Tallimanngorneq, septembarip 26-at
Ullaaralaakkut [Jiisusi] inoqanngitsumukarpoq, tassanilu qinulerpoq. – Mak 1:35.
Jiisusip nammineq Jehovamut qinunermigut ilinniartitani maligassippai. Nunarsuarmiinnermini Jiisusi akulikitsumik qinusarpoq. Ulapittarami inuppassuarnillu ilagineqartarami qinusarnissaminut piffissaqarniartarpoq. (Mak 6:31, 45, 46) Makiaartarpoq qinunissaminut piffissaqarniassagami. Ilaanni pingaarutilimmik aalajangiinnginnermini unnuaq naallugu qinuvoq. (Luk 6:12, 13) Aamma nunarsuarmi suliassami ajornakusoornerpaartaa naammassiniassagamiuk toqussi aqaguttoq unnuakkut qinusaqattaarpoq. (Mat 26:39, 42, 44) Jiisusip maligassiaanit ilinniarparput ulapikkaluaruttaluunniit qinusarnissamut piffissaqartariaqartugut. Jiisusi ilaarlugu ullaaralaannguakkut unnukkulluunniit qinusarnissamut piffissaqarniarsinnaavugut. Taamaalioraangatta Jehovamut ersersittarparput qinusinnaanermik tunissut immikkut ittoq qujamasuutigalugu. w23.05 3 § 4-5
Arfininngorneq, septembarip 27-at
Guutip anersaaq illernartoq uagutsinnut tunniussani atorlugu asanninnini uummatitsinnut kuivaa. – Rom 5:5.
Allassimaffimmi oqaaseq atorneqartoq “kuivaa” maluginiaruk. Qinerlerfissiat ilaanni kuussuartut uagutsinnut supisutut allaatigineqarpoq. Tamatumani Jehovap tanitanut asanningaarnera ersersinneqarluarpoq. Tanitat nalunngilaat ‘Guutimit asaneqarlutik’. (Juud 1) Tanitat qanoq misiginerat apustilip Johannesip ima allaatigaa: “Ataatap asangaarmatigut Guutip qitornaanik taaneqarsinnaavugut!” (Joh 1. 3:1) Jehovap tanitat kisiisa asavai? Naamik, Jehovap uppernarsarsimavaa tamatta asalluta. Jehovap ilinnut asanninneranik uppernarsaat annerpaaq suua? Utertitsissut. Tassa asanninnermut tamanit ersiutaanerpaaq. – Joh 3:16; Rom 5:8. w24.01 28 § 9-10
Sapaat, septembarip 28-at
“Ilinnut torlulaguma akeqqakka uteriassapput. Ilisimavara: Guuti iligaara.” – Tuss 56:10.
Versimi tamatumani ersersinneqarpoq Daavip siooranermini suna iluaqutigisimaneraa. Inuunini navianartorsioraluartoq imminut pilluni Jehovap iliuuseriumaagai eqqarsaatigeqqissaarpai. Daavip nalunngilaa Jehovap piffissaq eqqorlugu annaakkumaaraani, Jehovami neriorsuivoq Daavi Israalimi kunnginngorumaartoq. (Sam 1. 16:1, 13) Daavip qularinngilaa Jehovap neriorsuutini eqquutitissagai. Jehovap ilinnut iliuuseriumaakkani suut neriorsuutigai? Naatsorsuutiginngilarput ajornartorsiutigut qanorluunniit ittut maanna pinngitsoortissagai. Qanorluunniilli misilinneqaraluarutta paratiisissami Jehovap ajornartorsiutit tamaasa atuukkunnaarsissavai. (Es 25:7-9) Pinngortitsisitta soorunami toqusimasut makitissinnaavai, ajorunnaarsissinnaavaatigut akerlilersuisullu tamaasa piuneerussinnaallugit. – Joh 1. 4:4. w24.01 6 § 12-13