumik sinnattorsimaninnik oqaluttuutinngikkussinga suujunnaarsitaassaasi. – Dan 2:5.
Jerusalemmip Babylonnimiunit aserorneqarnerata kingorna ukiut marluk missaat qaangiuttut Babylonnimiut kunngiat Nebukadnesari eqqissiveerutigisaminik inuusaliarujussuarmik sinnattorpoq. Kunngi qanoq sinnattorsimanerminik qanorlu isumaqarneranik nassuiaanneqanngikkuni ilisimasut, Daaniali ilanngullugu, toqunniarlugit siorasaarivoq. (Dan 2:3-5) Daaniali iliuuseqapallanngippat inuppassuit toqutaassapput. Taava Daanialip “kunngi iserfigalugu qinnuigaa aalajangersimasumik piffissaqarteqqulluni sinnattugaanik oqaluttuullugulu nassuiaanissaminut”. (Dan 2:16) Daaniali taamaaliorami sapiissuseqarnini uppersuseqarninilu ersersippai. Biibilimi allassimasoqanngilaq siornatigut Daanialip sinnattunik nassuiaassisimaneranik. Ikinngutini ‘peqquai qilaap Guutia qinnuigeqqullugu naakkinnilluni isertugaq saqqummiuteqqullugu’. (Dan 2:18) Jehovap qinnutaat akivai. Guutip ikiuineratigut Nebukadnesarip sinnattuanik Daanialip nassuiaappaa. Daanialip ikinngutaasalu inuunertik annaappaat. w23.08 2 § 4